Sociedá La UNESCO celebra’l Día Internacional del idioma Maternu apostando pol multillingüismu nel ciberespaciu by asturnet 21 de febreru, 2006 La UNESCO celebra esti martes 21 el Día Internacional del Idioma Maternu dedicáu en 2006 a la necesidá de favorecer el multillingüimu nel ciberespaciu y l’accesu de tolos idiomes a les nueves tecnoloxíes n’igualdá de condiciones. Na so declaración con motivu d’esta celebración la organización mundial denuncia que son menos del 1% les llingües utilizes n’Internet. Otra de les recordances que fai la UNESCO ye que de les 6.000 llingües falaes anguaño nel mundu más de la mitá cuerren seriu peligru de desapaición en poques xeneraciones. Les nueves tecnoloxíes y la so universalización pueden suponer una aceleración nel procesu de perda de les llingües minorizaes, sicasí tamién pueden ser les sos verdaderes tables de salvación si se ponen los medios afayaízos, según barrunta la UNESCO na so declaración institucional referida al multillingüismu nel ciberespaciu con motivu del Día Internacional del Idioma Maternu 2006 . Son los gobiernos, afirma la organización mundial, los encargaos de favorecer esos mecanismos d’algame pa toles llingües y tamién les grandes corporaciones informátiques. 21 de febreru, 2006 0 FacebookTwitterPinterestEmail
Sociedá Valledor comparte’l pesimismu de ‘Churruca’ énte l’Estatutu y avisa al PSOE de que nun puede “cambiar de pareya” by asturnet 21 de febreru, 2006 El conseyeru de Xusticia y Esteriores Francisco Javier García Valledor comparte la visión pesimista del so compañeru de formación el cabezaleru xixonés Jesús Montes Estrada ‘Churruca’ respective a la imposibilidá d’algamar la inclusión de la oficialidá nel prósimu Estatutu ensin cuntar col sofitu del PSOE. Pa Valledor esto “ye la constatación d’un fechu” y avisó a los socialistes de que “nun pueden cambiar de pareya pa tar col PP” nel asuntu del asturiano. El conseyeru d’Izquierda Xunida nel gobiernu del Principáu coincide col so compañeru ‘Churruca’ en que la cuantía numérica de los diputaos de la coalición na Xunta Xeneral condiciona la so fuerza política a la hora de negociar colos sos socios mayoritarios del PSOE y reconoció en declaraciones al diariu El Comercio qu’esa situación namás podía cambiar si “IX-Bloque medra en representación” nunes prósimes elecciones. García Valledor espresó la so rocea a que nun se cumplan los plazos previstos por socialistes y Izquierda Xunida-Bloque por Asturies pa tener afechada la reforma l’Estatutu y manifestó’l so mieu a qu’ensin la concurrencia del tercer partíu na Xunta Xeneral, el PP, pueda haber un nuevu estatutu na presente lexislatura. 21 de febreru, 2006 0 FacebookTwitterPinterestEmail
Sociedá Villa retruca al BNG pol repartu de los fondos mineros by asturnet 20 de febreru, 2006 El secretariu xeneral del SOMA-FIA-UXT, José Ángel Fernández Villa, aprovechó esti domingu 19 el tradicional actu nel cementeriu de Mieres en recordanza de Manuel Llaneza, pa retrucar al Bloque Nacionalista Galego (BNG) na polémica polos fondos mineros. Villa remembró que Galicia ye rexón hullera gracies a una fuelga de los mineros asturianos en 1989. El cabezaleru del SOMA dixo nel actu d’homenaxe al fundador del sindicatu que “Asturies nun recibe nada que nun-y correspuenda” y que “nun somos nin pidiones nin lladrones”, en referencia a les declaraciones del diputáu del BNG Francisco Rodríguez que acusó a la nuestra comunidá de atropar la mayor parte de los fondos mineros de la Uniòn Europea en detrimentu de comunidaes como la gallega. El líder sindical calificó de “calumnies” les palabres de los nacionalistes gallegos y pidió-y al gobiernu del Principáu una respuesta institucional. 20 de febreru, 2006 0 FacebookTwitterPinterestEmail
Sociedá El líder xixonés d’IX Montes Estrada diz que nun se puede pidir a la coalición “quemase a lo bonzo” pola oficialidá by asturnet 20 de febreru, 2006 El responsable políticu d’Izquierda Xunida en Xixón y vicealcalde d’esi conceyu, Jesús Montes Estrada ‘Churruca’, afirmó que nel asuntu de la oficialidá: “nun se nos pueden pidir xuegos malabares nin que nos quememos a lo bonzo”. El líder local de la coalición reconoció les dificultaes énte la negociación col PSOE del nuevu estatutu y tocante a la inclusión del asturiano oficial señaló que “sabemos perfectamente que van dicinos non”. En declaraciones al diariu El Comercio ‘Churruca’ enarboló la representación numérica d’Izquierda Xunida-Bloque por Asturies nel parlamentu autonómicu pa enfocar con realismu la prósima negociación de la reforma estatutaria: “con cuatro diputaos nun se nos pueden pidir xuegos malabares”, dixo. Respective a la verdadera responsabilídá de nun incluir la cooficialidá del asturiano nel nuevu testu manifestó que “nun se trata de que n’IX-Bloque por Asturies nos quememos a lo bonzo sinón de que la mayoría de los asturianos sepan que son les dos fuerces mayoritaries les que s’oponen”. 20 de febreru, 2006 0 FacebookTwitterPinterestEmail
Sociedá El Congresu debate una proposición pa oficializar l’árabe y el bereber en Ceuta y Melilla by asturnet 20 de febreru, 2006 La comisión de Cultura del Congresu de los Diputaos debate esti llunes 20 una proposición non de llei na que s’encamienta la cooficialidá del árabe en Ceuta y del tamazigh en Melilla xunta col castellano. La propuesta avalada polos grupos PNV, ERC y Mistu tien el refugue de les dos formaciones mayoritaries, PSOE y PP. Na iniciativa encamiéntase al Ministeriu d’Educación a que revise los diseños curriculares pa que, de manera progresiva y a partir del prósimu cursu, el tamazigh -llingua bereber que falen alrodiu venti millones de persones nel norte d’Äfrica- se introduza como idioma vehicular na enseñanza en Melilla y se faga lo mesmo col árabe en Ceuta. La proposición namás cuenta col sofitu del Partido Nacionalista Vasco, Esquerra Republicana de Catalunya y el Grupu Mistu. El Partido Popular opónse a la posibilidá d’abrir la puerta a la cooficialidá del árabe y el tamazight en Ceuta y Melilla al consideralo “estemporáneo” y por voz del so diputáu Antonio Gutiérrez afirma que nes ciudaes norteafricanes “ya se potencia la cultura bereber”. Na mesma llínea, el Partido Socialista de Melilla-PSOE acusó de “intromisión” a los grupos nacionalistes firmantes de la proposición non de llei y afirma qu’esta iniciativa ta redactada “dende’l más profundu desconocimientu de la realidá social de les ciudaes”. Nel otru llau de les postures de PSOE y PP, asitióse’l principal partíu de la oposición en Melilla, CpM (Coalición por Melilla), de base mayoritariamente musulmana, que defendió la protección, promoción y divulgación del tamazight como pasu previu a la cooficialidá col castellano de la llingua propia de los melillesos d’orixen bereber. El presidente del partíu musulmán, Mustafa Aberchán, señaló que l’oxetivu últimu del so partíu “ye llograr en Melilla una cooficialidá del tamazight col castellano como la qu’esiste n’otres comunidaes con llingua propia”. 20 de febreru, 2006 0 FacebookTwitterPinterestEmail
Sociedá L’Asociación Asturiana d’Amigos del Pueblu Saharaui recauda fondos poles inundaciones de Tinduf by asturnet 19 de febreru, 2006 L’Asociación Asturiana d’Amigos del Pueblu Saharaui entama una campaña de recoyida de fondos y alimentos con destín a los refuxaos de los campamentos de Tinduf, arrasaos va unos díes por mor de les lluvies tropicales y les inundaciones que provocaron. Una caravana con cincuenta tonelaes d’alimentos básicos va salir dende Asturies a finales d’abril con destín a los campamentos saharauis. Enantes d’entamar los preparativos pa la caravana solidaria la organización non gubernamental ta entamando una campaña de recoyida de fondos pa unviar a la Media Luna Roja Saharaui. La xente que quiera colaborar con esti unvíu de perres puede facelo ingresando la so aportación enantes del 10 de marzu na siguiente cuenta, de la que ye titular l’Asociación Asturiana De Amigos del Pueblo Saharaui : 2048 0000 24 0340086603 , poniendo nel conceptu Ayuda Inundaciones. 19 de febreru, 2006 0 FacebookTwitterPinterestEmail
Sociedá L.lena coloca cartelos de doce llugares cola toponimia arreglada by asturnet 17 de febreru, 2006 L’Ayuntamientu de L.lena va empezar a instalar esti viernes 17 los nuevos cartelos de doce llugares del conceyu cola denominación tradicional. La colocación d’estes señales viaries constitúi la segunda fase de la campaña de recuperación de la toponimia local. Les señalizaciones van llantase nos barrios de la capital del conceyu y nos pueblos d’Arnón, Xomezana Riba, Xomezana Baxo y San Bras. Los nuevos indicadores formen parte d’un programa del Serviciu de Normalización Llingüística de L.lena para recuperar los nomes tradicionales locales. Nesta segunda fase van colocase un total de 12 cartelos que van empezar instalase esti viernes 17 nos barrios de La Pola: La Caleya, L.lencia, La Fuente l´Ablanu, La Crespa, Robleo, El Masgaín, El Molín de la Sala y Santa Cristina. La instalación va siguir nos prósimos díes. El coste de los nuevos cartelos y la so instalación asciende a 2.400 euros nuna iniciativa subvencionada pola Conseyería de Cultura al través del Plan pa la Normalización Social nel ámbitu municipal. 17 de febreru, 2006 0 FacebookTwitterPinterestEmail
Sociedá La Federación de Conceyos va colaborar cola Rede de Normalización Municipal by asturnet 17 de febreru, 2006 La Federación Asturiana de Conceyos (FAC) va crear un grupu de trabayu dedicáu a la normalización de la llingua asturiana dientro la so Comisión de Cultura. L’entamu d’esti grupu de trabayu ye’l primer pasu que da l’organismu supramunicipal pa colaborar cola Rede de Normalización en materia de política llingüística. La FAC quier ufiertar el so espaciu pa coordinar actividaes y polítiques en relación a la promoción social del asturiano aprovechando la so infraestructura supramunicipal y na que tan representaos los setenta y ocho conceyos d’Asturies. Esta iniciativa salió de la propia Rede de Normalización nel so enfotu por avanzar nel desenvolvimientu del so llabor nos conceyos asturianos. 17 de febreru, 2006 0 FacebookTwitterPinterestEmail
Sociedá La Xunta recalca les contradicciones de la FSA respective al PSOE estatal by asturnet 16 de febreru, 2006 La Xunta pola Defensa de la Llingua Asturiana recalca nun comunicáu les contradiciones qu’empobinen la posición política sobre l’idioma asturianu de la FSA y les recientes declaraciones de destacaos dirixentes socialistes. La organización polos derechos llingüísticos cita palabres pronunciaes pol diputáu del PSOE Ramón Jáuregui nel Congresu pa poner n’entedicho a los sos compañeros n’Asturies. La Xunta alude a la intervención de Jáuregui el pasáu 7 de febreru nel parlamentu de madrid nel comunicáu y a propósitu de les sos declaraciones formula una serie de preguntes retóriques sobre la posición contradictoria que representa la oposición de los socialistes asturianos al billingüismu, la convivencia llingüística y la cooficialidá de les llingües falaes nel Principáu. Amás de la intervención de Ramón Jáuregui, la Xunta cita les palabres de la tamién diputada socialista Batet Lamaña pa poner n’evidencia a la FSA, una formación política que pa la organización cívico-llingüística “tien muncho quesplicar a los ciudadanos porque, si como diz el señor Jáuregui, los derechos nun los tienen les llingües sinon los ciudadanos, nAsturies nesti momentu hai munchos miles de ciudadanos de segunda a los que nun se nos reconocen los nuesos derechos constitucionales”. 16 de febreru, 2006 0 FacebookTwitterPinterestEmail
Sociedá El CAO califica d’ignorancia premeditada la esclusión del asturiano por García de la Concha by asturnet 15 de febreru, 2006 El Conceyu Abiertu pola Oficialidá (CAO) considera inadmisible la esclusión del asturiano ente les llingües del estáu citaes pol director de la Real Academia Española, Víctor García de la Concha, como “patrimoniu común de tolos españoles”. La plataforma cívica calificó estes palabres del caderalgu asturianu de la Universidá de Salamanca de “ignorancia premeditada”. El CAO asitió les declaraciones de García de la Concha ente los diversos posicionamientos respective a la llingua asturiana fechos públicos nos últimos tiempos y por fala del so portavoz, Fernando Ornosa, afirmó que’l cabezaleru de l’Academia Española de la Lengua “tien la obligación de respetar y nun facer de menos a la llingua asturiana, cuando se refier a que’l patrimoniu cultural común de los pueblos del estáu lu formen namás cuatro llingües”. Víctor García de la Concha pronunciò va unos díes un discursu en Salamanca, nel cursu d’un homenaxe que-y dedicaba la universidá helmántica, nel que defendía “les cuatro llingües d’España como patrimoniu cultural común de tolos españoles” y apostaba pol “billingüismu real énte la diglosia”. El portavoz del COnceyu Abiertu considera que “precisamente esa ye la situación del asturiano, que ta n’inferioridá de condiciones respective al castellano y ensin reconocencia oficial”. Ornosa quiso contestualizar la posición de García de la Concha ente les posiciones públiques “tanto nel planu políticu como nel institucional o académicu” que se vienen conociendo nes últimes selmanes respective a la llingua asturiana y consideró especialmente “grave que sea un asturianu el que fai de menos al idioma propiu d’Asturies”. El representante del CAO invító a De la Concha a afueyar l’Atlas Llingüísticu d’Asturies que vien editando’l Muséu Etnográficu de Xixón “pa que pueda opinar con conocimientu de causa y non dende la ignorancia premeditada tocante a la realidá llingüística asturiana”. 15 de febreru, 2006 0 FacebookTwitterPinterestEmail