Sociedá Llamazares pídi-y liderazu a la FSA na reforma l’Estatutu by asturnet 6 de marzu, 2006 El coordinador xeneral d’Izquierda Unida Gaspar Llamazares pidió-y ayer en Xixón a la FSA “liderazu” pa enfrontar la reforma estatutaria n’Asturies y defendió que la nuestra comunidá encarrile’l procesu de reorganización territorial del estáu “como cabeza de tren y non como vagón de cola”. Llamazares pidió un nuevu estatutu asturianu basáu na identidá diferencial, l’autogobiernu y enmarcáu nun contestu de solidaridá ente les comunidaes. El cabezaleru estatal d’IU aprovechó la so intervención nel homenaxe a Horacio Fernández Inguanzo celebráu esti domingu 5 en Xixón pa retrucar a la Federación Socialista Asturiana (FSA), qu’un día enantes afirmara per voz de la so executiva respective a la reforma l’estatutu d’Asturies que “nun ye dalgo absolutamente prioritario”. El coordinador xeneral de la coalición d’izquierdes pidió-yos a los socialistes asturianos capacidá de liderazu pa encarrilar l’autogobiernu d’Asturies y tuvo dures palabres pal Partido Popular (PP) pòla so posición roceana na nuestra comunidá y a nivel del estáu énte’l nuevu mapa autonómicu, nel que dixo “Asturies tien que tar en cabeza”. Gaspar Llamazares intervieno nel actu d’alcordanza de El Paisano que remembraba’l décimu cabudañu del hestóricu comunista asturianu. Nel homenaxe, entamáu nel Teatru Xovellanos, intervinieron tamién los dirixentes d’Izquierda Xunida Noemì Martín y Manuel García Fonseca. La cantadora Mari Luz Cristobal Caunedo y los escritores Ana Vanessa Gutiérrez y Xuan Bello roblaron coles sos actuaciones l’actu de recordanza a Horacio, una figura de la que Gaspar Llamazares reivindicó “el so compromisu democráticu, republicanu y honestu” como valores propios de la izquierda asturiana actual. 6 de marzu, 2006 0 FacebookTwitterPinterestEmail
Sociedá Areces, Juan Vázquez y Ana Cano sofiten un homenaxe a El Paisano by asturnet 4 de marzu, 2006 El Teatru Xovellanos de Xixón acueye esti domingu 5 al meudía un actu d’homenaxe a la figura del hestóricu comunista asturianu Horacio Fernández Inguanzo ‘El Paisano’. La voz de Mari Luz Cristóbal Caunedo y los versos de los poetes Ana Vanessa Gutiérrez y Xuan Bello van ilustrar les intervenciones de Lorenzo Cordero, Manuel Fonseca ‘El Polesu’, Benigno Delmiro y Noemí Martín. Nel comité de sofitu al homenaxe figuren personalidaes públiques como’l presidente del Principáu, Vicente Álvarez Areces, la presidenta de l’Academia la Llingua, Ana Cano o el rector Juan Vázquez. Xunta ellos representantes de la vida política y cultural del nuestru país como’l cantante Víctor Manuel -autor d’una famosa canción a El Paisano-, l’alcadesa de Xixón, Paz Fernández Felgueroso o el conseyeru de Xusticia y Esteriores, Francisco Javier García Valledor, ente otros. 4 de marzu, 2006 0 FacebookTwitterPinterestEmail
Sociedá La Caravana pola Oficialidá arranca na cuenca del Nalón by asturnet 3 de marzu, 2006 La Caravana pola Oficialidá arrinca esti sábadu 4 dende la cuenca del Nalón con una concentración de coches énte la estación d’autobuses de La Felguera a les once de la mañana. Pela tarde a les 19,00 hores nel teatru municipal de San Martín del Rei Aureliu en L’Entregu va celebrase un festival coles actuaciones de Tuenda, Nuberu, Carlos Rubiera, la banda de gaites del conceyu agospiador y con un recital de poesía a cuenta de los miembros de la tertulia Malory. El conciertu ye lactu central de la Caravana pola Oficialidá, que va recorrer les poblaciones principales del vai del Nalón, dende Llangréu hasta La Pola Llaviana informando a los ciudadanos de la necesidá de que se reconoza l’asturianu oficial. A la caravana van poder sumase toles persones que quieran. Tanto la marcha de coches pel valle como lactu postreru nel Teatru de LEntregu tienen como oxetivos reclamar la inclusión de la oficialidá de la llingua asturiana nel Estatutu dAutonomía y facer que los ciudadanos garren conciencia de la necesidá de protexer y dignificar un patrimoniu de toos como ye lasturianu. La xornada del sábadu va ser la primera d’otres asemeyaes que se van desendolcar pelos conceyos dasturies y coles quel Conceyu Abiertu pola Oficialidá (CAO) quier sacar la reivindicación llingüística de les grandes ciudaes y acercala a los ciudadanos de les villes y pueblos. 3 de marzu, 2006 0 FacebookTwitterPinterestEmail
Sociedá Darréu adelantra’l Día de la Muyer Trabayadora by asturnet 3 de marzu, 2006 La organización moza Darréu adelantra la celebración del Día Internacional de la Muyer Trabayadora a esti sábadu 4 en Candás con un actu políticu y la estampación d’un mural urbanu alusivu al papelu de les muyeres na sociedá actual. L’actu ta convocáu pa les 12,30 del meudía. Darréu afirma nun comunicáu respective a la fecha del Día Internacional de la Muyer Trabayadora que “entendemos esta xornada como un día de reivindicación y homenax y non como un día de cellebración” ya que según manifiesten “la inxusta rialidá cola que millones de muyeres nel mundu savecen a vivir día tres día fai que dende coleutivos dizquierda como Darréu demos puxu a un día, el 8 marzu, que tien que treslladar la so reivindicación a tolos díes del añu”. 3 de marzu, 2006 0 FacebookTwitterPinterestEmail
Sociedá PAS y URAS aconceyen pa echar andar el proyectu d’Unión Asturianista by asturnet 3 de marzu, 2006 Les executives del Partíu Asturianista (PAS) y Unión Renovadora Asturiana (URAS) aconceyen esti fin de selmana n’Uviéu col fin d’echar andar el proyectu común d’Unión Asturianista. La elaboración d’una llinia estratéxica col oxetivu d’algamar representación institucional nes prósimes elecciones autonómiques y municipales ye l’enfotu que marca la reunión de los dos partíos asturianistes. L’aconceyamientu d’Uviéu habrá valir, según declararon fontes de les dos formaciones polítiques a diversos medios: “afinar dalgunes cuestiones programátiques que se van sustanciar nun manifiestu, aumentar la coordinación y el trabayu conxuntu y, finalmente, establecer un programa concretu d’actuaciones por llugares y sectores sociales”. Los presidentes de PAS y URAS, Xuan Xosé Sánchez Vicente y Sergio Marqués van encabezar les delegaciones de los dos partíos na primer reunión de les sos executives. 3 de marzu, 2006 0 FacebookTwitterPinterestEmail
Sociedá Gabino de Lorenzo enfréntase a la Fundación Príncipe pol allugamientu del muséu de Niemeyer by asturnet 2 de marzu, 2006 L’alcalde d’Uviéu Gabino de Lorenzo llanzó esti miércoles 1 dende diversos medios informativos ácides crítiques a los responsables de la Fundación Príncipe d’Asturies por mor de l’allugamientu del futuru muséu de la institución n’Avilés. El rexidor carbayón acusó a Graciano García y a los demás cabezaleros de la FPA de falta d’independencia y anunció una campaña de recoyida de firmes pa cambiar los planes del Principáu y ubicar el Muséu de los Premios na capital asturiana. De Lorenzo truñó contra’l gobiernu autonómicu al qu’acusó de refugar Uviéu por otros llugares de la comunidá pa asitiar instituciones como la del Procurador Xeneral, el Conseyu Consultivu o el propiu campus universitariu de Mieres. La ubicación del muséu diseñáu pol arquitectu brasileiru Niemeyer n’Avilés ye pal alcalde uvieín “la gota que colma’l vasu” y “una agresión a la ciudá”. En declaraciones a medios asturianos Gabino de Lorenzo afirmó que’l director de la Fundación Príncipe d’Asturies, el periodista Graciano García, prometiéra-y l’allugamientu del muséu n’Uviéu y contó que “mesmo m’enseñó unos planos onde s’asitiaba’l muséu na costera del Naranco”. El rexidor carbayón criticó duramente a García y a los responsables de la Fundación por “plegase a los dictaos políticos” del gobiernu de Vicente Álvarez Areces. A esti respective De Lorenzo dixo que los cabezaleros de la FPA “nun tán cumpliendo cola so obligación que nun ye otra que facer respetar la independencia de la fundación pa tomar les sos propies decisiones” y anunció xunto a la recoyida de firmes la intención de convocar una manifestación pol asitiamientu de la obra de Oscar Niemeyer n’Uviéu. 2 de marzu, 2006 0 FacebookTwitterPinterestEmail
Sociedá Escritores indíxenes de Chiapas defenden la traducción p’afitar la lliteratura nes sos llingües by asturnet 1 de marzu, 2006 Escritores y traductores nos idiomes indíxenes de los estaos mexicanos de Chiapas y Oaxaca defenden la versión a estes llingües de toa clase de testos creativos como manera d’afitar una llingua lliteraria. La reflexón fízose esti domingu 26 nel cursu de la Feria Internacional del Libro del Palacio de Minería (FILPM) na república azteca onde se presentaron fragmentos d’obres d’autores como Jaime Sabines o Pablo Neruda vertíos idiomes indíxenes. La traducción a les llingües propies americanes tien que dexar de ser refugada, afirmó el responsable del Centro Estatal de Lenguas, Cultura y Arte Indígena del Coneculta de Chiapas, Enrique Pérez López, ya que “trátase”, dixo “d’una actividá prioritaria que garantiza el derechu que toos tenemos a conocer la riqueza cultural del mundu, un derechu pol que los indíxenes inda tienen que lluchar”, afirmó. Entrevistáu nel marcu de les xornaes chiapaneques de la XXVII Feria Internacional del Libro del Palacio de Minería, Pérez López faló de la evolución qu’esperimentaron nos últimos años les lletres indíxenes: “Llevamos 20 años promoviendo la escritura en llingües indíxenes, y ya tamos nel procesu de creación lliteraria, y atrevémosnos agora a facer traducción de testos a les llingües indíxenes”. Estes iniciatives son, al entender del responsable del organismu cultural: “pasos que van consolidando esti movimientu lliterariu en Chiapas, comentó. El funcionariu chiapanecu, que participó na llectura del poema Tarumba, de Jaime Sabines, en llingua chol, tzeltal y tzotzil, recordó qu’esi proceso llevólo a traducir clásicos de la lliteratura universal, como Pablo Neruda, Nobel de Literatura 1971, o Juan Bañuelos, pero namás fragmentos, pos, “desafortunadamente”, dixo, “nun hai apoyos bastantes pa esti llabor”. Nesi sen, Pérez agregó, que “la traducción de Tarumba al chol, tzeltal y tzotzil ye de dalguna manera una forma de romper esos esquemes y enfrentase al conocimientu de la llingua y la cultura na que son concebíes les obres de los autores indíxenes”. La Feria Internacional del Libro del Palacio de Minería, organizada pola Universidad Nacional Autónoma de México (UNAM) celebra esti añu la so edición númberu ventisiete dedicada al estáu de Chiapas. Un atrevimientu 1 de marzu, 2006 0 FacebookTwitterPinterestEmail
Sociedá El Principáu va sufragar les operaciones de cambiu de sexu by asturnet 1 de marzu, 2006 L’administración autonómica va asumir dende finales d’esti añu les operaciones de cambiu de sexu pa les persones transexuales, según anunció esti martes 28 de febreru, el responsable de servicios sanitarios del Principáu. El sistema públicu de salú d’Asturies va sufragar los gastos de les intervenciones quirúrxiques que habrán facese fuera de la nuestra comunidá pola escasa demanda d’elles. Les poques solicitúes de transexuales pa sometese a operaciones de cambiu de sexu nun ye bastante pa crear una unidá quirúrxica propia inda sí pa que l’Administración asturiana asuma el coste de les intervenciones, manifestó’l responsable de los servicios sanitarios. L’anunciu de la puesta en marcha d’esta vía d’atención a les persones transexuales recibe’l contentu de les Xuventúes Socialistes d’Asturies, que por voz del so secretariu xeneral, Pelayo Prendes felicitó al gobiernu del Principáu por esta midida. Según Prendes: tolos ciudadanos y ciudadanes de la rexón que creen na igualdá d’ oportunidades y nel respetu a la dignidá de la persona tán de norabona, pos con esta midida acábase con un campu de discriminación y marxinación y acábase tamién con un motivu de sufrimientu pa munches persones. 1 de marzu, 2006 0 FacebookTwitterPinterestEmail
Sociedá Les subvenciones del Institutu de la Mocedá reciben les crítiques de MIAS by asturnet 1 de marzu, 2006 Les Mocedaes d’Izquierda Asturiana (MIAS) critiquen la convocatoria de subvenciones a asociaciones xuveniles del Institutu Asturianu de la Mocedá pa esti añu espublizada nel BOPA el pasáu 23 de febreru de 2006 y califiquen les bases poles que se rixen les ayudes de ” política censora ensin precedentes”. La convocatoria ya recibiera el malestar del Conseyu de la Mocedá del Principáu d’Asturies (CAMPA) poles atribuciones recoyíes nes bases a la dirección del Institutu de la Mocedá. El portavoz de MIAS, Carlos Suari sofitó les declaraciones del presidente del Conseyu de la , Paulino Feito nes qu’amosaba’l so desagradu pol conteníu de les normes pa distriuir subvenciones a asociaciones. Suari afirmó que nelles “apaez la mano censora de la Direutora del IAM, qu’algama, práuticamente, derechu de vetu, interpretación y resolución de les bases sobre los proyeutos que les asociaciones presenten, abellugándose falsamente siempre baxo criterios téunicos”. La organización moza d’Izquierda Asturiana espresó el so “plasmu” al ver como na convocatoria, les asociaciones o entidaes de mocedá que seyan beneficiaes nún importe igual o superior al 20% del coste total del proyeutu o actividá autoricen al ente de la RTPA a la comunicación pública de les mesmes actividaes. Pal portavoz de MIAS esti fechu “constitúi una intromisión forciada, obligada ya inadmisible na privacidá y na propia imaxe de les actividaes desendolcaes poles asociaciones”. A propósitu de la radiotelevisión autonómica, Suari aprovechó pa desixir “información sobro l’espaciu que va ocupar l’asociacionismu mozu asturianu nel nuevu ente radiotelevisivu”, esperando que, nesti casu, el responsable de la canal asturiana, Pérez Ornia, tenga “más decencia y nun abocane como cuando se-y entruga pola nula presencia de la llingua asturiana na televisión de toles ciudadanes y ciudadanos d’Asturies”. Per último, Suari, perafitó la desixencia que dende les asociaciones d’Asturies se fai a que “esta convocatoria seya iguada y rectificada” en BOPA y nun se pongan entá más torgues a l’actividá del asociacionismu mozu si lo que verdaderamente se quier ye fomentalu, promovelu y espardelu. Pa finar, Carlos Suari, espetó que “si los pilancos, el control políticu y les dificultaes alministratives son los finxos de los planes de mocedá d’esti gobiernu de la izquierda plural nun vamos quedar callaos”. 1 de marzu, 2006 0 FacebookTwitterPinterestEmail
Sociedá Preséntase n’Uviéu el seminariu sobre llingua, clase y sociedá by asturnet 1 de marzu, 2006 Les xornaes “Llingua, clase y sociedá” qu’organiza’l Seminariu d’Historia Contemporánea de la Universidá d’Uviéu preséntense esti miércoles 1 nel Club Prensa Asturiana cola presencia de los coordinadores del congresu, Rubén Vega y Xulio Viejo. El seminariu va celebrase del 27 al 30 de marzu na Facultá de Xeografía y Hestoria con participación d’especialistes provenientes de diverses universidaes. Les xornaes van centrase en debatir les relaciones hestóriques y de calter sociollingüísticu ente’l movimientu obreru y la izquierda asturiana respective a la realidá cultural propia del país. El tratamientu dau pol pensamientu marxista a la diversidá nacional y llingüística, los movimientos del poder nel estáu español tocante al centru y la periferia o el bagaxe ideolóxicu del asturianismu son otros de los asuntos que van tratase nes xornaes, xunto a la visión de realidaes nacionales prósimes como les de Galicia o el País Vascu. La cuota dinscripción pal seminariu ye de 30 euros y ha facese una tresferencia nel númberu de cuenta 2048 0077 5 2 034003587 de caxAstur, Teatinos-Uviéu, faciendo constar la referencia Seminariu Llingua, clase y sociedá. Ha unviasel resguardu bancariu dingresu a la Secretaría del Seminariu antes del 24 de marzu del 2006, axuntando col boletín dinscripción, la fotocopial DNI. Les señes de la Secretaría del Seminariu Llingua, clase y sociedá son : Seminariu dHistoria Contemporánea, Facultá dHistoria y Xeografía , Universidá dUviéu, c/Teniente Alfonso Martínez, s/n, 33011 Uviéu. 1 de marzu, 2006 0 FacebookTwitterPinterestEmail