Sociedá La propuesta de Procurador Xeneral enfrenta a PSOE con Izquierda Xunida-Bloque by asturnet 9 d'abril, 2006 El cabezaleru de la FSA y diputáu autonómicu del PSOE Fernando Lastra retrucó en diversos medios al conseyeru de Xusticia y Esteriores Francisco Javier García Valledor poles declaraciones feches por ésti en díes pasaos a cuentu de la propuesta de Maria Antonia Felgueroso como candidata a Procuradora Xeneral del Principáu y nes qu’acusaba a los socialistes de querer más pactar cola oposición del PP que colos sos socios de gobiernu. El dirixente socialista encamentó-y al conseyeru d’IX-BA “manifestase menos públicamente pa nun tener de retificar después” y aseguró que la candidatura de Felgueroso “yera namás la propuesta del PSOE”, negando habela pactao enantes col Partido Popular. Valledor advirtiera a los socialistes de les consecuencies que podía tener nes relaciones ente les dos fuerces presentes nel executivu asturianu una propuesta de candidatura pa Procurador Xeneral fecha a espaldes de la coalición d’izquierdes. El conseyeru de Xusticia y Esteriores tamién espresara públicamente’l so temor de que’l PSOE siguiere una llinia d’actuación asemeyada nel procesu de reforma estatutaria. 9 d'abril, 2006 0 FacebookTwitterPinterestEmail
Sociedá El teatru Filarmónica clamó pola oficialidá by asturnet 8 d'abril, 2006 El pasáu vienres día 7 dabril el teatru Filarmónica dUviéu enllenóse de xente que, siguiendo la convocatoria del Conceyu Abiertu pola Oficialidá, clamaron pola necesidá de que lestatutu asturianu recueya la oficialidá pa la llingua asturiana na so prósima reforma. Representantes de los más de 150 colectivos que formen parte desta organización cívica xubieron al escenariu pa desixir el reconocimientu de los derechos llingüísticos de los falantes dasturianu, llevando a los tribunales, si ficiere falta, cualquier casu de marxinación nesi sen. Debaxo duna gran pancarta na que se pidía Na reforma del Estatutu, lasturianu llingua oficial, los miembros del Conceyu Abiertu pola Oficialidá lleeron un manifiestu nel que sesixíal reconocimientu oficial del asturianu per parte del ordenamientu xurídicu, porque ésta ye la única ferramienta llegal que puede garantizar duna manera efectival respetu hacia esti derechu que los asturianos lleven clamando más de trenta años. Ente les actuaciones dAnabel Santiago, Toli Morilla y Felpeyu, representantes de los más de 150 colectivos de maestros, músicos, escritores, grupos políticos, sociales y culturales que formen parte del CAO xubieron al escenariu del teatru Filarmónica, faciendo desta manera visible la demanda de gran parte de los asturianos que ven agraviaos los sos derechos llingüísticos per parte del Gobiernu asturianu, denunciando asi lactitú inxusta de les fuerces polítiques mayoritaries que de contino vienen negandol reconocimientu llegal de la llingua y de los sos falantes. El gaiteru Xuacu Amieva foi lencargáu de zarrar lactu colos sones del Asturies, patria querida, que foron siguíos por tola xente quel vienres de tarde enllenabal teatru Filarmónica dUviéu. Mentestanto los convocantes emplazaben a la sociedá asturiana a volver a salir a la cail prósimu 5 mayu, día nel que se cellebral tradicional Día de les Lletres Asturianes. 8 d'abril, 2006 0 FacebookTwitterPinterestEmail
Sociedá El CAO celebra’l vienres n’Uviéu l’actu central de la so campaña pola oficialidá by asturnet 5 d'abril, 2006 El Conceyu Abiertu pola Oficialidá (CAO) va celebrar l’actu central de la so campaña pola reconocencia oficial de la llingua asturiana nel nuevu estatutu d’autonomía con un festival nel Teatru Filarmónica d’Uviéu esti viernes 7 d’abril. Los cantantes Anabel Santiago y Toli Morilla, el gaiteru Xuacu Amieva y el grupu Felpeyu igüen el cartelu d’esta atopada en reivindicación de los derechos llingüísticos asturianos. L’actu tien previsto escomenzar a les 19,30 y amás de les actuaciones musicales van intervenir representantes del mundu de la cultura, la enseñanza y de les organizaciones que formen parte de la plataforma unitaria. Con esti alcuentru públicu va encarrilase la Caravana pola Oficialidá puesta en rodanza va unes selmanes y que percuerre diversos conceyos del país difundiendo ente los ciudadanos la necesidá d’incluir la oficialidá pa la nuestra llingua na prósima reforma del estatutu. 5 d'abril, 2006 0 FacebookTwitterPinterestEmail
Sociedá Les mocedaes socialistes de La Rioja entamen una campaña contra la catalanofobia by asturnet 5 d'abril, 2006 Les Mocedaes Socialistes de La Rioja entamen una campaña en favor del entendimientu ente les estremaes comunidaes del estáu al través de la referencia directa a la catalana, oxetu de diverses acciones de propaganda negativa d’abenayá. Alrodiu de cinco mil cartelos col lema “La Rioja quier a Cataluña” les xuventúes rioxanes del PSOE tenten retrucar a campañes como les desenvueltes por Nuevas Generaciones del PP en delles comunidaes. Amás de la llienda central escrita en tipografía de grandor curiosu unos puntos suspensivos sumen en lletra más pequeño el testu: “y a Andalucía, Aragón, Asturias…”, hasta completar les otres quince comunidaes restantes. Les Mocedaes Socialistes de la comunidá rioxana afirmen nesta campaña que “hai vida después de los estatutos” y que, arriendes d’ellos: La Rioja nun tá escontra nenguna comunidá y nenguna comunidá tá escontra La Rioja. Nos últimos meses les mocedaes del Partido Popular, especialmente les de delles comunidaes como Castiella-Lleón llanzaron campañes contra los nacionalismos del estáu nes que se distribiyeron cartelos con lliendes como “Los traidores del PSOE” (n’alusión al Estatut), “Hablamos con asesinos. No gracias” (sobre’l diálogu con ETA y la izquierda abertzale) o un cartelu que preguntaba en catalán: “¿Ho entens? (escontra’l plurillingüismu). 5 d'abril, 2006 0 FacebookTwitterPinterestEmail
Sociedá La Universidá de Buenos Aires entama un programa d’estudiu de llingües indíxenes by asturnet 5 d'abril, 2006 El Centru Universitariu de Idiomes (CUI) de la Universidá de Buenos Aires va ser l’encargáu de poner en marcha el Programa de Lenguas Originarias pal estudiu y la divulgación de les llingües indíxenes d’Arxentina. Al través d’un sistema de beques con prioridá pa estudiantes de minoríes étniques orixinaries la universidá bonairense tenta recuperar el legáu cultural de los pueblos asoballaos pola hexemonía del español. Según informa la web del propiu CUI la iniciativa busca que los alumnos accedan a un panorama completu del patrimoniu cultural arxentinun na so diversidá y nun marcu de igualdá llingüística y resignificación de les cultures orixinaries americanes. El programa ye, en palabres de Roberto Villaroel, responsable del Centru Universitariu d’Idiomes, una respuesta “a un fenómenu qu’esiste tanto nel país como n’América latina de rescate, interés y un deséu d’ integración ente les cultures orixinaries y la sociedá tradicional”. El director del CUI afirma que’l programa “más qu’un sitiu pa deprender va ser un sitiu d’alcuentru” y espresó el so contentu porque “la respuesta de la xente superó toles nuestres espectatives, dixo Villarroel, que cifró nun 20 por cientu el númberu d’alumnos matriculaos nel cursu d’orixen indíxena. 5 d'abril, 2006 0 FacebookTwitterPinterestEmail
Sociedá López Aguilar defende’l plurillingüismu como un derechu ciudadanu by asturnet 4 d'abril, 2006 El ministru de Xusticia del gobiernu español, Juan Fernando López Aguilar, defendió la valoración del conocimientu de los idiomes del estáu nel ámbitu xudicial como un procesu lexítimu en favor de la normalización social de toles llingües del estáu y refugó que se trate d’un requisitu de méritos talo afirmen dellos sectores conservadores de la xudicatura. López Aguilar fexo estes observaciones nel cursu de la so comparencencia énte la Comisión de Xusticia del Congresu y afirmó que l’espardimientu del plurillingüismu nel ámbitu xudicial respuende a un derechu de la ciudadanía consagráu na Constitución. El ministru recordó que nel artículu 120 del nuevu Estatutu de Cataluña la conocencia del idioma propiu d’esa comunidá conséñase como “una valoración singular y específica”, non como dalgo de cumplimientu obligáu p’acceder o exercer les funciones propies de l’Administración de Xusticia. El portavoz del Partido Popular na Comisión, Ignacio Astarloa, acusó a López Aguilar y al gobiernu socialista de tar fomentando la quiebra de la unidá xudicial del estáu y manifestó que l’usu de les llingües cooficiales había ser “un retu que teníaamos de saber solventar sin enfrentar los derechos de naide”, dixo nel so retruque al ministru. 4 d'abril, 2006 0 FacebookTwitterPinterestEmail
Sociedá Una asociación del Bierzo pide la proteción del gallego periféricu nel Navia-Eo by asturnet 4 d'abril, 2006 L’asociación cultural Fala Ceibe del Bierzo encamienta nuna carta remitida a la comisión parlamentaria qu’estudia en Galicia la reforma del Estatutu d’esa comunidá “un mayor compromisu políticu cola protección de la llingua gallega de los 4 territorios periféricos de: Navia-Eo, O Bierzo, As Portelas sanabresas y Val de Ellas cacereño”. Los galleguistes bercianos invoquen l’artículu 21.2 de la Lei Galega de Normalización Lingüística pa fitar la so pitición. Fala Ceibe considera que mesmo la redacción del artículu que fai referencia nesa llei de la comunidá gallega a los territorios d’otres comunidaes ye “escasu” y pide una reconocencia más esplícita nel nuevu Estatutu del “gallegu limítrofe”. L’artículu al qu’aluden los galleguistes del Bierzo fala de “protexer la llingua galega falada en territorios limítrofes cola Comunidade Autónoma”. L’asociación galleguista berciana pide na so carta que nel nuevu estatutu se diferencie el fomentu del nomáu “galego esterior” (referíu a les comunidaes gallegues espardíes pel mundu) del qu’apelliden de “galego estremeiro”, faláu, según Fala Ceibe, “nos ditos catro territorios periféricos”. 4 d'abril, 2006 0 FacebookTwitterPinterestEmail
Sociedá Los estatutos de l’Academia cumplen 25 años esti xueves by asturnet 4 d'abril, 2006 Depués de celebrar el so 25 aniversariu n’Avientu de 2005, l’Academia de la Llingua Asturiana cumple esti xueves, 6 d’abril, otru aniversariu, el de la publicación de los sos Estatutos qu’afiten ente otres coses la so obligación de velar polos drechos de los asturianofalantes. Esa obligación ye parte del discutiniu qu’esta selmana vien desendolcándose na seición d’opinión d’Asturnews. L’Academia de la Llingua Asturiana (A.Ll.A.) ye una institución del Principáu d’Asturies que se creó en 1980 por Decretu del Conseyu Rexonal d’Asturies 33/1980 de 15 d’avientu y con Estatutos aprobaos pol mesmu muérganu por Decretu 9/1981, modificaos el 12 d’abril de 1995 (BOPA nu 136 de 14.6.1995). L’Academia tien anguaño 22 miembros de númberu, 19 miembros correspondientes y 14 académicos d’honor. Los académicos nun perciben nenguna retribución nin pola so condición de tales nin polos cargos que desempeñen na Academia. Ente los sos obxetivos alcontrábense yá naquel abril de 1981 “pescudar y formular les lleis gramaticales de les variedaes llingüístiques del bable, apurrir orientaciones y normes pal cultivu lliterariu de les mesmes,Inventariar el so lésicu, afalar lusu, enseñu y espardimientu del bable nes sos modalidaes, y curiar los drechos llingüísticos asturianos”. 4 d'abril, 2006 0 FacebookTwitterPinterestEmail
Sociedá El Ridea sigue ensin permitir les ponencies n’asturiano by asturnet 3 d'abril, 2006 El Real Institutu d’Estudios Asturianos anecia na so decisión de nun aceptar una ponencia n’asturiano pal I Congresu d’Estudios Asturianos, al considerar que diba ser una “imposición” pa un institutu que, en palabres del so director, Jose Luis Perez de Castro, “ye un organismu autónomu” que va emplegar nel so congresu como única llingua l’español, “y nun se van cambiar les normes”. Pesie a que na convocatoria nun s’especificaba espresamente la llingua na que diben poder presentase les ponencies y a que Ramón d’Andres, dende la Oficina de Política Llingüística de la Conseyería de Cultura, unvió una pitición de respetu a la llexislación vixente y el derechu a usar la llingua, los organizadores del Congresu insisten en que “nun cabe dengún recursu contra esta decisión”. Mentestanto la ponencia de Yolanda Magdalena titulada “La dignificación de la llingua asturiana a traves de los servicios de normalización llingüística nos conceyos”, según los organizadores, podrá ser lleída siempre y cuando lo faiga en castellán. 3 d'abril, 2006 0 FacebookTwitterPinterestEmail
Sociedá La Caravana pola Oficialidá percuerre los conceyos de Siero, Sariegu y Llanera by asturnet 2 d'abril, 2006 El Conceyu Abiertu pola Oficialidá percorrió con esitu’l sábadu pasáu los conceyos de Siero, Sariegu y Llanera, cola caravana enmarcada dientro de les sos acciones de reivindicación de la oficialidá de la llingua asturiana de cara a la prósima reforma estatutaria, espardiendo información y afalando a la sociedá a comprometese na defensa del idioma. La Caravana pola Oficialidá nel conceyu de Siero entamare’l pasáu martes día 28 con una xornada completa d’actividaes en La Pola, qu’empezó pela mañana repartiendo más de cuatro mil planfletos informativos ente la xente, y que pela tarde corrió a cargu de les actuaciones del grupu El Garrapiellu y de Milio’l del Nido, entreteniendo a los más pequeños, y del grupu de teatru del IES Ríu Ñora, amás de la Coral Santa María de Lieres, amosando d’esta manera toos ellos el so apoyu a la reivindicación llingüística y la oficialidá. Per otra parte, esti vienres día 7 d’abril el Teatru Filarmónica d’Uvieu va ser l’escenariu d’un actu central del CAO nel que van actuar Anabel Santiago, Felpeyu, Toli Morilla y Xuacu Amieva. 2 d'abril, 2006 0 FacebookTwitterPinterestEmail