Sociedá Valledor enfréntase al RIDEA pol asturianu by asturnet 11 de mayu, 2006 Depues de les declaraciones del conseyeru de Xusticia, Francisco Javier García Valledor, nes que tachaba al RIDEA de tener ‘una irreprochable trayectoria reaccionaria’, calificando la so negativa a aceptar una ponencia n’asturianu como ‘despreciu al más elemental sentíu democráticu’, representantes de la istitución manifestaron al periódicu xixones El Comercio que ‘nun nos molesta lo que diga esti señor, porque les coses hai que tomales según ónde vengan’, asegurando que por ellos puede seguir ‘la polemica, porque ye la meyor propaganda en favor del istitutu’. ‘Al que fala mal nun se-y va facer nin puñeteru casu’, acabó diciendo Jose Luis Perez de Castro, presidente del RIDEA, mentes que Moises Llorden, secretariu xeneral del Congresu d’Estudios Asturianos, aconseyó al conseyeru de Xusticia del Gobiernu del Principáu d’Asturies que ‘sía muncho más autocríticu y piense un poco en cómo fue la so trayectoria política y d’acción’. ‘El RIDEA nun ye reaccionariu, sinón rigurosu y autocríticu’ defendió, en respuesta a les declaraciones de Valledor, que ve nesti casu una prueba más ‘de la urxente necesidá de oficialidá pa la llingua asturiana’. Per otra parte, Valledor aseguró que, tres de la reunión del Conseyu de Gobiernu cellebrada ayeri, se llegó al alcuerdu de que nun se va repitir esta situación nes prósimes ediciones del Congresu d’Estudios Asturianos. 11 de mayu, 2006 0 FacebookTwitterPinterestEmail
Sociedá MIAS saca una colección de documentos políticos llamada ‘El Soyáu Alternativu’ by asturnet 11 de mayu, 2006 Mocedá d’Izquierda Asturiana quier cellebrar el primer aniversariu del so cartafueyu ‘na cai>>’ que recueye tolos temes d’actualidá, asina como l’ideariu, propuestes, actividaes y resúmenes de comunicaos, cola espublización d’una colección de documentos de llinia política que lleva por nome ‘El Soyáu Alternativu’. Mentes que ‘na cai>>’ va siguir siendo’l mediu físicu de comunicación principal de MIAS, ‘El Soyáu Alternativu’ va sacar el so primer testu nel que se recueya la reflexón interna de les mocedaes d’Izquierda Asturiana sobre los conceptos d’independencia y l’autodetermín. Con el, según Xuacu Rodríguez, encargáu de Comunicación y Nueves Tecnoloxíes de MIAS, ‘pretendemos asoleyar una desplicación nueva d’estos conceptos añediendo-y al componente identitariu’l que realmente val na xera de facer política, l’utilitariu. La xente mozo que formamos MIAS queremos da-y protagonismu a esta idea polo que tien de ferramienta nel trabayu de tresformación social y política pola que naguamos, como preseu na llucha por algamar una Asturies más socialmente xusta, ecolóxica y responsable cola so cultura. Una Asturies que se presente al mundu con espíritu solidariu y abiertu ensin escaecer lo que ye y les sos necesidaes’. 11 de mayu, 2006 0 FacebookTwitterPinterestEmail
Sociedá El Bloque por Asturies acusa a Migoya de ponese al marxe de la llei by asturnet 11 de mayu, 2006 Énte les declaraciones feches pola conseyera de Cultura, Ana Rosa Migoya nel actu d’inauguración del Congresu d’Estudios Asturianos, nes que defendía’l derechu del RIDEA a nun almitir ponencies n’asturianu, asegurando que nun incumplía con ello la llegalidá, el Bloque por Asturies consiera ‘mui grave’ esta situación, ‘por negar la Llei d’Usu y Promoción del Asturianu, asina como’l Plan de Normalización’, razón pola que pide la rectificación pública y inmediata de la conseyera, o ‘la intervención del presidente del Gobiernu en casu de que la conseyera nun lo ficiere’. El Conceyu Nacional del Bloque por Asturies considera que la conseyera ‘ta poniendose al marxe de la llei al defender un actu d’un organismu públicu como’l RIDEA, pesie a tar incumpliendose la Llei d’Usu y Promoción del Asturianu; y fuera de los alcuerdos de gobiernu, yá que l’actitú del RIDEA opónse a lo alcordao nel Plan de Normalización de la Llingua Asturiana’. ‘Siendo la obligación de la conseyera non sólo respetar la llei los alcuerdos de gobiernu al que pertenez, sinón tamien facer que se cumplan’, el Bloque por Asturies esixe la rectificación pública inmediata de la conseyera y del presidente del gobiernu, ‘llamándola al orde’ si ella nun lo fixere. 11 de mayu, 2006 0 FacebookTwitterPinterestEmail
Sociedá La llingua centra’l Congresu d’Estudios Asturianos del RIDEA by asturnet 10 de mayu, 2006 Pesie a tar vetáu nes ponencies del Congresu d’Estudios Asturianos col que’l RIDEA remembra los sos 60 años d’historia, l’asturianu foi’l tema central nel actu d’inauguración que se cellebró ayeri nel Auditoriu Príncipe Felipe d’Uvieu en presencia de la conseyera de Cultura, Ana Rosa Migoya, y ente l’ausencia d’otros miembros Gobiernu que s’amosaron críticos cola actitú d’esta institución pública. La Pita de la Xunta pola Defensa de la Llingua Asturiana y un cientu de persones que respondieron a la llamada d’esta organización, manifestáronse ente les puertes del Congresu, esixendo la dimisión de Migoya pola so ‘connivencia col antiasturianismu del RIDEA’. Énte les acusaciones de los manifestantes, la conseyera de Cultura, Ana Rosa Migoya defendió ‘l’autonomía y independencia del RIDEA’, del que dixo que ‘nun incumplía denguna llei’ al prohibir una comunicación por tar presentada n’asturianu. Sin embargu, el conseyeru de Xusticia, Francisco Javier García Valledor, consideró ‘mui grave’ esta decisión per parte del RIDEA, acusando a dalgunos de los sos responsables d’ ‘atesorar una irrepochable trayectoria reaccionaria’. Al contrario de lo defendío por Migoya, Valledor aseguró que ‘denguna entidá pública tien autonomía p’actuar al marxe de la llei d’Usu y Promoción del Asturianu’, tal y como-yos recordare Ramón d’Andres, director de la Oficina de Política Llingüística, al empiezu d’esta polemica. Mentestanto, l’esitu de la convocatoria fecha pola Xunta pola Defensa de la Llingua Asturiana ente les puertes del Auditoriu centró la inauguración d’un Congresu d’Estudios Asturianos, qu’estrenó la so cellebración ente pancartes que lu tachaben de ‘represor y antiasturianu’. 10 de mayu, 2006 0 FacebookTwitterPinterestEmail
Sociedá El RIDEA inaugura’l Congresu d’Estudios Asturianos metanes de la polémica by asturnet 9 de mayu, 2006 Énte la inauguración esta tarde nel Auditoriu Príncipe Felipe d’Uvieu del Congresu d’Estudios Asturianos col que’l RIDEA quier cellebrar los 60 años de la so esistencia, la Xunta Nacional del Bloque por Asturies quier manifestar el so rechazu a la política d’esta institución, que negó l’usu del asturianu nuna de les ponencies presentaes al congresu, tachándola esta actitú d’ ‘insultu pa la cultura asturiana’ y instando a tolos políticos y miembros del Gobiernu a nun asistir a tala inauguración. Dende’l Bloque por Asturies consideren esta actitú como ‘intolerable’ por vulnerar la Llei d’Usu, l’Estatutu d’Autonomía d’Asturies y el propiu Plan de Normalización aprobáu na Xunta Xeneral del Principáu d’Asturies, amás d’otres llexislaciones estatales y internacionales. Tocante a esti tema, el portavoz d’Izquierda Asturiana, Ignaciu Llope, manifestó qu’ ‘esta ye la enesima prueba de que ensin Oficialidá d la supuesta defensa y promoción del asturianu ye papel moyáu, y que’l pactu de Gobiernu y el Plan de Normalización nun son sinón una triste ironía sangrina pa les persones que sólo quiere facer usu de los sos derechos llingüísticos’. Llope recordó, que “esisten otros munchos casos asomeyaos derivaos d’una situación d’apartheid a la que se ven sometíos los ciudadanos que quieren usar la so llingua n’Asturies, como’l que se conocía va poco relativu al usu del asturianu en dependencies municipales de Xixón, o’l del miembru de la Dirección Nacional d’Izquierda Asturiana, Faustino Zapico, que hai sólo unos meses se-y prohibió matricular la so tesis doctoral porque’l so títulu taba redactáu n’asturianu”. La Xunta pola Defensa de la Llingua Asturiana tien convocada una manifestación en protesta pola actitú del RIDEA pa esta tarde, a les siete, ente les puertes del Auditoriu d’Uvieu, onde se fadrá inauguración del Congresu en presencia de la conseyera de Cultura, Ana Rosa Migoya. 9 de mayu, 2006 0 FacebookTwitterPinterestEmail
Sociedá Xixón saca la llingua by asturnet 9 de mayu, 2006 Esta mañana, el teatru Xovellanos de Xixón acoyía la cellebración de los III Alcuentros de la Mocedá cola Llingua, que lleven por nome ‘¡Saca la Llingua!’, nun actu que foi presentáu por Ester Fonseca y el cantante de Dixebra, Xune Elipe, nel que tuvo presenta la conceyala d’Educación y Promoción del asturianu, Carmen Rúa Morán. Estos alcuentros, que tienen una duración d’unes tres hores aprosimadamente, tán empobinaos al alumnáu d’ESO y Bachilleratu en Llingua Asturiana. Esta xornada lúdico-pedagóxica ta basada na participación y na tresversalidá cola que se busca que la mocedá s’avere a la llingua asturiana dende un aspectu que nun sía puramente academicu, pa que, d’esta manera, empiece a entendelu como una ferramienta normal de comunicación. Ente los oxetivos de los alcuentros ta’l potenciar que los Centros d’Enseñanza asuman el so papel como axentes de normalización llingüística; potenciar el desendolcu d’actividaes de promoción social de la llingua asturiana que sían atractives pa los más mozos; propiciar una reflexón sobre la situación de la llingua asturiana y la importancia d’activar acciones en favor d’ella; asina como asociar esta reflexón llingüística a actividaes colectives, lúdiques, culturales y interdisciplinares. Nel programa de ¡Saca la llingua! participaron Cellero y el colectivu H.a-Xareos, colos sos monólogos, asina como’l grupu Dixebra, que dio un conciertu pa los asistentes. Nestos alcuentros, que se cellebren per tercer añu consecutivu, participaron los centros IES Universidá Llaboral, IES Calderón de la Barca, IES Emilio Alarcos, IES Mata-Xove, IES Doña Ximena, IES Montevil, IES Rosario Acuña, IES Padre Feijoo, IES Xovellanos, Colexu San Lorenzo y IES Númberu 1. 9 de mayu, 2006 0 FacebookTwitterPinterestEmail
Sociedá Grandas de Salime, Tapia, Vegadeo y Pezós arreglen la so toponimia by asturnet 9 de mayu, 2006 La Xunta Asesora de Toponimia trabaya sobre l’occidente asturianu, depues de que los conceyos de Grandas de Salime, Tapia, Vegadeo y Pezós solicitaren a la Conseyería de Cultura del Principáu la oficialización de la so toponimia, teniendo yá’l primeru d’ellos aprobáu l’espediente de revisión nel Plenu del Ayuntamientu. A estes iniciatives de los conceyos van sumase una xornaes organizaes pola Consyería de Cultura que se van facer el prósimu día 19 n’El Franco sobre toponimia, a les que van asistir varios alcaldes de la zona pa conocer el procesu d’oficialización. Per otra parte, la Conseyería de Cultura tien previsto programar a lo llargo de la seronda un cursu d’alfabetización na fala empobináu a funcionarios municipales y periodistes. 9 de mayu, 2006 0 FacebookTwitterPinterestEmail
Sociedá El Tueru entrega los premios ‘Conceyu de Llanes’ by asturnet 8 de mayu, 2006 L’asociación El Tueru fizo ayeri entrega de les sos distinciones ‘Conceyu de Llanes’ coles que quier reconocer el llabor de diferentes persones en favor de la cultura y la llingua asturiana nesi conceyu. Concha Quintana, Ramón Sordo Sotres y Mª Dolores Sánchez ‘La Galana’ recibieron la distinción de manes de Xabel de Cea, presidente de l’asociación, del escritor ribeseyanu Xandru Martino. Pablo Ardisana, l’otru premiáu, nun pudo asistir al actu por problemes de salú. Nel discursu d’entrega, los representantes d’El Tueru desixeron la oficialidá de la llingua asturiana, defendieron el nomenclator de l’Academia de la Llingua Asturiana, asina como llamentaron la poca implicación nesti tema per parte de les autoridaes municipales, ausentes nel actu pesie a que foren convidaes pola entidá. Ente les declaraciones de los premiaos destacó la de Ramón Sordo Sotres que reconoció que “dempues de 21 años de trabayu y de 16 llibros asoleyaos e´l primer premiu que recibo”, o les palabres de ‘La Galana’, qu’aseguró que “la llingua nun morrerá mientres estemos nosotros, nuestros h.íyos y nietos”. 8 de mayu, 2006 0 FacebookTwitterPinterestEmail
Sociedá La Xunta pola Defensa de la Llingua convoca una concentración contra l’actitú del RIDEA by asturnet 8 de mayu, 2006 La Xunta pola Defensa de la Llingua Asturiana convoca una concentración pa mañana miercoles, día 10, a les siete la tarde ente la entrada del Auditoriu d’Uvieu, en protesta pola actitú del Real Institutu d’Estudios Asturianos, RIDEA, al prohibir la llectura n’asturianu d’una de les ponencies nel congresu qu’entama esti día. La Xunta tacha d’ ‘inaceptable qu’una entidá dependiente de la Conseyería de Cultura amuese una actitú tan reaccionaria y antiasturiana’, al tiempu que condena esta ‘nueva agresión a los nuesos derechos llingüísticos’. Cuando a ta a piques de cumplise un añu y mediu dende que’l Tribunal Superior de Xusticia d’Asturies revocare la retirada de la so llicencia de radio comercial, Radio Sele, col apoyu de la Xunta pola Defensa de la Llingua, convoca otra concentración pal prósimu día 19, a les siete la tarde, na cai Fruela d’Uvieu, en protesta pol bloqueu qu’esta emisora sufre per parte de l’alministración asturiana, que sigue ensin tramitar tala llincencia, consintiendo ‘qu’una persona vinculada al PSOE instale una emisora ensin llicencia de nenguna clase, nel dial que-y correspuende a Radio Sele”. 8 de mayu, 2006 0 FacebookTwitterPinterestEmail
Sociedá Comunicáu de la Xunta pola Defensa de la Llingua Asturiana nel Día de les Lletres by asturnet 7 de mayu, 2006 Otru Día de les Lletres. Hailu que yá perdió la cuenta de cuántos años llevamos manifestándonos, saliendo a la cai a esixir un derechu fundamental de la persona: la posibilidá llegal d’usar la llingua propia en cualquier situación de la vida. Los demócrates de verdá diben plasmar si supieren que n’Asturies, con decades yá de gobiernos democráticos, tovía ye illegal usar otra llingua que nun seya’l castellanu. ¡Y fálennos d’imposición a nós, que somos los que la sufrimos! ¡Guapa manera de da-y la vuelta a una culpa que nun ye más que de los que nos nieguen derechos! Llega’l Día de les Lletres y conseyeros y directores xenerales asoleyen los grandes llogros en política llingüística y faen declaraciones rotundes. La Xunta pola Defensa de la Llingua Asturiana enxamás va criticar los avances qu’haya na promoción del asturianu: bien ta que s’oficialice la nuesa toponimia, qu’aumenten los presupuestos pal nuesu idioma…, pero lo que nun vamos almitir ye que se mienta y se quiera embabucar a la xente. Y ye que dellos responsables de la Federación Socialista Asturiana y del Partíu Popular vuelven col cantar de qu’ellos tán pola promoción, pola protección, pola voluntariedá y non pola oficialidá y la imposición. Yera pa rise pola floxedá de razonamientos tan ruinos… si nun supieremos que la mentira milenta veces repetida acaba caltrizando na opinión pública. A eso tán xugando. Queremos dicilo alto y claro, otra vez más: promoción y oficialidá, voluntariedá y oficialidá nun son conceptos escluyentes. La oficialidá nun ye imposición. Imposición ye la situación que sufrimos agora onde namás el castellanu ye llegal. La oficialidá ye dalgo tan cenciello como que se reconozan los derechos llingüísticos a tolos asturianos y asturianes, falen la llingua que falen. ¿Cómo-yos costará tanto entendelo? ¿Será que la so idea de democracia nun ye más qu’un barniz qu’echen según la so comenencia? Hai otra mentira más nesi tipu de declaraciones. Y ye que la promoción ensin más, ensin una marcación llegal d’oficialidá lleva a la desaparición progresiva de la llingua minorizada. Ehí tán los estudios sociolóxicos pa demostralo, pero tamien la nuesa esperiencia diaria. ¿Que llingua fala la mocedá d’Asturies depues de tantos años y de tantos gobiernos asturianos partidarios de la famosa «promoción»? ¿Cómo quieren qu’una llingua gane falantes y prestixu si ye illegal usala? El problema ye que los amantes de la promoción y de la llibertá —pero que se nieguen a conceder la oficialidá— nun ye que tean confundíos y nun se dean cuenta: ye que lo dicen a sabiendes. Y dicen coses como que l’asturianu yá lo pue usar quien quiera, qu’hai oficialidá de facto… Claro, deben dicilo poles munches asociaciones que nun puen llegalizase presentando la documentación n’asturianu, o poles tesis doctorales refugaes por tramitase n’asturianu, o polos munchos escolinos que nun puen estudiar asturianu nos sos centros, o polos estudiosos que nun puen presentar una ponencia n’asturianu nun congresu entamáu por una institución oficial que se llama —nun vos rir— Institutu d’Estudios Asturianos. Esa ye la realidá de la promoción a cencielles: indefensión llegal, marxinación, represión. Tamos nun momentu políticu importante pal futuru del asturianu y del gallego-asturianu. En tol Estáu español tán reformándose los sos estatutos y n’Asturies tamos tamien nesi procesu. Ye la ocasión pa incluyir la oficialidá y por eso cientu cincuenta entidaes asturianes tamos trabayando por esparder esi mensaxe per Asturies nel Conceyu Abiertu pola Oficialidá. Son munches les declaraciones que se tán faciendo sobre les postures de cada partíu, pero tamos enfotaos en qu’Asturies nun pue ser diferente nin menos que naide. A la fin, el bon xacíu, la sensatez, l’altura de mires tien que s’imponer nos cabezaleros de la FSA y el PP perriba de les zunes personales y el provincianismu. Tienen que se poner a l’altura de la sociedá asturiana que, mayoritariamente, nun tien esos mieos y esos prexucios que tienen dellos políticos. Sicasí, refórmese l’estatutu d’equí a dos meses o d’equí a dos años, con pactu ente los partíos mayoritarios o ensin el, fagan lo que fagan, un estatutu ensin oficialidá diba ser un fraude, una burlla. Dirán lo que quieran, lo que yá tán diciendo: que nun hai demanda, que la xente nun lo quier, pero ellos saben que la oficialidá ye l’únicu tema social y cultural que se vien reivindicando en tolos debates estatutarios y ye’l que vien movilizando nestes decades a más xente y a más entidaes y asociaciones. ¿Cuánta demanda social hai pa la montonera de lleis que s’aprobaron na Xunta Xeneral? ¿Midió daquien la demanda de caúna d’elles? ¿Cuntaron a la xente que se manifestaba? Non. Nun son más que sides pa nun s’encarar cola realidá: qu’hai un sector mui importante de la sociedá que reclamamos daque que ye de xusticia y que ye una vergüenza que partíos que se dicen democráticos entá nun garantizaren esi derechu. Pero que-yos quede bien claro: la nuesa llingua nun va desapaecer por decretu o por un estatutu que nun recueya la oficialidá. Y el movimientu de reinvindicación tampoco. Equí tamos y equí vamos siguir tando pa llograr la oficialidá. Nun nos val otra cosa. Somos mui necios y amás tenemos tola razón y tol derechu. ¡L’asturianu, llingua oficial, yá! 7 de mayu, 2006 0 FacebookTwitterPinterestEmail