Sociedá La Unión Asturianista suspende la política llingüística del gobiernu asturianu. by asturnet 27 d'avientu, 2006 La Unión Asturianista considera que la política llingüística del gobiernu asturianu ye un “fracasu”. La coalición de PAS-URAS denunció’l “fraude” qu’Izquierda Xunida “cometiera colos ciudadanos” y l'”engañu al que los pretenden someter”. La UAS recordó que la Llei d’Usu del Asturianu foi aprebada cuando Sergio Marqués yera presidente del país y Xuán Xosé Sánchez Vicente diputáu de la Xunta Xeneral del Principáu. La coalición de los dos partíos asturianistes denunció la “promesa incumplida” d’Izquierda Xunida d’algamar la oficialidá del asturianu nesta llexislatura. Les crítiques de la Unión Asturianista tocaron tamién l’ámbitu de la recuperación toponímica considerando que los catorce conceyos, qu’hasta’l momentu oficializaron los sos topónimos, suponen un fracasu pa esta campaña del Gobiernu asturianu. L’ausencia de la llingua asturiana na Televisión Pública Asturiana ye tamién obxetu de denuncia de los lliberales asturianistes. Pa la UAS esta ausencia “incumple dafechu la llei d’Usu y Promoción”. Los llíderes de la UAS tuvieron tamién palabres pal Conseyeru de Xusticia Francisco Javier García Valledor al que-y recomendaron “que si nun-y parez aceptable, que se vaya pa casa y sinon, que coma y calle”. Dende la UAS criticáronse tamién los presupuestos xenerales de 2007 aludiendo a qu’en 1998 el presupuestu empobináu a la llingua asturiana yera mayor qu’el qu’agora s’aprueba. 27 d'avientu, 2006 0 FacebookTwitterPinterestEmail
Sociedá El Tribunal Superior de Xusticia pronúnciase en contra del derechu de poner un tesis n’asturianu by asturnet 26 d'avientu, 2006 El recursu presentáu pol historiador Faustino Zapico foi rechazáu pol Tribunal Superior de Xusticia d’Asturies. Faustino Zapico acudirá al Tribunal Constitucional p’algamar el reconocimientu del derechu a presentar el so estudiu académicu n’asturianu. Faustino Zapico, historiador y profesor d’enseñanza secundaria, intentó en 2005 inscribir la so tesis “El discursu de la periferia: corrientes federalistes y autonomistes n’Asturies” nel rexitru de la Universidá asturiana. Esti rexistru refugó la inscripción al nun ser l’asturianu una llingua oficial. Dende esi momentu’l casu de Faustino Zapico entamó nuna polémica sobre l’exerciciu de los derechos llingüísticos na máxima institución acaémica del país. Nesta polémica llego a intervenir el mesmu rector de la Universidá, Juan Vazquez, con unes declaraciones nes que dicía que “nun hai igualdá na ilegalidá”.Les pallabres de Vazquez facíen referencia a la esitencia d’otres tesis doctorales escrites presentaes n’asturianu. Ente la negativa de la Universidá d’aceptar l’exerciciu de los sos derechos llingüísticos Faustino Zapico acudió a la xusticia ordinaria, llegando agora al Tribunal Superior de Xusticia d’Asturies onde la sentencia pronunciada vuelve a ser contraria al exerciciu d’estos derechos. La importancia d’esta sentencia radica na interpretación que dende’l TSXA faigan del artículu 4 del Estatutu d’Autonomía, asina como de la Llei 1/98 del Asturianu o Bable, nes que se recueye’l derechu de los ciudadanos d’Asturies a dirixise a l’Alministración asturiana na llingua de la so elección. La Sala del Tribunal Superior de Xusticia d’Asturies pronuncióse en contra de la petición del doctorando, dientro d’un procesu anómalu nel qu’el xuez instructor retiróse por nun tan conforme col votu de la mayoría del Tribunal, que diba en contra del exerciciu de los derechos llingüísticos, sustituyéndolu na instrucción otru xuez miembru de la sala. Nel Tribunal Superior de Xusticia d’Asturies les sos decisiones avecen adoptase pola unanimidá de los miembros del Tribunal, nel casu presentáu por Faustino Zapico esta unanimidá rompióse al emitise un votu favorable a que Zapico pudiera exercer el so derechu a espresase na so llingua al presentar la so tesis doctoral. Faustino Zapico recurrirá la sentencia del TSXA énte’l Tribunal Constitucional, máxima autoridá xudicial del Estáu español, cola intención d’algamar una sentencia favorable pa presentar el so trabayu doctoral n’asturianu. 26 d'avientu, 2006 0 FacebookTwitterPinterestEmail
Sociedá Izquierda Xunida de Xixón califica la decisión del Conseyu Asesor de poco valiente y poco honesta by asturnet 26 d'avientu, 2006 El portavoz del Grupu Municipal d’Izquierda Xunida de Xixón, Jesús Montes Estrada, calificó la decisión adoptada poles organizaciones componentes del Conseyu Asesor de la Llingua Asturiana en Xixón. Na intervención d’Izquierda Xunida Carmen Rúa recordó que la esistencia de la Oficina de la Llingua ye un logru d’IX. La decisión de los integrantes del Conseyu Asesor de la Llingua Asturiana en Xixón de presentar la so dimisión ente la non aprobación de les Ordenances Municipales de la Llingua, redactaes en 2004, ta provocando una riestra declaraciones ente los diferentes grupos municipales xixoneses. Dende Izquierda Xunida Jesús Montes Estrada y Carmen Rúa defenden l’actuación d’Izquierda Xunida-Bloque por Asturies na materia de les polítiques llingüístiques que se tán desendolcando en Xixón. Reconociendo que la propia Oficina ye un logru algamáu por Izquierda Xunida. Nes files del Partíu Popular xixonés la decisión de les organizaciones sociales que componen esti muérganu asesor de les polítiques llingüístiques en Xixón, entiéndese como un fracasu del gobiernu municipal “que prometió munches coses pa la promoción del asturianu y que nun se tán cumpliendo”. El Conseyu de la Mocedá de Xixón, entidá que ye miembru del Conseyu Asesor de la Llingua, daba anuncia en nota de prensa de qu’el so representante nesti órganu dimitia por motivos personales, demarcándose la organización xuvenil de la postura presentada poles demás entidaes que componen esti Conseyu. 26 d'avientu, 2006 0 FacebookTwitterPinterestEmail
Sociedá La Sociedá d’Artesanos vetó la entrada de les muyeres by asturnet 26 d'avientu, 2006 La Sociedá d’Artesanos de Cangas vetó na Asamblea Xeneral d’esti sábadu la entrada de muyeres na mesma mediante la modificación del artículu, de los sos estatutos, nel que se facía referencia a quien podía ser miembru de la Sociedá. La decisión adoptada na Asamblea cita espresamente que pa ser miembru de la mesma hai que ser varón. L’Asociación qu’añalmente desenvuelve la perconocida Descarga de Cangas aconceyó esti sábadu cola fin d’iguar los sos estatutos ente la petición d’entrada de muyeres na asociación. De los 644 votos emitíos 521 fueron en contra de la entrada de muyeres, 121 a favor de la so entrada y dos votos en blancu. Dase la circunstancia de qu’en Cangas esiste una asoación que pon flores a la Virxe del Carme, esta asociacón compuesta esencialmente por muyeres, val como argumentu a los miembros de la Descarga p’afirmar que” elles ponen flores y nós ponemos la descarga”. L’Institutu de la Muyer, asina como delles asociaciones de muyeres, tán estudiando la reforma fecha por esta asociación yá que podría ser inconstitucional, al establecer la negación d’entrada na asociación por mor del xéneru. 26 d'avientu, 2006 0 FacebookTwitterPinterestEmail
Sociedá Cada asturianu invierte 243 añales en cultura by asturnet 22 d'avientu, 2006 Un estudiu del Anuariu d’Estadístiques Culturales del Ministeriu de Cultura situa a la población asturiana na media del consumu cultural del Estáu. La media estatal en consumu cultural situase en 242,7, quedando Asturies xusto na parte central d’esta estadística, na que Madrid ye la comunidá au más s’invierte en consumu cultural con 335,1 de media per habitante. Les estudiu ta basáu nel consumu de discos, llibros, teatru, cine o entraes de muséu. Los datos xenerales d’esti estudiu ufren que los ciudadanía del estáu aumentó la so inversión cultural nún 10% respectu a 2005. El consumu total en cultura de la ciudadanía situose en 10.460 millones d’euros. Amás d’esti estudiu despréndese que casi 500.000 trabayadores exercen el so llabor dientro del ámbitu de la cultura, lo que representaría un porcentaxe del 2,7% sobre’l total de trabayadores nel Estáu, suponiendo esto una medra del 22% respectu al añu 2000. La media de gastu cultural de les comunidaes autónomes entama con Madrid, 335,1;Euskadi, 296,7, País Valenciá,290,1; Catalunya, 289,8, Aragón 275,5; Balears, 266, Ceuta y Melilla ,261,9; La Rioja, 250,4; Asturies, 243,8; Nafarroa, 233,1; Canarias, 219,8; Cantabria, 217,2; Castilla y León, 201,9; Andalucía, 189,1; Galiza,168; Murcia, 144; Castilla-La Mancha, 136 y Extremadura, 100,1. 22 d'avientu, 2006 0 FacebookTwitterPinterestEmail
Sociedá IAS presenta a Inaciu Llope como cabeza de llista a les elecciones de 2007 by asturnet 21 d'avientu, 2006 L’Alcuentru Nacional d’Izquierda Asturiana cellebráu’l pasáu sábadu decidió por unanimidá la elección del actual portavoz nacional de la formación, Inaciu Llope, como candidatu a la Xunta Xeneral. L’Alcuentru Nacional d’Izquierda Asturiana apautó que la candidatura de Llope fuere na circunscripción occidental, pola so vinculación personal a esta fastera del país. Les causes que lleven a Izquierda Asturiana a presentase a estes elecciones son, según la nota de prensa unviada a Asturnews, la d'”ufrir” al electoráu asturianista y verde una “alternativa a les actuales polítiques del gobiernu de PSOE ya Izquierda Xunida que llevaron a Asturies a una situación culturalmente decadente, medioambientalmente desastrosa ya insostenible y económicamente estancada”. La decisión de presentar al so candidatu nacional na circunscripción occidental del país dase, según la nota recibida, “pa reivindicar la relevancia de les ales d’Asturies ente un sistema electoral que discrimina a los ciudadanos y ciudadanes que nun viven nel centru del país” Inaciu Llope ye médicu especialista nel Centru de Salú de Cangas. Ente los sos ensayos destaca “Xogo d’identidades na terra del Navia-Eo” o l’artículu sobre Felpeyu de Anuariu de la Música Asturiana de 2006. 21 d'avientu, 2006 0 FacebookTwitterPinterestEmail
Sociedá Les organizaciones del Conseyu Asesor de la Llingua de Xixón presenten la so dimisión irrevocable by asturnet 21 d'avientu, 2006 Les organizaciones que componen el Conseyu Asesor de la Llingua Asturiana presentaron la so dimisión irrevocable nel Conseyu Estraordinariu del día 19 d’avientu. La decisión tomóse “énte la falta de voluntá amosada polos grupos municipales presentes nel Gobiernu Municipal, PSOE y Izquierda Xunida-Bloque por Asturies p’alcordar un marcu normativu que garantice l’usu de la llingua asturiana” Les asociaciones que formaben el Conseyu Asesor de la Oficina Municipal de la Llingua de Xixón, SUATEA, CCOO, UXT, Xunta pola Defensa de la Llingua Asturiana, Academia de la Llingua Asturiana, Foru Arte Ciudá, Conseyu de Mocedá de Xixón, Comerciantes y Tertulia Cultural “El Garrapiellu” alcordaron por unanimidá presentar la so dimisión irrevocable énte la falta de voluntá del gobiernu municipal d’alcordar un marcu normativu que garantice “dignamente” l’usu de la llingua asturiana. Les asociaciones denuncien, asina mesmo, el “despreciu” del Equipu de Gobiernu al trabayu desinteresáu del Conseyu Asesor na materia de la creación d’unes Ordenances Municipales au se diera garantía pal exerciciu de los derechos llingüísticos de los ciudadanos y ciudadanes de Xixón. Esta situación yá fuera denunciada hai un tiempu pol Conseyu Asesor, algamando como única respuesta del gobiernu municipal “el sielnciu”. Poro el Conseyu Asesor presentó la so dimisión entendiendo que “nun quier ser una entidá que sirva namás que pa dar voces en castañéu, y lo que ye más grave, ser complice duna insistente política llingüística del Conceyu de Xixón.” El Conseyu Asesor valoró positivamente’l trabayu desenvueltu polos trabayadores de la Oficina de la Llingua, “pero nun albidrá intención de visualizar de modu eficaz la normalización toponímica”. El Conseyu Asesor de la Llingua en Xixón “atalanta que’l Conceyu de Xixón niégase a dar a carata de ciudadanía a los y les asturiano-falantes de Xixón per aciu d’un es Ordenances Municipales de la Llingua”. Puntu que supón pa los integrantes del Conseyu la “esistencia de ciudadanos y ciudadanes de segunda, que nun tienen los sos derechos llingüísticos reconocíos” El Conseyu Asesor “amuésase a favor del consensu social” en materia de derechos llingüísticos”. Y afirma qu’estos derechos son “irrenunciables”. La decisión de les diferentes organizaciones que componíen esti Conseyu Asesor nun “supón desdexar de les posiciones irrenunciables na defensa de la llingua asturiana, que vamos siguir defendiendo dende les nueses organizaciones sociales y sindicales, cola ciudadanía y col pueblu de Xixón, nel compromisu pola oficialidá de la llingua asturiana”. Polo que faen llamáu a la ciudadanía pa siguir “na llucha polos derechos civiles y la defensa ciudadana de la llingua asturiana” 21 d'avientu, 2006 0 FacebookTwitterPinterestEmail
Sociedá La entrada de les muyeres na Sociedá de la Descarga de Cangas vótase esti sábadu by asturnet 19 d'avientu, 2006 La petición d’entrada de Rosa Conde na Sociedá de la Descarga de Cangas abrió’l debate, nesta entidá centenaria, sobre la posibilidá de la entrada de les muyeres como miembres de plen derechu na mesma. Rosa Conde asoleyó un escritu, col respaldu d’otres dos cientes muyeres nel que se reclamaba que la Sociedá se pronunciara publicamente sobre’l reconocimientu del derechu d’almisión de muyeres. Dos años depués de que Rosa Conde movilizara a la sociedá canguesa sobre la cuestión de la entrada de les muyeres na Sociedá d’Artesanos Virgen del Carmen, la Sociedá votará esti sábadu sobre la modificación de los sos Estatutos. Nesta reforma d’estatutos se propón modificar l’artículu 23 del capítulu IV que ye’l que corresponde a los socios. La redacción actual diz que “podrán pertenecer a l’Asociación aquelles persones con capacidá d’obrar que tengan interés nel desendolcu de los fines de l’asociación” y la propuesta dende dalgún sector d’esta Sociedá diz “podrán pertenecer a l’Asociación toes aquelles persones físiques que seyan varones y que tengan interés nel desendolcu de los fines de l’asociación”. D’aprobase esta modificación la entrada de les muyeres quedara prohibida de l’Asociación. Dende la directiva actual de l’Asociación se diz que la polémica surdida pola reivindicación de muyeres n’igualdá de condiciones que los socios masculinos podría llevar incluso a la ruptura de l’Asociación. La mayoría de la Xunta Directiva s’amuesa contraria a la entrada de les muyeres. 19 d'avientu, 2006 0 FacebookTwitterPinterestEmail
Sociedá La Xunta pola Defensa de la Llingua Asturiana va facer cursos d’asturianu n’Uviéu y Cangas by asturnet 18 d'avientu, 2006 La Xunta pola Defensa de la Llingua Asturiana va poner dos cursos d’asturianu a partir del 27 d’avientu. El primer de los cursos ta entamáu pola agrupación del suroccidente, y se desenvolverá ente’l 27 y 28 d’avientu, tando puestu pol Académicu de la Llingua Asturiana Roberto González Quevedo. Asina mesmo la organización de defensa de los derechos de los asturiano-falantes abre’l plazu d’inscripción nel so cursu d’iniciu que va entamar el 22 de xineru. L’asociación de defensa de los derechos llingüísticos, Xunta pola Defensa de la Llingua Asturiana, abrió’l plazu d’inscripción nel so cursu d’asturianu básicu. El cursu ye de 60 hores y de tipu básciu, adaptáu a persones que de mano cuenten con pocos y mui pocos conocimientos d’asturianu. Sicasí ye bien completu y permite un bon nivel d’aprendizaxe. Los clase pondránse nos locales de Xunta pola Defensa de la Llingua a partir del llunes 22 de xineru. P’apuntase nel cursu d’iniciu se puede llamar al teléfonu 985229553 o univar un corréu electrónicu a uvieu@exunta.org . El cursu intensivu organizáu pola Xunta pola Defensa de la L.lingua nel Suroccidente entamará a les 10,30 hores del 28 d’avientu na Escuela de Xedré y correrá a cargu del académicu Roberto González Quevedo, amás la nueche del 28 d’avientu fadráse un filandón en casa Fonsiquín, p’apuntase a esti cursu hai que llamar al teléfonu 679908087. Xunta pola Defensa de la Llingua Asturiana 18 d'avientu, 2006 0 FacebookTwitterPinterestEmail
Sociedá Joaquín Aréstegui afirma que la posición del PSOE siempre foi más “inflexible” que la del PP na materia llingüística. by asturnet 18 d'avientu, 2006 El diputáu y portavoz adxuntu del Partíu Popular n’Asturies, Joaquín Aréstegui, foi entrevistáu nel diariu La Nueva España. Na entrevista surdió la cuestión llingüística na qu’el diputáu popular propunso “buscar una formula cola qu’el mayor númberu de xente quede a gustu”. Ente les menciones que fizo’l diputáu popular alcontrábase la referente al modelu d’oficialidá esistente na Comunidá Foral de Nafarroa na que la oficialidá del euskera depende de si la zona del municipiu ye vasco-falante o castellano-falante, anque nun afirmó que fuere la que valiera pal casu asturianu. Sicasí Aréstegui nesta entrevista almitía la esistencia de delles formules estudiables sobre l’estatus xurídicu del asturianu. El diputáu del Grupu Parlamentariu Popular afirmaba que dende’l PSOE la posición respectu al estatutus llegal del asturianu siempre fuera más “inflexible y más draconianu” que nel PP. Na última reforma del Estatutu d’Autonomía’l Partíu Popular ufrió la posibilidá de la Oficialidá diferida, un modelu d’aprobación que dexaría la puerta abierta a la Oficialidá mediante una votación parlamentaria, la propuesta del PP rechazóse de mano pol PSOE, calteniéndose l’estatutus xurídicu de cuando l’aprobación del primer textu estatutariu. Entrevista en el diariu La Nueva España 18 d'avientu, 2006 0 FacebookTwitterPinterestEmail