Sociedá Areces recibe les protestes ciudadanes na inauguración del Centru Polivalente de Candás by asturnet 28 de febreru, 2007 La inauguración del Centru Polivalente de Candás axunta les protestes ciudadanes contra la xestión del gobiernu asturianu. L’apertura d’esti Centru atraxó les protestes de los vecinos afectaos pola Zalia, la privatización de Perlora y la oficialidá del asturianu. L’entamu de la precampaña electoral pal presidente asturianu, Vicente Álvarez Areces, ta siendo una cuestión complicada poles concentraciones ciudadanes en defensa de los sos intereses. El presidente asturianu recibió na inauguración del Centru Polivalente de Candás les crítiques de diversos colectivos contrarios a dalgunos aspectos de la so xestión política. La Pita de la Xunta pola Defensa de la Llingua Asturiana participó ente los colectivos ciudadanos na reclamación de la Oficialidá de la Llingua Asturiana nesti actu d’inauguración. El presidente asturianu visitó les instalaciones del Centru Polivalente de Candás, que cuenta con sales de reuniones, espaciu d’internet, talleres o zones d’ociu, y que s’empobina a un aprovechamientu por parte de la ciudadanía del conceyu de Carreño. Nel actu’l presidente tenía prevista la inauguración d’un mural fechu por un grupu de neños y neñes discapacitaos, hai yá tres años con fondos del antigüu IMI, y que por “motivos de seguridá” acabó por nun inaugurar. Esti fechu foi criticáu poles plataformes ellí aconceyaes qu’en tou momentu apautaron coles families de los y les neñes que durante la inauguración del mural nun diben facer nenguna protesta entendiendo que’l protagonismu d’esi actu teníen que lu tener los neños. Esta nun ye la primer vegada na qu’el presidente asturianu ye recibíu poles protestes ciudadanes contraries a la so xestión, tando presente entovía la so visita a La Pola (Siero). 28 de febreru, 2007 0 FacebookTwitterPinterestEmail
Sociedá L’Amuesa d’Obres d’Arte pola Oficialidá llega a Uviéu by asturnet 27 de febreru, 2007 L’Amuesa d’obres d’Arte pola Oficialidá llega al so tercer edición teniendo al Auditoriu uvieín como marcu de presentación de les obres de los 99 artistes que nesta vegada sofiten la iniciativa del Conceyu Abiertu pola Oficialidá. A partir del próximu miércoles, 28 de febreru, a les 19.00 hores y hasta’l 7 de marzu les obres van tar espuestes na Sala d’Esposiciones del Auditoriu. Fernando Ornosa y Ánxel Nava presentaron esta nueva amuesa d’obres d’arte pola oficialidá, que depués de visitar Avilés y Xixón llega a Uviéu con más artistes que nunca, convirtiéndose posiblemente na mayor amuesa colectiva d’artistes asturianos de la historia. Na edición uvieína 99 artistes ceden les sos obres pa contribuyir col so trabayu a la campaña qu’el Conceyu Abiertu pola Oficialidá vien desenvolviendo pol reconocimientu del estatus d’oficialidá pa la llingua asturiana na próxima reforma estatutaria. Fernando Ornosa, portavoz del CAO, agradeció en nome de les 200 organizaciones que formen la plataforma “la sensibilidá amosada polos artistes pa la causa de la demanda de la oficialidá”. El representante agradeció, tamién, al Foru Arte Ciudá la collaboración aportada a lo llargo d’estes tres ediciones, al tiempu que consideró qu’esta Amuesa ye un perbon reflexu de lo que se ta faciendo actualmente nel arte d’Asturies. Pa Ornosa nesta Amuesa hai “99 sensibilidaes del mundu del arte asturianu comprometíes cola llingua”. Ánxel Nava, del Foru Arte Ciudá, considera que la presencia de 99 artistes ye un gran éxitu, amás de sorrayar qu’hebo más artistes que nun pudieron participar pola falta d’espaciu. Ánxel Nava agradeció la donación desinteresada de les obres por parte de los artistes asturianos. Nava definió al colectivu de creadores d’arte como “un movimientu vivu y activu de la sociedá civil” que nun ye nuevu na xera de la reivindicación de los derechos civiles. Na amuesa axúntense les obres de cuatro xeneraciones d’artistes, en campos que van dende la pintura, la escultura, les nueves tecnoloxíes o les instalciones. Los precios de puya entamen nos 30 y van hasta los aproximadamente 1.500 de les obres más cares. L’Amuesa d’Obres d’Arte pola Oficialidá constitúi un bon momentu pa puyar poles creaciones de los artistes comprometíos cola causa de la oficialidá de la llingua asturiana. 27 de febreru, 2007 0 FacebookTwitterPinterestEmail
Sociedá L.lena echa andar la so campaña de normalización del usu del asturianu nel comerciu by asturnet 27 de febreru, 2007 El conceyu de L.lena ta acabante presentar la so campaña de normalización del usu del asturianu. La campaña empobínase al comerciu y en concretu al sector alimentariu. Pa ello el Serviciu de Normalización de L.lena editó una serie de materiales nos que s’indica la denominación, na variedá local, de les verdures más comunes o del gochu. La campaña faese cola collaboración de la Oficina de Política Llingüística de la Conseyería de Cultura. Estes campañes se tán poniendo en funcionamientu nos conceyos que cuenten con un Serviciu de Normalización como Xixón, Avilés, Mieres o Cangas. 27 de febreru, 2007 0 FacebookTwitterPinterestEmail
Sociedá El conceyu de Cangas conclúi la redacción del Plan de Normalización 2007-2009 by asturnet 27 de febreru, 2007 El conceyu de Cangas ya tien concluida la redacción del nuevu Plan de Normalización Llingüística del asturianu pal periodu comprendíu ente los años 2007 y 2009. El plan tien por obxetu afitar les bases de la normalización social de la llingua asturiana fomentando progresivamente’l so usu institucional asina como la so utilización nos medios de comunicación, mesmo nos públicos como nos privaos. Nesa mesma llinia se va emplegar y fomentar l’usu de la toponimia tradicional, asina como desenvolver aiciones positives respectu a la mesma. Nesti tiempu se va proceder a la retulación billingüe de toles dependencies de l’alministración municipal asina como la retulación del cascu urbanu de Cangas, en tolos casos siguiendo la toponimia decretada pola Xunta Asesora de Toponimia. El conceyu de Cangas comprométese nesti Plan a usar la toponimia mayor y menor del conceyu en toles publicaciones, señales y demás material como impresos, documentación etc. Esti Plan va afectar a la imaxe corporativa del Ayuntamientu que pasará a usar l’asturianu. Dientro de les campañes de normalización social del usu del asturianu se van desenvolver campañes de promoción ente la hostelería y el comerciu cola collaboración de la Rede de Normalización Llingüística de los Conceyos. L’obxetivu d’esti Plan ye facer normal nel nivel institucional lo que resulta normal ente la mayoría de la población del conceyu. La Oficina de Normalización Llingüística de Cangas aporbóse’l 24 de febreru de 2004, dende entós desenvuelve’l llabor d’asesoramientu a los servicios municipales, asociaciones y particulares sobre l’usu del asturianu. 27 de febreru, 2007 0 FacebookTwitterPinterestEmail
Sociedá Preséntase la coalición electoral Izquierda Xunida-Bloque por Asturies-Los Verdes by asturnet 26 de febreru, 2007 El sábadu pasáu fízose la presentación pública de la coalición Izquierda Xunida-Bloque por Asturies-Los Verdes de cara a les prósimes elecciones autonómiques y municipales del 27 de mayu. La reivindicación d’un marcu estatutariu de másimos centró les intervenciones nesti actu nel que’l candidatu a la presidencia, Jesús Iglesias, aseguró que nun s’apoyaría nenguna reforma que nun contemplara la oficialidá de la llingua asturiana. La coalición preséntase cola fin de garantizar un modelu de desarrollu sostenible que garantice l’actividá económica y industrial, la propuesta d’incorporar una carta de derechos ciudadanos al Estatutu d’Autonomía y la “necesidá d’avanzar nel autogobiernu y reforzar la identidá como pueblu nel marcu d’un Estáu Fe Nel actu escucháronse les intervenciones de Rafael Palacios, Bloque por Asturies, que sobrayó la necesidá de la unión de la izquierda pa evitar la entrada de la derecha nel gobiernu asturianu. Pola so parte Juan Ignacio González, Los Verdes, reclamó na so intervención la defensa de los derechos civiles de la ciudadanía asturiana y la definitiva vertebración xeográfica del paísde mou que s’apoyen a les ales d’Asturies; na so intervención la reforma estatutaria tuvo un papel destacáu esixendo un Estatutu de máximos nel que se reconoza la oficialidá del asturianu. Jesús Iglesias, Izquierda Xunida, candidatu a la presidencia de la coalición Izquierda Xunida-Bloque por Asturies-Los Verdes, sorrayó la necesidá d’algamar un nuevu Estatutu nel que se contemplen les máximes posibilidaes d’autogobiernu, afitando qu’Izquierda Xunida “nun va apoyar un estatutu que nun recueya la oficalidá”. Iglesias criticó la posición del PP énte la reforma estatutaria culpándo a la formación conservadora de la paralisis na reforma de la carta magna asturiana, nesta crítica’l PSOE, col qu’Izquierda Xunida-Bloque por Asturies mantienen un pactu de gobiernu, nun tuvo ausente afitando Iglesias qu’esti partíu nun fizo l’esfuerzu afayadizu pa entamar la reforma na llexislatura que ta a puntu d’acabar. Pa pesllar l’actu de presentación de la coalición intervino Gaspar Llamazares, coordinador xeneral d’Izquierda Xunida. Llamazares rechazó la pretensión de PP y PSOE de considerar les elecciones autonómiques y municipales como unes primaries o revalida pal executivu español; Llamazares consideró qu’eses aciones empobinábense a “tapecer” los grandes problemes de la sociedá. 26 de febreru, 2007 0 FacebookTwitterPinterestEmail
Sociedá El plenu de Carreño refuga l’aprobación de les Ordenances Municipales d’Oficialidá by asturnet 26 de febreru, 2007 El plenu del conceyu de Carreño refugó’l pasáu vienres l’aprobación de les Ordenances Municipales d’Oficialidá presentaes pola organización nacionalista Andecha Astur. Na primer votación PSOE y PP axuntaron los sos 8 votos en contra de l’aprobación contra los 8 votos d’UICA, Andecha Astur y Izquierda Xunida, mientres el conceyal d’URAS s’abstenía, forciando una segunda votación na qu’el votu de calidá del alcalde inclinó la decisión munipal hacia la negativa a l’aprobación del documentu. 26 de febreru, 2007 0 FacebookTwitterPinterestEmail
Sociedá Areces siéntese arguyosu de la voluntariedá educativa del asturianu by asturnet 26 de febreru, 2007 foto1>Vicente Álvarez Areces diz que “crear una llingua cooficial nun tuvo nunca nel programa de los socialistes y creo que vaya tar”. El presidente asturianu faló sobre la llingua nuna entrevista publicada pol diariu El Comercio. Areces considera qu’el PSOE ye’l “primeru que defendió’l bable”, basándose en que la entrada del idioma nel sistema educativu foi durante’l gobiernu socialista. Na entrevista’l presidente del gobiernu asturianu afitóse na so posición de refugar la oficialidá de la llingua asturiana. A la pregunta d’El Comercio sobre la importacia que va dar IX a la oficialidá, de cara a una repetición del alcuerdu de gobiernu, Álvarez Areces evitó entrar en declaraciones centrándose na voluntariedá del aprendizaxe del asturianu de la que dixo que sentíense “arguyosos”. 26 de febreru, 2007 0 FacebookTwitterPinterestEmail
Sociedá Ovidio Sánchez diz que l’asturianu nun ye competitivu nel mundu globalizáu by asturnet 26 de febreru, 2007 El candidatu del Partíu Popular a la presidencia d’Asturies, Ovidio Sánchez, dixo a Canal 10 que “la llingua nun ye competitiva nel mundu globalizáu” durante una entrevista a esta canal televisiva . Sánchez remarcó la so voluntá de que’l marcu llegal del idioma continue como ta anguaño. Na entrevista’l llider popular abrió puertes a un posible pactu de gobiernu con Unión Asturianista. Sánchez defendió un modelu educativu nel que se crearen centros billingües castellano-inglés. Pal presidente del PP n’Asturies el marcu actual ye’l que se tien que desenvolver y nun habría porqué lu cambiar. Ovidio Sánchez foi un de los primeros políticos asturianos en reclamar un Estatutu de máximos pal país; esta situación foi variando radicalmente nel tiempu hasta llegar a les sos posiciones actuales nes que rechaza pidir pal país los máximos niveles d’autogobiernu. 26 de febreru, 2007 0 FacebookTwitterPinterestEmail
Sociedá MIAS denuncia la “desasturianización” del Antroxu Uvieín by asturnet 26 de febreru, 2007 La organización xuvenil vinculada a Izquierda Asturiana emitió un comunicáu nel que denuncia la “desasturianización” de la fiesta del Antroxu d’Uviéu. MIAS criticó l’ausencia d’elementos propios de la cultura asturiana nos actos de cellebración d’estes fiestes. La organización xuvenil considera que se tán dando pasos hacia un “carnaval al estilu tinerfeñu o gaditanu” dexando de llau los elementos asturianos. La nula presencia del asturianu nos programes de festexos, la realización d'”esperpentos” como la cellebración d’una Queimada gallega o l’actuación del grupu arxentín Ráfaga “dexando de llau la promoción de les tradiciones culturales propies como los frixuelos o la música del país” Dende la organización MIAS reclamen de los responsables de festexos “un mínimu de respetu y apreciu pola bayura cultural propia d’Asturies pa evitar la so desapaición”. La organización xuvenil criticó tamién la promoción de la Zarzuela madrileña que se ta desenvolviendo n’Uviéu mientres que nun hai “esmolición por defender les tradiciones milenaries de los les asturianes y asturianos” Mocedá d’Izquierda Asturiana 26 de febreru, 2007 0 FacebookTwitterPinterestEmail
Sociedá Izquierda Xunida y Partíu Popular apoyen la redacción d’una Llei de la Sidra by asturnet 24 de febreru, 2007 La norma ta solicitada pol colectivu de llagareros y tendría como fin regular la producción y consumu de la bebida asturiana. IX y PP quieren axuntar na mesma les diferentes regularizaciones esistentes sobre la sidra. Dende la FSA-PSOE contestóse que primero se tien de desenvolver una normativa estatal sobre l’alcohol. Dende Izquierda Xunida s’afala a la redacción d’un Plan Integral qu’axunte, y coordine, les diferentes aiciones que se vienen desenvolviendo sobre la sidra poles diferentes alministraciones. Jesús Iglesias esplicó qu’el vino tien medíes similares que supusieron una dinamización del sector. Y ye que la sidra ye actualemnte’l tercer subsector de l’agricultura asturiana, por detrás de los subsectores llacteu y cárnicu, amás de representar un bon porcentaxe de les ventes del sector hosteleru del país. El representante del Partíu Popular nel área rural na Xunta Xeneral Luís Pelaez considera que la llei propuesta necesita del consensu de les fuerces polítiques pa entamar la so redacción que nun traería problemes por ser “parte d’Asturies”. Dende la FSA-PSOE apúntase a esperar a qu’una llei estatal regule les bebides alcohóliques pa depués entamar la redacción específica pa una llei de la sidra.. Los tres grupos parlamentarios, PSOE, PP, IX, aprobaron esti mes una proposición non de llei na que s’instaba al Gobiernu asturianu a posicionase a favor de que la sidra reciba un tratamientu específicu. 24 de febreru, 2007 0 FacebookTwitterPinterestEmail