Sociedá L’Academia de la Llingua y SUATEA protesten pol casu de Xurde Blanco by asturnet 15 de marzu, 2007 La máxima autoridá llingüística del país el sindicatu educativu SUATEA denuncien el casu de discriminación que ta sofriendo l’abogáu del Principáu Xurde Blaco por mor d’emplegar l’asturianu pa rellenar un formulariu p’algamar díes de permisu por razones médiques. Dende SUATEA entrúguense si’l “siguiente pasu va ser poner un mecanismu desinhibidor de llingua asturiana en tolos ventanos de los organismos públicos, un aparatu que detecte los asturinismos de los alministraos”. el sindicatu considera urxente y prioritariu universalizar n’Asturies la equiparación de derechos mediante la oficialidá del asturianu. L’Academia de la Llingua Asturiana denuncia la “gravedá que supón la negativa de la Conseyería de la Presidencia del Principáu d’Asturies a tramitarles solicitúes de permisu d’un funcionariu de los sos Servicios Xurídicos pa ser sometíu a pruebes médiques nel Hospital Central d’Asturies, poniendo como xida pa ello l’emplegu de la llingua asturiana na mentada solicitú”. Esto supón pa l’Academia un fechu “inalmisible y vergoñosu” nel que se “pon en xuegu” la salú d’una persona. Asina meso la institución llingüítica considera qu’esti fechu ye un “retrocesu ensin precedentes na reconocencia de los derechos llingüísticos”. Pa l’ALLA esti fechu espeya les llimitaciones de la Llei d’Usu. 15 de marzu, 2007 0 FacebookTwitterPinterestEmail
Sociedá L’Observatoriu de la Política Llingüística reclama la Oficialidá by asturnet 14 de marzu, 2007 L’organismu consultivu de la Oficina de Política Llingüística fizo ayeri un balance de los cuatro años de llexilatura. Dende l’Observatoriu consideren que les medíes adoptaes son insuficientes si bien consideren qu’hebo un esfuerzu dende l’Administración pola normalización del idioma. Taresa Llorences y Ismael González Arias presentaron ayeri les conclusiones d’esti órganu consultivu. L’ausencia de midíes empobinaes a la visualización del idioma nes campañes institucionales, el non reconocimientu de la especialidá de llingua asturiana pal profesoráu non universitariu y la escasa presencia del idioma nel ente públicu de comunicación centraron les crítiques d’esti órganu. La dificultá de cumplir la Llei d’Usu, la inestabilidá de los servicios de normalización municipales son dalgunos de los puntos señalaos dende l’Observatoriu de la Política Llingüística. “La falta d’enfotu del pactu de gobiernu” na normalización social del idioma, asina como les inercies de l’administración son tamién dalgunos de los puntos criticaos dende l’Observatoriu. Esti órganu detecta la “existencia d’un sector duru” del asturianismu que refuga cualesquier avance na xera de la normalización. Pal órganu asesor de la Política Llingüística estos cuatro años nun supunsieron un periodu de sombres asina l’aprobación del primer Plan de Normalización Llingüísitica y la creación de la Rede Municipal de Servicios de Normalización son pasos que dende l’Obsevatoriu de la Política LLlingüística considérense esenciales. 14 de marzu, 2007 0 FacebookTwitterPinterestEmail
Sociedá Les organizaciones de defensa de los derechos denuncien la discriminación que sofre Xurde Blanco by asturnet 14 de marzu, 2007 La refuga de la conseyería de la Presidencia a tramitar les solicitues del abogáu del Principáu, Xurde Blanco, pa recibir un tratamientu cardiolóxicu ta recibiendo crítiques dende organizaciones como la Xunta pola Defensa de la Llingua Asturiana o l’asociación de Trabayadores de la Normalización Llingüística. Dende la XPDLA denúnciase l’actitú “hipócrita del Gobiernu asturianu” por prohibir y reprimir l’usu del asturianu p’acceder a los derechos llaborales más básicos. L’Asociación de Trabayadores de la Normalización Llingüística amuesen el so esmolecimientu pola discriminación y reducción de derechos que sofre Xurde Blanco por usar la llingua asturiana a la hora de solicitar los permisos a los que tien derechu. Dende esta Asociación se recuerden los diferentes marcos xurídicos nos qu’en tolos casos se recuye’l derechu a non ser discrimináu pol usu del idioma. L’asociación de Trabayadores pa la Normalización Llinmgüísitica reafírmase na falta de voluntá política como’l problema más grande a la hora de normalizar l’asturianu y defender los derechos llingüísticos de los sos falantes. Asina l’asociación de trabayadores propón que dende’l Gobiernu asturianu envede discriminar se tien que propiciar un marcu nuevu nel que la ciudadanía falante d’asturianu tenga reconocíos los sos derechos fundamentales, pa qu’asina nun se vuelvan a repetir actuaciones como les de la Conseyería de la Presidencia. 14 de marzu, 2007 0 FacebookTwitterPinterestEmail
Sociedá Izquierda Asturiana propón que’l nuevu edificiu de la fábrica de Tabacos abellugue una Escuela Municipal de Música by asturnet 13 de marzu, 2007 La organización nacionalista basa la so porpuesta na necesidá de dotar a la ciudá d’un espaciu educativu específicu dedicáu a la música tradicional asturiano. El candidatu a l’alcadía y portavoz d’Izquierda Asturiana de Xixón, Pablo Rodríguez Alonso, propunso que los espacios de la Fábrica de Tabacos de Cimavilla s’empobine a la creación d’una Escuela de Música Tradicional. Pal dirixente nacionalista l’interés amuesáu polos asturianos y los xixoneses pa la música del país fae que seya “obligación del conceyu de Xixón atender a esti interés, amás de valir como forma de conservar el padremuñu asturiano”. El candidatu nacionalista considera que “otres clases de música yá tienen en Xixón el favor del Conceyu, polo que yá ye hora de que la música asturiano en mayúscules tenga nesta ciudá un llugar dignu pal so enseñu y divulgación, como yá asocede n’otres ciudaes como la cercana Uviéu, onde va delos años hai una Escuela de Música Tradicional Municipal que cuenta con un bon númberu d’alumnos”.<`/p> IAS propón un usu públicu pa la Fábrica de Tabaco de Cimavilla 13 de marzu, 2007 0 FacebookTwitterPinterestEmail
Sociedá La Conseyería de la Presidencia rechaza la solicitú de Xurde Blanco pa ser operáu por tar n’asturianu by asturnet 13 de marzu, 2007 Xurde Blanco, lletráu de l’administración y miembru de Xuristes pol Asturianu, sofrió dos infartos y va ser interveníu güei, a pesar de nun disponer de l’autorización de la Conseyería de la Presidencia por redactar la solicitú n’asturianu. L’abogáu del Principáu vien sofriendo la negativa de la Conseyería de la Presidencia a tramitar les sos peticiones dende hai tiempu por escribiles en llingua asturiana. Xurde Blanco lleva tiempu ensin poder disfrutar de vacaciones, de díes de permisu por cubrir los formularios n’asturianu. La última petición, venceyada a les sos dolencies cardiaques, ye del pasáu 5 de marzu cuando cubrió’l formulariu pa solicitar el permisu por causes médiques por mor de la operación de corazón a la que se va someter güei. L’impresu administrativu ta redactáu en castellano y el lletráu del Principáu rellenó los diferentes campos n’asturianu “por dignidá personal”. Na respuesta del Serviciu Xurídicu Asturianu se diz qu’anque la Llei 1/1998 del Asturianu se diga que los ciudadanos tienen derechu a dirixise n’asturianu a l’admnistración non especifica nada sobre’l derechu de los trabayadores de la propia administración a emplegar la llingua nos asuntos internos. Dende Asturnews queremos desea-y a Xurde Blanco una pronta recuperación de les sos dolencies cardiaques. 13 de marzu, 2007 0 FacebookTwitterPinterestEmail
Sociedá Reportaxe sobre’l celtismu na National Geografic by asturnet 12 de marzu, 2007 La edición interactiva de la National Geographic Society inclui un reportaxe sobre los pueblos celtes. El reportaxe dixital recorre los principales venceyos de los pueblos dedicando la mayor parte del so tiempu a los países británicos dexa un espaciu pa Galiza y Asturies. El documentu ye un complementu a un reportaxe publicáu durante l’añu 2005 na revista americana. Col títulu “El Reinu Celta” la revista americana analiza la vitalidá de la cultura celta d’anguaño, dende una visión poética de los pueblos d’herencia celta. El reportaxe, n’inglés, ta nel espaciu web de la National Geographic Society. El reportaxe ye obra de Tom O’Neill, acompañáu de les imáxenes de Jim Richardson 12 de marzu, 2007 0 FacebookTwitterPinterestEmail
Sociedá La Xunta Xeneral esixe a la Conseyería d’Administración Pública que rectifique nel casu de TeleAsturias. by asturnet 9 de marzu, 2007 La proposición non de llei presentada pol Grupu Parlamentariu d’Izquierda Xunida pa que la Conseyería d’Administración Pública restituya la señal televisica a TeleAsturias algama l’apoyu del Partíu Popular y sal alantre col votu en contra del Grupu Socialista na Cámara Asturiana. Valledor da diez díes de plazu pa que Iturrioz rectifique la so decisión. Noemí Martín considera que ye una “obligación moral” del executivu executar el mandáu de la Xunta Xeneral. Otru de los puntos más polémicos, y históricos, de la llexislatura, la entrada dientro del sistema de salú públicu del Hospital Grande Covián llegó ayeri al so final cola decisión de la Xunta Xeneral d’aprobar la proposición non de llei del Grupu Parlamentariu d’Izquierda Xunida pa que s’instara al executivu a esta medía. L’alcuerdu d’última hora ente los dos grupos del gobiernu del país evitó una nueva derrota de la mayoría socialista nel Parlamentu asturianu. El Conseyeru de Xusticia, Seguridá Pública y Relaciones Esteriores da un plazu de diez díes pa que la Conseyería d’Administración Pública cumpla’l mandáu de la Xunta Xeneral. 9 de marzu, 2007 0 FacebookTwitterPinterestEmail
Sociedá Concursu de Cuentos pola Oficialidá by asturnet 8 de marzu, 2007 El Conceyu Bimenes ta acabante de convocar el Concursu de Cuentos pola Oficialidá del Asturianu, questi añu llega a la so décima edición. Los cuentos a presentar tienen de tar redactaos en llingua asturiana y ser inéditos. Aquelles persones interesaes en participar tienen que facer llegar a la Casa la Cultura de Bimenes (Santuyano, s/n. CP 33527 Bimenes) lorixinal, tres copies y una copia en versión informática. El plazu pa la presentación de trabayos final sábadu 9 de xunu. Los premios afitaos son los que vienen darréu: 800 pal primer premiu; 500 pal segundu y 350 pal terceru. Lactu istitucional dentrega de premios sedrál vienres 13 de xunetu, coincidiendo coles cellebraciones de la Fiesta de la Oficialidá de la Llingua Asturiana. 8 de marzu, 2007 0 FacebookTwitterPinterestEmail
Sociedá Ésitu de la puya d’obres d’arte pola oficialidá del CAO by asturnet 8 de marzu, 2007 El Conceyu Abiertu pola Oficialidá fizo ayeri la puya de la III Amuesa d’Obres d’Arte pola Oficialidá. La plataforma xunitaria de defensa de la oficialidá algamó pola puya de les 38 pieces vendíes la cantidá de 13.189. Na puya d’ayeri hebo una bona representación del arcu políticu asturianu, dende’l Conseyeru de Xusticia, Francisco Javier García Valledor, al conceyal del Partíu Popular uvieín Agustín Iglesias Caunedo o José Suárez Arias-Cachero “Felechosa” que puyó en nome del alcalde d’Uviéu, Gabino de Lorenzo. 8 de marzu, 2007 0 FacebookTwitterPinterestEmail
Sociedá El Partíu Popular de Siero apostaría pola cultura asturiana si llega al poder by asturnet 8 de marzu, 2007 El portavoz del PP de Siero, José Antonio Noval, dio anuncia de qu’una de les prioridaes del so grupu, si llega al poder nel conceyu, sería preservar y potenciar la cultura asturiana. Pa ello los conservadores de Siero proponen fomentar la difusión y la enseñanza de la cultura asturiana nel conceyu. Nel ámbitu de la normalización, José Antonio Noval propón la rotulación billingüe de les dependencies municipales, el fomentu del teatru asturianu y la potenciación de la tradición oral nes sidreríes. 8 de marzu, 2007 0 FacebookTwitterPinterestEmail