Sociedá La reinvidicación de la oficialidá del asturianu va enllenar les cais dUviéu esti vienres by asturnet 2 de mayu, 2007 Redacción. La XPDLA, a sabiendes de que “nel mes de mayu n’Asturies vamos vivir un procesu electoral. Nel van escoyese los nuesos representantes na Xunta Xeneral y d’ehí va salir el gobiernu asturianu futuru” y que “la llexislatura que vien va ser la de la reforma del Estatutu d’Autonomía asturianu y tien que ser tamien la de la reconocencia estatutaria de la oficialidá” convoca una manifestación pa esti vienres, con salida de la Estación d’Uvieu a les siete la tarde. Nel comunicáu que da anuncia d’esta manifestación, la XPDLA diz qu’“Anque haya partíos que nun incluyan (la oficialidá) nos sos programes electorales eso nun va esconder la realidá d’una demanda pola que llevamos lluchando demasiaos años: la reconocencia de la igualdá xurídica de tolos asturianos y asturianes falen la llingua que falen”. Faen referencia, tamien nesi comunicáu, a los casos de represión llingüística que se dieron nos últimos tiempos “un doctorando al que la Universidá nun-y tramita la tesis por pidilo n’asturianu, un profesor al que l’alministración educativa nun-y almite papeles por tar n’asturianu, un funcionariu al que los sos xefes nun-y acepten impresos cubiertos n’asturianu, etc.”, recordando que “nun pue haber garantíes xurídiques si la llingua nun ye oficial”. 2 de mayu, 2007 0 FacebookTwitterPinterestEmail
Sociedá La XPDLA convoca una manifestación pola oficialidá de la llingua asturiana pal Día de les Lletres by asturnet 1 de mayu, 2007 Redacción. La Xunta pola Defensa de la Llingua Asturiana (XPDLA) convoca pal próximu vienres 4 de mayu, la yá tradicional manifestación pola oficialidá de la llingua asturiana del Día de les Lletres. La marcha va salir a les siete la tarde de la Estación del Norte d’Uvieu y va llegar hasta les puertes del Teatru Campoamor, onde l’Academia de la Llingua Asturiana va celebrar la so Xunta Estraordinaria añal. Nel comunicáu que da anuncia d’esta manifestación, la XPDLA diz qu’“Anque haya partíos que nun incluyan (la oficialidá) nos sos programes electorales eso nun va esconder la realidá d’una demanda pola que llevamos lluchando demasiaos años: la reconocencia de la igualdá xurídica de tolos asturianos y asturianes falen la llingua que falen”. Faen referencia, tamien nesi comunicáu, a los casos de represión llingüística que se dieron nos últimos tiempos “un doctorando al que la Universidá nun-y tramita la tesis por pidilo n’asturianu, un profesor al que l’alministración educativa nun-y almite papeles por tar n’asturianu, un funcionariu al que los sos xefes nun-y acepten impresos cubiertos n’asturianu, etc.”, recordando que “nun pue haber garantíes xurídiques si la llingua nun ye oficial”. 1 de mayu, 2007 0 FacebookTwitterPinterestEmail
Sociedá Venti escritores denuncien el tratu del Gobiernu dAsturies pa col asturianu coincidiendo cola inauguración de la Selmana de les Lletres by asturnet 26 d'abril, 2007 Redacción. Un grupu de venti escritores en llingua asturiana emitió güei un comunicáu “refugando los honores que mos ufierta’l Gobiernu del Principáu con motivu de la Selmana de les Lletres Asturianes”, nel mesmu dicíen que “los escritores qu’emplegamos la Llingua Asturiana pa facer lliteratura somos, antes qu’escritores, persones que falamos y escribimos n’asturianu na nuestra vida diaria como ciudadanos”. Nel comunicáu denuncien “les actuaciones direutamente represives (y, polo tanto, illegales) escontra ciudadanos asturianos que quieren utilizar la so llingua propia con normalidá n’ámbitos d’usu distintos a los familiares o puramente lliterarios” y solidarícense “colos ciudadanos (represariaos direutamente) y col pueblu asturianu en xeneral”. El comunicáu fírmenlu una representación de venti autores pertenecientes a toles sensibilidaes lliteraries y polítiques: Lourdes Álvarez, Ánxel Álvarez Llano, Nel Caldevilla Vega, Xose Lluís Campal, Sixto Cortina, L.luis Fernández Álvarez, Vicente García Oliva, Humberto González, Sabel López Labrada, Inaciu Llope, Pablo Antón Marín Estrada, Xandru Martino Ruz, Marta Mori d’Arriba, Xose Nel Riesgo, David Rivas, Pablo Rodríguez Alonso, Carlos Rubiera, Xuan Xose Sánchez Vicente, Xulio Viejo y Xulio Vixil Castañón. El Manifiestu d’Escritores Asturianos completu 26 d'abril, 2007 0 FacebookTwitterPinterestEmail
Sociedá MANIFIESTU DESCRITORES ASTURIANOS by asturnet 26 d'abril, 2007 Los escritores qu’embaxo se nomen, con motivu los actos institucionales de la Selmana de les Lletres Asturianes 2007 qu’entama la Conseyería de Cultura, comunicación Social y Turismu del Principáu d’Asturies MANIFIESTEN: Los escritores qu’emplegamos la Llingua Asturiana pa facer lliteratura somos, antes qu’escritores, persones que falamos y escribimos n’asturianu na nuestra vida diaria como ciudadanos. Por ello, perriba de que se nos reconoza’l nuestru trabayu creativu como escritores, queremos que se nos reconozan y garanticen plenos drechos como ciudadanos que fales y escriben l’asturianu. Esos drechos como falantes de la nuestra llingua materna tán espresamente recoyíos na Carta Europa de les Llingües Rexonales y Minoritaries (suscrita pol Estáu español) y nel artículáu de la Constitución Española en vigor (mui especialmente nel art. 3.2, qu’afita: “Las demás lenguas españolas –amás del castellán- serán tambien oficiales en sus respectivas comunidades autónomas”); asina como taimen nel ordenamientu xurídicu asturianu (Estatutu d’Autonomía d’Asturies y Llei d’Usu y Promoción del Asturianu), inda de forma insuficiente. Especialmente llamentable vien siendo’l facer de les instituciones del Gobiernu del Principáu d’Asturies. Yá que, arriendes d’incumplir pa col ordenamientu xurídicu de la comunidá autónoma no que cinca a la promoción, difusión y enseñanza de la llingua, nos últimos meses tán propiciando actuaciones direutamente represives (y, polo tanto, illegales) escontra ciudadanos asturianos que quieren utilizar la so llingua propia con normalidá n’ámbitos d’usu distintos a los familiares o puramente lliterarios; situación esta que nun se da nel restu les comunidaes con llingua propia dende va munchos años. Gravísimes son, nesi sen, les recientes actuaciones represives escontra los señores Xurde Blanco y Xose Nel Comba (funcionarios del propiu Principáu) por usar l’asturianu escritu na alministración; como lo ye tamien l’anuncia del Gobiernu asturianu y la Universidá d’Uvieu nel atropellu al doctorando Sr. Faustino Zapico, torgándo-y la presentación del so trabayu academicu n’asturianu; la complacencia del Gobiernu ente actuaciones asemeyaes d’instituciones dependientes del Principáu; el tratu dau al asturianu nes emisones de la reacien creada radiotelevisión pública o’l tratamientu dau al asturianu nel recien aprobáu curriculu d’enseñanza; lo que, de por xunto, confgura la triste semeya reciente de la marxinación y la represión llingüística que sufren la Llingua Asturiana y los sos falantes. Por ello, los escritores que figuren embaxo, nun actu cívicu, pacíficu y simbólicu de protestas escontra esta inxusta situación, en solidaridá colos ciudadanos enantes aludíos y col pueblu asturianu en xeneral, apauten lo siguiente: Refugar los honores que mos ufierta’l Gobiernu del Principáu con motivu de la Selmana de les Lletres Asturianes y encamentá-y al mesmu que los tresllade a la propia llingua, de la que namás somos heriedes y tresmisores; equiparándola social y xurídicamente coles demás llingües españoles, tal como manda la Constitución, y honrando asina la memoria de los nuesos antepasaos y a tola xente que la tuvo y tien como propia dende va más de 1.000 años. Denunciar l’actual situación de discriminación y represión de los ciudadanos asturianos no que cinca a los sos drechos llingüísticos; faciendo llegar esta denuncia, per tolos medios de que dispongamos, al conxuntu de la sociedá asturiana y española, asina como a les instituciones asturianes, españoles y europees que seyan competentes pal casu. Afalar al conxuntu la sociedá pa desixir, de forma clara y rotunda, la plena oficialidá de la llingua asturiana y la igualdá de drechos de los asturianos colos demás ciudadanos del Estáu español. N’Asturies, a 26 d’abril de 2007; col preste y la robla de: Álvarez García, Lourdes Álvarez Llano, Ánxel Caldevilla Vega, Nel Campal, Xose Lluís Cortina Cortina, Sixto Fernández Álvarez, L.luis García Oliva, Vicente González, Humberto López Labrada, Sabel Llope, Inaciu Marín Estrada, Pablo Antón Martino Ruz, Xandru Mori d’Arriba, Marta Riesgo, Xose Nel Rivas, David Rodríguez Alonso, Pablo Rubiera Tuya, Carlos Sánchez Vicente, Xuan Xose Viejo, Xulio Vixil Castañón, Xulio 26 d'abril, 2007 0 FacebookTwitterPinterestEmail
Sociedá Xulio Vixil Castañón va recibir el I Premiu Sonadía quotorga la Mancomunidá de la Sidra by asturnet 25 d'abril, 2007 Redacción. El xuráu de la primer edición del Premiu ‘Sonadía’, formáu por Eloi Antuña Zamarro, Daniel Cueli Canto, Xicu Xabel Díaz Yepes y Francisco de Borja Márquez, actuando como secretariu Xermán Fierro Martínez, responsable del Serviciu de Normalización Llingüística de la Comarca de la Sidra, decidieron concede-y el Primer Premiu “Sonadía” a Xulio Vixil Castañón, escritor y estudiosu de la filoloxía asturiana. Esti nuevu premiu quier otorgase a persones, entidaes y asociaciones que tengan destacao pol so llabor de sofitu a la llingua asturiana dientro de la Mancomunidá Comarca de la Sidra y cuenta col sofitu de la Conseyería de Cultura. Xulio Vixil, ta consideráu ún de los meyores escritores asturianos, con obres como ‘El Paraísu Blancu’ o ‘L’Inmoral’. Tien una presencia destacada nel tarren de la reivindicación llingüística, milita na Xunta pola Defensa de la Llingua Asturiana, y collabora con Radio Sele. Tien fechos dellos trabayos sobre la toponimia y sobre ún de los aspeutos más carauterísticos de la fala del so conceyu, Bimenes: la metafonía. La entrega va facese’l próximu miercoles día 2 de mayu nel centru cultural San Xuan de Capistrano de Villaviciosa a partir de les siete y media, nun actu nel que van actuar los cantantes de tonada Tuya y Estrada, componentes del dúu “Astur” y que s’afaya dientro de los actos oficiales de la XXVIII Selmana de les Lletres Asturianes. 25 d'abril, 2007 0 FacebookTwitterPinterestEmail
Sociedá Marta Mori dArriba va tomar posesión como nuevu Miembru de Númberu de lAcademia de la Llingua Asturiana by asturnet 23 d'abril, 2007 Redacción. Según anuncia la propia Institución, el próximu día 4 de mayu a les ocho la tarde, l’Academia de la Llingua Asturiana va celebrar l’actu oficial del Día de les Lletres Asturianes, qu’esti añu llega a la so edición ventiocho volviendo al so llugar hestóricu de celebración, el Teatru Campoamor. Va abrir l’actu l’entamu musical de la gaitera Andrea FernándezJoglar al que siguirá la Xunta Estraordinaria de l’Academia de la Llingua Asturiana, col discursu institucional de la Presidenta, Ana Mª Cano. Nesta Xunta Estraordinaria va nomase Miembru de Númberu a la profesora ya investigadora Marta Mori d’Arriba. Col nomamientu de Mori “l’Academia de la Llingua Asturiana quier reconocer la fondura de la so contribución científica, lliteraria y docente al procesu de recuperación llingüística n’Asturies y facer posible, al empar, qu’esa valible contribución pueda enanchase col so trabayu dientro de la propia institución”. Los sones del grupu folk Tejedor van poner puntu final a esti XXVIII Día de les Lletres Asturianes. L’ALLA organiza una espicha, abierta a tol públicu, nel restorán ‘La Gruta’ d’Uvieu. 23 d'abril, 2007 0 FacebookTwitterPinterestEmail
Sociedá El Gobiernu escaez l’asturianu de la web pa les eleiciones 2007 by asturnet 21 d'abril, 2007 Por cenciello que resulte facer una versión n’asturianu de la web pola que se van poer seguir n’Asturies les eleiciones, el Gobiernu nun tuvo en cuenta la posibilidá y nun ufierta más que desplicaciones en castellán na páxina presentada esti día pola Conseyera de la Presidencia, María José Ramos. La web pue consultase na direición www.eleccionesasturias2007.es y trata de facilitar un mayor conocimientu del procesu electoral a tolos organismos, entidaes y ciudadanos en xeneral, menos a los que falen asturianu. “Nuestro objetivo es que sea la principal herramienta para los comicios” afitó María José Ramos al desplica los principales contenidos de la web que ta compuesta de dos enlaces. Ún d’ellos va permitir entrar na web electoral, mentantu que l’otru refierse a los resultaos del escrutiniu, que como nos anteriores comicios, habilitarase’l 27 de mayo y va permitir consultar en tiempu real los resultaos de les eleiciones a la Xunta Xeneral. 21 d'abril, 2007 0 FacebookTwitterPinterestEmail
Sociedá Humberto González, escritor en llingua asturiana y xestor cultural, na llista del Partíu Popular de Xixón by asturnet 19 d'abril, 2007 Redacción. Dempues del anunciu va unes selmanes de la inclusión del hestóricu nacionalista Xose Suárez Arias-Cachero ‘Felechosa’ na llista del PP pal conceyu d’Uvieu, la inclusión d’Humberto González na llista del PP de Xixón, nel númberu 16 de la llista, súmase a los movimientos d’acercamientu a posiciones asturianistes de los populares. Según fontes mui cercanes, Humberto González va participar na reorganización del Partíu Popular de Xixón, con un cargu internu entovía ensin definir. Esta tarde, a les ocho y media va presentase na sede del PP de Xixón, la semeya oficial de candidatos, na que tará González, xunto a la candidata a l’alcaldía, Pilar Fernández Pardo. Humberto González (Figareo, 1961) ye escritor y xestor cultural, organizó delles Xuntes d’Escritores nos años noventa y participó de l’actividá de la Xunta pola Defensa de la Llingua Asturiana, de la que foi Secretariu Nacional. Foi miembru del Partíu Asturianista a principios de los noventa. L’añu pasáu impulsó la celebración de l’Arribada en Xixón. 19 d'abril, 2007 0 FacebookTwitterPinterestEmail
Sociedá La Xunta pola Defensa de la Llingua Asturiana critica les declaraciones de Gabino de Lorenzo sobre lasturianu by asturnet 17 d'abril, 2007 Redacción La Xunta pola Defensa de la Llingua Asturiana (XPDLA) emitió ayeri un comunicáu nel que criticaba les declaraciones de Gabino de Lorenzo, alcalde d’Uvieu y vicepresidente del Partíu Popular d’Asturies. Anque nel comunicáu reconocen que “nos últimos tiempos el Partíu Popular d’Asturies vien faciendo xestos a favor de la llingua asturiana. Mesmamente, a favor de la oficialidá, como nel casu del votu favorable de los conceyales populares nes mociones presentaes nos Conceyos de Siero, Villaviciosa y Samartín del Rei Aurelio”, a la organización nun-y presten les declaraciones del alcalde uvieín “a favor del asturianu pero refugando la cooficialidá”. Pa la XPDLA ye “una grave contradicción” que “nun son a comprender nun partíu que n’otres comunidaes autónomes tien una postura distinta dafechu” y ye que De Lorenzo comentó nes sos declaraciones qu’“había que-y echar una mano al asturianu pa que nun morriera, pero qu’eso nun significaba la cooficialidá”. La XPDLA diz-y a Gabino que “nun se pue tar en misa y repicando” y que “si quier salvar l’asturianu, como diz, entame una política llingüística seria nel so conceyu”. Comunicáu completu de la XPDLA 17 d'abril, 2007 0 FacebookTwitterPinterestEmail
Sociedá Esti martes 17 presentase’l llibru “Histories del Balonmano Ciudá Naranco” de Miliol del Nido by asturnet 16 d'abril, 2007 Esti martes 17 dabril, a les 21 hores, va facese nel chigre de la Xunta, La Casa Posafuelles (C/La Cuesta la Vega 10, Uviéu), la presentación del llibru “Histories del Balonmano Ciudá Naranco”, del que ye autor Miliol del Nido. El llibru, espublizáu pola editorial Trabe, recueye la historia y anécdotes de cinco años decisivos pal equipu, de 1979 a 1984. 16 d'abril, 2007 0 FacebookTwitterPinterestEmail