Sociedá Aconceyamientu de Xuristes pol Asturianu súmase a les protestes pola redaición del currículu by asturnet 29 de xineru, 2008 L’Aconceyamientu de Xuristes pol Asturianu denunciarña mañana; nuna carta al Conseyeru d’Educación que’l borrador de currículu pa la enseñanza infantil ye talamente una copia d’un testu fechu pa la educación de los neños de territorios nos que nun se fala otra llingua que nun seya’l castellán. Según los xuristes faen saber a Jose Luis Iglesias Riopedre, esti tratamientu del asturianu nel borrador dexa a los escolinos de la rexón ensin posibilidá de formase na so llingua propia nos primeros años d’escolarización, dalgó que choca dafechu escontra la Llei d’usu y promoción del asturianu, escontra l’estatutu d’autonomía y escontra la Carta Europea de les Llingües Rexonales o Minoritaries. Poro, Xurde Blanco, como secretariu y representante de los xuristes asturianos, reclama a la conseyería la reforma del proyeutu de Decretu pa la educación infantil. Amás y “nel sen de reconocer el calter vehicular de la llingua asturiana na enseñanza infantil, como desixe la Carta Europea de les Llingües Rexonales o Minoritaries” recuerda-y a Riopedre, aprovechando la condición de gallegu del conseyeru d’educación, como seríen les formules emplegaes en Galicia pa la proteición de la so llingüa nel casu d’Asturies. Son les que siguen: L’Estatutu d’Autonomía determina nel so artículu 4 que se promoverá la enseñanza del bable acordies colo establecío nuna llei del Principáu d’Asturies pa la so proteición, usu y promoción. Cumpliendo col mandáu, la Llei 1/1998, de 23 de marzu, nel so artículu 10.1 establez que’l Principáu d’Asturies garantizará la enseñanza del bable/asturianu en tolos niveles y graos, y nel 2 que’l rexime de proteición, respetu, procuru y desendolcu afitáu pal bable/asturianu enancharáse al gallego-asturianu nes fasteres nes que tien calter de modalidá llingüística propia. D’otra miente, l’artículu 8 de la Carta Europea de les Llingües Rexonales o Minoritaries, nos terminos del instrumentu de ratificación por España, contien el compromisu del Estáu de prever una educación preescolar garantizada nes llingües rexonales que los Estatutos d’Autonomía protexen y amparen. Poro, los profesores tienen d’emplegar na clas la llingua materna de los escolinos, asturianu o castellán, arriendes de curiar de qu’estos alquieran la conocencia de la otra llingua de forma oral y escrita. Nel determín tien de participar tol equipu docente. Los centros educativos informarán a les families sobro les ventaxes d’algamar un billingüismu equilibráu y arriquecedor col envís de que participen na toma de decisiones. La escuela emplegará material con dibuxos y pallabres o testos curtios n’asturianu y castellán pa que nun se xeneren desaxustes pente lo que los neños ven y lo que sienten dicir. Aconceyamientu de Xuristes pol asturianu 29 de xineru, 2008 0 FacebookTwitterPinterestEmail
Sociedá Gozón y Carreño van acoyer dos campañes pa fomentar la normalización nel comerciu y la hostelería by asturnet 29 de xineru, 2008 Los comercios y los establecimientos hosteleros de Gozón y Carreño, conceyos integraos na Mancomunidá del Cabu Peñes van participar dende esti mes en dos nueves campañes de normalización llingüística asemeyaes a les que se fixeron haz poco n’Aviles o en Mieres. Les iniciatives, entitulaes “Comerciu asturianu: lo que quies, lo que necesites, lo que te presta” y “Mueyate cola llingua”, parten del Serviciu de Normalización Llingüística de la Mancomunidá y van consistir nel repartu ente los comerciantes d’elementos como cartelos pa los precios, bolses, elementos de señalización n’asturianu, posavasos o un CD pa poder tornar la carta’l restorán. Les dos campañes cunten amás cola collaboración de la Conseyería de Cultura y Turismu del Principáu pa llegar a un presupuestu total de 4.000 euros, 2000 por campaña. Los comercios interesaos en participar na iniciativa puen pidir el material correspondiente poniendose en contautu cola Mancomunidá del Cabu Peñes al travies del númberu de telefonu 985 88 35 32. 29 de xineru, 2008 0 FacebookTwitterPinterestEmail
Sociedá La Xunta denuncia qu’un colexu Xixón enfrenta l’asturianu a la llingua de señes by asturnet 26 de xineru, 2008 La Xunta Pola Defensa de la Llingua denunció güei d’un comunicáu que’l colexu públicu Ríu Piles de Xixón enfrenta l’asignatura de Llingua Asturiana a la de Llingua Señes, dao que los alumnos que cursen una nun puen elixir la otra. Según la Xunta, “nesti centru impártese la Llingua de Señes, emplegada por persones con dispacidaes auditives, como asignatura alternativa d’asturianu, tornando pela vía de los fechos al asturianu nuna asignatura optativa, en vez d’una voluntaria, como ta establecío per Llei nel testu del currículu d’Enseñanza Primaria”. Aludiendo a la Llei de Promoción y Usu, la Xunta recordó que “ésta impide espresamente que l’estudiu de la ‘llingua’ puea competir con otres materies, pa evitar la discriminación de los alumnos que la escueyen, al non tener accesu a la mesma formación qu’aquellos que nun la escueyen”. La Xunta señaló la “responsabilidá de la Conseyería d’Educación nestos casos, y que la inspeición educativa nun actúa nestes maniobres, que cuenten cola aprobación de la Conseyería”. 26 de xineru, 2008 0 FacebookTwitterPinterestEmail
Sociedá El descalabru de la izquierda nacionalista sigue cola desapaición de Mocedá d’Izquierda Asturiana (MIAS) by asturnet 25 de xineru, 2008 Nun comunicáu emitíu esta mañana, la estaya xuvenil dIzquierda Asturiana, MIAS, anunciaba la so disolución como estaya xuvenil vinculada a Izquierda Asturiana. La despaición desti coleutivu bien a sumase a los graves problemes que bien viviendo la coalición UNIDÁ dende los sos entamos. Una coalición que ñacía de la xunión electoral ente Izquierda Asturiana, parte dAndecha Astur y una escisión de Los Verdes, quabandonaron al pocu la coalición. Esti abandonu supón un nuevu golpe pa esti proyectu políticu que ñaciere col envís daxuntar a la esquierda nacionalista asturiana y que paez que nun algamó los sos oxetivos. La organización xuvenil MIAS -Mocedá d’Izquierda Asturiana-, aconceyada la so militancia na IV Asamblea Xeneral, celebrada’l pasáu sábadu 19 de xineru de 2008 n’Uviéu decidió por unanimidá, dempués d’un llargu discutiniu nos últimos meses, anunciar el fin de la so actividá nel marcu d’actuación del partíu Izquierda Asturiana disolviéndose como organización. Los motivos que lleven a les y los militantes de MIAS a tomar esta decisión murnia en tolos sentíos “, espliquen nel comunicá, tan xeneraos por discrepancies cola estratexa política que vien aprobando Izquierda Asturiana nos últimos tiempos, que provocaron una falta de sintonía ente les propuestes que salíen dende la estaya moza y les resoluciones de los Alcuentros Nacionales d’Izquierda Asturiana MIAS, poro, considerando non viable’l so propiu proyectu d’esistencia nesti marcu d’actuación, opónse asina, claramente, a convertise nun pilancu nel procesu d’apueste estratéxicu d’Izquierda Asturiana -la coalición Unidá- que ponga torgues al mesmu, condicionando la so dinámica de trabayu y discutiniu, y dexando llibre’l camín a IAS nel ámbetu de la mocedá. Asinamesmo, siguel comunicáu, los y les militantes de MIAS quieren facer anuncia, tamién, del so rechazu a abandonar la vida política asturiana activa y la defensa de los principios y finxos ideolóxicos que, según les bases fundacionales d’Izquierda Asturiana y, dende va casi trés años, vienen defendiendo ente la mocedá pa la consecución d’una Asturies sostenible col mediu ambiente, xusta socialmente y llibre, polo que nes próximes selmanes perfilarán y presentarán un nuevu espaciu asociativu que seya plataforma dende la que siguir lluchando por da-y otra traza a esti País. Pa finar, los y les militantes de MIAS quieren esclariar qu’esta decisión nun guarda rellación dala cola xusta decisión tomada por Izquierda Asturiana na espulsión del conceyal Jose Ángel García “Allende” de Piloña, fechu que cuntó col respaldu total de la organización de mocedá. 25 de xineru, 2008 0 FacebookTwitterPinterestEmail
Sociedá Izquierda Xunida va homenaxear a Anita Sirgo, hestórica militante del Partíu Comunista by asturnet 25 de xineru, 2008 Izquierda Xunida va homenaxear esti vienres 25 de xineru en La Felguera a Anita Sirgo, hestórica militante del Partíu Comunista y una de les participantes mas actives durante les fuelgues mineres del 62. El actu, al que ta previsto qu’asistan más de 400 persones, van asistir el Coordinador Federal d’IX, Gaspar Llamazares y la candidata d’IX al congresu, Laura González, va entamar a les 17:30 nel Hotel Palacio de las Nieves. Con esti reconocimientu a la llabor d’Anita Sirgo, IX quier homenaxear, por estensión a toda una xeneración de muyeres que llucharon escontra la Dictadura y en favor de la llibertá. “Ye un homenaxe nun namái a la trayectoria d’Anita Sirgo sinón a tolo que ella representa nuna vida enllena de llucha, coherencia y trabayu a favor de les llibertaes”, sorayaron los responsables del partíu nun comunicáu de prensa. 25 de xineru, 2008 0 FacebookTwitterPinterestEmail
Sociedá Unidá amuesa’l so descontentu pola redaición del curriculu d’educación infantil by asturnet 25 de xineru, 2008 Unidá amestose a les denuncies que se viene faciendo al curriculu d’Educación Infantil en rellación col tratu al asturianu.La coalición d’izquierda considera que’l borrador presentáu haz poco pola Conseyería d’Educación del Principaú, nun cumple nin col Estatutu d’Autonomía nin cola Llei d’Usu y Normalización de la Llingua Asturiana. “La Llingua Asturiana nun tien presencia nenguna, sacante delles referencies esllavazaes ya imprecises que pa nada dignifiquen l’usu del Asturianu”. Unidá recordó que l’artículu 10 de la Llei d’Usu y Promoción del Asturianu recueye que l’asturianu tien que tar presente en tolos niveles y graos del Sistema Educativu, dalgo que nun tiene en cuenta el borrador. Amás el testu tamien incumple’l Plan de Normalización Social del Asturianu, aprobáu por unanimidá na Xunta Xeneral. En pallabres de los responsables de la coalición d’izquierdes, la Conseyería d’Educación amuesa col borrador un total desconocimientu de la realidá sociollingüística d’Asturies al ignorar que l’Asturianu ye l’idioma familiar de munches escolines y escolinos asturianos amás d’una falta de capacidá pedagóxica y didáutica 25 de xineru, 2008 0 FacebookTwitterPinterestEmail
Sociedá El Centru social Sestaferia organiza una mesa redonda sobre precariedá llaboral by asturnet 25 de xineru, 2008 El centru social Sestaferia (C/Numa Guilhou, 14, Xixón) va organizar pa esti sábadu 26 de xineru una mesa redonda pa debatir alredor de precariedá llaboral y mocedá. L’actu va entamar a les 19:30 hores y ye una más de les actividaes programaes pol Aula Popular García Rúa dientro de les xornaes qu’organizen cada añu. Na mesa redonda van participar representantes de l’abocacía, un trabayador de Duro Felguera represaliáu pola empresa recientemente, y miembros del Comite de Fuelga nel últimu paru que vivió esti mesmu mes el metru de Madrid. 25 de xineru, 2008 0 FacebookTwitterPinterestEmail
Sociedá Ribeseya y l’Academia de la Llingua van collaborar pa promocionar l’asturianu by asturnet 24 de xineru, 2008 El Conceyu de Ribeseya fomentará l’usu del asturianu al travies de la firma d’un conveniu de collaboración cola Academia de la Llingua. Les dos instituciones roblaron esta selmana un principiu d’alcuerdu pol cual va facese la llista de topónimos de los llugares del conceyu o la señalización billingüe nos edificios municipales, ente otres actividaes y eventos empobinaos a averar l’idioma a los ribeseyanos. L’Academia tamien se comprometió a donar un exemplar de cada una de les publicaciones del so fondu editorial al Ayuntamientu pa que pasen a formar parte del catálogu de les biblioteques minicipales. 24 de xineru, 2008 0 FacebookTwitterPinterestEmail
Sociedá La Oficina Municipal de la Llingua de Xixón fae un balance positivu de 2007 by asturnet 22 de xineru, 2008 La Oficina Municipal de la Llingua del Ayuntamientu de Xixón implicó alredor de 14.000 persones nes actividaes que llevaron al cabu durante l’añu 2007. Esto ye lo que se recueye nel balance y nes cuentes añales que tan acabantes de presentar los responsables d’un serviciu que ya cumple cuatro años de funcionamientu. La oficina encárgase de dar sofitu a delles instituciones, tanto públiques como privaes, no tocante a tornes y asesoramientu llingüísticu. Amás esti serviciu del consistoriu xixones collabora colos centros educativos qu’imparten l’asignatura d’asturianu na ciudá y organiza davezu actividaes de promoción de la cultura y la llingua asturiana. Tamien organizó dos campañes col oxetivu de promocionar l’usu del asturianu na actividá mercantil nos comercios de Xixón. 22 de xineru, 2008 0 FacebookTwitterPinterestEmail
Sociedá L’academia de la llingua cellebra la primer prueba de conocencia del añu esti sábadu by asturnet 22 de xineru, 2008 L’Academia de la Llingua Asturiana va zarrar, esti xueves 24, el plazu pa matrículase na primer prueba de conocencia d’esti añu, que se cellebrará’l prósimu sábadu 26 de xineru. La segunda oportunidá p’algamar el diploma de conocimientu básicu del asturianu a nivel 1 va facese en mayu. La prueba va tener dos partes, una escrita (dictáu, torna, exercicios gramaticales, redaición) y otra falada (conversación) na que se van valorar los conocimientos gramaticales, d’espresión escrita y oral asina como la conocencia del allugamientu de la llingua dientro de la sociedá asturiana y del procesu de normalización en que ta inxerta. Na web de l’ALLA hai más información sobre la prueba y sobre la bibliografía necesaria pa preparar esti esamen, ente ella la Gramática de la Llingua Asturiana y les Normes ortográfiques espublizaes pola institución. 22 de xineru, 2008 0 FacebookTwitterPinterestEmail