Patrimoniu El Muséu’l Xurásicu consolídase como gran atractivu turísticu, con cien mil visites en cuatro meses by asturnet 27 de xunetu, 2004 Cien mil visites en cuatro meses. El Muséu’l Xurásicu, abiertu al públicu el pasáu 1 d’abril na rasa de San Telmo, na costa de Colunga, afítase como l’equipamientu cultural con mayor atractivu pa los turistes qu’aporten al Principáu y ruempe tolos ‘records’ de visitantes a equipamientos museísticos asturianos: El Muséu de la Minería, el más visitáu en 2003, recibió a lo llargo de tol añu pasáu a 85.000 persones. La taquilla’l centru allugáu en Colunga llevaba despachaes el pasáu domingu más de 96.000 entraes, cifra yá superada nes últimes hores y que va llevar mañana a la conseyera de Cultura, Comunicación Social y Turismu, Ana Rosa Migoya, a desplazase al muséu pa cellebrar l’ésitu de públicu ensin precedentes nos equipamientos museísticos asturianos. Por procedencia xeográfica, los turistes madrilanos, vascos, gallegos y los aportaos de Castiella y Lleón son la mayor parte de los contabilizaos pol Muséu Xurásicu nos sos primeros cuatro meses de vida, que se cumplen el prósimu domingu. El centru tamién recibió visitantes llegaos de Francia, México, Bélxica y Estaos Xuníos. Los quince museos controlaos pola Alministración autonómica reciberon un total de 463.000 visites a lo llargo del añu pasáu. Nengún d’ellos fue quien en doce meses a igualar les cifres que’l Muséu’l Xurásicu yá acumuló en sólo un cuatrimestre. Cifres de visites a los museos asturianos en 2003 27 de xunetu, 2004 0 FacebookTwitterPinterestEmail
Patrimoniu El Palaciu de Campusagráu y la ilesia de Llimanes algamen el másimu nivel de protección monumental by asturnet 22 de xunetu, 2004 El Palaciu’l Marqués de Camposagráu, llevantáu en Mieres nel sieglu XVII y propiedá orixinal de la familia Bernaldo de Quirós; la ilesia de Santa María de Llimanes, en Siero; l’aldega d’Argul, en Pesoz; la torre medieval de Silviella, n’Onís; el Palaciu Valdés Bazán, asitiáu en Candamu dende’l sieglu XVII por iniciativa d’Antonio Valdés Bazán; y el cancel de la ilesia de Santiso de Candamo algamaron güei la declaración de Bien d’Interés Cultural, el másimu nivel de protección monumental previstu na Llei de Patrimoniu Cultural. El Conseyu de Gobiernu aprobó la medida na so xuntanza d’esta mañana, reunión na que tamién s’autorizó la firma d’un conveniu ente l’Alministración autonómica y los 34 conceyos pelos que discurren los dos principales itinerarios del Camín de Santiago n’Asturies. Con esi alcuerdu a dos bandes, meyoraránse los albergues de los tramos xacobeos, señalizaránse y sallaránse les siendes y daráse-y puxu, en xeneral, a los servicios empobinaos a los pelegrinos qu’opten pola variante asturiana nel so caleyar pa Compostela. Na última de les midíes adoptaes güei pol Conseyu de Gobiernu na estaya de Cultura, l’Executivu dio lluz verde a una partida económica de 168.000 euros que va dir a parar, en conceptu de subvención, al Ayuntamientu de Xixón pa la organización del Festival Internacional de Cine, a Ediciones Nobel pa la convocatoria y asoleyamientu del Premiu d’Ensayu ‘Xovellanos’, al Gremiu d’editores d’Asturies pa la potenciación de la lliteratura’l país y a la Fundación Sánchez Albornoz. 22 de xunetu, 2004 0 FacebookTwitterPinterestEmail
Patrimoniu La ministra de Cultura visita por primer vez Asturies pa inagurar una esposición del Camín de Santiago by asturnet 20 de xunetu, 2004 La ministra de Cultura, Carmen Calvo, fixa la so primer visita a Asturies dende que tomó posesión del cargu, n’abril pasáu. El llunes 26 de xunetu, Calvo inagurará n’Uviéu una gran esposición sobro’l Camín de Santiago que permanecerá abierta hasta mediaos de setiembre. El Principáu presentó esta mañana un conveniu que meyora tramos, albergues y señalización del itinerariu a Compostela nos 34 conceyos asturianos qu’atraviesa. Cola so presencia na capital d’Asturies, que según fontes de la Conseyería de Cultura, Comunicación Social y Turismu, prollongaráse alpenes unes hores, la ministra quier avalar la importancia de la esposición ‘Luces de peregrinación’, considerada l’estandarte del Añu Santu Xacobéu depués de la so primer inaguración n’avientu pasáu nel Muséu Arqueolóxicu Nacional y la so amuesa posterior en Santiago de Compostela. A partir de más de setenta pieces asoleyaes na sala d’esposiciones del Bancu Herrero n’Uviéu, na cai Suárez de la Riva, los visitantes podrán evocar un itinerariu xacobéu que’l director xeneral de Promoción Cultural del Principáu, Carlos Madera, volvió reivindicar esta mañana como alternativa “seria y potente” al llamáu ‘Camín Francés’, que discurre por Castiella y Lleón. Los 34 municipios asturianos polos que pasen les siendes tradicionales a Compostela cuenten dende güei con un conveniu marcu col que’l Gobiernu autonómicu asume la meyora integral del Camín y que ye una prórroga ampliada del conveniu qu’hai seis años se firmara colos conceyos pa da-y puxu a les rutes xacobees n’Asturies. Nesta ocasión, l’alcuerdu estiéndese a los ayuntamientos d’El Franco, Tinéu, Valdés y Les Regueres. En términos xenerales, les actuaciones del Executivu autonómicu pa meyorar y promocionar los caminos asturianos a Santiago tienen tres d’elles una inversión global de casi 700.000 euros, escluyendo d’esa cifra los gastos d’organización y montaxe de la esposición que’l llunes inagurará n’Uviéu la ministra de Cultura. 20 de xunetu, 2004 0 FacebookTwitterPinterestEmail
Patrimoniu Cultura entamará en setiembre les obres pa meyorar los servicios esteriores del Muséu’l Xurásicu by asturnet 19 de xunetu, 2004 El Muséu’l Xurásicu d’Asturies medrará a partir de setiembre. El Gobiernu’l Principáu, al traviés de la Conseyería de Cultura, Comunicación Social y Turismu, entamará na seronda les obres pa meyorar l’entornu esterior del equipamientu cola construcción d’una cafetería una zona de xuegos infantiles y un puntu d’interpretación del paisaxe que s’acollumbra dende la rasa de San Telmo, en Colunga, onde ta allugáu el muséu. Cultura da asina un pasu más na promoción del equipamientu museísticu del oriente d’Asturies, que con una media de mil visites diaries y a puntu de cumplir cuatro meses de vida afítase como ún de los museos con más ‘tirón’ ente’l públicu. P’aprovechar y rentabilizar esa alta demanda, l’actuación prevista nel entornu esterior del centru enmárcase nun plan más ampliu de dinamización del Muséu’l Xurásicu, nel que según la conseyera de Cultura, Ana Rosa Migoya, interésense 36 inversores privaos y que prevé la construcción d’un parque temáticu sobro mitoloxía asturiana, un hotel con balneariu y una estación turística. Migoya inaguró esta mañana nel muséu asitiáu en Colunga una esposición promocional d’Asturies como destín turísticu que s’organiza nuna superficie de 300 metros cuadraos y na que s’ufre información sobro gestronomía, artesanía, etnografía y xeografía’l Principáu. El Gobiernu autonómicu prevé entamar na prósima seronda una campaña específica de promoción del Muséu’l Xurásicu nes comunidaes vecines de Castiella y Lleón, Galicia y Cantabria p’atrayer al equipamientu visitantes de les auronomíes vecines. 19 de xunetu, 2004 0 FacebookTwitterPinterestEmail
Patrimoniu Cultura sostién que 36 inversores privaos interésense nos proyectos al rodiu’l Muséu Xurásicu by asturnet 28 de xunu, 2004 Un total de 36 inversores privaos amosaron interés nes futures instalaciones que complementarán l’entornu del Muséu Xurásicu (MUXA) d’Asturies, allugáu na rasa costera de San Telmo, en Colunga. La conseyera de Cultura, Comunicación Social y Turismu, Ana Rosa Migoya, asoleyó güei esi datu pa defender énte la Comisión Parlamentaria d’esa estaya la viabilidá de los proyectos plantegaos al rodiu’l MUXA. Ente eses futuribles actuaciones, figuren la construcción d’un parque temáticu de la mitoloxía asturiana, un hotel con balneariu y una estación turística, iniciatives propuestes pola empresa adxudicataria del proyectu de dinamizar el muséu, Advancec Leisure Services (ALS), y acoyíes a una cláusula de confidencialidá contenida nel contratu ente Cultura y esa sociedá. Según sostuvo Migoya na so comparecencia énte la Comisión Parlamentaria de Cultura de la Xunta Xeneral, alcuéntrase abierta la captación d’inversores privaos p’amortizar el desembolsu públicu fechu nel equipamientu de Colunga, que se reveló como ún de los museos más visitaos d’Asturies poco depués de la so apertura al públicu, el pasáu 1 d’abril. Los planes del Principáu pal Muséu del Xurásicu pasen por aprovechar el potencial d’atracción de turistes del centru pa dinamizar el sector terciariu de tol oriente asturianu, cola construcción de nuevos servicios y equipamientos col MUXA como epicentru. 28 de xunu, 2004 0 FacebookTwitterPinterestEmail
Patrimoniu El Muséu Xurásicu cellebró los sos primeros dos meses de vida con una media de mil visites diaries by asturnet 16 de xunu, 2004 El Muséu Xurásicu d’Asturies recibió una media de mil visitantes diarios dende la so apertura al públicu, el pasáu 1 d’abril, hasta’l 10 de xunu, ésitu que lleva a la Conseyería de Cultura, Comunicación Social y Turismu a preparar una campaña de promoción del centru nes comunidaes vecines de Cantabria, Galicia y Castiella y Lleón a partir de la prósima seronda. Según precisó güei la titular de Cultura, Ana Rosa Migoya, l’equipamientu museísticu allugáu na rasa costera de San Telmo, nel conceyu de Colunga, acoyó hasta la fecha unes 62.500 visites, lo que lu convierte nel muséu públicu con mayor aceptación xunta’l Muséu de la Industria y la Minería. Migoya asoleyó les cifres de visites al Muséu Xurásicu na presentación del llibru ‘La Guía del Jurásico de Asturias, rutas por los yacimientos de huellas de dinosuarios’, obra del profesor de Xeoloxía de la Universidá d’Uviéu José Carlos García-Ramos y los sos collaboradores Laura Piñuela y José Lires, que güei avaló la conseyera cola so presencia nel salón d’actos del muséu. Na so alocución, Ana Rosa Migoya afirmó que’l centru museísticu asitiáu en Colunga entá nun funciona a plenu rendimientu, y destacó la impresión positiva cola que, aseguró, salen los visitantes qu’acuden al centru. 16 de xunu, 2004 0 FacebookTwitterPinterestEmail
Patrimoniu El Pueblu d’Asturies crez con 2.000 metros cuadraos más pa xunir “lo moderno y lo ancestral” by asturnet 14 de xunu, 2004 Xunir “lo moderno y lo ancestral”. El presidente’l Principáu, Vicente Álvarez Areces, y l’alcaldesa de Xixón, Paz Fernández Felgueroso, resumieron güei nesos términos el papel del renováu Muséu Etnográficu del Pueblu d’Asturies, cuyes obres d’ampliación inaguráronse esti mediudía en Xixón pa cellebrar los más de 2.000 metros cuadraos que’l complexu gana cola incorporación del pabellón de la ‘Expo 92’. Treslladáu a la oriella drecha’l ríu Piles en 1994 “non por casualidá nin azar, sinón depués de meses de batalla política”, según Álvarez Areces, l’edificiu sedrá a partir d’agora la sé central del complexu museísticu xixonés, cabecera d’una rede de centros etnográficos “cada vegada más rica”, a los güeyos del presidente autonómicu, y llamáu a afitar el patrimoniu y l’autoestima d’Asturies como “comunidá hestórica singular na so identidá”. La nueva cara del Pueblu d’Asturies -fundáu en 1968 pero somorguiáu nun “ciertu desorde y abandonu” inda a finales de los ochenta, en pallabres d’Areces- ye posible llueu de varios años de trabayos p’habilitar les tres plantes del pabellón de la ‘Expo’ como sé de la colección permanente del muséu. Nesa recuperación -yá que’l pabellón usábase namás puntual y parcialmente p’allugar ciertes esposiciones- xugó un papel importante el presupuestu de les obres, de más de 1,3 millones d’euros, pero tamién la tenacidá del equipu de técnicos encabezáu pol director del centru, Xuacu López, “que son como un martiellu pilón”, bromeó l’alcaldesa de Xixón, qu’eloxó el renováu complexu etnográficu como “un espaciu únicu que ye un arguyu p’Asturies”. Pa cellebrar la so incorporación dafechu de los 2.070 metros cuadraos del pabellón asturianu na Esposición Universal cellebrada en Sevilla en 1992, l’edificiu estrénase como sé central del muséu con una amuesa que retrata la evolución de los habitantes d’Asturies nos últimos dos sieglos, vista al traviés de la cocina. Cacíos y preseos domésticos d’época repasen l’espaciu más característicu de la vivienda asturiana ente 1800 y 1965. La esposición permanecerá tres años a disposición del públicu nel pabellón de la ‘Expo’, anque rotando con otres amueses temporales, y evoca la vida cotidiana de los asturianos dende la dómina de la preindustrialización hasta’l tránsitu a la modernidá, nel tiempu d’entesieglos, y el posterior desarrollismu de los años cincuenta. 14 de xunu, 2004 0 FacebookTwitterPinterestEmail
Patrimoniu El Pueblu d’Asturies afítase como’l mayor muséu etnográficu al incorporar el pabellón de la Expo by asturnet 12 de xunu, 2004 El Muséu Etnográficu del Pueblu d’Asturies, fundáu en Xixón en 1968, afítase como’l mayor equipamientu na so estaya en territoriu asturianu. La incorporación del pabellón col qu’Asturies tuvo representada na Esposición Universal de Sevilla -la ‘Expo 92’- esparde a partir de güei los espacios d’un complexu museísticu que reivindica la so condición de cabecera de la investigación etnográfica asturiana. Cola anesión del renováu pabellón de la Expo, un edificiu de tres plantes qu’hasta agora foi emplegáu como sé d’actos puntuales del muséu pero con una dimensión tamién vinculada a la hostelería, el Pueblu d’Asturies pieslla la so formación como complexu museísticu y cellebra esi estremu con una esposición sobro la cocina. Frutu d’un llabor de más d’una década, l’amuesa fai un repás de la evolución de la sociedá asturiana nos dos últimos sieglos al traviés d’esa estancia doméstica como la más característica del domiciliu. Dende esi llugar, entienden los responsables de la esposición, pue reconstruyise con fidelidá l’actividad económica, los gustos, los cambios d’alimentación, les diferencies sociales y el mou d’afrontar la vida de sucesives xeneraciones d’asturianos. El Muséu Etnográficu del Pueblu d’Asturies ocupa una superficie de más de 30.000 metros cuadraos na oriella drecha’l ríu Piles. Atesora un archivu de la tradición oral y una fototeca con más de 200.000 imáxenes, asina como una importante colección de preseos domésticos y de llabor, atropada baxo la coordinación del director del centru, Xuaco López, defensor del muséu como centru de referencia de la investigación etnográfica asturiana. 12 de xunu, 2004 0 FacebookTwitterPinterestEmail
Patrimoniu Cultura denuncia la falta de sofitu de Fomentu pa recuperar l’albergue de Curniana by asturnet 9 de xunu, 2004 Los distintos organismos del Gobiernu asturianu pusieron 4,4 millones d’euros dende 1999 pa recuperar l’albergue de pelegrinos de Curniana y el Ministeriu de Fomentu nun pagó nin un euru pesie a tar obligáu a facelo al traviés del 1 por cientu del so presupuestu. La Conseyera de Cultura, Comunicación Social y Turismu, acusó güei nesos términos al anterior ministru de Fomentu, Francisco Álvarez Cascos, na inaguración del monasteriu de San Salvador de Curniana como albergue de pelegrinos depués de llargues obres. La recuperación del vieyu edificiu relixosu, fundáu nel sieglu XI y cedíu cien años depués a la orde monástica de los cluniacenses -rama de los benedictinos que foi impulsora del arte románicu como reivindicación de l’austeridá arquitectónica- yera una vieya demanda de los estudiosos del Camín de Santiago n’Asturies, que vieron impulsáu el so deseyu llueu d’un congresu sobro rehabilitación del patrimoniu cellebráu hai agora seis años en Salas. Les conclusiones d’esa xuntanza abrieron la puerta al aniciu de les obres de remocicamientu’l monasteriu de Curniana, que se vieron postergaes en sucesives ocasiones y qu’agora tán acabante cuayar nun complexu destináu al tránsitu de pelegrinos qu’inclúi, ente otres dependencies, una hospedería con 24 places, un comedor, una cocina y un edificiu de servicios. Too ello construyío, reivindicó Migoya, con perres aportaes dafechu pol Principáu, yá que según denunció la titular de Cultura, de les 33 obres culturales asturianes nes que ta comprometida la participación del Ministeriu de Fomentu, namás 5 recibieron esa participación -al traviés del 1 por cientu que Fomentu cede pa proyectos en beneficiu de la cultura-, mientres que n’otres 13 obres el Ministeriu ta desapaecíu. 9 de xunu, 2004 0 FacebookTwitterPinterestEmail
Patrimoniu Los espertos llocalicen la entrada orixinal a Tito Bustillo nuna cueva anexa con más pintures by asturnet 9 de xunu, 2004 La entrada orixinal a la cueva de Tito Bustillo taba nuna cavidá anexa de 28 metros de llargor na que podríen tar depositaos nuevos restos humanos de más de diez mil años d’antigüedá. L’equipu que restola el conxuntu xeolóxicu de Ribesella defende esa hipótesis depués d’atopar abondos restos de pintura “idénticos” a los de la cavidá principal na nueva galería, bautizada polos científicos como ‘La Cuevina’. En realidá, trátase d’un segundu bautizu, porque l’equipu encabezáu polos caderalgos Rodrigo de Balbín y Alberto Foyo barrunta que’l furacu acabante descubrir correspuéndese cola denominada ‘Cueva’l Ríu’ que’l paleontólogu Eduardo Hernández Pacheco escavó a primeros del sieglu XX. Los sos trabayos nun s’espublicaron, pero’l nome y la esistencia de la cueva dióse por fecha magar que nun se conocíen nin el so allugamientu esactu, nin la so relación con Tito Bustillo. L’equipu llideráu por Balbín y Foyo respuende agora a esa entruga: La cueva redescubierta, que foi llocalizada a primeros d’esti añu ya esplorada nos meses siguientes, comunícase cola cavidá de Tito Bustillo -anque esi pasu tea agora tupíu pol pasu’l tiempu-, y de fechu yera la entrada orixinal a ella: Quienes accedieron a la cavidá pa pintar los grandes murales de Tito Bustillo entraron per ‘La Cuevina’, aseguraron dambos caderalgos nuna comparecencia que se cellebró esta tarde na sé Conseyería de Cultura. La galería soterraña redescubierta tien 28 metros de llargor, 3 d’anchu y un altor máximu de 2 metros, dimensiones que son enforma más pequeñes que les orixinales porque un movimientu masivu de tierres afectó a tol conxuntu de cavidaes y provocó un derrabe que tupió estancies y vasos comunicantes baxo tierra. Amás d’ello, ‘La Cuevina’ tien a lo llargo de tola so estensión abondos restos de pintura, a primer vista trazos negros y encarnaos que, según l’equipu d’investigadores, son “idénticos” a los qu’hai na vecina Tito Bustillo. Talos afayos lleven a los científicos a enfotase n’atopar nuevos restos humanos na cavidá descubierta y faen evidente qu’hebio un “terremotu” posterior al tiempu en que les cueves de Ribesella taben habitaes por homes y muyeres del Paleolíticu. Lo qu’entá desconocen los xeólogos y paleontólogos ye si los pobladores de Tito Bustillo “marcharon porque cayó-yos la cueva enriba, o si primero esbarrumbóse la cueva y depués colaron”, según precisó Alberto Foyo. A rescamplar esa incógnita van dedicar los sos prósimos llabores los investigadores qu’esploren el yacimientu de Ribesella. 9 de xunu, 2004 0 FacebookTwitterPinterestEmail