Música Una amuesa didáctica retrata n’Uviéu cinco conceptos estremaos de la ‘jota’ baillada by asturnet 4 d'avientu, 2004 Repasu a la ‘jota’ en cinco episodios. El collectivu Andecha Folclor d’Uviéu escenifica nel auditoriu ‘Príncipe Felipe’ los pasos y la hestoria d’esa modalidá baillada n’Asturies, al traviés d’una amuesa didáctica abierta al públicu na que se retraten les estremaes variedaes de ‘jota’ d’oriente a occidente. Na exhibición, prevista pa les 18,30 hores de güei, sábadu, na sala de cámara del auditoriu, ta previsto repasar les ‘jotes’ mediante la so distinción per zones xeográfiques. Asina, los miembros d’Andecha Folclor baillarán dos decenes de pieces tradicionales cinco comarques: El noroccidente d’Asturies, l’oriente, la zona central, el conceyu de Cangas del Narcea y los municipios d’Ibias y Degaña. L’Andecha Folclor d’Uviéu trabaya na recuperación y caltenimientu de la cultura tradicional col propósitu d’evitar la perda de les señes d’identidá asturianes, con especial procuru nes manifestaciones culturales que se tresmiten de forma oral. 4 d'avientu, 2004 0 FacebookTwitterPinterestEmail
Música La Sociedá d’Autores asegura que quier un alcuerdu “razonable y equitativu” col Intercélticu d’Avilés by asturnet 3 d'avientu, 2004 Un alcuerdu “razonable y equitativu”. Esi ye’l pactu que quier pesllar la Sociedá Xeneral d’Autores y Editores, en pallabres del so responsable xurídicu n’Asturies, Francisco García Hidalgo, pa cobrar los drechos d’autor del Festival Intercélticu d’Avilés. Los organizadores del eventu tienen yá llista una propuesta de liquidación na qu’asumen pagar el 10 por cientu sobre’l presupuestu sólo de dalgunos de los recitales. En principiu, esa pretensión casa namás en parte col plantegamientu de la Sociedá d’Autores, que según precisó García Hidalgo mantién la so esixencia de cobrar el 10 por cientu del “presupuestu de gastos necesarios” pa ca ún de los conciertos que se cellebraron na última edición del Intercélticu, en xunetu pasáu. La SXAE inda nun fala de cifres concretes. El so representante xurídicu sorrayó la voluntá de la entidá d’algamar un alcuerdu amistosu y declaróse a la espera de recibir la correspondiente declaración de gastos, que nos prósimos díes unviarán los responsables de l’asociación Esbardu, organizadora del festival avilesín, cola propuesta de sufragar los drechos d’autor “siempre qu’haiga que pagar”. Con eses pallabres, el presidente d’Esbardu, Juan Casas, matiza que los entamadores del Intercélticu proponen paga-y a la SXAE el porcentaxe conveníu sólo nos casos de los recitales que, a xuiciu de los organizadores, xeneren drechos d’autor, una llista de la que quedaríen escluyíos los conciertos de música d’autoría estrictamente tradicional. Un puntu adicional separta les visiones d’Autores y Esbardu. Mientres que García Hidalgo sostién que “la negociación tien que ser global” y reclama un pactu retroactivu sobre los drechos d’autor d’ediciones anteriores del festival, Juan Casas remembra que l’alcuerdu algamáu ‘in extremis’ na puerta’l xulgáu na viéspora l’aniciu del festival prevía namás la negociación al rodiu de los drechos d’autor xeneraos pola edición de 2004. La octava edición del Intercélticu d’Avilés y Comarca aconceyó ente’l 16 y el 27 de xunetu a unos 20.000 asistentes, según el balance de los organizadores, nun añu que supuso un importante saltu cualitativu pal eventu, qu’axuntó a 850 participantes y aumentó la so duración respecto a 2003. Archivu. La Sociedá d’Autores retira la demanda contra l’Intercélticu y negociará un cobru a la baxa 3 d'avientu, 2004 0 FacebookTwitterPinterestEmail
Música L’anuariu de la música constata que les producciones tienen escasu éxitu de públicu por falta de promoción by asturnet 3 d'avientu, 2004 Asturies tien una abondosa producción musical, pero los discos lleguen “escasamente” al públicu por falta de promoción pública y d’interés priváu. Esa ya una de les conclusiones qu’asoleya l’Anuariu de la Música Asturiana 2004, que güei presentó n’Uviéu el cordinador de la publicación, Xune Elipe, quien tildó de “agridulce” el balance del añu, yá que pesie a sacar al mercáu unos 40 discos nun añu -cantidá superior a la qu’asoleyen Estaos como Luxemburgo o Malta-, la industria musical asturiana nun acaba de cuayar. Ye, n’opinión d’Elipe, un sector “incipiente que da reblagos hacia la profesionalización, pero mui feble tovía”. Pa solventar esa situación, el músicu destacó la importancia de la futura radiotelevisión autonómica na promoción de la música fecha n’Asturies al marxe de criterios sólo comerciales, y convidó a los ayuntamientos y al Principáu -al qu’acusó de nun tener una política musical “coherente”- a cuidar con más procuru a los grupos llocales, obligando por cláusula de contratu a incluiyir teloneros asturianos en grandes conciertos de bandes d’éxitu. Na llista de reivindicaciones que’l vocalista del grupu Dixebra espardió na so comparecencia d’esta mañana figuró amás la esixencia a que “nun nos metan un gol como’l del añu pasáu nos Premios de la Música”, n’alusión al galardón instauráu en 2003 y que na so primer edición algamaron Pepín Fernandez y Manolo Morán pol tema ‘Nunca máis’, un tema del que’l propiu Víctor Manuel dixo que nun conocíen quienes lu votaron. Con cien páxines y una tirada de 2.000 exemplares que se prevé escosar en poques selmanes, l’Anuariu de la Música Asturiana repasa’l panorama musical del añu que termina al traviés, ente otros conteníos, d’un estudiu sobro l’usu de la llingua asturiana nel grupu ‘Los Berrones’, l’alcordanza d’artistes desapaecíos, estudios etnográficos, un testu sobro la influencia de Conceyu Bable na música asturiana y una guía de contactos con músicos y promotores que permite, según destacó Xune Elipe, “organizar un festival nuna hora”. 3 d'avientu, 2004 0 FacebookTwitterPinterestEmail
Música Taramundi convoca a quince ‘luthiers’ del noroeste nuna amuesa d’artesanía musical by asturnet 1 d'avientu, 2004 Flautes, requintos, vigulinos y gaites de rabil. Quince ‘luthiers’ d’Asturies y Galicia acudirán el fin de selmana al conceyu de Taramundi p’amosar les técniques de construcción artesana d’instrumentos musicales y poner a la venta les pieces salíes de los sos obradorios, nun certame que tamién tendrá conciertos didácticos ya interpretaciones en vivo. La V Amuesa d’Artesanía de la Música, entamada pol Ayuntamientu de Taramundi al traviés de la so oficina d’información xuvenil, llevará al conceyu a artesanos procedentes del Principáu, Lugo, Coruña y Pontevedra que rescatarán na cai los sones amenazaos pol escaezu d’instrumentos manufacturaos con técniques tradicionales. Nos puestos de la feria pondránse al algame del públicu oxetos musicales de cuerda, percusión y vientu, ente ellos vigulinos, gaites de rabil, flautes, requintos, panderos y panderetes, instrumentos asociaos a la música folk y fabricaos acordies con estándares tradicionales. Los propios ‘luthiers’ ufrirán interpretaciones en vivo de los instrumentos que presenten nel certame y encargaránse d’enseña-yos a los visitantes de la feria el timbre y calterístiques propies de cada pieza, yá que la ellaboración d’instrumentos a mano permite da-yos a los exemplares acabaos que se traducen en soníos singulares. La enseñanza de la música tradicional movió en 2004 un total de 90.000 euros sólo en subvenciones del Principáu a bandes de gaites y asociaciones folclóriques que se nutren, polo común, d’instrumentos artesanos. D’eses ayudes didáctiques correspondientes beneficiáronse trenta collectivos musicales. Archivu. Trenta bandes y asociaciones benefíciense d’ayudes del Principáu a la enseñanza de música tradicional 1 d'avientu, 2004 0 FacebookTwitterPinterestEmail
Música Raimundo Amador, Kepa Junkera y Llan de Cubel pondrán-y música a un alcuentru solidariu n’Avilés by asturnet 1 d'avientu, 2004 El guitarrista andaluz Raimundo Amador, el curdionista vascu Kepa Junkera y el grupu asturianu de folk Llan de Cubel compartirán escenariu n’Avilés el prósimu 17 d’avientu. La ciudá culminará con un conciertu collectivu una selmana solidaria empobinada a la mocedá y entamada pola Axencia de Cooperación del Principáu, que llevará a la villa a ponentes de Guatemala, Brasil y Palestina. Asina lo anunció esta mañana el titular de l’Axencia Asturiana de Cooperación al Desarrollu, Rafael Palacios, quien precisó que’l recital sedrá de baldre pero les invitaciones p’asistir a él habrán retirase previamente nel Ayuntamientu pa evitar problemes d’aforu. El bautizáu como primer Foru Solidariu desendolcaráse a partir del llunes 13 d’avientu, fecha señalada pa un actu d’unaguración y l’actuación del grupu Aratzá. Al otru día, martes, representantes del pueblu saharaui centrarán les actividaes nel mundu árabe, mientres que pal miércoles ta prevista la intervención d’una asesora’l Gobiernu de Brasil nel programa que’l Gobiernu d’esi país tien en marcha pa desaniciar la fame. El xueves 16 d’avientu, la selmana solidaria d’Avilés debatirá cuestiones rellacionaes cola globalización con participación d’espertos guatemaltecos, y el programa d’actos pesllaráse el vienres col conciertu de Raimundo Amador, Llan de Cubel y Kepa Junkera, amás de la cellebración d’estremaos talleres nos colexos de la ciudá. 1 d'avientu, 2004 0 FacebookTwitterPinterestEmail
Música Dixebra entrará nel estudiu n’avientu pa grabar los temes del so octavu discu by asturnet 26 de payares, 2004 Poderosos ‘riffs’ de guitarra, guiños al funky, hestories a ritmu de reggae y contundencia ska. La banda de rock Dixebra texe con eses blimes el so discu númberu ocho, que saldrá a la cai na primavera de 2005 pero que’l grupu empezará grabar nos estudios ‘Tutu’ de Corvera a partir del mes d’avientu, cola idea de sometese a un procesu final de creación más reposáu qu’en trabayos anteriores. La salida al mercáu del octavu cedé de la banda avilesina conmemorará la mayoría d’edá de Dixebra, yá que’l grupu cumple dientro d’unos meses los 18 años n’escena como únicu referente afitáu y durable de la música rock en llingua asturiana. Por esa razón, los miembros del conxuntu entrarán al estudiu de grabación con más calma que n’ocasiones anteriores. L’asoleyamientu del nuevu trabayu discográficu de Dixebra, pal que’l grupu inda completa una llaboriosa esbilla de bases musicales a partir de decenes d’idegues, supondrá’l regresu de la banda con temes de nueva creación tres años depués de la publicación de ‘Sube la marea’, un cedé grabáu nuna selmana nel estudiu que rexenta nel País Vascu el productor y músicu Kaki Arkarazo. La última incursión de Dixebra nel mercáu con nuevu productu prodúxose hai agora un añu, cuando la banda editó ‘Cróniques d’un pueblu’, un cedé recopilatoriu xunta un llibru cola hestoria’l grupu escritu pol periodista xixonés Francisco Álvarez. Fundada n’Avilés nel añu 1987, y con una llarga esperiencia dende entós tanto nel estudiu como nel directu, la banda Dixebra fizo del usu esclusivu de la llingua asturiana la so seña d’identidá y evolucíonó, a lo llargo de les sos casi dos décades de vida, p’hacia un soníu propiu construyíu colos preseos tradicionales del rock y destacada presencia de los metales (trompeta y saxu). Páxina web del grupu 26 de payares, 2004 0 FacebookTwitterPinterestEmail
Música La Sociedá d’Autores descarta Asturies en favor de Santiago pa centralizar la so actividá nel noroeste by asturnet 24 de payares, 2004 L’actividá de la Sociedá Xeneral d’Autores y Editores pa tol noroeste, incluyida Asturies, centralizaráse a partir de 2006 en Santiago de Compostela. La entidá construirá un gran edificiu na capital gallega, depués de descartar la so ubicación en el Principáu, nun procesu que, según el responsable de la Sociedá d’Autores n’Asturies, Javier Vidal, nun implicará el pieslle de la sé que la SXAE mantién n’Uviéu. L’actividá nella, afirma Vidal, mantendráse “esactamente nos mesmos términos qu’agora”, ensin suponer amenorgamientu nengún del ritmu de funcionamientu o les prestaciones a los artistes asociaos, que según el responsable d’Autores n’Asturies tendrán nueves posibilidaes de promoción nel edificiu qu’abrirá les sos puertes en Compostela a mediaos de 2006. Magar d’ello, la propia Sociedá Xeneral d’Autores espresa na so páxina web que la nueva instalación, con una programación permanente de música, teatru, danza y cine, tratará con especial procuru la promoción de nuevos creadores y dramaturgos gallegos. El descarte del Principáu como llugar de la nueva sé pal noroeste depués de valorar allugamientos n’Asturies alternativos a Santiago obedez en parte, sostién Vidal, a la imposibilidá de llevantar grandes edificios -el de Galicia tendrá 3.200 metros cuadraos- en llugares prósimos ente sigo, lo qu’obliga a la SXAE a instalar namás seis infraestructures de grandes dimensiones en tol Estáu: Amás de Compostela, sedrán centru d’actividaes nes sos respectives zones les ciudaes de Bilbao, Barcelona, Valencia, Sevilla y Madrid. El presidente de la Sociedá d’Autores, Eduardo Bautista, presentó ayeri en Santiago xunta’l propiu Vidal el proyectu del edificiu de la SXAE pal noroeste, una construcción que se llevantará nun solar céntricu que l’Ayuntamientu de Compostela cederá a Autores por un plazu de 60 años. Web oficial de la Sociedá Xeneral d’Autores y Editores 24 de payares, 2004 0 FacebookTwitterPinterestEmail
Música La Fnac programa doce conciertos p’avientu, con Tennessee, Gaia, Berrones y Australian Blonde by asturnet 19 de payares, 2004 L’estilu vocal ‘retro’ de Tennessee, el rock de Gaia, el soníu ‘agro’ de Los Berrones y el pop matizáu d’Australian Blonde. La multinacional de la cultura Fnac programa pa la temporada navidiega un total de trece conciertos nes sos instalaciones de Parque Principáu, acordies con una llista na que tamién figuren los grupos o solistes Sangrientos, Cooper, Los Bruscos y Lucas Masciano. El calendariu abriránlu los integrantes de Prof. Popsnuggle, banda qu’actuará el 1 d’avientu nel ámbitu del Festival Internacional de Cine de Xixón como telonera de los ingleses Six By Seven. Sangrientos y Emergency Poncho garrarán el relevu al otru día, yá nel recintu de la Fnac nel centru comercial Parque Principáu, mientres que’l 4 d’avientu ye la fecha prevista pa la presentación del dvd ellaboráu a partir de los conciertos del últimu festival Derrame Rock, cellebráu en Pravia el veranu pasáu. Les formaciones Despistaos y Gaia pondrán-y música al segundu fin de selmana d’avientu -sábadu y domingu, respectivamente-, como preludiu d’una selmana na qu’actuarán Cooper (día 15), Liverpull (17) y Los Berrones, que’l sábadu 18 d’avientu presentarán en directu temes del so últimu trabayu, resultáu del conciertu que’l grupu de Tolivia ufrió n’agostu na playa de Poniente de Xixón. Los últimos recitales previstos pa la temporada navidiega sedrán los de Los Bruscos (día 19), Tennessee (presentación ‘a capella’ del so nuevu discu el 21 d’avientu), Lucas Masciano (22 d’avientu) y Australian Blonde, que pasarán pola Fnac el 26 d’avientu. Amás de les actividaes estrictamente en vivo, l’espaciu cultural de Parque Principáu acoyerá la presentación, el día 18, del cd editáu por Sesfebú Producciones a partir del montaxe musical ‘Sesfebú’. Archivu. Australian Blonde edita’l so séptimu discu, plenu de matices y cuidáu nel soníu 19 de payares, 2004 0 FacebookTwitterPinterestEmail
Música Turón enfila la recta final de la so selmana cultural, con Dixebra, Obús y La Col.lá Propinde by asturnet 18 de payares, 2004 Turón prepárase pa tres xornaes de música. Les xornaes culturales de la llocalidá enfilen la so recta final colos conciertos previstos de Dixebra y Obús (mañana, vienres), La Col.lá Propinde y Dark la Eme (sábadu) y Juan Castro y Alfredo González, recital fixáu pal domingu. Un alderique sobro les Cuenques mineres centra’l programa d’actos pa güei, qu’inclúi amás teatru pa neños y un taller de cueru. Asina, el certame desendolcáu en Turón prevé pa les 20 hores d’esta tarde una mesa reonda baxo’l títulu ‘Las Cuencas, una realidad silenciosa’ na que s’espera la participación del sociólogu Holm Detler, el cineasta Adrián Castañeda, el músicu Chus Pedro Suárez y un responsable de ‘La Nueva España’ de les Cuenques. El conciertu inagural del fin de selmana protagonizaránlu los avilesinos Dixebra y la veterana banda Obús, a partir de les 23 hores nel parque llocal y como remate d’una xornada na qu’habrá estremaes competiciones deportives y se presentará la revista ‘Eventual’, dirixida por Mauro Díaz. La música’l sábadu pondránla La Col.lá Propinde y Dark la Eme, nuna tarde organizada al rodiu d’un amagüestu popular tamién nel parque. Pol so llau, los intérpretes Juan Castro y Alfredo González darán-y vida al conciertu caberu de la Selmana Cultural, a partir de les 19 hores del domingu. 18 de payares, 2004 0 FacebookTwitterPinterestEmail
Música Les Tertulies del Asturianu tornen otra vuelta con Xosé “Ambás” y la tradición oral by asturnet 17 de payares, 2004 El gaiteru y cantante de N’Arba Xosé “Ambas” va protagonizar la vuelta de les conferencies qu’ufierta’l chigre l’Asturianu con una sobro la tradición oral que va desendolcase esti miércoles 17. Nel actu, quentama a les nueve de la nueche, Xosé Antón Fernández “Ambás”, miembru del Conceyu dEstudios Etnográficos Belenos y cantante del grupu folk NArba, va falar de “Quince años de recoyida de la tradición oral”. Les conferencies que se cellebren davezu nestacervecería uvieína tienen ya un fondu raigañu como cita cultural na seronda y acueyen a una bona riestra de persones interesaes n’aspeutos que cinquen a etnoloxía y la cultura tradicional asturiana. 17 de payares, 2004 0 FacebookTwitterPinterestEmail