Música Muerre’l músicu y ex director de la OSPA Benito Lauret by asturnet 3 de payares, 2005 El músicu y compositor Benito Lauret morrió esti llunes 1 en Madrid a los setenta y seis años por mor d’un infartu. Nacíu en Murcia tuvo una fonda vinculación con Asturies onde dirixó ente 1973 y 1980 la Orquesta Sinfónica. Dende la dirección de la formación orquestal llevó a fechu diverses iniciatives relacionaes cola música popular asturiana, na que tamién s’inspiró pa la composición d’obres propies. La última xera artística vinculada a Asturies de Lauret fue la composición de “Tres melodías asturianas”, una obra sinfónica cola gaita como instrumentu solista y qu’estrenó’l gaiteru José Manuel Tejedor na última edición de los cursos Magistralia en Xixón. Na so etapa como director de la Sinfónica d’Asturies el músicu murcianu destacó pol so llabor d’espardir los trabayos de la so formación fuera de los ámbitos avezaos y acercala a tou tipu de públicos. 3 de payares, 2005 0 FacebookTwitterPinterestEmail
Música El punk desenfadáu de los Toy Dolls llega esti viernes a Avilés by asturnet 18 d'ochobre, 2005 The Toy Dolls, veterana banda del punk británicu de los ochenta, llega esti viernes 21 a Avilés p’actuar na Sala Quatro con nun únicu conciertu n’Asturies. Después de cinco años ensin entamar xires el grupu vien a Avilés col so álbum más recién, tituláu irónicamente: Our last album?” y los asturianos The Punishers como teloneros. Los últimos representantes vivos de la escena punk británica promocionen el so últimu discu calificándolu de “el nuestru primer álbum en cuatro años y la nuestra primera xira en cinco años. ¿Será la última?”. La respuesta ta esti viernes 21 a les 23.30 na Sala Quatro d’Avilés. Una ocasión única pa ver en directu a una banda, qu’a fuerza de rodar a lo llargo de más de venti años pelos escenarios, deprendiera a reíse de too, empezando por reíse d’ellos mesmos. 18 d'ochobre, 2005 0 FacebookTwitterPinterestEmail
Música Rafa Lorenzo presenta Pabirún, Pabirún en Cangas by asturnet 16 d'ochobre, 2005 El Teatru Toreno de Cangas va acoyer el prósimu miercoles 19 a les 20.30 hores la presentación del últimu discu del cantautor Rafa Lorenzo “Pabirún, pabirún”, un «folk vaqueiru» basáu nel mestizaxe. El compositor tinetense quier asina homenaxear la figura del vaqueiru, n’especial el de les brañes somedanes. El discu busca «llamar l’atención de los aspectos marxinales a los que tuvieron sometíos los vaqueiros». El discu, producíu por Antón García y el fíu del autor, Rafa L. Fernández, y editáu pol nuevu sellu discográficu Trabe Musicae, cunta con collaboraciones tan importantes como les de la cantante Mari Luz Cristóbal, el cantante-investigador de folclor astur, Xose Antón «Ambás»; asina como´l guitarrista y compositor Rody Herrera. 16 d'ochobre, 2005 0 FacebookTwitterPinterestEmail
Música La Eurovisión de les llingües minorizaes nun contempla la participación d’Asturies by asturnet 13 d'ochobre, 2005 Asturies, xunta Aragón, son les úniques naciones con llingua propia del estáu español qu’inda nun participen nel Liet Ynternational, un festival de la canción entamáu dende Frisia que tenta dar la réplica a Eurovisión pa dar voz a los idiomes minorizaos del vieyu continente. El festival organízse dende 2002 auspiciáu pola Frisian Foundation Liet (www.liet.nl) y anguaño cuenta cola participación de Vasconia, Bretaña, Cataluña, Cornualles, Friûl, Galicia, Irlanda, Kashubia (Polonia), Northfriesland y Sorbs (Alemaña), Occitania, Sámi(Suecia), Escocia y Gales. Pa la so prósima edición de 2006 tien un presupuestu cuentificáu en 181.000 euros y forma parte de los programes de Cultura de la Unión Europea. Na edición del añu que vien la organización divide Europa en tres rexones: centro-occidental, sur y nordeste, que van cuntar caúna cola so correpondiente semifinal d’artistes y grupos participantes. Una final única va dar el nome del ganador de la edición 2006 del Liet Ynernational. Los samis de Suecia fueron los ganadores de les dos últimes ediciones y va ser nel país d’esta minoría cultural escandinava onde s’entame la prósima convocatoria del festival. Liet Ynternational 13 d'ochobre, 2005 0 FacebookTwitterPinterestEmail
Música La Villa acueye el primer Alcuentru de Bandes de Gaites by asturnet 13 d'ochobre, 2005 Villaviciosa acueye esti sábadu 15 el I Alcuentru de Bandes de Gaites de Maliayo. Diez formaciones del país y procedentes d’otros países van participar nuna atopada que tamién inclúi l’actuación de La Bandina’l Tombo. L’alcuentru de bandes de gaites celébrase dientro los actos de conmemoranza del 25 aniversariu del Festival de la Mazana de La Villa y va entamar a partir de les seis y media de la tarde na Plaza’l Güevu. Una hora después escomienza’l concursu ente los conxuntos participantes que tien un premiu final de 9.000 euros. L’actuación de La Bandina’l Tombo ta prevista pa les once y media de la nueche. Nel I Alcuentru de Bandes de Gaites de Maliayo participen amás del conxuntu agospiador de La Villa, les bandes de Samartín del Rei Aureliu, Llangréu, Sariegu y Xácara, amás de les gallegues de Verín y A Carballeira, y la berciana de Castrovergidum. 13 d'ochobre, 2005 0 FacebookTwitterPinterestEmail
Música El cantautor Pablo Moro ufierta entrambos conciertos en Xixón y Avilés by asturnet 13 d'ochobre, 2005 El cantautor Pablo Moro presenta los temes del so primer trabayu ‘Emepetrés’ faciendo dos miniconciertos acústicos n’entrambos centros comerciales de Xixón y Avilés. El primeru de los directos va ser na villa playa esti viernes a les 19.30 y el siguiente esti sábadu 15 n’Avilés, a la mesma hora. El músicu uvieín ta en plena promoción del so discu debut editáu va dos selmanes y que tuvo la so puesta de llargo’l 20 de setiembre n’Uviéu, actuando como invitáu nel conciertu de Melendi en San Mateo. “Emepetreses” ye’l títulu del discu, grabáu baxo les ordenes de David Ferrero y que cuenta cola colaboración del mesmu Melendi, que canta a medies con Moro la canción “María”. El tema elexíu como single promocional ye “Albumes de fotos”. 13 d'ochobre, 2005 0 FacebookTwitterPinterestEmail
Música La Felguera acueye esti sábadu’l XXIII Festival de Folclor de Llangreu by asturnet 13 d'ochobre, 2005 LAgrupación dEtnografia y Folclor Reija de Llangréu entama tolos años esti Festival de Folclor de Llangreu que nesta ocasión forma parte de los actos postreros del so CINCUENTA ANIVERSARIU. Pal Festival de 2005 l’Agrupación tien amás el sofitu de la Conseyería de Cultura Comunicación Social y TurismU, LAyuntamientu de Llangréu y Cajastur. Nesta edición del festival participen el RANCHO TIPICO DE SANTA MARIA DA REGUEÑA de Portugal, la BANDINA DUENDU de Asturies y el GRUPO DE FOLCLORE ABUELA SANTA ANA de Santa Ana – Albacete. Dende un entamu el so principal esmolecimientu y porgüeyu diríxese a caltener ya esparder el folclor y la etnografía popular en tolos sos aspeutos. Desi mou non solo representa los bailles y cantares tradicionales dAsturies, sinón que tamién organiza charres, esposiciones y talleres de tradición, amás de cuntar con escuela música y cultura tradicional. Una de les principales carauterístiques de lagrupación ye la so coleición dindumentaria tradicional. Les pieces que la formen son orixinales y copies destos, toes elles feches tras un llargu estudiu bibliográficu y de campu. Con esta indumentaria fai les sos actuaciones, charres ya esposiciones.Cuenta colos galardones Arandanu de Plata del Certamen de los pueblos dAsturies de Navelgas en Tinéu y el Urogallu de Bronce del Centru Asturianu de Madrid, en reconocimientu pol so llabor dinvestigación. 13 d'ochobre, 2005 0 FacebookTwitterPinterestEmail
Música Llan de Cubel cancela la so xira polos EEXX y prepara nuevu discu by asturnet 12 d'ochobre, 2005 Llan de Cubel anunció la suspensión de la xira prevista a lo llargo d’esta seronda pelos Estaos Uníos. Les estorbises burocrátiques puestes poles autoridaes americanes d’Inmigración son la causa de la cancelación de los conciertos. Mentantu la banda pixueta prepara nuevu discu pal añu que vien. El grupu más internacional del folk asturianu decidió nun entamar la xira prevista pa estes selmanes pelos EEXX. Na so páxina web oficial los músicos denuncien les dificultaes puestes poles autoridaes norteamericanes y la nula colaboración de la Embaxada d’esi país en Madrid pa facilitar los permisos d’entrada y trabayu. Per otru llau Llan de Cubel anuncia que ta trabayando na elaboración d’un nuevu trabayu discográficu resultáu de más de tres años de llabor. El sestu álbum de la banda ta pensao que se grabe nos primeros meses de 2006 y podía tar a la vienda hacia xunu. Nél van recoyese temes y melodíes de dellos cancioneros antiguos asturianos y otros frutu de la revisión de numberoses grabaciones de campu, unes de grupos etnográficos y otres d’orixe tan diversu como por exemplu de los exiliaos asturianos tres la guerra civi. 12 d'ochobre, 2005 0 FacebookTwitterPinterestEmail
Música Caifás, el primer videoclip de los Stukas preséntase na Fnac by asturnet 12 d'ochobre, 2005 El míticu grupu de rock llangreanu ‘Stukas’ presenta güei, a les ocho la tarde, na Fnac el vidiu que correspuende a la canción ‘Caifás’, el primeru de la so carrera discográfica, que forma parte del so últimu discu ‘A pesar de todo’. La banda que yá empezare a xuntase nel añu 1961 nos locales de La Salle de La Felguera, depues de pasar per diferentes formaciones, volvió a sacar discu primeros d’añu, ‘A pesar de todo’. Grabáu nos estudios Luna Music de Llugo Llanera, esti discu recueye nueves composiciones como ‘Todo no vale’. ‘Hasta luego amigo’ o ‘Caifás’, de la qu’esta tarde, a les ocho, presenten el vidiu promocional nel foru de la Fnac, en Siero. La nueva formación de Stukas ta compuesta por Jose Ramón Ordóñez (voz y armónica), Chus Rodríguez (baxu), Adrián Ordóñez (batería -fíu del cantante Jose Ramón Ordóñez-), Iván Menendez (guitarra electrica y tecláu -fíu del batería fundador de la banda, Jose Luis Menendez-) y Nacho Nistal (guitarra electrica, acústica, española y armónica -componente del grupu llangreanu “Los Calambres”-). Mañana, tamien a les ocho la tarde, va ser el cuartetu ‘Los Bourbon’ los que dean un conciertu nel foru Fnac de Parque Principado, como presentación del discu ‘Reserva del 81’. Web de los Stukas 12 d'ochobre, 2005 0 FacebookTwitterPinterestEmail
Música Conciertu de cuerda nel Teatru Toreno de Cangas by asturnet 12 d'ochobre, 2005 El Teatru Toreno de Cangas del Narcea va acoyer mañana vienres, día 14, a les 20.30 hores un conciertu de violonchelu y violín a cargu de Blanca Coines y Pedro Rodríguez dientro de la XIV Selmana de Música 2005 de Cajastur. La Fundación Príncipe d’Asturies organiza, en collaboración colos Ayuntamientos, ente’l 14 y el 20 d’ochobre una serie de conciertos en diferentes llugares d’Asturies. La música va volver al Teatru Toreno el miercoles 19, a les 20.30 hores, cola presentación del últimu discu de Rafa Lorenzo, “Pabirún, pabirún”, un «folk vaqueiru» basáu nel mestizaxe. Pa zarrar esti mes d’ochobre, la compañía Falcatrúa Teatro va ufiertar pa los más neños el so espectáculu “El espíritu del bosque”, que va poder vese’l miercoles 26 a les 19.00 hores. 12 d'ochobre, 2005 0 FacebookTwitterPinterestEmail