Música Nosoträsh presenta a la so nueva formación con Xabel Vegas by asturnet 4 de xineru, 2006 El grupu xixonés Nosoträsh presenta los temes del so últimu discu ‘Cierra la puerta al salir’ y a la so nueva formación nun conciertu nel que van compartir escenariu con Xabel Vegas y la so banda Las Uvas de la Ira. Les músiques playes actúen cola incorporación a la batería del propiu Xabel Vegas y de la componente de Pauline en la Playa Mar Álvarez. La nueva formación de Nosoträsh presenta amás de les incorporaciones de Vegas y Álvarez cola vuelta de l’antigua componente eugenia Durán ‘Malela’, xunto a la salida del grupu de Monste Álvarez y Covadonga de Silva. La cita ye esti xueves 5 a les doce de la nueche na discoteca El Parque del Piles nun conciertu nel que Xabel Vegas y Las Uvas de la Ira actúen como teloneros de luxu de la nueva formación de Nosoträsh. 4 de xineru, 2006 0 FacebookTwitterPinterestEmail
Música La Xunta pola Defensa de la Llingua organiza un conciertu deTuenda en Xedré by asturnet 3 de xineru, 2006 La Xunta pola Defensa de la Llingua nel surroccidente organiza esti miércoles 4 un conciertu del grupu Tuenda en Xedré, nel conceyu de Cangas del Narcea. El tríu de música tradicional va presentar na so actuación los temes del so primer trabayu discográficu, nel que recueyen cantares procedentes de la memoria oral. La estaya suroccidental de la Xunta sigue col conciertu de Tuenda el so calandariu avezáu d’actividaes como les últimes entamaes los pasaos díes 27 y 28 d’avientu consistentes nun cursu d’asturiano occidental, impartíu pol académicu Roberto González-Quevedo, y la presentación de dos llibros de Naciu i Riguilón. El grupu Tuenda, qu’actúa a les 18,00 hores en Xedré, ta formáu pol cantante Xosé Ambás, Elías García al bouzouki y Pepín de Muñalén a la flauta. Los sos cantares beben directamente de la tradición popular y la mayor parte d’ellos recoyéronse en trabayos de campu per toa Asturies. 3 de xineru, 2006 0 FacebookTwitterPinterestEmail
Música Tuenda bebi derecho na tradición popular nel so primer discu by asturnet 24 d'avientu, 2005 Tuenda acaba publicar el so primer trabayu discográficu, una obra compuesta de temes tradicionales pañaos per tol país y remanecíos polos propios integrantes del tríu folk pal so debú nel sellu Tierra que dirixe Ígor Medio. Un discu que bebi directamente nes fontes orixinales de la música popular asturiana. Xosé ‘Ambás’ a la voz y percusiones, Elías García al bouzuki y Pepín de Muñalén a la flauta formen Tuenda, un grupu surdíu nos conciertos de folk de cámara de Caxastur y que ve espeyada nel so primer discu una manera distinta y bien personal de facer música tradicional. En xunto diecisiete temes recoyíos directamente pol cantante ya investigador Xosé ‘Ambás’ nos sos trabayos de campu per diverses fasteres de toa Asturies. 24 d'avientu, 2005 0 FacebookTwitterPinterestEmail
Música Ilegales recupera les sos primeres grabaciones nun discu by asturnet 23 d'avientu, 2005 Ilegales presenta esti viernes 23 nun conciertu en Xixón la reedición nun discu de delles grabaciones orixinales de los sos primeros temes. La banda de Jorge Martínez va actuar na fiesta del aniversariu d’un conocíu local de Cimavilla y va facelo compartiendo escenariu con Koniec, l’otru grupu encargáu d’amenizar la folixa. Cantares como “Princesa equivocada”, “Europa ha muerto”, “Revuelta juvenil en Mongolia” o “La Fiesta” van sonar esta nueche na discoteca El Parque’l Piles en voz del so autor, el fundador y caltenedor del espíritu orixinal d’Ilegales, Jorge Martínez. Xunta l’actuación en directu, dende agora los fans del grupu van poder disponer de les grabaciones remasterizaes d’estos temes vieyos nel discu que’l propiu Martínez acaba de publicar nel so sellu La Casa del Misterio. Ilegales actúa a partir de les doce de la nueche nun conciertu que va tener continuación na banda Koniec pa conmemorar la fundación fai más de dos décades del pub Escocia de Cimavilla. Darréu de les actuaciones d’Ilegales y Koniec, diversos Djs van encargase de que siga la fiesta na discoteca del Piles hasta que’l cuerpu aguante. 23 d'avientu, 2005 0 FacebookTwitterPinterestEmail
Música Ciañu acueye la cuarta edición del festival Nalón Rock by asturnet 22 d'avientu, 2005 L’antigu Cine Ideal de Ciañu ye l’escenariu escoyíu pa la celebración de la cuarta edición del festival Nalón Rock qu’entama esti viernes 23 cola presencia de los grupos Skontra, La Tarrancha, KilometroZero y Moebius. El festival escomienza a les 21.00 hores y el preciu de les entraes ye de 5 euros. 22 d'avientu, 2005 0 FacebookTwitterPinterestEmail
Música La Banda Gaites de Villaviciosa consigue’l primer puestu de la Liga Galega by asturnet 20 d'avientu, 2005 La Banda de Gaites de Villaviciosa-Sidra El Gaitero consiguió la másima puntuación na primer fase eliminatoria de la Liga Galega de Bandas de Gaitas celebrada esti domingu 18 n’Entrimo (Ourense)y los uvieínos de la Banda Xácara quedaron nel quintu puestu. El conxuntu maliayés algama por segundu añu consecutivu esta posición del prestixosu concursu de música tradicional. La Banda de La Villa llogró sacar 94,5 puntos sobre un total de 100 nesta primer fase de la Liga Galega, un campeonatu al qu’acuden conxuntos musicales de toa Galicia y d’otros países, ente ellos Asturies. La eliminatoria celebróse esti domingu 18 n’Entrimo nun certame nel que participaron más de cinco mil gaiteros. 20 d'avientu, 2005 0 FacebookTwitterPinterestEmail
Música Daniel de la Cuesta recueye nun CD los sos trabayos d’investigación sobre la bandurria by asturnet 19 d'avientu, 2005 El músicu y investigador etnográficu Daniel García de la Cuesta ye l’autor del discu tituláu “Cantares de bandurria” qu’acaba d’aparecer embaxo’l sellu de L’Aguañaz. El discu ufierta una amplia amuesa de piecesrecuperaes y otres compuestes pol autor valiéndose del instrumentu de cuerda y arcu remanecíu de la tradición popular. “Cantares de bandurria” ye’l resultáu musical d’un trabayu d’investigación fechu por Daniel García de la Cuesta, al rodiu de la bandurria, amás, ye’l complementu sonoru del llibru entituláu “La bandurria y el rabel”, del mesmu autor, nel que s’amuesa la hestoria, usu, espardimientu, etimoloxía, etc…, d’esti instrumentu y d’otros colos que comparte hestoria musical, como’l rabel. Ye esti un trabayu de recuperación y tresmisión del usu tradicional del instrumentu n’Asturies, ya que’l bandurrieru caberu conocíu, morrió metanes la década de 1990. El trabayu de García de la Cuesta basóse nel llabor d’oyer y trabayar coles grabaciones que se caltienen de bandurrieros como David Caballín, Pepe Calvo, José Ramón Prida o Cefero Traviesas, amás de remanar la información atropada gracies a los testimonios de familiares y d’otros munchos informantes, sobretoo del pueblu casín de Caliao, aldea onde se celebra un alcuentru de bandurrieros, dende 1998, entamáu pola asociación La Quintana, de Xixón. El discu contién 31 cortes, de los que 17 son melodíes y cantares tradicionales del repertoriu del instrumentu interpretaes por Dani García, amestando dalguna composición propia. De forma inédita, ufiértase nesta edición parte de les grabaciones que se-y ficieron a David Caballín. Estes grabaciones rexistróles nel añu 1982 Manuel S. López, miembru de La Quintana. Tamién apaez, de forma inédita, una grabación fecha en Buenos Aires, na década de 1960, polos bandurrieros Pepe Calvo y José Ramón Prida. Asina, esti cd, conviértese nun trabayu etnográficu de consulta imprescindible alredor d’esti tipu d’instrumentos de cuerda esfrotiada. Nel llibru La bandurria y el rabel, xuntu col métodu pa deprender a tocar, apaecen les partitures de los temes que s’ufierten nesti discu compautu. El cd vien con un cartafueyu de 28 fueyes a color que trai información gráfica abondo, los testos de los cantares y desplicaciones asgaya del conteníu del mesmu. Esti trabayu tá editau pola compañía discos L’Aguañaz y cuenta col patrocinu pal so espardimientu la compañía Tecnosaga 19 d'avientu, 2005 0 FacebookTwitterPinterestEmail
Música Woody Allen vuelve a Asturies pa tocar cola so banda de jazz by asturnet 15 d'avientu, 2005 El cineasta Woody Allen vuelve a Asturies cola so banda de jazz pa ufiertar un conciertu de baldre nel Auditoriu d’Uviéu el prósimu 26 d’avientu. La noticia fízola pública el director de la Fundación Príncipe d’Asturies Graciano García nel cursu d’una conferencia sobre los venticinco años d’esistencia de los premios que lleven el nome del heriede de la corona española. El cineasta niuyorquín vuelve a Asturies invitáu pola Fundación pa actuar cola so New Orleans Jazz Band y col fin de pasar unos díes nel país nun viaxe financiáu por Caxastur, según desveló esti miércoles el creador de los Premios Príncipe, Graciano García. Allen tien previsto llegar a Uviéu el día 25 d’avientu y marchar dos díes después, el 27, después d’ufiertar el so conciertu nel Auditoriu y visitar l’interior d’Asturies. Darréu de la so estancia nel nuestru país el director de ‘Manhattan’ y clarinetista de la New Orleans Jazz Band va dar un conciertu en Vitoria. 15 d'avientu, 2005 0 FacebookTwitterPinterestEmail
Música Responsables municipales de Xixón amuesen el so disgustu pol ‘gatillazu’ de Sabina by asturnet 13 d'avientu, 2005 La suspensión de los conciertos de Joaquín Sabina en Xixón sigue trayendo cola. Al pesar de les disculpes al músicu y los sos bonos deseos pa la so recuperación manifestaes pol conceyal de Festeyos, Ivan Álvarez Raja, tanto la xerente del Teatru Xovellanos como la propia alcaldesa Paz Fernández Felgueroso, espresaron el so disgustu y maltar pola situación creada. El PP pide la dimisión de Raja del que afirmen: “la xente diz que ye gafe”. Los representantes del Partíu Popular, per voz del conceyal Pablo González pidieron la dimisión del responsable de la conceyalía de Festeyos: “pola so mala xestión” y recordaron que “ye una caxigalina difundida per tola ciudá que Raja ye gafe”. La xerente del Teatru Xovellanos, Carmen Veiga, declaró, pel so llau, según recueye’l Diariu El Comercio que “si por min fuera, Sabina nun volvía al Teatru” y calificó al artista de “poco profesional” porque “reconozca públicamente que ‘fue malito’ y darréu suspenda los sos conciertos”. Veiga quixo recalcar que la suya yera una “opinión personal” y que les decisiones de la empresa municipal “tómales el so Conseyu d’Administración”. L’alcaldesa tamién espresó en diversos medios el so “disgustu” polo sucedío, mientres la oficina del músicu xienense aseguraba que los conciertos de la xira entamada n’ochobre por Sabina siguen vixentes y que’l prósimu va ser en Granada esti xueves. 13 d'avientu, 2005 0 FacebookTwitterPinterestEmail
Música Sabina tien de suspender la so primer actuación en Xixón por pingu by asturnet 9 d'avientu, 2005 El cantautor Joaquín Sabina tuvo de suspender esti xueves pela nueche la so primer actuación en Xixón por mor de los efectos de la so primer confesada salida nocherniega dende quentamó la so xiral 17 de payares en Valladolid. Poro, ya se falara na rede de rumores del so tornar a la folixa nos hoteles de delles ciudaes nes que vieno actuando dende entós. En Xixón tien previsto actuar na nueche desti vienres y del domingu nel Teatru Xovellanos, y agora ye futurible que lo faiga tamién na del sábadu pa sostituir el conciertu del miércoles. Sabina suspendiól primer conciertu en Xixón por problemes de voz depués de quentamare lactuación cola quhabría los tres conciertos previstos nel Teatru Xovellanos. Tres dentamar lactuación Sabina nun pudo ufiertar más que cinco cancios por mor de los problemes cola voz y confesó que per primera vegada dende quentamare la Xiral pasáu 17 de payares, na nueche anterior fuera malu. Los espectadores respondieron a la confesión de Sabina con aplausos, amuesandol gran ciñu que se-y tien en Xixón y nAsturies al meyor cantautor de la música española recién. Si nun hai nueves sorpreses amás de los conciertos previstos pa güei vienres y pal domingu, tendrá de cellebrase otru conciertul sábadu día 10. La presencia de Sabina nAsturies entamó ya con dificultaes pola escasez de localidaes p’asistir a los conciertos del músicu xienense por mor del repartu d’invitaciones de baldre y lo limitao del aforu del coliséu playu que ficieron a los responsables municipales del eventu entainar la contratación d’otra actuación de Sabina pal domingu 11 d’avientu. Alrodiu de mediu centenar d’entraes punxéronse a la vienda nes taquielles del Xovellanos pal nuevu conciertu marcáu después de que s’esgotaren les localidaes pa los díes 8 y 9. 9 d'avientu, 2005 0 FacebookTwitterPinterestEmail