Música The Lords of Altamont traen a Xixón los sos ritmos arispios de garaxe-punk by asturnet 19 de xineru, 2006 La banda americana de garaxe-punk The Lords of Altamont ufierten esti xueves 19 un conciertu na Sala Parque del Piles de Xixón pa presentar el so últimu discu: ‘Lords have Mercy”. Los ex componentes de The Fuzztones y Bomboras traen a Asturies los sos ritmos arispios y contundentes nuna única actuación que de xuro nun va defraudar nin a los fans nin al públicu casual. La cita pa ver a la banda capitaneada por Jake Cavaliere ye a les diez de la nueche na discoteca Parque del Piles de Xixón con un preciu de 15 euros en taquiella y 12 en vienda anticipada. 19 de xineru, 2006 0 FacebookTwitterPinterestEmail
Música Aplácense temporalmente los ciclos musicales ‘Entre mujeres’ y ‘Pop la cara’ by asturnet 17 de xineru, 2006 Les actuaciones previstes dientro de los ciclos musicales ‘Entre mujeres’ y ‘Pop la cara’ organizaos pola empresa promotora del Crossroad Festival na Sala Albéniz de Xixón van aplazase temporalmente por dellos problemes nel calendariu de los artistes participantes. Destamiente los conciertos de les cantadores Esperanza Älvarez y Mayte Martín programaos pa esta selmana pospónense pal mes d’abril. La organización de les actuaciones asegura nuna nota de prensa que les persones con entraes adquiríes pa los conciertos de les dos cantadores flamenques pueden conservales hasta la nueva fecha de les actuaciones o solicitar que-yos devuelvan les perres onde les mercaron. Na mesma nota infórmase que los otros ciclos musicales programaos pal mes de marzu: ‘Guitars & Revolution’ y ‘White Boy Blues’ van celebrase nes feches previstes. Asina’l viernes 3 de marzu, actúen Comando 9mm + Desakato y dientro’l ciclu de bandes españoles de blues el xueves 9 de marzu van tocar Los reyes del KO, el viernes 17 del mesmu mes: Malcom Scarpa/Ñaco Goñy trio y el viernes 23 : Tonky Blues Band. 17 de xineru, 2006 0 FacebookTwitterPinterestEmail
Música Elliot Murphy y Carmen París protagonicen los conciertos estrella del fin de selmana by asturnet 13 de xineru, 2006 El rockeru americanu Elliot Murphy actúa esti viernes 13 n’Avilés nun conciertu de la so xira de promoción del so últimu discu “Murphy gets Muddy”, una esbilla de versiones de blues clásicos n’homenaxe al míticu Muddy Waters. Na nueche del sábadu una artista bien distinta, la cantante aragonesa Carmen París llega al Teatru Xovellanos de Xixón colos temes del so últimu trabayu: “Jotera lo serás tú”. El conciertu de Murphy -un vieyu conocíu de los escenarios asturianos y colaborador de grupos del país como los uvieínos The Stoormy Mondays- ye esta tarde a les 20,30 na Casa Muncipal de Cultura d’Avilés. Carmen París actúa esti sábadu 14 a les 20,30 nel Teatru Xovellanos pa presentar les pieces del so segundu trabayu discográficu, una grabación na que xunta los sones tradicionales de la jota aragonesa col flamenco y ritmos de la más diversa procedencia. 13 de xineru, 2006 0 FacebookTwitterPinterestEmail
Música Herbert, Klaus & The Happy Amish presenten en directu un clip del so álbum de debú by asturnet 12 de xineru, 2006 Herbert, Klaus & The Happy Amish presenten esti viernes 13 en directu el video-clip ‘Ghost in the River’ de la realizadora Laura Martínez. El tema del clip ta estraíu del primer trabayu discográficu de la banda llangreana “The Smallest Story”. El Forum de Fnac ye’l sitiu escoyíu por esta banda de country alternativu pa facer el conciertu de presentación del so videu musical. L’autora de la filmación de ‘Ghost in the River’ algamó como ganadora l’últimu concursu de videoclips del Institutu Asturianu de la Mocedá y de la cadena 40 Principales-Asturies y rodó esta pieza siguiendo los patrones estéticos del western clásico pa ilustrar el tema de Herbert, Klaus & The Happy Amish. El conciertu y la presentación de ‘Ghost in the River’ ye esti viernes 13 a les 19,00 hores en Fnac de Parque Principado. 12 de xineru, 2006 0 FacebookTwitterPinterestEmail
Música Chus Pedro y José Manuel Tejedor vuelven al Celtic Connections de Glasgow by asturnet 11 de xineru, 2006 El cantante Chus Pedro y el gaiteru José Manuel Tejedor vuelven participar nel festival Celtic Connections de Glasgow qu’escomienza esti miércoles 11 y va espurrise hasta’l prósimu 29 de xineru. La cita ye nel espectáculu Donald Shaw’s Harvest, un proyectu común nel que xóvenes talentos musicales afonden na interpretación les tradiciones bretona, gallega y asturiana. Xunta Chus Pedro y Tejedor van participar los bretones Jean Michel Veillon y Gilles le Bigot, la cantante gallega Uxía, l’irlandés Gerry O’Coonor y los escoceses Aidan O’Rourke, Charlie McKerron, Michael McGoldrick y Jim Sutherland. Al llau de los músicos invitaos una orquesta de xente mozo y la batuta del fundador de los míticos Capercaille, l’escocés Donald Shaw. El Donald Shaw’s Harvest (lliteralmente ‘collecha’) va entamase’l prósimu domingu 22 de xineru nel Auditorium de Glasgow a les 3.00 p.m. 11 de xineru, 2006 0 FacebookTwitterPinterestEmail
Música Dixebra, Stukas y Berrones participen nel conciertu d’apoyu a los trabayadores de Menasa by asturnet 11 de xineru, 2006 Dixebra, Stukas y Los Berrones son los cabezaleros del cartelu col que va celebrase esti viernes 13 en Sama un festival de sofitu a los trabayadores de la empresa Menasa. Otros grupos y músicos de la Cuenca participen nel conciertu solidariu como Martagón Trío, Tomás y los Demás, Tony Penicilina y Los Frixuelos Eléctricos. El festival ta organizáu pol sindicatu CCOO y la estaya moza d’Izquierda Xunida del Nalón y cuenta cola colaboración del colectivu de Muyeres de los Trabayadores de Menasa. Un día enantes, el xueves 12 a les 19.00 hores, na Casa de Cultura de La Felguera, va entamase una mesa redonda titulada “Perspectives de futuru na Cuenca” na que van intervenir Juan Iglesias secretariu xeneral de la UJCE, Pablo Prieto de la Plataforma Xuvenil de Turón, el profesor de socioloxía Holm Koler y Darío Díaz Director Xeneral de Relaciones Esteriores del Principáu. El festival n’apoyu a los trabayadores de Menasa escomienza a les 21.00 hores nel Teatru Llangréu de Sama y les entraes tán puestes a la vienda como bonos d’ayuda de 3 euros. 11 de xineru, 2006 0 FacebookTwitterPinterestEmail
Música Un discu-llibru recuerre la hestoria del pop playu de los 60 by asturnet 10 de xineru, 2006 L’hestoriador y responsable del archivu municipal de Xixón Luis Miguel Piñera ye l’autor del discu-llibru “Pop playu” que se presenta esta tarde a les 20,00 hores nel Centru de Cultura Antigu Institutu con presencia del prologuista del volume, el cantante Miguel Ríos. El recopilatoriu repasa los conxuntos ye-yés del Xixón de los años sesenta. 10 de xineru, 2006 0 FacebookTwitterPinterestEmail
Música Clara Montes abre un ciclu de conciertos organizaos polos promotores del Crossroad by asturnet 9 de xineru, 2006 Tres ciclos de conciertos dedicaos a otros tantos xéneros musicales van protagonizar les actuaciones en directu de la Sala Albéniz de Xixón nos prósimos meses. La cantante Clara Montes esti xueves 12 ye la primera en desfilar per esta serie de conciertos entamaos polos mesmos promotores del Crossroad Festival. “Entre mujeres” ye’l títulu del miniciclu inauguráu por Clara Montes y a la que van siguir Esperanza Fernández, el prósimu 19 de xineru y la cantadora flamenca Mayte Martín el 26. Darréu la Sala xixonesa va abellugar el siguiente ciclu nomáu “Pop la cara” nel que ya hai confirmaes les actuaciones de los grupos Aviador Dro y Humbert & Humbert. Los ritmos del blues encarrilen el terceru de los ciclos embaxo’l títulu de “White Boys Blues” y nél van intervenir bandes como Los Reyes del KO, Tonky Blues Band y Ñaco Goñi y Malcom Scarpa Trio. L’empresariu local Kike Loui, promotor del Crossroad Festival, ye l’organizador d’estos conciertos colos que pretende animar l’entamu priváu d’actuaciones musicales na ciudá de Xixón. Amás de los tres ciclos programaos ta previsto entamar un cuartu dedicáu al rock’n’roll y a mediaos del mes de marzu va celebrase un conciertu con bandes de hard radical como Desakato, Comando 9 mm. y grupos asturianos d’escena asemeyada. 9 de xineru, 2006 0 FacebookTwitterPinterestEmail
Música Depeche Mode podía protagonizar el conciertu del veranu de Xixón by asturnet 5 de xineru, 2006 Depeche Mode, la veterana banda pop británica de los ochenta, podía ser el grupu estrella del prósimu veranu en Xixón. La posibilidá anuncióla’l conceyal de Festeyos del Ayuntamientu playu, Iván Álvarez Raja, en declaraciones a un mediu informativu de la ciudá de Xovellanos. Inda col espolín entamáu a cuenta de la suspensión de les actuaciones de Joaquín Sabina, el polémicu conceyal, anunciara va unos díes que taba negociándose la celebración d’entrambos macroconciertos en Xíxón pa los prósimos meses. Una de les actuaciones estrella del añu qu’escomienza sábese agora que puede ser Depeche Mode, la veterana banda del pop británicu que remaneció apocayá con un nuevu discu: “Playing The Angel” y que ta en plena xira de promoción embaxo’l títulu de “Touring The Angel”. Una de les cites d’esta xira pasa pel Festival de Benicassim nel mes de xunetu y alrodiu d’eses feches podía celebrase’l conciertu de Xixón. 5 de xineru, 2006 0 FacebookTwitterPinterestEmail
Música Mari Luz Cristóbal Caunedo apuesta nel so segundu discu pola anovación serena de la tonada by asturnet 4 de xineru, 2006 Mari Luz Cristóbal Caunedo busca nel so segundu discu producíu por Lisardo Lombardía un camín ente la fidelidá a los raigaños tradicionales y l’anovación de la tonada con arreglos que l’asitien pelos carriles de la música étnica universal. Un escoyíu y discretu garrapiellu de colaboradores arropiellen la voz de Mari Luz en ‘Cantar de seronda’. Les voces del coru Muyeres y del cantador Horacio Huerta, el gaiteru Llorián Fernández xunta los músicos de la Bandina’l Tombo y el tríu DRD acompañen a la gran dama de la canción asturiana nel so segundu trabayu discográficu, una curiada producción de Lisardo Lombardía na que la presencia de Caunedo ye tan fonda como esplícita. Dieciocho temes de raigañu tradicional, munchos d’ellos recuperaos pola cantadora pa esti discu, componen l’afitamientu definitivu d’una voz ensin la que nun diba entendese la música asturiana d’esti sieglu XXI. 4 de xineru, 2006 0 FacebookTwitterPinterestEmail