Música Tribuna Ciudadana organiza un ciclu de música folk by asturnet 15 de marzu, 2006 L’asociación cultural Tribuna Ciudadana ye la organizadora d’un miniciclu de conciertos dedicáu a la música folk. El programa, coordináu por Lisardo Lombardía, inclúi tres actuaciones cola participación de los asturianos Felpeyu, la mítica banda castellana La Musgaña y los norteamericanos Hielen Ivers. El primeru de los conciertos va celebrase esti llunes 20 de marzu con Felpeyu. Habrán siguilu l’actuación de La Musgaña el prósimu 27 d’abril y de Hielen Ivers el xueves 29 de xunu. Toles actuaciones van ser n’Uviéu nun sitiu inda por concretar. 15 de marzu, 2006 0 FacebookTwitterPinterestEmail
Música Sophie Auster va actuar n’Avilés por mor del Día Mundial de la Poesía by asturnet 12 de marzu, 2006 La cantautora norteamericana Sophie Auster va actuar n’Avilés el prósimu 20 de marzu nun conciertu nel Teatru Valdés, dientro la programación del Día Mundial de la Poesía qu’entama la Fundación Príncipe d’Asturies a comuña cola UNESCO. Auster vien acompañada del so grupu One Ring Zero y va repetir actuación n’Uviéu xunto a Luis Eduardo Aute nel actu central del Teatru Filarmónica el día 21. La niuyorquina, fía del escritor Paul Auster y considerada una de les voces más singulares de la nueva música d’autor norteamericana, interpreta nel so repertoriu versiones de poemes de so padre y d’autores como los surrealistes franceses Paul Eluard, Guillaume Apollinaire o Tristan Tzara. Los conciertos d’Avilés y Uviéu avérenla al nuestru país per primer vez dende que saltara al circu de la música independiente americana. 12 de marzu, 2006 0 FacebookTwitterPinterestEmail
Música Los hestóricos Comando 9mm actúen en Xixón colos asturianos Desakato by asturnet 10 de marzu, 2006 Comando 9mm, la lexendaria banda superviviente del punk radical de los ochenta, actúa esti viernes 10 en Xixón nun conciertu que va tener a los asturianos Desakato como teloneros. La Sala Albéniz acueye el conciertu del grupu cabezaleru de la escena combativa estatal entamada va dos décades y que remaneció de la so povisa en 2002 col enérxicu discu “Dios salve a los taraos”. L’últimu trabayu grabáu por Comando 9mm ye’l directu “La Gran Estafa”, con DVD incluíu, onde repasen temes del so vieyu repertoriu y del actual, una amuesa de lo que habrá ver el públicu xixonés esti viernes darréu l’actuación de Desakato. L’empiezu del conciertu ta previstu pa les 20.00 hores. Comando 9mm surdió a mediaos de la década de los ochenta colos restos d’otres dos mítiques bandes de la escena punk estatal: La UVI y Larsen. Tres unos años nel limbu musical, va cuatro la banda sorprendió a toos col discu “Dios salve a los taraos”, consideráu el so meyor trabayu hasta la fecha. 10 de marzu, 2006 0 FacebookTwitterPinterestEmail
Música Dark la Eme presenta el so últimu discu “Chigre y dragón” by asturnet 9 de marzu, 2006 El raperu l.leniegu Dark la Eme presenta esti viernes 10 nel Forum de Fnac en Siero el so últimu trabayu discográficu “Chigre y Dragón”(Santo Grial, 2006)acompañáu por una formación de tres músicos habituales nos sos directos: Antón Ceballos al baxu, Nacho García a la batería y Sergio García a les percusiones. L’autor de “Un asturiano en Madrid” (versión autorizada de Englisman in N.Y. de Sting que se convirtió nel himnu oficial de los nuevos emigrantes asturianos) vuelve a la so tierra después de la esitosa presentación de “Chigre y dragón” nel últimu antroxu n’Uviéu, nun conciertu al qu’asistieron más de cuatro mil persones. Nel discu que va presentar esti viernes a les 20.00 hores en Fnac colaboren músicos y cantantes asturianos como Anabel Santiago, Héctor Braga, Alberto Rionda (Avalanch) o Andreas Priwitz. 9 de marzu, 2006 0 FacebookTwitterPinterestEmail
Música La Complutense noma a Serrat ‘honoris causa’ por defender la convivencia llingüística by asturnet 9 de marzu, 2006 La Universidá Complutense de Madrid va nomar ‘honoris causa’ al cantautor catalán Joan Manuel Serrat nun actu que va celebrase’l prósimu 15 de marzu na sé de la institución académica. Ente los méritos de la distinción, fecha a propuesta del rector Carlos Berzosa, destácase la contribución del músicu barcelonés a la convivencia ente les llingües castellana y catalana. Otros méritos que se resalten de la trayectoria artística de Serrat son el so llabor de difusión de la poesía española y latinoamericana, asina como’l so puxu a la nomada canción d’autor tanto en catalán como en castellán. Joan Manuel Serrat remata estos díes el so nuevu discu, un trabayu grabáu en Menorca con un repertoriu íntegramente en catalán tituláu “Mo” (la pronunciación del topónimu Maó polos naturales de la isla balear). El reconocimientu de la Universidá Complutense destacando la contribución del cantautor a la convivencia llingüística produzse nun momentu de másima cripación ente los sectores más conservadores del nacionalismu español dica la diversidá idiomática del estáu y especialmente en Cataluña, y puede intepretase como un xestu del Madrid cultural ya intelectual al papelu desenvueltu por artistes como Serrat nel afitamientu democráticu del estáu español dende la so filiación a la diversidá pluricultural. 9 de marzu, 2006 0 FacebookTwitterPinterestEmail
Música Rafael Lorenzo celebra trenta años dedicaos a la música popular asturiana by asturnet 8 de marzu, 2006 L’agrupación n’Occidente de la Xunta pola Defensa de la Llingua entama esti sábadu 11 en Tinéu una folixa d’homenaxe a Rafael Lorenzo cola que se quier remembrar la dedicación a la música popular del cantautor a lo llargo de trenta años. La Bandina’l Tombo, Xosé Ambás, Pedru Pereira y La Banda Gaitas ‘Rapigueiro’ de La Puela, ente otros, van tar arrodiando al músicu tinetense. El cine Marvi de la villa occidental acueye’l conciertu en recordanza de la treintena d’años que lleva Rafael Lorenzo cantando en llingua asturiana. La cita ye esti sábadu 11 a les 19.30. De siguío’l conciertu la Xunta organiza un filandón-folixa na Plaza las Campas onde podrá degustase la gastronomía del conceyu y beber vino del país. Rafael Lorenzo pertenez a la xeneración de músicos que se dio en nomar Nueu Canciu Astur. Los sos últimos trabayos discográficos tuvieron dedicaos a la figura d’Alfonso Camín y al folklor vaqueiru. 8 de marzu, 2006 0 FacebookTwitterPinterestEmail
Música El Pericote de Fardaxu escoyíu nel Irish & Celtic Music Podcast by asturnet 6 de marzu, 2006 L’Irish & Celtic Music Podcast ta acabante d’escoyer el tema “El Pericote” del grupu Fardaxu pal so númberu de marzu del mismo. Hasta agora Fardaxu yera un grupo recomendáu por esti sitiu asturianu-americanu de EEUU. Dende güei entama la difusión de la so versión de El Pericote nos Estaos Xuníos. Fardaxu comparte’l Podcast de marzu xunta Karen Mal de New England, Seamus Keneddy de Belfast, Kevin Beham de New Jersey y los Brother 3 de Dallas ente otros.Los discos de Fardaxu viéndense na Arxentina en Tamaba, Adolfo Alsina 1994, tf: 4952-9803 (sede de Fardaxu) y en Musimundo, Yenni’s, Deep Blue (Paseo La Plaza) ente otres disqueríes y na web www.piramily.com . 6 de marzu, 2006 0 FacebookTwitterPinterestEmail
Música Niundes saca a la cai el so primer trabayu discográficu by asturnet 6 de marzu, 2006 “Enxamás ye pa siempre” ye’l títulu del primer trabayu discográficu de Niundes , una banda formada por seis músicos con raigaños en Llanes qu’al pesar del so breve bagaxe vien apurrir aires de frescura al panorama folk asturianu. La producción artística del discu ta a cargu de Xel Pereda, que tamién colabora en dellos temes xunto al so compañeru de Llan de Cubel Elías García. Publicáu pol sellu Lloria Discos , grabáu nel estudiu Mundo Sonoro y mezcláu en Stereofolk Studios, “Enxamás ye pa siempre” ufierta un conxuntu d’once temes, dalgunos de composición propia y el restu d’inspiración popular, amás d’una pieza escrita pol desapaecíu Pedro Bastarrica. El primer discu de Niundes apuesta por un folk de llinia clara interpretáu con fonda llimpieza instrumental y magnetizáu pola suxerente voz de la solista Belén García. La grabación impecable y la mano minuciosa del productor Xel Pereda (Llan de Cubel, Nacho Vegas…) faen de “Enxamás ye pa siempre” una de les novedaes más interesantes de les últimes fornaes de la música asturiana. Niundes fórmenlo amás de Belén García a la voz y a los teclaos, Ramón González al vigulín, Omar Ceballos na percusión, Isidro Suárez a la flauta travesera, Jonathan Ward a la guitarra acústica y Roberto Tarano a la gaita y xiblates. 6 de marzu, 2006 0 FacebookTwitterPinterestEmail
Música Elefantes despídese del públicu asturianu con un conciertu en Xixón by asturnet 2 de marzu, 2006 La última xira del grupu Elefantes pasa esti xueves 2 per Xixón onde la célebre banda de los noventa despídese del públicu asturianu con un conciertu na Sala Albéniz. El grupu anunció va unes selmanes nuna nota de prensa la so intención de disolvese después d’esta serie de conciertos pa que cada miembru de la banda siga la so carrera en solitario. Elefantes dexa tres del so rastru diez años de carrera y siete discos nel mercáu col marchamu de la que fuera ún de los conxuntos más esitosos del panorama de la música indie del estáu na década de los noventa. La última ocasión de velos xuntos n’Asturies ye la del conciertu d’esta nueche en Xixón, a les 21.30 na Sala Albéniz. El grupu sigue darréu la que ye so última xira hasta’l mes de mayu per diverses ciudaes de la península. 2 de marzu, 2006 0 FacebookTwitterPinterestEmail
Música El procesu de El Filandón y la bandurria de Dani de la Cuesta estrenen los xueves de marzu en Tierra Astur by asturnet 2 de marzu, 2006 El procesu tradicional de los filandones puestu en práctica poles Muyeres de La Cogolla-Nava y la presentación del discu de Daniel García de la Cuesta “Cantares de bandurria” protagonicen la estrena de los xueves musicales de marzu nel llagar de Tierra Astur en Cualloto. Nes prósimes selmanes van desfilar pel escenariu de la sidrería-restaurán grupos como Batulax, Los Llanzones, FLAD+D y Na Zona. L’asociación de Muyeres de La Cogolla van facer una amuesa en directu del procesu de cardáu, filáu y texíu de la llana según el métodu siguíu nos filandones tradicionales, unes atopaes qu’amás de la so función utilitaria teníen el calter de puntos d’alcuentru, convivencia ya intercambiu de la memoria oral ente les muyeres campesines asturianes. Pel so llau, el músicu ya investigador, Daniel García de la Cuesta, presenta en formatu de discu-llibru el resultáu de los sos llabores de recuperación y estudiu d’un instrumentu tradicional como la bandurria, poco conocíu anguaño y que fue en tiempos ún de los más populares nes celebraciones tradicionales. Los prósimos conciertos de Tierra Astur van protagonizalos Batulax, el día 9 de marzu; Los Llanzones, el xueves 16; FLAD+D el xueves 23; y Na Zona, que van actuar na presentación del so discu homónimu, na nueche del 30 de marzu. 2 de marzu, 2006 0 FacebookTwitterPinterestEmail