Música Eileen Ivers pon el raigañu de la música irlandesa nel pieslle de los conciertos de Tribuna Ciudadana by asturnet 27 de xunu, 2006 La vigulinista d’ascendencia irlandesa Eileen Ivers va ser la encargada de pesllar mañana los conciertos del ciclu “Música con Raíces” organizaos por Tribuna Ciudadana, nun recital nel que va tar acompañada por Tommy McDonell (voz principal, armónica y percusión), James Riley (guitarra), Isaac Alderson (flauta y uillean pipes), Gregory Jones (baxu acústicu y ellectricu) y Ben Wittman (batería), y que supón la so primer actuación n’España. El conciertu va tener llugar nel Auditoriu Príncipe Felipe a les ocho la tarde de mañana. Eileen nació en 1965 nel Bronx, New York, fía d’inmigrantes irlandeses. Dende los ocho años lleva tocando’l vigulín, llegando a collaborar dende bien moza con músicos como Seamus Egan y Mick Moloney, que creó Green Fields of America poco depues, entrando Eileen a formar parte de la banda. Otres collaboraciones inclúin a Luka Bloom; Daryl Hall y John Oates, colos que fizo una xira d’un añu que la llevó per toa Europa, Australia y Xapón; John Doyle; Seamus Egan, Kimati Dinizulu, Chris Byrne y Pat Maguire, enre otros. Amás, Eileen foi una de les fundadores del grupu Cherish The Ladies. 27 de xunu, 2006 0 FacebookTwitterPinterestEmail
Música El Festival Intercélticu d’Avilés rinde homenaxe a Felpeyu by asturnet 27 de xunu, 2006 El Festival Intercelticu d’Aviles que se celebra tolos branos aconceyando dalgunes de les meyores bandes de música folk del país xunta agrupaciones de prestixu internacional, prepara pal prósimu sábadu día 22 de xunetu un homenaxe al grupu Felpeyu, que la pasada fin de selmana tuvo un accidente de tráficu nel que perdieron la vida dos de los sos miembros, Igor Medio y Carlos Redondo. El Festival Intercelticu d’Aviles, que yá tenía ciarrada la participación de grupos y bandes de toles naciones celtes, tenía previstes les actuaciones de Llan de Cubel y de los galeses Mabon pal prósimu día 22 de xunetu. Tres del desgraciáu accidente que tuvo llugar el pasáu sábadu na localidá alavesa de Zuya, nel que perdieron la vida Igor Medio y Carlos Redondo, la organización del festival decidió dedicar un homenaxe especial a esti míticu grupu asturianu que na pasada edición fue ún de los más siguíos pol públicu asistente a la cita avilesina. Fontes de la organización punxeronse en contactu col grupu xixones ‘pa que toquen ellos o pa sumar nuevos grupos al homenaxe. Como ellos quieran’, y anguaño tán estudiando la posibilidiá de bautizar ún de los díes del festival ‘col nome del grupu d’Ígor y Carlos’. 27 de xunu, 2006 0 FacebookTwitterPinterestEmail
Música Carlos Rubiera presenta un nuevu discu con ‘Canciones de Xixón’ by asturnet 26 de xunu, 2006 El veteranu cantautor Carlos Rubiera presentaba güei a la una de tarde, nel Centru de Cultura Antiguu Institutu de Xixón, el so últimu trabayu discográficu que lleva por títulu ‘Canciones de Xixón’. Rubiera ye ún de los históricos miembros del llamáu Nueu Canciu Astur nos primeros años de la transición, a mou d’otros movimientos asomeyaos que se dieron n’otres nacionalidaes del estáu, y de la organización Conceyu Bable en Xixón, dende onde empezó a trabayar pola recuperación llingüística del asturianu. Carlos Rubiera (Caldones, 1956) presenta asina un nuevu discu depues del conocíu ‘Viaxe al silenciu’ onde marcó la so evolución como barítono llíricu, nel que facía arreglos a canciones tradicionales y versionaba al míticu Lluis Llach. Na so faceta lliteraria Rubiera ye autor de llibros como ‘Cuentos tres la guerra’ y ‘Cuentos de bona oreya’, y escribió tamien el poemariu ‘Venti sonetos’ nel añu 1999. 26 de xunu, 2006 0 FacebookTwitterPinterestEmail
Música Valledor compromete una Medalla d’Asturies pal grupu Felpeyu by asturnet 26 de xunu, 2006 El Conseyeru de Xusticia del Principáu d’Asturies, Francisco Javier García Valledor, comprometióse esti llunes nuna entrevista que-y ficieren en Popular TV (Cadena COPE) a plantegar nel Conseyu de Gobiernu la concesión d’una de les medalles d’Asturies al grupu Felpeyu, recién fechos una llaceria nun accidente cola perda d’Igor Medio y Carlos Redondo, polos qu’ayeri s’ufrió un funeral en Xixón qu’axuntó a tola clas política y la escena cultural astur. Francisco Javier García Valledor comprometió la so pallabra pa ufrir esti homenaxe al grupu y a los dos fallecíos respondiendo nesti sen a una entruga del director d’Astrunews, Próspero Morán, que participaba como invitáu nun programa especial de Popular TV de fin de la temporada política. El conductor del espaciu “El Avispero” de Popular TV, programa de tertulies polítiques nel que s’enxertaba la entrevista, comprometióse tamién a treslladar la petición a Ovidio Sánchez que va ser entrevistáu pela tardi y a Vicente älvarez Areces mañana. La entrevista col Conseyeru de Xusticia, Seguridad y Asuntos Esteriores del Principáu d’Asturies, Francisco Javier García Valledor, na que se fizo un repasu al añu políticu y a la xestión d’Izquierda Xunida-Bloque Por Asturies nel gobiernu asturianu no que va de llexislatura, tien una reemisión a les 13 hores de gúei martes en Popular TV. 26 de xunu, 2006 0 FacebookTwitterPinterestEmail
Música Emocionante despidida en Xixón pa Igor Medio y Carlos Redondo by asturnet 26 de xunu, 2006 Cientos de persones congregáronse ayeri nel tanatoriu municipal de Xixón pa despidir y homenaxear a los músicos de Felpeyu, Igor Medio y Carlos Redondo, muertos n’Àlava’l pasáu sábadu nun terrible accidente de coche cuando diben camín de Barcelona pa tocar nel Festival de Calaf. El panorama musical asturianu reconocía asina a dos de los grandes de la música , que foron despidíos polos acordes de los sos compañeros de profesión, colos que tanto y tan bien trabayaron na última decada. L’actu civil que se celebró ayeri a la una la tarde nel tanatoriu municipal de Xixón vióse desbordáu pola asistencia de cientos de personalidaes de diferentes ámbitos de la política, la música y la cultura, asina como multitú de familiares, amigos y siguidores, que quixeron dar la última despidida a Igor Medio y Carlos Redondo. A lo llargo del sentíu homenaxe, nel que tuvieron el restu de los componentes de Felpeyu, menos Xuan Nel Expósito que tovía s’alcontraba ingresáu nel hospital recuperándose de les sos mancadures, foron interpretaes n’honor de los fallecíos tres marches procesionales qu’arrespigaron y emocionaron a tolos presentes. Prestixosos músicos de diferentes formaciones asturianes, axuntaos nuna bandina, foron interpretando la marcha de Belmonte y la de Llanes, dando pasu a les palabres de los amigos como Miguel Rojo, que fixo llectura de dos de los sos poemes. Tres d’el, Boni Ortiz, lletrista de Felpeyu y amigu íntimu de los desaparecíos, tuvo unes palabres de recuerdu a la trayectoria y vivencies personales de Medio y Redondo. El filólogu Fernando Álvarez-Balbuena, amigu del grupu, fixo llectura de la canción ‘Tierra’, de la que ye autor, y que ye tou un símbolu na trayectoria de Felpeyu, al da-y nome a ún de los sos discos asina como al sellu discográficu que tiempu más tarde formaría Igor Medio. L’actor Toño Caamaño faló en nome de les families de los fallecíos p’agradecer el tratu y la presencia de tolos asistentes y poles muestres de cariñu recibíes nos dos díes anteriores. Con un emocionáu ‘que la música continúe’, l’homenaxe a estos dos grandes artistes ya inolvidables persones acabó cola interpretación en solitario de Flavio Benito d’«Antón el Neñu». Un emocionante homenaxe más que merecíu pa dos persones inolvidables que fixeron escuela y marcaron el camín na escena musical asturiana. Igor Medio y Carlos Redondo muerren de madrugada nun accidente 26 de xunu, 2006 0 FacebookTwitterPinterestEmail
Música L’homenaxe al Texu La Collá recuerda a Rafa Balbín, Igor Medio y Carlos Redondo by asturnet 26 de xunu, 2006 Un añu más, y yá van tres, la Tertulia Cultural El Garrapiellu organizó l’Homenaxe al Texu La Collá (Siero). El domingu pela mañana vecinos de la parroquia de La Collá y xente venío d’otros llugares d’Asturies aconceyaron xunto al texu milenariu de La Collá pa rindir homenaxe a esti árbol, reivindicar la so proteición y homenaxear al etnógrafu Rafa Balbín Loredo, muertu fai agora un añu. Nes ruines de la ilesia vieya de San Pedru La Collá, que tien orixe prerrománicu y foi quedama nos entamos de la Guerra Civil, celebróse una misa n’asturianu a cargu del Coleutivu Manuel Fernández de Castro na que se recordó la figura de los músicos del grupu ‘Felpeyu’, Ígor Medio y Carlos Redondo, que morrieron esta fin de selmana n’accidente de tráficu. Pola mor d’esti accidente nun pudo asistir como taba previsto, el gran maestru de gaita Diego Pangua, que tuvo que salir pal País Vascu a recoyer al so fíu accidentáu, anque yá dau d’alta. El sacerdote que dio la misa fizo una comparanza ente’l mensaxe de llucha desinteresada polos drechos de Xesucristu y la llucha pola recuperación cultural d’Asturies de los asturianistes, ‘Nun podemos mirar esta llucha pola nación asturiana dende’l puntu de vista humanu, del propiu porgüeyu, sinón dende’l puntu de vista espiritual, de la llucha desinteresada pola xusticia’. La misa cuntó finalmente col soníu de la gaita del Gaiteru de Veriña en solitariu y foi un recuerdu emocionáu de les figures de Rafa Balbín Loredo y los músicos de Felpeyu muertos el sábadu pela mañana. N’acadando la misa, Gloria García, presidenta d’El Garrapiellu y Ánxel Nava ficieron alcordanza de la figura de Rafa Balbín embaxo’l texu y recordaron a los asistentes el so enfotu en ‘siguir facineo esti homenaxe tolos años ya implicar al pueblu de La Collá nel mesmu, homenaxeando a les persones que ficieron pola memoria d’Asturies y que cada añu mos dexen por unes o otres razones y reivindicando la recuperación d’esti espaciu natural cuasi míticu’. Dubardu Puente amenizó cola gaita los posteriores bailles alredor del texu mientres los presentes entonben los cantares habituales pa estes dances milenaries, la parte más animada d’unos actos marcaos pola tristeza d’unes muertes mui cercanes nel tiempu. Como vien siendo habitual cada añu, El Garrapiellu aprovecha esti actu pa reivindicar pelos medios de comunicación asturianos la necesidá de protexer el Texu La Collá, árbol milenariu que nun tien proteición dalguna y que cuerre peligru de secar pola aición sobre’l tarren que tien un camín asfaltáu que pasa perbaxo d’el. Amás, les ruines de la ilesia vieya de San Pedru, asitiada a pocos metros del texu, necesiten reforzase y un caltenimientu habitual p’aguantar el pasu del tiempu ensin más desperfeutos. Conceyales del ayuntamientu de Siero asistieron n’otres ocasiones a esti homenaxe y prometieron buscar igua a esti problema, llegando a facese dalgún arreglu, pero los grandes problemes d’esti entornu siguen tando ehí. Pa tratar d’iguar esti problema organizáronse otros años esposiciones recaudatories de fondos, pero la inversión pública entovía nun llegó a esti perguapu espaciu qu’arrodia al texu de La Collá y que lleva munchos sieglos siendo’l centru espiritual d’una parroquia. 26 de xunu, 2006 0 FacebookTwitterPinterestEmail
Música Igor Medio y Carlos Redondo muerren de madrugada nun accidente by asturnet 23 de xunu, 2006 Dos de los meyores músicos asturianos d’anguañu, Igor Medio y Carlos Redondo, morrieron na madrugada d’esti sábadu nun accidente mortal en Zuya (Álava) tres de salise de l’Autopista AP-68 la furgoneta na que diben a tocar a Barcelona colos demás componentes de Felpeyu. Xuan nel Expósito y Diego Pangua recibieron fortes impactos y Ruma Barbero, Fernando Oyagüez y Lisardo Prieto, xunta’l téunicu de soníu Slaven Kolak, alcontrábense daos d’alta yá dende los primeros momentos. Acabante tar en Trasona (Corvera), los miembros de Felpeyu colaben en furgoneta pa Barcelona a cumplir con un conciertu contratáu hai cuatro meses cuando se salieron de l’autopista a l’altura de Zuya y cayeron per un terraplén abaxo. La muerte de Carlos Redondo, ex-Locos, ya Igor Medio, dibuxante d’hestorietes amás de músicu, conmocionó esti día a tol mundu musical asturianu y supón una perda pergrande pal folk asturianu, del que Felpeyu yera ún de los grupos más veteranos ya nomaos xunta Llan de Cubel, que de xira pelos Estaos Xuníos facién anuncia de tornar p’Asturies. Carlos Redondo yera’l miembru del grupu cola mayor y más variao esperiencia profesional, como músicu, productor ya inxenieru de soníu, anque fora más conocíu n’Asturies como cantante y baxista del grupu de pop-rock Los Locos. Trabayó intensamente na música pop-rock enantes de metese na música folk nos primeros 90, y axuntóse a Felpeyu xusto depués de producir el so primer discu, Felpeyu, nel añu 1994. Nel gurpu tocaba guitarra y baxu llétricu, y facía voz principal y coros. Carlos ñació y vivía en Xixón y dexa muyer y dos fíos. Ígor Medio yera, xunto con Ruma, ún de los dos miembros más antiguos del grupu. Ígor creció nun entornu de cantu coral y canción asturiana y tuvo estudios de música clásica y esperiencies col blues y el rock enantes d’entamar cola música folk, desendolcando un estilu personal y eclécticu d’arranchar ya interpretar la música tradicional asturiano. Entamó tocando la guitarra y la mandulina, pasando depués al bouzouki como’l so instrumentu principal; agora tocaba bouzoukis, guitarra baxu pedal, y fai voz principal y coros. Nel ámbitu artísticu Ígor yera tamién abondo nomáu pol so trabayu como dibuxante de cómic, llabor que no cabero centraba námái na serie “La familia Castañón” que dibuxaba tolos branos nel diariu “La Nueva españa”. Ígor yera del barriu xixonés del Nataoyo, y vivía en Xixón. Felpeyu formóse nel añu 1991 en Salamanca, onde Ígor Medio (bouzouki) y Ruma Barbero (percusión) cursaben estudios de Belles Artes. N’años sucesivos incorporáronse al grupu Xuan Nel Expósito (curdión), Elías García (vigulín), Fernando Oyágüez (vigulín), Diego Pangua (gaita), Lisardo Prieto (vigulín) y Carlos Redondo (guitarra). Web de oficial de Felpeyu 23 de xunu, 2006 0 FacebookTwitterPinterestEmail
Música La nueche de San Xuan enciéndese cola música asturiana by asturnet 21 de xunu, 2006 La nueche de San Xuan, la nueche más máxica del añu, va encender les sos tradicionales fogueres al son de la música asturiana. Xixón, Llugones, Uvieu, Nava y Mieres, son dalgunes de les ufiertes musicales pa la nueche d’esti vienres na qu’Asturies va danzar alredor de les cenices del fueu y al son de grupos como Lliberdón, Xuacu Amieva, Dixebra o Victor Manuel. Amás de la multitudinaria propuesta mierense que va traer al veteranu Victor Manuel xunto a Ana Belen, otres ciudaes tamien presentaron el so programa festivu pa la nueche más máxica del añu, que marca’l solsticiu de branu. Asina, la plaza de la catedral uvieína va valir pa presentar el nuevu trabayu de Xuacu Amieva, que va xubir a los escenarios acompañáu de dalgunos amigos y músicos d’excepción, como Ramón Prada, Sergio Fernández, Jorge García, les pandereteres de Dulcamara y les bandes de gaites El Llacín y Naranco, ente otros. Los veteranos Lliberdón van ser los encargaos de poner música a la foguera xixonesa, que va ser prendida a les doce la nueche na playa de Poniente, mentes que los rockeros Dixebra van facer lo propio en Nava. Pela so parte, la foguera de Llugones trai a un ampliu repertoriu de músicos asturianos de prestixu. Dende les ocho la tarde hasta la madrugada los sones más tradicionales van llenar el Parque La Paz, de la mano d’artistes tan conocíos como Jorge Tuya, Luis Estrada, Xuan Nel Expósito, Emilio Martínez, La Bandina, McGoldrick, Corquieu y Skama la Rede. 21 de xunu, 2006 0 FacebookTwitterPinterestEmail
Música El grupu xixonés Mus saca discu cola discográfica sevillana Green Ufos by asturnet 20 de xunu, 2006 El dúu asturianu Mus, formáu por Mónica Vacas y Fran Gayo, ta trabayando nel so cuartu trabayu discográficu que va salir a la cai en 2007 de la mano de la productora sevillana Green Ufos baxo’l títulu ‘La Vida’. ‘Fai’, ‘El Naval’ y ‘Divina lluz’, anteriores trabayos de los xixoneses, fueren editaos con Acuarela Discos. El discu ‘La Vida’, nel que Mus ta trabayando nos estudios Teisco de Xixón, ye un trabayu ‘más lluminosu y accesible’ que los anteriores, al tiempu que ye’l primer trabayu d’un grupu español qu’edite y promocione la discográfica Green Ufos. 20 de xunu, 2006 0 FacebookTwitterPinterestEmail
Música El gaiteru José Ángel Hevia marcal ritmu nel Festival de la Sidra de Nava by asturnet 19 de xunu, 2006 El gaiteru maliayes Jose Ángel Hevia va ser l’encargáu de marcar el ritmu nel Festival de la Sidra que se va celebrar en Nava los prósimos díes 7, 8 y 9 de xunetu. El conceyu navetu, que tien un presupuestu de 60000 euros pa esti certame, apuesta un añu más pola diversificación de la ufierta lúdica alredor de la bebora que-yos da la fama. El dia grande les fiestes, el sábadu día 8 de xunetu, va tener como pregoneru al cardiólogu Arturo Cortina, ex director del serviciu de cardioloxía del Hospital Central d’Asturies, y gran defensor de les propiedaes beneficioses de la sidra. Tres de la llectura del pregón dende’l balcón del Ayuntamientu, va tener llugar el clásicu concursu a la meyor sidra naveta y asturiana, asina como’l popular certame d’escanciadores. Pero nesta nueva edición del Festival de Nava, nel que nun falten les actividaes lúdiques rellacionaes cola sidra, el protagonismu recái nel gaiteru maliayes Jose Ángel Hevia, que va dar un conciertu’l vienres día 7 de xunetu, mentes que la cantante Natalia, salida del programa de televisión ‘Operación Triunfo’ fadrá lo propio’l domingu día 9. 19 de xunu, 2006 0 FacebookTwitterPinterestEmail