Música El Grupu de Baille San Félix de Candás celebra’l II Alcuentru cola Cultura Tradicional by asturnet 9 d'agostu, 2006 El Grupu de Baille San Felix de Candás va celebrar ente los prósimos díes 24 al 27 d’agostu, el II Alcuentru cola Cultura Tradicional na que la música va correr a cargu de grupos asturianos y húngaros. Como complementu d’estos Alcuentros asoleyase tamien el segundu númberu de la revista ‘El Cuirno’ que, con calter añal, compila artículos y escritos de toa mena que tean venceyaos cola tierra de Peñes. Nella participen, ente otros, autores como Xose Lluis García Arias, Aurelio G. Ovies, Alberto Álvarez Peña o Pedro Busto. El II Alcuentru cola Cultura Tradicional va empezar el xueves 24 a les diez de la nueche con un desfile de baille húngaru Zalagyöngye que va recorrer les cais candasines dende El Mueye hasta’l Teatru Prendes. El mesmu grupu, desfilará al día siguiente, a les ocho la tarde, acompañáu pol propiu Grupu de Baille San Felix de Candás. El sábadu 26 d’agostu, a les siete y media la tarde, La Baragaña va acoyer una ‘Xuntanza Traidicional’ ente estes dos formaciones y Blima, que va tar dedicada a la memoria d’Igor Medio y Carlos Redondo, músicos de Felpeyu fallecíos n’accidente de tráficu. Estos alcuentros van finar el domingu 27 a la una la tarde, cola actuación del grupu húngaru convidáu, Zalagyöngye. 9 d'agostu, 2006 0 FacebookTwitterPinterestEmail
Música La Escuela Internacional de Música pieslla la XI edición de los sos Cursos de Branu by asturnet 9 d'agostu, 2006 La XI edición de los Cursos de Branu de la Escuela Internacional de Música de la Fundación Príncipe d’Asturies va pesllar el prósimu sábadu, 12 d’agostu, a les 20.00 hores, con un conciertu a cargu de los alumnos que participaron nes clases. L’actu va tener llugar na sala principal del Auditoriu Príncipe Felipe d’Uvieu y va ser d’accesu llibre hasta enllenar l’aforu. La XI edición de los cursos de branu de la Escuela Internacional de Música empezó’l 1 d’agostu nel Conservatoriu Superior de Música del Principáu d’Asturies ‘Eduardo Martínez Tornet’ con 161 alumnos procedentes d’Alemaña, l’Arxentina, Francia, Italia, Portugal, Venezuela y España. Como complementu a les enseñances nes clases, los profesores y alumnos de la Escuela ufiertaron varios conciertos d’entrada llibre en diferentes sitios, asina ocmo un ciclu de música na cai. Nesi sen, destacaron sobremanera les actuaciones del gaiteru Xuacu Amieva, que repasó varies pieces de música tradicional asturiana asina como les sos últimes creaciones. 9 d'agostu, 2006 0 FacebookTwitterPinterestEmail
Música Tuenda pieslla esta nueche’l ciclu de música nel parque de Ferrera n’Avilés by asturnet 8 d'agostu, 2006 Los sones tradicionales del grupu asturianu Tuenda, formáu por Xose ‘Ambás’, Elías García y Pepín de Muñalen, recien llegaos de Lorient, piesllen güei a les diez y media la nueche’l ciclu de música nel xardín frances, conocíu como Ferrera, n’Aviles. El primer trabayu discográficu d’esti tríu formáu nos conciertos de Folk de Cámara xixoneses foi, ensin duda, ún de los principales acontecimientos musicales del añu. Tuenda espublizaba hai unos meses el so primer trabayu discográficu. Una obra compuesta de temes tradicionales pañaos per tol país y remanecíos polos propios integrantes del tríu folk pal so debú nel sellu Tierra, que dirixía’l desaparecíu Ígor Medio. Un discu que bebi directamente nes fontes orixinales de la música popular asturiana. Xose ‘Ambás’ a la voz y percusiones, Elías García al bouzuki y Pepín de Muñalen a la flauta formen Tuenda, un grupu surdíu nos conciertos de folk de cámara de Caxastur y que ve espeyada nel so primer discu una manera distinta y bien personal de facer música tradicional. En xunto, diecisiete temes recoyíos directamente pol cantante ya investigador Xose ‘Ambás’ nos sos trabayos de campu per diverses fasteres de toa Asturies. 8 d'agostu, 2006 0 FacebookTwitterPinterestEmail
Música Los chigres de Ribeseya organicen el primer Concursu de Rock ‘Dexareu Rock’ by asturnet 8 d'agostu, 2006 L’asociación de chigres y disco-bares ribeseyanos ‘Dexareu’ convocó esti añu per primer vez el concursu de rock ‘Dexareu Rock’ nel que van poder participar tolos grupos y solistes que, tocando cualisquier estilu musical que pueda ser encuadrá dientro del rock (metal, trash, rock clásicu, alternativu, numetal, góticu…) nun tengan denguna grabación o contratu discográficu. Les canciones a esti concursu, que tien una dotación económica de 1500 euros pal primer premiu y de 500 pal segundu, pueden ser temes propios, versiones o covers en cualisquier llingua. Al concursu que se va celebrar el día 17 d’agostu, había de mandase una maqueta o grabación en formatu de CD con, a lo menos, tres temes, asina como una memoria del grupu y una declaración firmada pol so representante de nun tener un contratu en vigor con denguna compañía discográfica. Les direcciones de contactu pa les persones interesaes nesti certame son les que vienen darreu: Pub Atalaya C/ Manuel Fernández Juncos, n’2 33560 Ribeseya, Asturies // Disco- bar Alboroto C/ Comercio, nº 35 33560 Ribeseya, Asturies. Telefonos de contactu: 626 028 750/ 620725911 8 d'agostu, 2006 0 FacebookTwitterPinterestEmail
Música Tejedor pieslla mañana’l ciclu de Música con Raíces con un conciertu llenu de collaboraciones especiales by asturnet 3 d'agostu, 2006 El grupu asturianu Tejedor va echar el pieslle esti sábadu al ciclu de Música con Raíces qu’organiza’l Xardín Botánicu de Xixón, nun conciertu mui especial nel que van tar acompañaos por dalgunos de los artistes más interesantes de la escena folk nacional, internacional y, por supuesto, asturiana. Asina, nel conciertu que tendrá llugar esti sábadu día 5 d’agostu, a partir de les diez y media la nueche, la formación habitual de Tejedor va tocar xunta’l grupu de pandereteres gallegues Faltriqueira, los Txalapartaris Joan Garmendia ya Iñaki Plaza, l’irlandes Niall Valley, asina como la Banda de Gaites Tabladar y una pareya de baille, ente otros. Tejedor, que los prósimos díes 10 y 11 va participar nel festival Piping Live de Glasgow (Escocia), lleva grabando estos eses en dalgunos estudios d’Euskadi y Asturies el que va ser el so tercer discu d’estudiu, que va sali a la cai a finales d’añu. Tejedor ta formáu polos hermanos Jose Manuel Tejedor (gaita asturiana y flautes), Javier Tejedor (curdión, percusión, gaita y flauta) y Eva Tejedor (voz y percusión); asina como por Ramón G. Morán (teclaos), Horacio A. García (contrabaxu), Jesús Castro (batería), Ruben Alba (guitarra) y Alberto Ablanedo (bouzouki). 3 d'agostu, 2006 0 FacebookTwitterPinterestEmail
Música Xera toca esta nueche na fiesta de la Xunta Moza n’Ibias by asturnet 2 d'agostu, 2006 Como vien faciendo nos últimos años, la Xunta Moza organiza una fiesta en Santantolín d’Ibias coincidiendo colos Cursos de Branu de l’Academia de la Llingua Asturiana. La fiesta que va tener llugar güei a partir de les diez de la nueche va cuntar cola actuación del grupu de folk ellectrónicu Xera. El grupu uviedín Xera naz d’un proyectu interculturalista iguáu por cuatro músicos: Verval (bouzouki, guitarra D, voz y pianu); Flavia (vigulín y rabel); Iván (gaita asturiana, Low Wisthle/flautes y voz); ya Isaac (teclaos y programaciones), na busca de tresmitir la música de raigambre asturiana, con conceptos musicales sinfónicos afitaos na tradición folk, al travies de los ritmos celtes incorporaos a les bases ellectróniques. Siguiendo la creencia de que la música ye una forma d’espresión que s’ha d’esparder con llibertá, Xera distribúi los sos cantares llibremente baxo una llicencia Creative Commons que permite, mesmamente, descargalos na páxina web del grupu. Pa sentilos en directo, Xera tien apalabraos conciertos el prósimu día 12 en Candás y el 7 de setiembre na sidrería Tierra Astur de Cualloto, asina como la participación nel Concursu Folkez Blai (Ermua) el prósimu 9 de setiembre. Web de Xera 2 d'agostu, 2006 0 FacebookTwitterPinterestEmail
Música Los Llanzones estrenen la primer fiesta agostiega na sidrería Tierra Astur de Cualloto by asturnet 2 d'agostu, 2006 Los miembros de la bandina Los Llanzones van ser los encargaos d’estrenar esti mes d’agostu los yá tradicionales xueves musicales de la sidrería Tierra Astur de Cualloto. Tradicionales y festivos, Los Llanzones pondrán la fiesta güei a partir de les diez de la nueche, mentes qu’a lo llargo del mes van facer lo propio grupos como Tarañu, Corquieu, Merlín o los llaniscos Niundes, que van aprovechar la ocasión pa facer presentación del so discu, ‘Enxamás ye pa siempres’. Les baillables xotes, polques, saltones y muñeires de Los Llanzones van estrenar el primer xueves agostiegu na sidrería Tierra Astur de Cualloto con un conciertu qu’empieza güei a les diez de la nueche. Los tradicionales xueves musicales na sidrería asturiana van siguir el prósimu día 10 con un conciertu de Tarañu, a los que van siguir los díes 17 y 31 los grupos Corquieu y Merlín. Pela so parte, el xueves día 24, la banda llanisca Niundes va presentar na sidrería llevantada na antigua fábrica del Aguila Negra, el so últimu trabayu que lleva por títulu ‘Enxamás ye pa siempres’. 2 d'agostu, 2006 0 FacebookTwitterPinterestEmail
Música El tríu DRD actúa esta tarde nel III Congresu Mundial d’Asturianía by asturnet 1 d'agostu, 2006 El grupu asturianu de música folk DRD, formáu por Diego Pangua, Ruben Bada y Dolfu R. Fernández, va actuar esta tarde a les ocho dientro del III Congrsu Mundial d’Asturianía que se celebra estos díes nel Centru Municipal Integráu de Pumarín, Xixón-Sur. Con esta actuación, la tríu formáu dientro del ciclu de conciertos de Folk de Cámara, coordinaos pol fallecíu Igor Medio, na Casa Natal de Xovellanos va mostrar a la emigración asturiana por que la música folk ye nesti momentu la música más programada según l’anuariu de la SGAE. La xornada de güei nel III Congresu Mundial d’Asturianía va tar dedicada a la participación de la muyer y la integración de los mozos nos Centros Asturianos, y nella, la formación moza DRD va interpretar temes del so discu ‘Namái’, amás d’adelantar dalgunos trabayos del so prósimu proyectu discográficu. Esti tríu ye ún de los grupos que salieron del ciclu de conciertos de la Casa Natal de Xovellanos conocíu como “Folk de Cámara” y que coordinaba’l músico xixones tristemente fallecíu Igor Medio. El grupu, que ta teniendo una gran repercusión a nivel nacional ya internacional, va participar tamien esti mes d’agostu en dos de los festivales más importantes d’Europa. Nel VII Festival Intercelticu de Sendim, en Portugal y nel Festival de la Danse Bretonne et de la Saint Loup, na localidá bretona de Guingamp, en Francia. 1 d'agostu, 2006 0 FacebookTwitterPinterestEmail
Música Empiecen los XI cursos de branu de la Escuela Internacional de Música de la Fundación Príncipe d’Asturies by asturnet 31 de xunetu, 2006 Esta mañana foi inaugurada nel Conservatoriu Superior de Música Eduardo Martínez Torner d’Uvieu la XI edición de los cursos de branu de la Escuela Internacional de Música de la Fundación Príncipe d’Asturies, a cargu del so director artísticu, Yuri Nasushkin. Na presentación de los cursos, los profesores Valeria Nasushkina y Makael Samsonov interpretaron el Dúu pa vigulín y violonchelu de Zoltan Kodály, mentes que’l profesor Javier Fernández Vallina ofreció una conferencia col títulu “Cuando la palabra se fixo música: un viaxe a la poesía musical”. Los 161 alumnos matriculaos nos cursos de branu que van durar hasta’l prósimu día 12 d’agostu, vienen dende l’Arxentina, Francia, Portugal, Venezuela y España, y anden ente los nueve y los trenta y cuatro años. Les clases son puestes por una trentena de maestros que vienen dende Moldavia, Bielorrusia, la China, Alemania, Italia, Holanda, Ucrania, Israel, l’Arxentina, Rusia y España, baxo la dirección artística de Yuri Nasushkin (Kiev, Ucrania), profesor del Conservatoriu Superior del Principáu d’Asturies y director de la Moza Orquesta Sinfónica del Principáu (JOSPA). Como complementu a la enseñanza nes aules, los profesores y alumnos de la Escuela van ufiertar conciertos d’entrada llibre y un ciclu de música na cai. Asinamesmo, Xuacu Amieva va interpretar un recital de música folk y van celebrase dos conferencies a cargu del musicólogu Luca Chiantore y del catedráticu de Musicoloxía Ramón Sobrino. 31 de xunetu, 2006 0 FacebookTwitterPinterestEmail
Música Más de 350 pieces amuesen la música tradicional asturiana en Xixón by asturnet 31 de xunetu, 2006 Una exposición exhibe más 350 instrumentos tradicionales de música asturiana nel Centru Sur de Xixón, onde hasta’l xueves va celebrase’l III Congresu Mundial d’Asturianía. La exposición presenta pieces de gran valor testimonial y ente elles figuren instrumentos rescataos en países d’acoyida d’emigrantes, que viaxaron con elles nos sos baúles. La esposición d’instrumentos musicales y utensilios xeneradores de soníos quier amosar al públicu un panorama pluriforme y exhaustivu de la música asturiana nel so aspectu folclóricu. Dende elementos rudimentarios creadores de melodía hasta instrumentos más complexos que calaron na sociedá rural y que foron productores de munchos de los arquetipos melódicos que llevaron los bailles per doquier de la nuestra xeografía. La música, como necesidá humana que ye, ta presente en munchos acontecimientos sociales y, al mesmu tiempu, nos comentos d’intimidá que les persones pasen nes diverses circunstancies que los arrodien. Nesi momentu, el sonador faise tamien constructor y, al mesmu tiempu, vive de la so producción y materialízala en sones que son fiel espeyu de la so propia idiosincrasia. A lo llargo del recorríu vense físicamente más de 350 instrumentos clasificaos según un ordenamientu organolóxicu coherente, con esplicaciones sobre los sos usos y aplicaciones nos contestos nos que s’encarquen. La esposición presenta pieces de gran valor testimonial nos apartaos d’instrumentos de percursión entrechocaos (fundamentalmente, castañueles) y ruidófonos (carraques y matraques); aerófonos de llingüeta simple y llingüeta doble (gaites, curdiones), de bisel; cordáfonos (bandurries); instrumentos de percusión manual (panderos y paderetes), con baquetes (tambores, redoblantes, bombos y bombos con platillos) y un sinfín d’exemplos, mesmo nel apartáu d’instrumentos como nel d’utensilios, que cumplieron, fundamentalmente, una base d’apoyatura rítimica a la canción conductora el baille, tal como cazos (payel.las), lates, vanos, etcetera. Non sólo s’esponen instrumentos recuperaos nel Principáu, sinón que tamien s’amusen pieces rescataes n’otros países d’acoyida d’asturianos, pieces de la emigración que salieron nos baúles de los desplazaos y que se volvieron asina elementos sonoros qu’allegaben la tierra al travies de los sos sones. La base de la exposición fórmenla les colecciones de Fernando Manuel de la Puente Hevia y Jose Ángel Llaneza, con aportaciones puntuales de particulares y colectivos, que completen la más importante reunión d’instrumentos orixinales y reproducciones que se puede atopar anguaño n’Asturies. La esposición ta patrocinada pol Conseyu de Comunidaes Asturianes y Caxastur, en collaboración cola Asociación de Maestros de Música Tradicional (AMMTA). 31 de xunetu, 2006 0 FacebookTwitterPinterestEmail