Música Jarabe de Palo llega mañana Adelantando a la Sala Albéniz de Xixón by asturnet 8 de mayu, 2007 Redacción. Pau Dones y el restu de la formación ‘Jarabe de palo’ van tocar na Sala Albeniz de Xixón esti xueves a les 23:30 hores presentando’l so discu nuevu ‘Adelantando’. Esti ye’l setimu discu del grupu que se dio a conocer col esitu de ‘La flaca’ y que vien siendo fiel al so estilu de los entamos. Jarabe de Palo ye un grupu que se define a si mesmu como de ‘rock llatín’ y ta formáu por Alex Tenas, Jordi Mena, Carmen Niño, Quino Bejar, Jorge Rebenaque y el llíder, Pau Dones, solista y compositor. El so primer discu llegó en 1996. Un añu más tarde llegó la sorpresa, el tema principal del discu llevó a vender millones de discos en dellos países, y el cantar ‘La Flaca’ convirtióse nun de les cantares del branu de 1997. Les entraes tán a la venta en Llibería Paradiso, Cascanueces y nos puntos habituales de Tick Tack Ticket al preciu de 15 euros anticipada. Na puerta del Albeniz va tar a la venta al preciu de venti euros. 8 de mayu, 2007 0 FacebookTwitterPinterestEmail
Música Preséntase nAyer el tercer volume del Atlas Sonoru de la Llingua Asturiana cola presencia de dalgunos informantes del conceyu by asturnet 6 de mayu, 2007 Redacción. Güei a les ocho la tarde, na Casa Cultura de Morea, nel conceyu d’Ayer, va presentase’l tercer volume del ‘Atlas Sonoru de la Llingua Asturiana’, una obra que yá se presentare n’Uvieu, pero que llega agora a ún de los conceyos d’onde salió la información que recueye. La presentación va cuntar cola presencia de vecinos de Casomera y Roayer, que van cuntar cuentos tradicionales de contorna. En concretu van tar les hermanes Julia y Anita de Yananzanes, dos de les meyores informantes del conceyu d’Ayer y que xunto a Xose Antón ‘Ambás’, van tar na presentación d’esta obra. L’ Atlas Sonoru de la Llingua Asturiana ye un trabayu que recueye les distintes variantes d’usu del asturianu a lo llargo de toa Asturies. Casos de falantes tradicionales d’asturianu de tolos llugares y hestories tradicionales que son recoyíes en CD. La tercer entrega inclúi grabaciones feches nos conceyos de L.lena, Riosa, Morcín, Mieres y Ayer. 6 de mayu, 2007 0 FacebookTwitterPinterestEmail
Música La Raitana va presentar esta fin de selmana Moh.ito, el so discu nuevu by asturnet 3 de mayu, 2007 Redacción. La Banda de gaites La Raitana de Nava y Piloña va facer el conciertu de presentación del so nuevu discu, ‘Moh.ito’, esti sábadu que vien, mañana, día 5 de mayu, a les siete y media la tarde nel Conservatoriu E. M. Torner d’Uvieu. La entrada ye de baldre. Esti discu nuevu, que ye’l segundu qu’asoleya l’agrupación dende la so formación en 1998, sal a la venta dempues del esitu collecháu cola grabación anterior ‘De La Revuelta a La Marea’, espublizáu en 2002, que los llevó a percorrer los festivales internacionales más afamaos d’Europa. Ente más otros, los festivales franceses de Lorient, Guingamp, Chemin de crabas, el portugues de Marinha Grande y l’italianu d’Agrigento. Pa esta ocasión especial, la banda va cuntar cola presencia y collaboración de dellos de los músicos más relevantes de la escena asturiana, dirixíos como siempres pol llíder de la formación Flavio R. Benito. Páxina oficial Banda de Gaites ‘La Raitana’ 3 de mayu, 2007 0 FacebookTwitterPinterestEmail
Música Xixón presental calendariu de conciertos y actuaciones teatrales pa esti branu by asturnet 2 de mayu, 2007 Redacción. Na Plaza Toros d’El Bibio va tocar Pignoise, el sábadu 7 de xunetu y Paulina Rubio’l día 14 del mesmu mes. El miercoles 18 Julita Venegas, ganadora de dellos premios Grammy. El domingu 29, el cantante David Bisbal va actuar nel mesmu llugar. Nel mes d’agostu, el día 4, va ser el grupu de rock Motörhead quien enllene de música’l Palaciu los Deportes. ‘El suañu d’una nueche de branu’, de William Shakespeare, va representase nel Teatru Xovellanos el día 9 d’agostu. Ente’l llunes 13 y el miercoles 15 van facese tres pases d’‘El Tramposu’, d’Arsenio González. Una obra costumista representada pola Compañía Asturiana de Comedies. El grupu ‘Dover’ va tocar nel Palaciu los Deportes el día 18 presentando’l discu ‘Follow the city lights’. El musical ‘Fama’ va tar nel coliseu xixones ente’l 30 d’agostu y el 2 de setiembre, con dellos pases diarios. Setiembre zárrase con delles actuaciones teatrales más. 2 de mayu, 2007 0 FacebookTwitterPinterestEmail
Música Los dos díes de música del V Festival Folixa Primeru de Mayu entamen güei en Xixón by asturnet 29 d'abril, 2007 Redacción. Güei y mañana va celebrase, la ‘V Folixa Primeru de Mayu’ nuna carpa instalada en L’Atalaya de Xixón. FUSOA ye quien organiza esti actu pa celebrar el Día Internacional del Trabayador. Güei, a partir de les cinco la tarde van tocar los grupos Lendakaris Muertos, Skama La Rede, Insershow y Skontra. Yá mañana, a les doce del meudía, CSI entama una ‘Manifestación del Primeru de Mayu’. A les dos de la tarde una Xinta popular va completar la xornada reivindicativa, que va pesllase a partir de les cuatro, cola segunda xornada de conciertos. Van actuar mañana: El grupu folk Blima, el solista Merino el grupu de reggae Astur Sound y Los Osos. El preciu de la Folixa pal llunes val 8 euros y pal martes 5. Sicasí, hai un bonu pa los dos díes, al preciu de 10 euros. Amás van ufiertase otros bonos solidariu pa financiar ‘la llucha social por unes condiciones llaborales dignes y pol emplegu’. 29 d'abril, 2007 0 FacebookTwitterPinterestEmail
Música Xunta Moza va celebrar mañanal XIX Conciertu pola Oficialidá nUviéu by asturnet 26 d'abril, 2007 Redacción. Xunta Moza y la Xunta pola Defensa de la Llingua Asturiana (XPDLA) organicen pa mañana, sábadu 28 d’abril, el ‘XIX Conciertu pola Oficialidá’, con un cartelu onde apaecen los grupos y artistes asturianos de más esitu. El conciertu va facese nel aparcamientu del estadiu Carlos Tartiere, onde va instalase una carpa xigante y dos escenarios independientes nos que van dir alternándose les actuaciones de: Tuenda, Llangres, Dulcamara, Lafu y Rebeca Velasco, Toli Morilla, Chalaneru Soundsystem, K-Nalón y Skama la Rede. El conciertu va entamar a les 19:30 y va durar más d’ocho hores ensin descansu gracies a los dos escenarios nos que van alternándose los artistes. La xornada quier sirvir pa llamar l’atención sobre’l problema llingüísticu n’Asturies. Les entraes tán a la venta al preciu de 5 euros y mañana, a 6 euros na puerta. 26 d'abril, 2007 0 FacebookTwitterPinterestEmail
Música Los hermanos Tejedor presenten en Xixón el so discu últimu Musica na maleta by asturnet 26 d'abril, 2007 Redacción. El grupu Tejedor va presentar el so discu güei, vienes 27, a les ocho la tarde nel Ateneu de La Calzada, en Xixón. Siguen asina cola xira de presentación de ‘Música na maleta’, que cuenta coles collaboraciones de Faltriqueira, Michael McGoldrick o Niall Vallely, ente otres munches. El discu foi presentáu nel Teatru Campoamor d’Uvieu, colgando’l cartelu de ‘llocalidaes escosaes’. Participaron nel ‘Festival Celtic Connections’ de Glasgow y el mes de xineru pasáu, los hermanos Tejedor realizaron programes de TV y radio pa la BBC, actuaron como cabeza de cartelu na mítica sala ABC y Jose Manuel, llíder del grupu, participó nel homenaxe al gaiteru Gordon Duncan. El grupu va tar presente tamien nos actos de la Xunta Estraordinaria de l’Academia de la Llingua Asturiana, el próximu vienres 4 de mayu, nel Teatru Campoamor. 26 d'abril, 2007 0 FacebookTwitterPinterestEmail
Música La Col.lá Propinde va presentar la xira Güeria 2007 na Feria Internacional de los Pueblos en Málaga by asturnet 26 d'abril, 2007 Redacción. Esta fin de selmana, el grupu l.lenense de folk-fusión La Col.la Propinde va presentar la so xira ‘Güeria 2007’ na Feria Internacional de los Pueblos en Fuengirola, en Málaga. Va ser nel escenariu del Pabellón d’Asturies de la feria yá citada. Nos actos que van celebrase los díes 29 y 30 d’abril, va presentase’l so vidiu últimu, ‘Llandellena’, grabáu y editáu n’Asturies ente los meses d’avientu a marzu embaxo la direición de Delfo Valdes. El grupu yá nel 2003 algamó’l ‘Premiu al Meyor Cantar n’Asturianu’ del añu col cantar ‘L’emigrante’, ún de los temes metíu nel so anterior discu ‘L.l’ que cuenta los sentimientos y la señaldá d’otru emigrante asturianu. Pa esti branu, el grupu tien confirmaes feches d’actuaciones na Nueche Folk de Cue (Llanes) el 26 de Mayu, y na Fiesta la Escanda de Xomezana (L.lena) el 25 d’Agostu. Más información del grupu, na so páxina oficial 26 d'abril, 2007 0 FacebookTwitterPinterestEmail
Música Una asociación de Navia convoca un concursu de maquetes de música pa grupos amateur by asturnet 24 d'abril, 2007 Redacción. Dellos bares de Navia en collaboración cola Asociación Xuvenil de Navia organicen un concursu de maquetes pa músicos de tolos estilos, grupos o solistes, residentes n’Asturies y Lugo. El plazu de recepción de maquetes zárrase a finales de mayu. Nes actuaciones el públicu va ser quien decida’l ganador al travies de votaciones y puntuaciones. El grupu o solista que más alta puntuación acumule va tener opción como mínimo a la grabación d’una maqueta con soníu profesional nun estudiu asturianu. El concursu almite cualesquier estilu de música, modernu o tradicional: rock, blues, folk, hip-hop, lletrónica, punk, reggae, vocal… Les úniques condiciones son que seyan composiciones propies y orixinales, y que’l grupu o solista nun espublizaren material discográficu comercial o firmaren contratos discográficos col mesmu nome, componentes y estilu. Na preseleición valoraráse la orixinalidá y la espresión, amás de la efectividá teunica. La iniciativa quier sacar a la lluz “los trabayos musicales amateurs interesantes y de calidá”, y al mesmu tiempu “ser una idea más p’animar el panorama festivu y nocherniegu de Navia”. Bases completes: 24 d'abril, 2007 0 FacebookTwitterPinterestEmail
Música Un llibru fai repás a la hestoria del pop y el rock asturianu nos años ochenta by asturnet 23 d'abril, 2007 Redacción. Nortesur Records saca al mercáu ‘No se salva nadie: Crónica del pop-rock en Asturias (1979-1990)’, un volume de más de trescientes páxines onde l’autor, Rafa Balbuena, fai repás a la trayeutoria del por y el rock asturianu nos años ochenta. El llibru inclúi un CD con ventidós cantares seleicionaos d’ente los más de 150 grupos que recueye’l llibru y que tuvieron n’activu nos años ochenta n’Asturies. El llibru va presentase’l vienres 27 ente’l gran públicu nuna fiesta na que sonarán los cantares de la epoca y que va celebrase na sala “La Santa Sebe” d’Uvieu, a les ocho la tarde. Ente los grupos que recueye esti llibru tán dalgunos hestóricos de la recuperación llingüística y cultural d’Asturies, como Asturcón, Dixebra, Güestia o Los Berrones. 23 d'abril, 2007 0 FacebookTwitterPinterestEmail