Lliteratura Javier Maqua cuenta la hestoria del últimu delincuente común fusiláu nel franquismu by asturnet 10 de xunetu, 2005 L’escritor y cineasta Javier Maqua presenta esta tarde na Selmana Negra de Xixón el so últimu llibru: “Fusilamiento (Instrucciones de uso)”, una novela documental na que se recrea la hestoria del últimu delincuente común fusiláu nel franquismu. Estructurada cásique como un guion, la novela de Maqua, reconstrúi al través de remembrances, correspondencia vía electrónica y reflexones del narrador la crónica d’una muerte olvidada. Al fondo de la hestoria del axusticiáu, el rumor cercanu de la guerra d’Irak y de los sucesos vivíos en mundu tres el 11-S de Nueva York. L’alcuentru casual nunos talleres sobre escritura de documentales llevó al autor de “Fusilamiento” a conocer a dalguién que ficiera una película amateur sobre’l fusilamientu en 1972 del soldáu P.M.M. de Gandía, condenáu a muerte por asesinar a dos muyeres, madre y fía, pa roba-yos. L’asesín, un delincuente de poca monta con bultable retrasu mental, ye namás una sombra llonxana sobre la que se proyecta la busca de Javier Maqua al través de la complicidá del otru personaxe narrador: Debé, el rapaz que lu llevó a interesase por ésti últimu fusiláu del franquismu. Maqua utiliza los materiales reales d’aquel intercambiu de correspondencia por corréu electrónicu: los propios mails, fotografíes reales del delincuente P.M.M. y del so entornu familiar, xunta les sos reflexones personales sobre la hestoria y la aplicación del so desconciertu críticu dica fechos d’inxusticia sucedíos na realidá más actual, como’l nuevu orde mundial impuestu polos Estaos Uníos na so particular cruzada contra’l nomáu Exe del Mal. Javier Maqua -autor como cineasta de filmes como “Apuntarse a un bombardero”, “Chevrolet” o “Carne de gallina”, presenta la so última novela “Fusilamiento (Instrucciones de Uso)”(Algaida, 2005) esti llunes 11 a les 19.30 na Carpa de Radio Kras en la Selmana Negra de Xixón, nun actú organizáu pola emisora independiente y la Sociedá Cultural Xixonesa. La presentación va tar a cargu del escritor y redactor d’Asturnews Pablo Antón Marín Estrada. Mañana, Maqua va tener en Xixón una xinta de presentación a los medios de comunicación de la so novela. 10 de xunetu, 2005 0 FacebookTwitterPinterestEmail
Lliteratura Nueve muyeres poetes protagonicen les dos primeres xornaes lliteraries de la Semana Negra by asturnet 8 de xunetu, 2005 Nueve poetes moces, ente elles les asturianes Ana Vanessa Gutiérrez y Rosana Popelka, lleguen mañana a Xixón col Tren Negru y el restu de los pasaxeros convidaos a la XVII Semana Negra. Elles van ser les protagonistes de la primer rueda de prensa, nel mesmu tren especial al so pasu por Mieres, y tamién de la velada poética que va celebrase na nueche del sábadu na carpa central del festival lliterariu. Son les autores seleccionaes pol escritor David González pa la so antoloxía “La verdadera historia de los hombres”. La poesía va tener nome de muyer na edición de la Selmana Negra qu’escomienza mañana en Xixón. Ana Vanessa Gutiérrez, Carmen Beltrán, Eva Vaz, Isabel Bono, Isla Correyero, Idoia Ikardo, Miriam Reyes, Roxana Popelka, Sonia San Román, toes elles autores moces y con una mirada bien personal a la hora d’entender el so oficiu lliterariu dende la so identidá como muyeres, son los nomes escoyíos por David González pa l’antoloxía que va presentase na Semana Negra. El volume amuesa una amplia selección de poemes de toles nueve autores nes que les poetes espresen la so particular visión del mundu masculín y de les relaciones con esi xéneru. “La verdadera historia de los hombres” ye una antoloxía de voces diverses na que tamién s’ufierta un asomu de la diversidá llingüística de les distintes lliteratures del estáu nes que s’inxeren les autores, asina los testos de l’asturiana Vanessa Gutiérrez, de la vasca Idoia Ikardo y la gallega Isabel Bono, apaecen nes sos respectives llingües propies xunta una versión en castellano de los versos. La Selmana Negra qu’esti añu -como vien sucediendo nes últimes ediciones- ufierta na so parte lliteraria central una apuesta pola apertura a tolos xéneros, mesmo a los que pudieran abultar alloñaos d’un eventu con vocación de multitudinariu, como puede ser la poesía. Xunta les nueve poetes de “La verdadera historia de los hombres”, dos autores, ya presentes n’otres ediciones de la Selmana: Ángel González y Luis García Montero, van protagonizar la otra velada nocturna dedicada a la poesía. La lliteratura fantástica, la ciencia-ficción, la novela d’aventures y hestórica, son otros de los xéneros polos qu’apuesta la edición de la Selmana Negra qu’escomienza mañana en Xixón. El cómic ye otru de los centros neurálxicos de la programación del festival, con entrambes esposiciones dedicaes, respectivamente, a los dibuxantes ya ilustradores de los años de la transición española y otra a les xeneraciones más moces del tebéu. El fotoperiodismu ocupa un sitiu destacáu na programación del festival lliterariu xixonés col so novenu alcuentru dedicáu a esti xéneru. Diversos talleres, debates y varies amueses fotográfiques centren les actividaes d’esti alcuentru. Ente les esposiciones: “Desfaciendo entuertos”, una amuesa de diversos reporteros gráficos nos que la cámara ye non namás testigu de la realidá sinón voceru de denuncia; xunta esta amuesa, “Donde mueren los sueños” del fotógrafu Juan Medina y “Madres lesbianas” d’Oriana Eliçabe. Nos debates abiertos al públicu van participar diversos fotoperiodistes y periodistes, ente ellos el director d’Asturnews, Próspero Morán, o les apocayá premiaes col Ortega y Gasset d’Investigación Periodística y redactores de “El Comercio”: Leticia Álvarez y Rosana Lanero. 8 de xunetu, 2005 0 FacebookTwitterPinterestEmail
Lliteratura Calros Suari Rodrigue publica’l primer poemariu asturianu n’Internet con copyleft by asturnet 30 de xunu, 2005 Carlos Suari Rodrigue ufierta dende güei la posibilidá de lleer y descargar dende la so páxina www.lletresnapapelera.com el poemariu “El mio cachu tírolu”. Suari ye’l primer autor en llingua asturiana que cuelga parte de la so obra na Rede col fin de que cualquier navegador interesáu pueda acceder a ella y baxala en formatu word o acrobat, disponer de los testos y usalos llibremente siempre que se cite’l nome del autor,la procedencia y nun se camude l’orixinal. Nes instrucciones d’usu de la posibilidá de descargar “El mio cachu tírolu”, Suari Rodriguez (Avilés, 1982) caltién con humor el métodu propuestu: “fai con ello lo que quieras. si cuentes lleelo, igual ye meyor tenelo en papel. nesi casu taba guapo que taprovechares del serviciu dimprenta de les oficines de mocedá, telecentros, sales dinformática de la facultá, del equipu del trabayu si non, usa fueyes puerques pela otra llana y el mou económicu de la to impresora. nun malgastes”. Ye la so manera d’apostar pola edición lliteraria non arreyada a les lleis convencionales de la propiedá intelectual y como manera llibre d’intercambiu d’idees y palabres. Na so web “Lletres na papelera” ufierta xunta’l poemariu diversos testos fragmentarios, anotaciones, anécdotes y un álbum de semeyes nes que s’inxeren versos de los sos poemes. Nunes llinies introductories a la obra y la personalidá del autor de “El mio cachu tírolu”, Berto García García, que firma como amigu del poeta afirma que “Carlos Suari llevanta con estos versos la so propia casa didees; ábrenos la puerta y pasamos dientro. nella afayámonos, pudiendo tomar daqué colos sos collacios de pisu: la crítica social más sangrina (la selmana fantástica, líndiz big mac, lesconderite inglés, axit-prop) y la descripción más íntima del yo (soterrañu, orixe, sistema de referencia, ego, del desaniciu) y les circunstancies que vive (ye lo que paez, bon tratu, sé escribir poemes, pa cuando llegue, poco pido) mazcarada dironía autóctona. un poemariu que, en xunto, diznos cómo vive lautor les sos esmoliciones sociales y vitales, convidándonos a reflexonar cola so poética brillante, aguda, realista”. Los versos frescos y atrevíos, sueltos y a menudu lluminosos de la so obra corroboren estes aseveraciones de Berto García alrodiu d’un autor de les últimes xeneraciones lliteraries en llingua asturiana que ye consciente del tiempu nel que vive y de nun fai falta percorrer los davezu abegosos caminos de la edición convencional -col so débitu allampiáu al ritmu y la decisión de les subvenciones- y de qu’hai munchos otros caminos, como los qu’ufierta la Rede pa difundir la obra d’ún y echala a volar hasta esi llector inesperáu que busquen toles llinies escrites pa comunicar dalgo más de por qué s’escribieron. Lletres na papelera 30 de xunu, 2005 0 FacebookTwitterPinterestEmail
Lliteratura Cálida acoyida en Bruseles y Luxemburgu al recital poéticu entamáu por ASBRU by asturnet 29 de xunu, 2005 La primer actividá entamada na capital belga pola recien asociación ASBRU (Asturianos en Bruselas) acabó’l pasáu sábado 25 de xunu con un balance más que positivu. Aproximadamente setenta persones –aforu casi completu- tuvieron el vienres 24 nel recital poeticu que se fexo nel Edificio Asturies de Bruseles, nueva se del Principáu na capital comunitaria. L’eventu, inspiráu nes esistoses xornaes poetiques organizaes en Madrid pola asociación Asturianos en Madrid (ASMA), tuvo protagonizáu polos poetes asturianos Xuan Bello, Javier Almuzara, Martín López-Vega y Julio Rodríguez, y pol cantautor Toli Morilla, que presentó una selección de les sos últimes composiciones. Depues d’unes palabres de bienvenía y presentación a cargu del presidente d’ASBRU, Carlos Rodríguez Cocina, garró la palabra Julio Rodríguez, que, en calidá de maestru de ceremonias y con un discusu áxil y cargáu de retranca, dio pasu al recital como se tratare del espectáculo más grande del mundu: el circu. Asina, presentó al “trapecista” Xuan Bello como “el símbolo más representativu de la poesía n’asturianu”, al “equilibrista” Martín López-Vega como a “un gran viaxeru de la palabra” y al “domador de lliones” Javier Almuzara como “el que meyor sabe usar el llátigu de la melancolía”. Los cuatro poetes ufiertaron al públicu una selección de poemes en castellán y n’asturianu na que nun faltaron, ente otros, el yá míticu Paniceiros, de Xuan Bello, o dalgunes de les rimes que formen Constantes vitales, l’últimu llibru de Javier Almuzara col que ganó’l II Premiu Emilio Alarcos de poesía. El recital poeticu completóse cola actuación del cantautor asturianu Toli Morilla, que presentó al públicu de Bruseles dalgunos temes del últimu disco, Nueche d’insomniu, una intersección ente la música acústica de raíz americana y una cuidada selección de testos de poetes asturianos. Ente los temes qu’interpretó l’artista encontrábase El tren, versión musical del poema homónimu de Xuan Bello. Tres de la visita en Bruseles a los estudios de la emisora española Radio SI, onde poetes y cantautor reflexonaron alrodiu de la poesía asturiana y el so momento actual, un nuevu recital poeticu foi celebráu con gran esitu’l sábado 25 na llibrería Intermede de Luxemburgo, frutu de la collaboración ente ASBRU y el Centru Cultural Antonio Machado. Esta actividá cultural, la primera organizada pola asociación ASBRU, pudo facese gracies al sofitu de l’Axencia Asturiana d’Emigración, el Conseyu de Comunidaes Asturianes y la compañía aerea Air Nostrum. 29 de xunu, 2005 0 FacebookTwitterPinterestEmail
Lliteratura L’escritor Xosé Ramón Martín Ardines gana’l concursu de cuentos pola Oficialidá de Bimenes by asturnet 28 de xunu, 2005 L’escritor Xosé Ramón Martín Ardines col relatu tituláu “Seis d’abril” algamó’l primer premiu del Concursu de Cuentos pola Oficialidá convocáu pol Ayuntamientu de Bimenes. El segundu y tercer premiu del certame lliterariu foron pa Ricardo Saavedra Fernández pol so cuentu “Les mosques” y pa Xosé Nel Riesgo por “El vientre de la escuridá”. La entrega de los premios va facese’l viernes 1 na Casa de Cultura de Bimenes, dientro los actos organizaos con motivu de la IX Fiesta pola Oficialidá nel conceyu yerbatu que’l sábadu va tener el so día grande. 28 de xunu, 2005 0 FacebookTwitterPinterestEmail
Lliteratura La Selmana Negra apuesta pol protagonismu de los llibros y la so apertura a tolos xéneros by asturnet 27 de xunu, 2005 La Colexata de San Xuan Bautista foi l’escenariu escoyíu polos responsables de la organización de la Selmana Negra de Xixón pa presentar oficialmente’l programa de la so edición númberu dieciocho. Resaltar el protagonismu del llibru y del fomentu a la llectura como motivos cimeros d’esti festival lliterariu ye l’oxetivu sobre’l que va centrase esta XVIII Selmana qu’empieza el prósimu viernes 8 cola llegada del avezáu Tren Negru y que se prollonga hasta’l 17 de xunetu. Respective a la identidá del festival, Paco Ignacio Taibo II señaló qu’esta “ta arreyada a la ciudá de Xixón, equí nació y equí ha morrer”. Nel so tonu desenfadáu y charramplán característicu el responsable de la Selmana Negra aprovechó la presentación pa facer un repasu a la hestoria d’estes dieciocho ediciones y tuvo pulles ocurrentes pa los detractores del eventu, cuando remembró que “hasta nos criticaron los miembros d’una asociación antitaurina y nós preguntábamos: ¿y qué carayu tenemos nós que ver colos toros?”. Taibo, en tonu más seriu, remembró que’l principal protagonista del festival yera el llibru y esti añu va tener un papel más descatáu con iniciatives como la novedosa incorporación al eventu: un inxeniu nomáu LOM (Librería de Oportunidad Móvil), una cinta tresportadora -asemeyada a les de la salida d’equipaxes de los aeropuertos- pela que van circular llibros de saldu a espera de la so caza polos llectores. L’apertura a otres lliteratures de xéneru, amás del negru, como’l fantásticu, la ciencia ficción o la novela hestórica, ye otra de les característiques novedoses de la XVIII, que va cuntar tamién con espacios dedicaos a la poesía, con dos velaes de llectures: una protagonizada poles nueve poetes moces seleccionaes n’antoloxía “La verdadera historia de los hombres”, ente elles les asturianes Ana Vanessa Gutiérrez y Rosana Popelka; la segunda velada, van ofrecela dos autores ya habituales de la Selmana: Ángel González y Luis García Montero. Nel apartáu musical, pel escenariu central del recintu de la Selmana Negra, van desfilar músiques pa tolos gustos: Sexy Sadie, Anabel Santiago, la Big Band Terressa, la fanfarria de xitanos rumanos Ciocarlia, Muchachito Bombo Infierno o Charmaine Neville son los nomes principales de los conciertos, ente los que va haber tamién una jam sessiom de gaiteros asturianos. Ente la nómina d’autores presentes nesta dieciocho edición del alcuentru lliterariu-festivu, escritores como Peter Berling (l’autor de la tetraloxía “Hijos del Grial”), Christopher Priest, Andrezj Sapkowski o Giles Courtemanche, a los que se vam unir otros como González Ledesma, Carlos Quílez, Raúl Argemí o la noruega Anne Holt. Tamién autores españoles como José Carlos Somoza, Almudena Grandes, Hermán Migoya, Raul Guerra Garrido, Lorenzo Silva o l’asturianu Rodolfo Martínez, ganador del Premiu Minotauro cola so novela: “Los sicarios del cielo”. Amás del avezáu alcuentru internacional de Fotoperiodismu, el cómic va ser otru de los protagonistes d’esta Selmana con entrambes esposiciones, una d’homenaxe a la xeneración de dibuxantes ya ilustradores de la transición y una amuesa con obres de creadores de les últimes xeneraciones. El capítulu solidariu va tar dedicáu esti añu a recaudar fondos pa la construcción d’un orfanatu n’Haití. Un homenaxe a Emilio Salgari patrocináu pola marca de refrescos qu’esponsoriza la Selmana Negra y nel que diversos creadores recreen la so particular visión del autor de “Sandokán” ye otra de les novedaes qu’ufierta la XVIII edición. Web de la Selmana Negra de Xixón 27 de xunu, 2005 0 FacebookTwitterPinterestEmail
Lliteratura Alberto Vega ufierta nel so últimu llibru la madurez plena de la so obra poética by asturnet 26 de xunu, 2005 Alberto Vega acaba de publicar na prestixosa editorial Visor el so últimu llibru de poemes: “Estudio melódico de un grito”, una obra de madurez na que la voz del poeta llangreanu suena más personal y fonda qu’en nenguna de les sos obres anteriores. El volume, que cuenta con una introducción del tamién asturianu Ángel González, va presentase esti martes 28 en la Casa Cultura de La Felguera nun actu que va cuntar cola presencia de los miembros del grupu “Luna de Abajo”, al que pertenez el poeta llangreanu dende la so fundación. Venticinco años después de la publicación del so primer volume de versos: “Brisas ligeras”, Alberto Vega reún los sos últimos poemes nun nuevu volume: “Estudio melódico del grito”(Visor, 2005), un llibru qu’amuesa la parte más fonda y verdadera del xuegu de mázcares y pantasmes col qu’esti autor vien desenvolviendo la so obra lliteraria con títulos tan fundamentales como “Memoria de la noche”(1981) o “Cuaderno de la ciudad”(1985). La presentación d’esti últimu llibru de Vega va cuntar amás de cola presencia del so autor, cola de los miembros del colectivu “Luna de Abajo”, al que pertenez el poeta llangreanu dende los sos escomienzos. Otros escritores como Noelí Puente, Ricardo Labra, Miguel Munárriz y el diseñador Helios Pandiella van acompañar al autor de “Estudio melódico del grito” na so presentación pública. La cita ye esti martes 28 a les 20.00 na Casa Cultura de La Felguera nun actu organizáu pola asociación Cauce del Nalón. 26 de xunu, 2005 0 FacebookTwitterPinterestEmail
Lliteratura ASBRU entama un actu lliterariu con cuatro escritores asturianos y el cantante Toli Morilla by asturnet 23 de xunu, 2005 L’asociación ASBRU (Asturianos en Bruseles) organiza pa esti viernes 24 un actu lliterariu na Casa d’Asturies de la capital belga nel que van intervenir cuatro escritores asturianos y con ellos el cantautor Toli Morilla. Destamiente l’asociación, creada apocayá a semeyanza d’otres qu’axunten a los nuevos emigrantes asturianos pel mundu, quier caltener encesos los sos vínculos col país y la so cultura. Los escritors participantes nesti actu intervienen el sábadu 25 tamién nuna llectura en Luxemburgo. La llectura poética organizada por ASBRU pa mañana vienres a les ocho la tarde na Casa dAsturies en Bruseles, cuenta con cuatro de los poetes más representativos de la lliteratura asturiana danguaño: Javier Almuzara (Oviedo, 1969) ye ganador del II Premiu Alarcos de Poesía con Constantes vitales. Amás tien publicaos El sueño de una sombra y el dietariu Letra y música, ente otros. Xuan Bello (Paniceiros, 1965) ye seguramente lescritor en llingua asturiana más conocíu y reconocíu. Autor de Historia universal de Paniceiros y Los cuarteles de la memoria, tien la so obra poética recoyida en La vida perdida. Martín López-Vega (Llanes, 1975) ye ún de los autores mozos asturianos con más proyección. Escritor mesmo nasturianu quen castellán, tien publicaos varios poemarios, como Mácula o La visita. Nel añu 2002 resultó ganador del I Premiu Alarcos de Poesía cola obra Árbol desconocido. Julio Rodríguez (Uviéu, 1971) fue finalista del Premiu Planeta nel añu 2003 cola novela “El poeta más grande del mundo”. Xunta ellos va tar Toli Morilla que presentarál so espectáculu basáu precisamente en testos dautores asturianos a los quél punxo música, teniendo gran ésitu nAsturies. Tres del recital va ufiertase un vinu español a tolos asistentes. Al día siguiente, sábadu 25 de xunu, los cuatro poetes van volver recitar en Luxemburgo, en collaboración col centru cultural Antonio Machado. Esti recital va ser na Librarie Intermede, 8 Rue A. Charles, Luxemburgo. 23 de xunu, 2005 0 FacebookTwitterPinterestEmail
Lliteratura Iris Díaz Trancho gana’l XIV Concursu de Relatos Curtios de la Terturlia Cultural El Garrapiellu by asturnet 19 de xunu, 2005 La escritora Iris Díaz Trancho col so relatu “Sedna” ya la ganadora del últimu concursu de cuentos organizáu pola Tertulia Cultural El Garrapiellu de Xixón. El xuráu decidió apurrir el segundu premiu a Pablo Texón Castañón pola so obra “Ente l’agua” y conceder un accesit especial al relatu “Les tardes del tesoru” d’Héctor Pérez Iglesias. El Garrapiellu entama esti concursu lliterariu dende va catorce años y ye ún de los que cuenta con más popularidá dende la so esistencia. Nesta ocasión el xuráu encargáu de valorar los relatos presentaos taba compuestu pol ganador del últimu certame, el periodista y colaborador d’Asturnews Quique Faes; l’académica de la Llingua y poeta Marta Mori; Beatriz R. Viado, redactora del semanariu “Les Noticies”; Mari Paz Fonticiella, mayestra d’asturianu y l’escritor Adolfo Camilo Díaz. Nel so acta el xuráu quiso resaltar la calidá xeneral de tolos trabayos presentaos que vien a consolidar esti concursu como una de les semienteres de nuevos valores de la lliteratura asturiana. 19 de xunu, 2005 0 FacebookTwitterPinterestEmail
Lliteratura Francisco J. Lauriño reún nun volume una selección de los sos relatos dispersos ya inéditos by asturnet 16 de xunu, 2005 L’escritor llangreanu Francisco José Lauriño presenta esta tarde na Casa de la Buelga de Ciañu, el so llibru “Su crimen y otros relatos selectos”, una amuesa significada de la obra narrativa que desenvuelve dende hai más de dos décades y qu’hasta agora permanecía dispersa en diverses publicaciones y volúmnes colectivos. L’autor d’esti volume qu’acaba de publicar la editorial vasca Erroteta, afirma que los sos fines lliterarios “son los que persigue cualquier escritor, consiguir conmover a los llectores tanto nel intelectu como nel corazón, si un escritor lo llogra había sentise satisfechu”. Lauriño, colaborador habitual en medios de comunicación -ente ellos “El Comercio” onde escribe una columna selmanal-, fundador de múltiples proyectos lliterarios y axitador cultural de la cuenca del Nalón, ye autor d’una amplia y diversa obra lliteraria, espardida hasta agora por sinfinidá de publicaciones. La razón de recoyer nun volume esta primera entrega d’una selección de la so obra narrativa ye pal so autor “aparte del exerciciu de vanidá lliteraria y supongo que personal que supón siempre publicar un llibru, considérolo el resultáu inevitable d’una ilusión, un enfotu qu’agora quier cumplise en forma de volumen impresu, en realidá una primer toma de contactu colos posibles llectores al través d’esti formatu públicu”. Francisco José Lauriño xunta en “Su crimen y otros relatos selectos” un conxuntu de narraciones de variada estensión, ente la qu’abonden los cuentos y les fábules breves, cercanes al microrrelatu y nes que la voz narradora de calter realista nun esclúi la ocasión d’adientrase nos terrenos de lo fantástico: “cuido qu’esa voz realista busca la complicidá del llector énte hestories non namás fantástiques o imaxinaries, sinón imposibles de suceder nunca na realidá, al presentales d’una manera realista tento allana-y el camín al que les llea, llevalu al terrén onde se pretende llevalu con narraciones qu’alcuando parten de tradiciones fantástiques como la del cuentu góticu o el cómic”. Los filos conductores que xunen los relatos seleccionaos son a xuiciu del so autor “los que siempre movieron l’interés de cualquier escritor, de la propia lliteratura: l’amor y la muerte, les dos solombres qu’inquieten al ser humanu y lu envereden a veces per caminos sinuosos y nebulentos de la realidá”. En “Su crimen” hai tamién otru filu conductor, el de la llamada d’atención sobre ciertos asuntos de calter moral: “sí, hai otra parte de relatos, inda nun seya la predominante, onde la intención moral, de denuncia social, vamos dicir, son evidentes n’hestories onde se trata de los fondos escuros del mundu de la prostitución o de cómo la defensa de la propiedá privada puede llevar a dalguién a ponela per enriba de la vida d’un ser humanu, tamién creo nesa intención de la lliteratura, como llamada a la concencia”. Después de la publicación d’esta primer entrega de la so obra narrativa Francisco José Lauriño trabaya en colaboración con Teresa Martín na prósima edición d’un volume onde se recueya una selección de la so poesía y na redacción d’una novela, na que tamién, como ocurre con dellos de los relatos de “Su crimen”, el realismu formal y de conteníu va trazar una hestoria onde los elementos fantásticos tán presentes y envuelven una trama desarrollada nel marcu escénicu de la cuenca del Nalón. “Su crimen y otros relatos selectos”, preséntase esi viernes 17 a les 19,30 na Casa de la Buelga de Ciañu, nun actu nel que van intervenir xunta l’autor, el presidente de Cauce del Nalón, Quico García, el director de la Casa de la Buelga, Aladino Fernández García y los escritores Casimiro Palacios y Pablo Antón Marín Estrada. El prósimu día 25 de xunu Francisco J.Lauriño presentará’l so llibru en Xixón na Llibrería Central. 16 de xunu, 2005 0 FacebookTwitterPinterestEmail