Lliteratura Un trabayu sobre Carmen Gómez Ojeda principia una colección de llibros sobre muyeres by asturnet 2 de payares, 2005 El volume tituláu “El despertar de la vida” de Pilar Cartón inaugura la colección ‘Gaudiosa’ d’Ediciones Trabe, dedicada a publicar llibros de conteníu feminista. La obra de Cartón estudia la narrativa de la escritora xixonesa Carmen Gómez Ojea al través de cinco noveles suyes. El llibru “El despertar de la vida” preséntase esti martes 2 a les 20.00 hores na Llibrería Trabe d’Uviéu con presencia de la profesora de la Universidá d’Uvièu Carmen Alonso, la directora del Institutu Asturianu de la Muyer Begoña Fernández y la escritora Carmen Gómez Ojeda. Nel volume de Pilar Cartón estúdiense les noveles de formación de l’autora de “Cantiga de Agüero” embaxo l’enfoque de la crítica lliteraria feminista. Ye’l primer llibru de la colección ‘Gaudiosa’, una iniciativa d’Ediciones Trabe y l’Asociación Feminista d’Asturies (AFA). 2 de payares, 2005 0 FacebookTwitterPinterestEmail
Lliteratura El poeta José Luis Piquero ufierta una llectura nel Aula de les Metáfores de Grao by asturnet 31 d'ochobre, 2005 El poeta José Luis Piquero va ufiertar el prósimu viernes 4 de payares una llectura de la so obra nel Aula de les Metáfores de Grao dientro’l ciclu de recitales entamáu pol centru de difusión lliteraria. Piquero, últimu premiu “Ojo crítico” pola so obra recopilatoria ‘Autopsia’ y residente anguaño en Huelva, va lleer los sos poemes a partir de les 20.00 hores na Casa de Cultura de la villa moscona. L’Aula de les Metáfores ye un proyectu del escritor Fernando Beltrán que dirixe’l críticu y profesor de la Universidá d’Uviéu Leopoldo Sánchez Torre. El ciclu Poetes nel Aula forma parte del calendariu d’actividaes programaes por esti foru col oxetivu de difundir la poesía en toles sos vertientes. Xunta la llectura de José Luis Piquero, l’Aula de Grao caltién abiertu un ciclu de proyecciones cinematográfiques cola poesía como motivu principal. 31 d'ochobre, 2005 0 FacebookTwitterPinterestEmail
Lliteratura Xosé María Rodríguez algama’l premiu de narrativa del Centru Asturianu de Madrid by asturnet 27 d'ochobre, 2005 L’escritor Xosé María Rodríguez algamó’l Premiu de Narrativa Xosé Álvarez “Pin” del Centru Asturianu de Madrid col so relatu ‘Amores ya desalcuentros’. El narrador, natural de Cangas del Narcea y afincáu na capital del estáu dende va décades, ye autor de dos llibros de relatos escritos n’asturianu occidental y de la recién novela ‘Tiempu de nublina'(Trabe, 2004), ente otres obres. Alberto Suárez resultó finalista nel concursu convocáu pola colonia asturiana en Madrid y dedicáu a relatos sobre la emigración. El premiu Xosé Álvarez “Pin” lleva’l nome del escritor fallecíu y fundador del Conceyu d’Asturies de Madrid autor ente otres obres de “Fíos de Naide”. Nel cursu del actu nel que se dio a conocer el fallu del xuráu nel Centru Asturianu de la capital del estáu presentóse l’antoloxía poética “Los poetas de un príncipe”, una esbilla de José Luis García Martín de los poemes citaos pol Príncipe Felipe nos sos discursos añales de la entrega de los premios que lleven el so nome y que presentaron les escritores Berta Piñán y Susana Reisz. 27 d'ochobre, 2005 0 FacebookTwitterPinterestEmail
Lliteratura La Fundación Muñiz Zapico presenta un llibru sobre l’últimu gran procesu del TOP franquista by asturnet 24 d'ochobre, 2005 El presidente del Principáu Vícente Álvarez Areces va ser l’encargáu de presentar esti miércoles en Xixón,xunta’l , Director de la Fundación 10 de Marzo de CC.OO. de Galicia.Víctor Manuel Santidrián Arias el volume “El juicio de los 23” d’ Enrique Barrera, Rafael Pillado y José Torregrosa. El llibru reconstrúi el procesu nel que se xulgaron a los sindicalistes deteníos en Ferrol nel añu 1972, nunos sucesos nos que’l güei presidente asturianu y antigu dirixente del PCE tuvo un protagonismu destacáu. La Fundación Juan Muñiz Zapico organiza esta presentación na Llibrería Central a les 19.30 nun actu qu’amás de les intervenciones d’Areces y Santidrán Arias va cuntar coles de los propios autores del llibru y la del presidente de la fundación cultural de COmisiones Obreres d’Asturies, Francisco Pardo Alberdi. El volume que se presenta esti miércoles en Xixón narra’l que fue l’últimu gran procesu políticu del Tribunal d’Orden Públicu franquista en 1975 contrs los deteníos polos sucesos del 10 de marzu de 1972 en Ferrol. 24 d'ochobre, 2005 0 FacebookTwitterPinterestEmail
Lliteratura Cultura caltién abiertu’l plazu pa los sos premios lliterarios n’asturianu by asturnet 22 d'ochobre, 2005 La Xonseyería de Cultura caltién abiertu’l plazu de recepción d’orixinales destinaos a los premios de novela, poesía y periodismu en llingua asturiana hasta’l prósimu 31 d’ochobre. Los concursos de poesía y novela tán dotaos con 6.000 euros y el de periodismu con 3.000. Amás de la cuantía económica los premios Xosefa Xovellanos de narrativa y el Xuan María Acebal de poesía contem’plen la publicación de la obra ganadora. 22 d'ochobre, 2005 0 FacebookTwitterPinterestEmail
Lliteratura Alcobendas celebra un día dedicáu a les lletres asturianes by asturnet 20 d'ochobre, 2005 El Centru Cultural Pablo Iglesias d’Alcobendas (Madrid) acueye esta tarde un actu d’homenaxe a les lletres asturianes entamáu pola Casa d’Asturies y nel que van participar los escritores Xuan Bello, Xuan Santori y los dibuxantes Àlberto Álvarez Peña y Neto. L’actu va tar presidíu pola delegada del Gobiernu del Principáu en Madrid Pilar Rodríguez y escomienza a les 19.00 hores. Amás de les intervenciones de Xuan Bello y Xuan Santori, el dibuxante Alberto Álvarez Peña presenta’l so llibru “Arte popular asturianu” introducíu pol tamien dibuxante asturianu Ernesto Castillo ‘Neto’. 20 d'ochobre, 2005 0 FacebookTwitterPinterestEmail
Lliteratura L’Atenéu de Turón celebra’l centenariu del Quixote con diverses activiadae by asturnet 19 d'ochobre, 2005 L’Atenéu de Turón acueye nes prósimes selmanes una amplia actividá relacionada col IV Centenariu del Quixote. El prorgama inclúi cuentacuentos, una esposición de pintura y otra bibliográfica, asina como una actividá destinada a que los usuarios de la biblioteca local reescriban de puñu y lletra la novela de Cervantes. Como contribución al cuatricentenariu del Quixote, la Sala d’ Esposiciones del Atenéu de Turón ccueye una amuesa del pintor Toni Vila, titulada “20 rostros, una expresión”. Trátase d’una orixinal propuesta plástica, presentada na xornada d’arte européu de Macedo de Cavaleiros (Portugal)nel pasáu mes de mayu con obres dedicaes a El Quixote, y que recueye 20 rostros del mundu cervantín en distintes técniques pictóriques y acompañaos d’una selección de testos de la obra cume de la lliteratura castellana. Al empar la Biblioteca de Turón organiza una esposición bibliográfica, que va tar abierta hasta’l 31 d’avientu y que se combina cola actividá “Turón escribe al Quijote”, que tien por oxetivu consiguir nun tomu especial la reescritura de la novela de Miguel de Cervantes del puño y lletra de los usuarios de la biblioteca. Previamente, el llunes día 24 d’ochobre, a las 18,30 hores, va haber un Cuentacuentos especial del Quixote a cargu del actor Carlos Alba pa neños y grandes. Nesa gala va aprovechase pa la entrega de regalos y diplomes a los superllectores del añu na biblioteca turonesa. 19 d'ochobre, 2005 0 FacebookTwitterPinterestEmail
Lliteratura L’Academia recupera la obra disperso de tres autores del sieglu XX by asturnet 17 d'ochobre, 2005 L’Academia de la Llingua Asturiana acaba de recuperar dientro la so colección editorial Cartafueyos de Lliteratura Escaecida la obra disperso de tres autores del sieglu pasáu. Con estes nueves entregues la institución llingüística sigue enfotada en remanecer testos escritos en llingua asturiana por autores antiguos y hasta agora poco difundíos. El númberu 83 de la colección académica de Lliteratura Escaecida correspuende a “El Gallu de la Quintana y otros poemes (1901-1935)” d’Alfredo Alonso nuna edición a cargu del estudiosu Gelu Rico. Xosé Lluis Campal ye l’autor de la edición de les otres dos entregues publicaes pola Academia: “Poemes sueltos(1903-1904)” de Rufino Martínez Vázquez y “Versos espardíos (1947-1960)” de Luis Aurelio, los númberos correspondientes a les entregues 84 y 85 de los Cartafueyos. 17 d'ochobre, 2005 0 FacebookTwitterPinterestEmail
Lliteratura Homenaxe en L.luarca a la escritora Mª Esther García López by asturnet 16 d'ochobre, 2005 La escritora valdesana María Esther García López va recibir esti sábadu, a partir de les siete la tarde, un homenaxe nel salón del plenos del Ayuntamientu de Valdes, en reconocimientu a la so figura como escritora y miembru correspondiente de l’Academia de la Llingua asturiana. Esti homenaxe ta organizáu pola asociación de Muyeres Valdes Sieglu XXI. La mesma entidá que dende va dos años vien convocando’l certame poeticu que lleva’l nome de la tamien escritora Nene Losada Rico, y que nesta edición, tando pendiente’l fallu del xuráu, recibió un total de 23 poemarios a concursu, dos d’ellos pa la modalidá en llingua asturiana. La presidenta de l’asociación, Aurora Valdes, comunicó qu’esti añu tienen llegao poemarios dende Cuba, l’Arxentina, Venezuela y Portugal. El xuráu del concursu fallará el premiu a finales d’esti mes. 16 d'ochobre, 2005 0 FacebookTwitterPinterestEmail
Lliteratura La Universidá remembra’l centenariu del poeta checu Vladimir Holan by asturnet 10 d'ochobre, 2005 La Universidá d’Uviéu va rendir homenaze a l’alcordanza del poeta chechu Vladimir Holan nel so centenariu con una conferencia esti martes 11 de la escritora Clara Janés y entrambes esposiciones sobre la Praga contemporánea del autor remembráu. El Vicerrectoráu d’Estensión Universitaria, conmemora’l centenariu del nacimientu de Holan con dos esposiciones, una fotográfica sobre Praga d’ Enrique Granel y otra sobre Camino a Kampa. Centenario de Vladimir Holan (1905-1980), de Clara Janes. La escritora catalana va dar una conferencia a las 19.00 hores d’esti martes 11 nel Aula Magna. La esposición fotográfica y la conmemoración del centenariu de Holan tienen como nexu a la escritora Clara Janés, autora del prólogu qu’ introduz les imáxenes de l’amuesa fotográfica sobre Praga y traductora de les obres del poeta checu. La escritora va falar de la poesía de Holan na so conferencia titulada La gruta de las palabras. 10 d'ochobre, 2005 0 FacebookTwitterPinterestEmail