Lliteratura Dos Nóbel y tres Príncipe d’Asturies celebren n’Uviéu el Día Mundial de la Poesía by asturnet 20 de marzu, 2006 El Teatru Filarmónica d’Uviéu acueye esti martes 21 l’actu central de la celebración del Día Mundial de la Poesía cola presencia de dos premios Nóbel de Lliteratura: Wole Soyinka y Derek Walcott y tres premios Príncipe d’Asturies de les Lletres: Ängel González, Carlos Bousoño y Pablo García Baena. El pieslle musical van ponelu los cantautores Sophie Auster y Luis Eduardo Aute. La cita ye a les 20,00 y les entraes de baldre pueden retirase nes taquielles del Auditoriu d’Uviéu. Esti llunes 20 na viéspora del actu d’Uviéu, Wole Soyinka y José Manuel Caballero Bonald van recitar los sos poemes nel IES Pedro Duque de Cangas; Derek Walcott, presentáu por Luis Eduardo Aute, llee na Casa Cultura de Noreña; y Alí Ahmad Said Adonis va lleer los sos versos xunto a Ángel González na Casa Cultura de Grao. A les 20,00 hores la cantante americana Sophie Auster actúa nel Teatru Palacio Valdés d’Avilés, acompañada de la so banda One Ring Zero. 20 de marzu, 2006 0 FacebookTwitterPinterestEmail
Lliteratura Xuan Bello y el xaponés Yoshie Sakai nos actos pol Día Mundial de la Poesía by asturnet 16 de marzu, 2006 Los actos entamaos con motivu de la celebración del Día Mundial de la Poesía escomiencen esti xueves 16 con una actuación de la soprano Teresa Berganza n’Uviéu y un espectáculu-recital de Mari Paz Pondal en Xixón. El protagonismu de los poetes escomienza esti viernes 17 con una llectura nel Muséu Piñole de Xixón na qu’intervienen Xuan Bello, Joan Margarit, Luisa Castro, Benjamín Prado, Luis Alberto de Cuenca y Luis Muñoz, presentaos por Berta Piñán. L’actu de Xixón ta programáu pa les 20.00 hores. A la mesma hora nel Aula de les Metáfores de Grao el poeta xaponés Yoshie Sakai va ufiertar un recital de música y haikus. Les actividaes del Día Mundial de la Poesía siguen el sábadu 18, a les 20,00 hores, nel Aula Magna de la Universidá con una llectura na que participen el poeta y disidente cubanu Raúl Rivero, la escritora Clara Janés, Antonio Colinas, Cesar Antonio Molina y los asturianos Pelayo Fueyo y Antonio Gamoneda. Al día siguiente Uviéu va ser escenariu de la grabación d’un programa pa la televisión autonómica madrilana nel que van participar Fernando Sánchez Dragó, Fernando Arrabal, Javier Guinea y Javier Lizano. Darréu va celebrase un conciertu recital n’homenaxe a Lorca con Enrique Morente, el Niño Josele y Luis García Montero. L’actu central va celebrase el martes 21 nel Teatru Filarmónica con una llectura na qu’intervienen los premios Nóbel Wole Soyinka y Derek Walcott, xunto a los Premios Príncipe de les Lletres asturianos Ängel González y Carlos Bousoño. Darréu del recital Luis Eduardo Aute y Sophie Auster ufierten un conciertu con delles de les sos canciones. La cantante estadounidense y Aute ufierten el día enantes n’Avilés una actuación nel Teatru Palacio Valdés y los Nóbel Soyinka y Walcott reciten los sos versos en Cangas del Narcea y Noreña, respectivamente. 16 de marzu, 2006 0 FacebookTwitterPinterestEmail
Lliteratura Milio R. Cueto, Sánchez Vicente y Xulio Vixil protagonicen l’últimu númberu de Lliteratu by asturnet 10 de marzu, 2006 Tres escritores fundamentales del Surdimientu: Milio Rodríguez Cueto, Xuan Xosé Sánchez Vicente y Xulio Vixil protagonicen les entrevistes de la última entrega de la revista Lliteratu . La publicación dixital dedica tamién nel so númberu 6 un ampliu espaciu a los actos y a los actores que van entamar la celebración n’Asturies del Día Mundial de la Poesía a lo llargo del mes de marzu. Lliteratu algama la so sesta entrega con una güeyada amplia a les xornaes poétiques organizaes pola UNESCO en colaboración cola Fundación Príncipe d’Asturies y que van traer a dellos llugares de la nuestra comunidá a autores como los Nóbel Wole Soyinka y Derek Walcott, amàs d’una amplia representación del panorama poéticu del estáu. Les avezaes secciones de novedaes, axenda y premios completen xunto un reportaxe sobre’l grupu Poegía de Xixón y la figura d’Antón Marirreguera el númberu últimu de la publicación lliteraria dixital. 10 de marzu, 2006 0 FacebookTwitterPinterestEmail
Lliteratura Figures destacaes de la lliteratura universal y del estáu participen nel Día Mundial de la Poesía n’Asturies by asturnet 10 de marzu, 2006 La presencia de nomes importantes del panorama lliterariu universal y del estáu xunto a la descentralización de les actividaes ye lo más destacao de la celebración n’Asturies dende la prósima selmana del Día Mundial de la Poesía, entamáu pola Fundación Príncipe d’Asturies embaxo l’auspiciu de la UNESCO. Un gran recital nel Auditoriu d’Uviéu el prósimu 21 de marzu va ser l’actu cimeru d’esta celebración. El programa d’actos escomienza esti martes 14 cola inauguración de l’amuesa “La palabra y la huella” na sala d’esposiciones del Banco Herrero n’Uviéu. El xueves 16 la cantante Teresa Berganza ufierta un recital nel Auditoriu uvieín al que se va poder asistir con invitaciones de baldre y el mesmu día en Xixón, l’actriz Mari Paz Pondal va poner n’escena el so espectáculu “Unidos en el tiempo” sobre la poesía y la figura d’Antonio Machado, Federico García Lorca y Miguel Hernández. Los actos protagonizaos por poetes empiecen el viernes 17 con una llectura nel Muséu Piñole de Xixón a cargu de Xuan Bello, Carlos Marzal, Joan Margarit, Luis Alberto de Cuenca, Luisa Castro, Luis Muñoz y Benjamín Prado, presentaos por Berta Piñán. Esi mesmu día nel Aula de les Metáfores de Grao el poeta xaponés Yoshie Sakai va ufiertar un recital de música y haikus. El sábado 18 l’Aula Magna de la Universidá va acoyer una llectura na que participen el poeta y disidente cubanu Raúl Rivero, la escritora Clara Janés, Antonio Colinas, Cesar Antonio Molina y los asturianos Pelayo Fueyo y Antonio Gamoneda. Al día siguiente Uviéu va ser escenariu de la grabación d’un programa pa la televisión autonómica madrilana nel que van participar Fernando Sánchez Dragó, Fernando Arrabal, Javier Guinea y Javier Lizano. Darréu va celebrase un conciertu recital n’homenaxe a Lorca con Enrique Morente, el Niño Josele y Luis García Montero. Los Premios Nóbel Derek Walcott y Wole Soyinka ufierten el llunes 20 entrambos recitales na Casa de Cultura de Noreña y nel IES Pedro Duque de Cangas del Narcea, respectivamente. L’actu central va ser al día siguiente nel Teatru Filarmónica d’Uviéu con un recital a cargu de Walcott, Soyinka, los asturianos Ángel González y Carlos Bousoño, asina como’l poeta senegalés Charles Carrére. 10 de marzu, 2006 0 FacebookTwitterPinterestEmail
Lliteratura El llibru “Tenía que contarlo” de María Luisa Álvarez algama la tercer edición by asturnet 9 de marzu, 2006 El volume de memories “Tenía que contarlo” de la veterana lluchadora antifranquista María Luisa Álvarez Llorente (Luisina Quiroga) acaba d’estampar la so tercera edición, un cume editorial poco frecuente nel panorama de les publicaciones d’esti calter n’Asturies. L’autora va presentar esta nueva impresión de les sos alcordances el viernes 10 en Sama, nun actu entamáu pola Fundación Juan Muñiz Zapico nel que la hestórica comunista mierense va dialogar cola hestoriadora de la Universidá d’Uviéu Carmen García. En “Tenía que contarlo” María Luisa Álvarez narra la hestoria personal y colectiva d’una familia marcada por dellos de los principales sucesos políticos y sociales del sieglu XX n’Asturies: la revolución del 34, la guerra civil, la represión franquista y la llucha poles llibertaes embaxo la dictadura. La esperiencia relatada por esta veterana militante d’izquierdes despertó un fondu interés nos llectores dende la primer edición de la obra y esi ye’l motivu cimeru de qu’esti volume de memories algame ya la so tercera edición. L’actu de presentación de “Tenía que contarlo” ta programáu pa les 18.00 hores nel salón d’actos del Centru Cultural Escueles Dorado de Sama. 9 de marzu, 2006 0 FacebookTwitterPinterestEmail
Lliteratura Miguel Barrero finalista del I Premiu de Novela Bruguera by asturnet 8 de marzu, 2006 L’escritor y periodista Miguel Barrero quedó ente los finalistes del I Premiu Bruguera de Novela cola so obra ‘Los últimos días de Michi Panero’. A la convocatoria ganada pola narradora cubana Wendy Guerra unviáronse alrodiu de trescientos orixinales provenientes de diversos países de la península ya iberoamérica, ente elles la obra del autor asturianu. Barrero algamó en 2004 el Premiu Asturies Xoven pola so obra ‘Espejo'(KRK, 2005) y ye autor de diverses narraciones asoleyaes de manera dispersa. Fue redactor del diariu El Comercio y anguaño collabora nel semanariu Les Noticies. Ye un de los responsables de la publicación lliteraria Eventual publicada en Turón. 8 de marzu, 2006 0 FacebookTwitterPinterestEmail
Lliteratura Berta Piñán y Pablo Amargo colaboren nun llibru empobináu a los nuevos llectores by asturnet 7 de marzu, 2006 La escritora Berta Piñán acaba de publicar “El branu de Mirtya”, un volume ilustráu por Pablo Amargo nel que se recrea el pasu de la infancia a la adolescencia d’una neña énte la que se desplieguen les novedaes de la vida. El relatu de l’autora canguesa va empobináu a los llectores más mozos na nuestra llingua. Publicáu pola editorial Ámbitu dientro la so colección dedicada al públicu infantil-xuvenil, “El viaxe de Mirtya” cuenta la hestoria d’un alcuentru ente la rapacina protagonista y Mirtya, la empleada doméstica que trabaya en casa de so tía onde ta braniando. L’autora de la narración, Berta Piñán, ye una de les más prestixoses voces de la lliteratura asturiana contemporánea. Pablo Amargo, ilustrador del volume, ye un de los dibuxantes con más proyección esterior y algamó en 2004 el Premiu Nacional d’Ilustración Infantil y Xuvenil del Ministeriu de Cultura. 7 de marzu, 2006 0 FacebookTwitterPinterestEmail
Lliteratura Humberto González presenta en Xixón un nuevu llibru de poemes by asturnet 24 de febreru, 2006 L’escritor Humberto González presenta esti viernes 24 en Xixón el so últimu llibru de poemes: “Decenariu”, un conxuntu de ciento dieciséis testos compuestos a lo llargo de los años 1988 y 1998, nos que la singular voz lírica del autor traza un camín de recovecaos llaberintos sentimentales y estéticos. El periodista y narrador Chema Vega, l’escritor Xosé Nel Riesgo y el conceyal del Partido Popular nel Ayuntamientu de Llaviana José María González van ser los encargaos d’arropiellar al poeta de Figareo na estrena del so nuevu llibru. El salón d’actos del Antigu Institutu acueye a les 19,30 l’actu nel que se va presentar “Decenariu”. Humberto González (Figareo-Mieres, 1961), ye una de les voces más personales de la lliteratura asturiana, con una amplia obra poético publicao: Augua d’invocación (1988), Poemes en prosa (1992), Hábitat azul (1995), Ámbitu elemental (1997), Del país de la caliza (Premiu “Fernán-Coronas”, 1997), Les esferes del tiempu (2001), De nueche y agua (2000), y Tiempu de nós (2001). Traductor del francés (Un furacu na alambrera, de François Sautereau, 1991) y del catalán (Piedra de llerón, de Maria Barbal, 1992), y narrador, tien publicaos dos llibros de cuentos (Anatomíes de la mañana, 1995; y Histories escabroses, 2002). El restu de la so obra apaez recoyida en múltiples llibros colectivos de poesía, narrativa, asina como en revistes y prensa. Parte d’ella tradúxose al castellanu, inglés, gallegu, catalán y rusu; y a lo último apaecerá na revista lliteraria de la Universidá de Dakota del Norte. 24 de febreru, 2006 0 FacebookTwitterPinterestEmail
Lliteratura Publícase un llibru póstumu del escritor Mánfer de la Llera by asturnet 23 de febreru, 2006 El salón d’actos del Muséu de Belles Artes d’Asturies va ser esti xueves 23 l’escenariu de la presentación del volume póstumu del escritor Mánfer de la Llera tituláu ‘Monólogos d’ente dos sieglos’. El llibru recueye la obra del poeta fallecíu apocayá nel xéneru monologuísticu, un de los munchos que cultivó l’autor llangreanu. Manuel d’Andrés Fernández, Mánfer de la Llera, ye un de los escritores en llingua asturiana consideraos unánimemente como ‘ponte’ ente les xeneraciones vieyes y les nueves. Escritor de formación autodidacta y mineru d’oficiu bien de tiempu, dedicó bona parte del so llabor intelectual a la crónica periodística, la escritura de poemes, monólogos y relatos nes dos llingües d’Asturies y mesmo a entrambos volúmenes de prosa memorialista. En 1981, cuando se constituyó la primer xunta pública de l’Academia de la Llingua, Mánfer de la Llera fue un de los miembros correspondientes. Como recopilador ye autor de dos volúmenes dedicaos al vocabulariu asturianu de la mina. L’actu de presentación del volume póstumu de Mánfer va entamar esti xueves 23 a les 20.00 hores con presencia de Ramón d’Andrés, responsable de la Oficina de Política Llingüística del Principáu y fíu del escritor fallecíu, asina como de los escritores Xuan Bello y Henrique Facuriella. 23 de febreru, 2006 0 FacebookTwitterPinterestEmail
Lliteratura Xosé Gago traduz la Odisea d’Homero al asturiano by asturnet 20 de febreru, 2006 Xosé Gago, profesor na Universitat Oberta de Catalunya y traductor al asturiano d’autores como Safo o Konstantin Kavafis, trabaya anguaño na versión na nuestra llingua de la Odisea. L’autor de la traducion de la obra homérica lleva imersu na so xera dende va años y nos prósimos veses va ver publicáu el primer volumen de la obra. La edición de la Odisea en llingua asturiana va ser posible a lo llargo d’esti añu cuando apaeza el primeru de los dos volúmenes nos que se distribúi la so versión. Gago y el sellu editorial que va publicar el so trabayu inda nun saben si la publicación de la obra d’Homero va facese billingüe asturiano-griego o namas en llingua asturiana. Xosé Gago, nacíu en Turón y residente en Catalunya dende la década de los setenta fue miembru de Conceyu Bable y traduxo al nuestru idioma los poemes y fragmentos de Safo, publicaos en 1985 pola Academia de la Llingua, y de Kavafis en 1989. 20 de febreru, 2006 0 FacebookTwitterPinterestEmail