Hestoria Emprimen los actos en conmemoranza de la Revolución asturiana d’Ochobre del 34 by asturnet 1 d'ochobre, 2004 La remembranza del 70 aniversariu de la Revolución d’Ochobre del 34 va cuntar con un ampliu programa d’activides qu’incluin esposiciones, proyecciones,charles y una marcha ente La Pola L.lena y la Vega’l Rei na que se va percorrer un de los itinerarios siguíos polos revolucionarios asturianos.Ente los actos convocaos va haber tamién una alcordana pa los represaliaos políticos del fascismu y un homenaxe a los ‘mártires de Carbayín’ nel cementeriu d’Areñes, en Sieru. Diversos colectivos ciudadanos y organizaciones d’izquierda xúntense nesta convocatoria unitaria cola que se tenta enfrescar la memoria hestórica del pueblu asturianu. Los actos emprimen güei cola inauguración na Casa Duró de Mieres de la esposición ‘Ochobre 1934-2004.34 artistes. 14 díes de revolución’, una amuesa na que participen dellos de los más significativos artistes contemporáneos asturianos. Otra de les esposiciones va tar dedicada al ‘Arte y Revolución en Mieres, 1934/2004’, como la que s’abre’l 4 d’ochobre, entamada pol Foru Arte Ciudá, nel Institutu Bernaldo de Quirós con un alderique abiertu y l’aniciu de la instalación ‘Barricada de la memoria’ nel patiu l’istitutu. Al empar, organizada pola Asociación d’Ex presos y Represaliaos Políticos Antifranquistes y la Fundación Juan Muñiz Zapico va poder visitase na Casá Duró de Mieres y na Casa Cultura de Riañu la esposición ‘El suañu de la llibertá’. La Fundación Horacio Fernández Inguanzo contribúi al aniversariu de la comuna cola proyección el 8 d’ochobre nel Salón d’actos de Caxastur de la película ‘Por el camino de Mieres’ y dellos documenales d’ochobre del 34. Una mesa redonda con los hestoriadores Francisco Erice, José Girón y Juan Antonio de Blas na sé de la Sociedá Cultural Xixonesa y un recital poéticu nel Atenéu Obreru de Xixón completen el programa en conmemoranza de la revolución asturiana. 1 d'ochobre, 2004 0 FacebookTwitterPinterestEmail
Hestoria Zapico aborda la tensión ente centralismu y periferia, na primer tesina n’asturianu de la Facultá d’Hestoria by asturnet 23 de setiembre, 2004 La Facultá d’Hestoria acoyó na mañana de güei la presentación de la primer tesina lleída n’asturianu na facultá. Faustino Zapico, el so autor, defendió un trabayu tituláu ‘El discursu de la periferia. Corrientes federalistes y autonomistes na Asturies decimonónica (1808-1898)’, nel que s’estudia un periodu poco conocíu de la hestoria d’Asturies y que tuvo abonda influencia nes corrientes ideolóxiques medraes nel sieglu XX. La tesina de Faustino Zapico acuta el so campu d’investigación ente los ecos del alborecer constitucional de les Cortes de Cádiz dica el momentu de la independencia de les últimes colonies españoles n’Ultramar. Les guerres carlistes y l’ambivalencia de la última ente escoyer un modelu de monarquía federal o un remanecer del modelu del vieyu réxime ocupa un sitiu destacáu nesti trabayu. Otres corrientes nes que se centra l’estudiu de Zapico son les del republicanismu federal, una ideoloxía con fondu arraigu n’Asturies de les últimes décades del sieglu XIX. El papel secundariu del asturianismu cultural nesi periodu y l’ausencia d’una burguesía enfotada n’intereses asemeyaos a los d’otres burguesíes del estáu son otros puntos destacables de la tesina. El tribunal, presidíu por José Girón y formáu tamién pola directora de la tesina, Carmen García, y Francisco Erice, valoró la coherencia del trabayu y la novedá que representa un estudiu d’esi periodu hestóricu n’Asturies enfocáu nel discursu de les corrientes anticentralistes, si bien fizo delles suxerencies y correcciones al testu orixinal. 23 de setiembre, 2004 0 FacebookTwitterPinterestEmail
Hestoria Una decena de collectivos xúnense pa cellebrar el 70 aniversariu de la revolución d’ochobre by asturnet 20 de setiembre, 2004 Tres esposiciones, una novela, varies proyecciones, un recital y una marcha pa evocar la revolución asturiana de 1934. Una decena de collectivos xunen esfuerzos pa conmemorar el 70 aniversariu de los sucesos revolucionarios con un programa d’actos que van prollongase a lo llargo de tol mes en llocalidaes de les cuenques mineres, Uviéu y Xixón. Nes cellebraciones ocupará un espaciu propiu l’Asociación d’ex presos y represaliaos del franquismu, qu’amás de pesllar los actos con una conferencia prevista pal 29 d’ochobre na Casa Duró de Mieres, entamará una esposición con materiales hestóricos que podrá visitase nesi mesmu llugar na segunda quincena d’ochobre y, del 4 al 15 d’esi mes, en Llangréu. Otres dos amueses intentarán recuperar na cabecera de la cuenca’l Caudal l’alcordanza del ambiente revolucionariu: Una nel institutu Bernaldo de Quirós y otra na Casa Duró, con participación d’artistes contemporáneos. Uviéu acoyerá, pol so llau, la presentación de la novela ‘La sombra del tren’, obra de Marcelino Iglesias, na tarde’l 7 d’ochobre. Completen el programa de conmemoraciones un recital poéticu nel Atenéu Obreru de Xixón, el 14 d’ochobre, y dos cites sobro’l tarrén: una marcha a pie ente La Pola L.lena y La Vega’l Rei, el día 9, y un actu d’homenaxe a los revolucionarios asesinaos nel cimenteriu de Santiago d’Areñes, na llocalidá de Carbayín, el 24 d’ochobre. Les cellebraciones del 70 aniversariu de la revolución tán entamaes n’andecha polos collectivos ya organizaciones Lliberación, Izquierda Xunida, Bloque por Asturies, Partíu Comunista d’Asturies, Fundación ‘Juan Muñiz Zapico’, Atenéu Obreru de Xixón, Sociedá Cultural Xixonesa, Conceyu Abiertu pola Oficialidá, Mocedaes Comunistes, Fundación ‘Horacio Fernández Inguanzo’ y Foru Arte Ciudá. L’episodiu revolucionariu de 1934 orixinóse tres d’un llamáu fechu a nivel estatal en rempuesta a la entrada nel Gobiernu de tres ministros de dreches, anque los socialistes veníen alitando diba tiempu la revolución como fin tácticu pa camudar l’orde social y la drecha retrucaba a esa amenaza con posiciones cada vegada más reaccionaries, yá dende los primeros años del sieglu XIX. La revolución perduró sólo n’Asturies y foi derrotada militarmente depués de dos selmanes d’enfrentamientos a los que siguió una dura represión. Programa íntegru de los actos 20 de setiembre, 2004 0 FacebookTwitterPinterestEmail
Hestoria Francisco Erice inagura un ciclu que rescata la memoria’l centenariu Ferrocarril Vasco-asturianu by asturnet 10 de setiembre, 2004 El ‘Vasco’ renaz a los cien años. El profesor universitariu Francisco Erice, espertu na burguesía industrial asturiana, abre güei en Xixón un ciclu de conferencies consagráu a rescatar l’alcordanza del Ferrocarril Vasco-asturianu, que cellebra’l centenariu del so primer tramu de llinia, ente Uviéu y San Esteban. Erice falará esta tarde de les rellaciones ente los burgueses qu’industrializaron Asturies nel sieglu XIX y los sos homólogos nel País Vascu, nuna conferencia que se cellebrará a les 19 hores na sala d’actividaes del Muséu’l Ferrocarril, en Xixón, y a la que van siguir charres del director del Muséu Vascu’l Ferrocarril, Juanjo Olaizola (23 de setiembre) y el responsable del equipamientu cultural xixonés, Javier Fernández (8 d’ochobre). Tamién intervendrán nel ciclu los espertos María Fernanda Fernández, que falará el 22 d’ochobre de la Sociedá Hulleras del Turón; José María Flores, encargáu d’analizar el 12 de payares l’arquitectura de les estaciones del ‘Vasco’; y Germán Ojeda, quien pesllará’l ciclu de conferencies el 26 de payares con un análisis de la industria carbonera asturiana. El Ferrocarril Vasco-asturianu, anguaño xestionáu por Feve, inaguró’l primeru de los sos tramos, ente Uviéu y San Esteban, el 2 d’agostu de 1904, y dos años depués algamó la llocalidá mierense de Figareo. La llinia penetró nel valle d’Ayer en 1935, hasta Col.lanzo, y afitóse como un preséu fundamental de la industrialización d’Asturies, n’estrencha vinculación a la salida al mar del carbón de la cuenca’l Caudal pal so tresporte posterior por barcu. 10 de setiembre, 2004 0 FacebookTwitterPinterestEmail
Hestoria Xuan Bello amiesta lo llocal y lo universal na presentación en San Antolín del anuariu ‘Bedoniana’ by asturnet 15 d'agostu, 2004 ¿Ye posible quun pequeñu llugar llegue a simbolizar duna manera claral mundu? ¿Ye posible fixándose nun pequeñu granu darena ver la esencia de la playa? Con esa entruga retórica presentabal poeta asturianu Xuan Bellol sestu anuariu ‘Bedoniana’, quespubliza tolos años la comisión de fiestes del Bandu de San Antolín de Naves de Llanes y que se presentaba esta fin de selmana nel Monasteriu San Antolín. El sestu anuariu del Bandu de San Antolín de Naves presentóse na nueche desti domingu 15 dagostu col meyor allugamientu posible, la praera del Monasteriu de San Antolín de Beón, y con un ésitu de participación y públicu que siguió con procuru les pallabres del editor Juan Carlos Villaverde Amieva y del poeta Xuan Bello, encargáu de la presentación del actu. Juan Carlos Villaverde dio llectura a la presentación del volume faciendo alcordanza del volume primerizu y dexando nidio questi sestu númberu de Bedoniana apaez con la mesma frescura y novedad de aquel primer volumen de 1997. Naves, sus tierras y sus gentes, la fiesta patronal de San Antolín, con sus ritos, mitos y símbolos, y Bedón con su historia, su paisaje y su leyenda, constituyen una tríada privilegiada para el estudio sosegado, la investigación pormenorizada, la evocación literaria y la inspiración artística que la presenta entrega reúne de y difunde de manera exuberante. Darréu, y tamién en castellán, Villaverde fizo un recordatoriu de los contenidos desti caberu anuariu dexando afitao que salgamare reunir un repertorio de imágenes que constituyen el testimonio fechaciente que nos permite seguir los modos y las modas matrimoniales a lo largo del pasado siglo XX nuna nidia referencia a una les estayes más destacaes del anuariu, la entitulada Un siglo de bodas navizas (1901-2000) quamuesa munches fotos de boda de les families que viven o vivieren en Naves. Depués de les pallabres de Juan Carlos Villaverde intervino Xuan Bello quentamó diciendo-y al numberosu público que saxuntara nel prau del Monasteriu quentendía que Nueva York, París o Madrid seyan motores de la gran cultura universal al mesmu tiempu que xuraba nun tar faciendo alabanza denguna del localismu, tolo contrario: solo toi afirmando lo que los matemáticos persaben dende Pitágoras, quentel cero y lún ta linfinitu. Y darréu desta alcordanza entamó a entrugase retóricamente si ¿Ye posible quun pequeñu llugar llegue a simbolizar duna manera claral mundu? ¿Ye posible fixándose nun pequeñu granu darena ver la esencia de la playa? Un pequeñu versu dEnderson y una referencia a Fernando Pessoa que descubriera quel mundu yera más profundu quextenso foron la base dende la que Bello encadarmó un discursu que lu llevó a afirmar questi anuariu cultu vien a aportar una visión universalista de lo local. Amás de la mentada collecha de fotos de boda de les families navices a lo llargo del sieglu XX tamién salcuentren nesti anuariu trabayos de Carmen Meneses sobre Una maqueta de San Antolín de Bedón (h.1866), de Ramón Alvargonzález sobre San Antolín y las costas de Llanes en el siglo XVII, Luis Carrera Buergo acerca de Orquídeas silvestres de la cuenca y costa bedonianas, Francisco Cabriffose Cuesrta sobrel fotógrafu Cándido García, Michael Wilkinson quufierta la Perspectiva romántica del viajero inglés Edgar Wigram, Luis Pérez Ortin, Bernardo García, Pablo Ardisana, Carmen Acebo, Federico Sopeña, María Concepción Vega Obeso, Antonio Cantero y Yolanda Cerra Bada. Lanuariu, como tradicional portfoliu de fiestes que perye, ufierta una bona riestra danunciantes que sufragen la edición como asocede tradicionalmente con esti tipu de trabayos festivos. 15 d'agostu, 2004 0 FacebookTwitterPinterestEmail
Hestoria La figura de Xovellanos recibe l’homenaxe de los asturianos 193 años depués del so últimu regresu a Xixón by asturnet 6 d'agostu, 2004 Gaspar Melchor de Xovellanos sigue recibiendo flores 193 años depués del so últimu regresu a Xixón. Autoridaes, instituciones y collectivos ciudadanos participaron esti mediudía na ofrenda floral énte la estatua del illustráu allugada na plaza’l 6 d’agostu, que conmemora la vuelta del esiliu del que fora Ministru de Gracia y Xusticia nel reináu de Carlos III. L’alcaldesa de Xixón, Paz Fernández Felgueroso, presidió la ofrenda, na que tamién tomaron parte representantes de la familia Xovellanos, ‘Fundación Foro Jovellanos’, Teatru Municipal Xovellanos, Real Institutu Xovellanos y Atenéu Xovellanos, ente otros oferentes. Nel trescursu del actu, la Banda de Música de Xixón y la Orquesta New Milenium interpretaron la Obertura-fanfarre a Xovellanos, compuesta y dirixida por Vicente Cueva, una pieza de seis minutos de duración estrenada hai un añu pa conmemorar el regresu a Xixón de Xovellanos acordies col modelu de les obertures-fanfarre d’estilu centroeuropéu de los sieglos XVII y XVIII. 6 d'agostu, 2004 0 FacebookTwitterPinterestEmail
Hestoria Les 78 pieces más relevantes de les pelegrinaciones a Santiago resalten el papel d’Asturies nel Camín by asturnet 27 de xunetu, 2004 El protagonismu pioneru d’Asturies nos caminos a Compostela, al traviés de 78 escultures, pieces d’orfebrería y restos arquitectónicos. La ministra de Cultura, Carmen Calvo, inaguró ayeri n’Uviéu la esposición ‘Luces de peregrinación, sede real y sede apostólica’ como un repasu “escepcional” a “tantu dir y venir de persones a la gueta d’un sentíu pa les sos vides”. Y nesi camín de doble sentíu, sorrayó la ministra, Uviéu y Asturies “tienen muncho que dicir”, tomando en cuenta que l’orixe de la propia ciudá de Santiago de Compostela ye’l santuariu xacobéu fundáu nel sieglu IX pola monarquía asturiana pa destacar l’afayu del supuestu sepulcru l’Apóstol. “Dende’l sentíu de pertenencia a un llugar”, Calvo alitó a los asturianos a sentise protagonistes del mayor itinerariu cultural européu y abrió formalmente una esposición que permanecerá abierta al públicu hasta’l prósimu 21 de setiembre na sala d’amueses del Bancu Herrero n’Uviéu, allugada na cai Suárez de la Riva. Comisariada por Francisco Singul, y considerada l’estandarte del Añu Santu Xacobéu depués de la so primer inaguración n’avientu pasáu nel Muséu Arqueolóxicu Nacional y la so amuesa posterior en Compostela, ‘Luces de peregrinación’ repasa les principales rutes xacobees al traviés de talles de Santiago’l Mayor en maera policromao, relicarios ellaboraos con pedrería, cálices, capiteles y cachos de relieves de les ilesies del Camín. La esposición dedica amás un espaciu monográficu a resaltar la importacia d’Uviéu y Santiago como grandes centros de pelegrinación na Edá Media, ya inclúi una amuesa d’obres d’orfebrería donaes a la Cámara Santa uvieína y a la Catedral compostelana como ofrenda. 27 de xunetu, 2004 0 FacebookTwitterPinterestEmail
Hestoria L’ampliación del Muséu Arqueolóxicu arranca llueu d’una década de trámites burocráticos by asturnet 26 de xunetu, 2004 Diez años de trámites nos despachos. Les obres d’ampliación y remocicamientu del Muséu Arqueolóxicu d’Asturies, allugáu nel vieyu monasteriu uvieín de San Vicente, arranquen formalmente güei, depués que’l Ministeriu de Cultura encamentara el primer estudiu de l’actuación en 1994. Los trabayos duplicarán la superficie del equipamientu, de los 2.700 metros cuadraos d’anguaño a más de 5.600. Presupuestaes en 6,2 millones d’euros y adxudicaes a la Unión Temporal d’Empreses Alfredo Rodríguez S.L. y ‘Técnicas de Arquitectura Monumental S.A.’, les obres habíen tar yá entamaes na pasada seronda, cuando’l Muséu Arqueolóxicu treslladó los sos fondos a un depósitu esternu pa propiciar l’aniciu de los trabayos. Magar d’esa actuación, qu’obligó a pesllar el centru museísticu al públicu, pales y obreros nun entraron al edificiu nin n’inviernu, nin en primavera. La ministra de Cultura, Carmen Calvo, peslló esta tarde na sé del muséu la caxa na que quedarán soterraos los periódicos del día como símbolu del empiezu de los trabayos, que si se cumplen les previsiones pérmitirán la inaguración del equipamientu yá meyoráu a mediaos de 2007. Nel conventu uvieín, Calvo acusbió la maqueta de l’ampliación ya interesóse polos detáis del proyectu pal muséu, de titularidá estatal pero xestionáu pol Principáu Nel trescursu de la visita de la ministra al edifiiu qu’alberga l’Arqueolóxicu d’Asturies, l’alcalde d’Uviéu, Gabino de Lorenzo, comprometióse a tramitar darréu la llicencia municipal necesaria pal aniciu de los trabayos del Archivu Hestóricu, a petición de Calvo y del presidente autonómicu, Vicente Álvarez Areces. La Conseyería y el Ministeriu de Cultura firmaron en 1995 el conveniu col que se comprometía l’ampliación y remocicamientu del Arqueolóxicu d’Asturies, cuyu proyectu museolóxicu foi redactáu tres años depués pol arqueólogu Ángel Villa. Depués de nuevos trámites técnicos, el Boletín Oficial del Estáu (BOE) publicó’l pasáu 9 de xunu l’adxudicación de les obres. El vieyu conventu benedictín de San Vicente, nel que vivió’l padre Feijóo, rellaciónase cola fundación de la ciudá d’Uviéu. Llueu d’asitiase n’estremaes sés transitories, la colección del Muséu Arqueolóxicu d’Asturies quedó a la fin allugada nel monasteriu uvieín en 1952. 26 de xunetu, 2004 0 FacebookTwitterPinterestEmail
Hestoria Una esposición amuesa a pie de playa la cultura ibera p’atrayer a quien nun entra nos museos by asturnet 21 de xunetu, 2004 Averar la cultura al ciudadanu-tipo que nunca nun entraría nun muséu. Con esi envís declaráu quedó abierta esti mediudía en Xixón la esposición ‘Íberos: príncipes, guerreros y artesanos”, que permanecerá nuna carpa allugada n’El Náuticu hasta’l 3 de setiembre y qu’amuesa la despensa, la casa, el sistema económicu y el llabor d’una civilización que pervivió nel levante de la Península Ibérica dende’l sieglu VI antes de Cristu hasta la dominación romana. La Fundación La Caixa, qu’entama l’amuesa baxo’l comisariáu del arqueólogu Lluís Batista, tien el llistón altu respecto a años anteriores: Na que ye la so sétima visita veraniega a El Náuticu xixonés, la entidá plantégase superar la cifra de 125.000 persones que pasaron en 2003 pol mesmu llugar pa visitar l’anterior esposición entamada na ciudá pola fundación catalana, centrada entós na evolución biolóxica del monu a la persona humana. Nesta ocasión, según precisó’l secretariu xeneral de la Fundación La Caixa, Luis Reverter, quienes entren a la carpa onde se recrea la cultura ibera van atopase con una esposición eminentemente didáctica -hai cartafueyos específicos pal públicu más neñu- qu’evoca la vida d’un pueblu de príncipes guerreros -n’ocasiones mercenarios d’otros pueblos- que nunca nun se constituyó n’Estáu pero que demostró durante siete sieglos la so “cultura elevada”. Como pieces que la reconstrúin, l’amuesa incorpora reproducciones d’un domiciliu, una despensa y una tumba de la época, amás de maquetes de tres tipos de poblaos documentaos en Barcelona, Xaén y Huelva, y recreaciones de preseos agrícoles decisivos na península ibérica, como l’aráu con punta de fierro. Tanto Reverter como’l comisariu de la esposición, qu’esta mañana ficieron de guíes nuna visita pa los medios de comunicación previa a l’apertura de la carpa al públicu, llamentaron la imposibilidá d’atalantar l’idioma qu’emplegaben los iberos, del que se conoz el so alfabetu pero entá nun se descifró’l so significáu. La esposición ‘Íberos: príncipes, guerreros y artesanos’ permanecerá abierta de martes a vienres de 10 a 14 hores y de 17 a 21, mientres que los sábados, domingos y festivos l’horariu sedrá de 11 a 15 y de 17 a 21. 21 de xunetu, 2004 0 FacebookTwitterPinterestEmail
Hestoria Una esposición recupera n’Avilés fotografíes de la Guerra Civil española by asturnet 23 de xunu, 2004 Avilés recupera una alcordanza visual de la Guerra Civil española. Una esposición de fotografíes inédites de l’axencia estatal Efe y una esbilla de testos d’intelectuales, políticos y militares de la época desentierra nel Centru Municipal d’Arte, allugáu na cai de Llanoponte, el drama humanu orixináu pol conflictu bélicu, que causó miles de muertos ente los años 1936 y 1939. Inagurada ayeri y a disposición del públicu hasta’l prósimu 23 de xunetu, l’amuesa fotográfica asoleya imáxenes captaes polos reporteros d’Efe en llugares y situaciones inaccesibles pa los ciudadanos d’a pie, tanto de grandes acontecimientos como de detáis de la engarradiella. Según los responsables de la esposición, cuyu catálogu ta ellaboráu pol investigador Stanley Payne, la recuperación de fotografíes pretende echar una güeyada a la fonda resquiebra que’l conflictu supuso pa la sociedá española, dixebrada en dos bandos nos que llucharon familiares y collacios enfrentaos ente sigo. 23 de xunu, 2004 0 FacebookTwitterPinterestEmail