Escéniques Van Morrison actúa’l 27 en Xixón nun conciertu compartíu con Tejedor by asturnet 23 de xunetu, 2005 Van Morrison comparte esta nueche escenariu colos asturianos Tejedor na Plaza de Toros de Xixón. L’irlandés vien a presentar el so nuevu discu “Magic Time”, un trabayu nel que vuelve beber de les fontes tradicionales de la música celta ensin perder les sos esencies de cantante de rithm’n’blues. El conciertu ye parte d la xira europea del músicu de Belfast y vien a entamase nel contestu de les actividaes paraleles a los Xuegos Náuticos Intercélticos que se celebren estos díes na villa playa. La presencia nel escenariu, precediento a Morrison, de los avilesinos Tejedor, va añadir un atractivu especial a esta ocasión pa ver nuna mesma nueche a dos propuestes tan estremaes de música con raigañu tradicional y al empar xunìes polos filos comunes de los sones celtes. Una banda de seis músicos van acompañar al Lleón de Belfast nesti conciertu onde la contención y la elegancia de la puesta n’escena de Morrison nun van dexar de llau la parte más espansiva de los sos temes nuevos y vieyos. El cantante irlandés preséntase en Xixón col so últimu trabayu discográficu “Magic Time” y una banda compuesta por Matthew Holland, a la trompeta; Martin Winning: saxo y flauta; David Hayes al baxu; Robert Ruggiero, a les percusiones; John Edwards, a la guitarra; y Mark Jordan, a los teclaos; amás del saxo, la guitarra y l’armónica cola que Van Morrison va interpretar les canciones del so nuevu discu y a repasar los temes clásicos del so repertoriu. La disposición del aforu na Plaza de Toros, con una parte de sielles n’arena (a 45 euros) y otra nes grades (30 euros), barrunta un conciertu tranquilu nel que se va amosar el Morrison más íntimu y cercanu. Una ocasión única pa contemplar en vivo a esa llienda viva de la música contemporánea, xunta la que nun han sonar estraños los ritmos tradicionales de los teloneros Tejedor, a los que xune al irlandés unos filos comunes al través de los máxicos pasadizos de la música celta. 23 de xunetu, 2005 0 FacebookTwitterPinterestEmail
Escéniques El maestru Cellero va dar un taller d’iniciación al monologuismu cómicu asturianu by asturnet 21 de xunetu, 2005 Candás va acoyer la última selmana d’agostu el II Taller d’Iniciación al Monologuismu Cómicu Asturianu, un cursu impartíu pol humorista y actor Carlos Alba “Cellero”. Los oxetivos del taller son la formación de futuros ínterpretes de monólogos y la preparación pa l’adaptación escénica de la tradición humorística oral. La metodoloxía del cursu ye fundamentalmente práctica y preténdese que los futuros monologuistes deprendan a cuntar hestories dende’l primer día de clase. Cellero ye un de los cómicos asturianos más célebres nel xeneru del monólogu tradicional y tien incorporao a la puesta n’escena propia de los cuntadores d’hestories humorístiques del país les técniques interpretatives del teatru universal. Llicenciáu en Ciencies de la Información pola Universidá Complutense de Madrid, actor y cuentacuentos, Carlos Alba, xunta otros cómicos actuales remaneció’l xéneru del monologuismu asturianu llevándolu a nuevos públicos, especialmente a la xente mozo. Como monologuista tien tres espectáculos individuales: “Por falar vencí la güestia”, basáu en cantares y versos de finales del XIX y principios del XX; “Del chigre”, monólogos propios sobre asuntos d’anguañu, dende’l galipote del Prestige a les carreres de Fernando Alonso; y “Cellero, el monologuista”, una amestanza de testos d’autores como Delestal, García Oliveros o Rubén Sánchez Vicente. El taller d’iniciación al monólogu que va impartir Carlos Alba “Cellero” tien un programa nel que s’escomienza analizando los testos de los monólogos y desaminando’l material narrativu col que construi un cómicu les sos hestories. La espresión corporal, la modulación ya impostación de la voz a la manera tradicional o la improvisación son otres de les materies que se van desenvolver nel taller. L’atención a grabaciones de monologuistes tradicionales y la recoyida de materiales de la tradición oral, formen parte tamién del conteníu del cursu. El númberu d’alumnos pal que ta pensáu esti taller d’iniciación al monologuismu cómicu asturianu ye d’ente 10 y 15, y la formación va tar dividida nun total de cinco clases, en total 15 hores lectives. Unos díes enantes del empiezu del cursu, el profesor va repartir ente los sos alumnos una serie de testos pa que los vayan preparando enantes d’entamar y tamién va trabayase sobre les hestories qu’ellos recueyan nel so entornu. El cursu va impartise ente los díes 22 y 26 d’agostu, entrambos incluíos, n’horariu de 18.00 a 21.00 hores y el preciu de la matrícula ye de 24 euros, qu’amás del cursu inclúi dos entraes pa espectáculos del Salón de Teatru Costumista. El teléfonu de contactu pa inscribise o solicitar más información ye’l del Teatru Prendes de Candás:: 985 871 021. Cellero el monologuista 21 de xunetu, 2005 0 FacebookTwitterPinterestEmail
Escéniques Nun Tris presenta n’Avilés el so espectáculu de cai Gorseed basáu nun ritual célticu by asturnet 13 de xunetu, 2005 La Plaza l’Ayuntamientu d’Avilés ye l’escenariu escoyíu pola compañía Nun Tris pa presentar el so espectáculu Gorseed, un montaxe especialmente entamáu pa espacios abiertos y nel que se recrea la ceremonia ritual de l’antigua celebración céltica del Lughnassad. La compañía asturiana va llevar esti mesmu espectáculu a Cangas del Narcea el prósimu 19 de xunetu y al festival intercélticu de Sendim en Portugal el 6 d’agostu. Gorseed ye una palabra gaélica que significa “conceyu”, “asamblea”. Alude a les ceremonies rituales que celebraben los druides célticos y nes que s’esconxuraben los espíritus de les fuerces de la naturaleza metanes un atopada colectiva de dances y fogueres. Nun Tris emplea nel so montaxe diversos elementos como la pirotecnia, los malabares y la danza, tentando recrear un de los rituales de más significáu dientro les celebraciones de los antigüos celtes. La cita ye a les 20.00 hores na Plaza l’Ayuntamientu avilesín. Les prósimes ocasiones de ver esti espectáculu, talo se recordaba: el 19 xunetu en Cangas, el 29 en Villaviciosa y el 8 d’agostu na ciudá portuguesa de Sendim. 13 de xunetu, 2005 0 FacebookTwitterPinterestEmail
Escéniques La compañía Teatro del Norte cumple’l so venti aniversariu representando Ifigenia by asturnet 30 de xunu, 2005 La compañía Teatro del Norte cumple venti años d’esistencia y quier celebralo con una función nel escenariu onde fexo la so primer representación en 1985, el salón d’actos de la Casa Cultura de La Pola Siero. Ende, el grupu que dirixe Etelvino Vázquez, va entamar el preestrenu del so últimu espectáculu: “La sombra de Ifigenia”. La cita p’asistir a la función del nuevu montaxe de Teatro del Norte ye a les 20.00. Con esta obra inaugúrase la Selmana de Teatru de La Pola Siero, qu’a lo llargo de los prósimos díes ufierta la posibilidá de ver espectáculos de diverses compañíes asturianes y del restu l’estáu. 30 de xunu, 2005 0 FacebookTwitterPinterestEmail
Escéniques Nun Tris pon a don Quixote a falar n’asturianu nel cuartu centenariu de Cervantes by asturnet 12 d'abril, 2005 La compañía asturiana Nun Tris quier contribuir al cuartu centenariu de Miguel de Cervantes con un montaxe que fai falar al Quixote en llingua asturiana. La obra del escritor Pedro Lanza ta pensada pa un públicu infantil inda ta abierta a toa clase d’espectadores y presenta la estampa más divertida del triste fidalgu manchegu coles sos más célebres aventures. La estrena ye’l prósimu 22 na Sala Alarcos de la Biblioteca’l Fontán d’Uviéu. L’inxeniosu fidalgu don Quixote de la Mancha va falar n’asturianu nel añu que se celebra’l cuartu centenariu del so autor Miguel de Cervantes. La compañía asturiana Nun Tris ye la responsable d’esti montaxe que parte d’una adaptación a la nuestra llingua d’un testu orixinal del dramaturgu xixonés Pedro Lanza. En declaraciones a Asturnews, l’actor Toño Camaaño amosóse enfotáu en qu’esti montaxe tenga una bona acoyida y pueda sumase a les numberoses iniciatives que recuerden la figura de Cervantes y la so obra más inmortal. El repartu de “El caballeru de la Murnia Figura”,ta integráu poles actrices Carmen Gloria García Suárez ya Inma Rodríguez, y polos actores Avelino Arias Requexu, Luis Fdo. Alvarez Marrot “Win” y Toño Caamaño. Empobinen la puesta n’escena Inma Rodriguez y Toño Caamaño. L’homenaxe al Quixote ye’l más reciente trabayu de Nun Tris, una compañía qu’acaba poner n’escena la so adaptación de “José ” d’Armando Palacio Valdés en Bruseles pa la comunidá asturiana emigrada na capital belga y en colaboración col grupu de baile del Centru Asturianu. Mientres esperen la estrena’l prósimu día 22 a les 19,30 na Biblioteca del Fontán, Nun Tris trabaya en nuevos proyectos, ente ellos un espectáculu de cai basáu nos mitos celtes que podía estrenase esti veranu. 12 d'abril, 2005 0 FacebookTwitterPinterestEmail
Escéniques Les actuaciones del I Certame de Monólogu Modernu emítense esta nueche en TLG by asturnet 25 de marzu, 2005 El festival d’humoristes n’asturianu qu’entamó el colectivu Xareos el pasáu tres de marzu nuna sala d’espectáculos de Xixón va poder vese esta nueche emitíu na so integridá por Televisión Local Gijón(TLG). Esti I Certame de Monólogu Modernu inclúi les actuaciones de los cómicos Toño Caamaño, Lluis Antón González, Benxa Pérez y Carlos Alba “Cellero”, que representen monólogos propios y otros escritos por Chechu García y Isaac de L’Arada. Mentantu los organizadores del eventu quieren dar continuidá a estes actuaciones coles que se tenta remanecer la tradición cómic del monólogu asturianu amestada a nueves formes d’humorismu con gran ésitu gracies a la so difusión televisiva. La iniciativa d’entamar el I Certame de Monólogu Modernu surdió del colectivu H.A Xareos, formáu por Benxa Pérez y Inaciu Galán, una asociación dedicada la organización d’actividaes culturales dende la perspectiva de la normalización de la llingua asturiana. Col festival y la so continuidá en futuros eventos quier contribuyise a modernizar el monólogu asturianu de raigañu tradicional p’adecualu a formes d’espresión escénica asemeyaes a les que popularizaron abenayá en tol estáu canales privaos de televisión con programes como “La Paramount” o “El Club de la Comedia”. La primer actuación en directu d’estos nuevos monologuistes llevóse a fechu’l pasáu 3 de marzu na sala xixonesa Albéniz y tuvo un gran ésitu de públicu. Esta nueche va poder contemplase’l festival en tola so integridá na Televisión Local Gijón (TLG) que desenvolvió pa la ocasión un gran despliegue de medios técnicos, col usu de múltiples cámares y ángulos de visión. L’espectáculu ta presentáu por Inaciu Galán y cuenta cola actuación final del grupu folk Tarañu. Más información 25 de marzu, 2005 0 FacebookTwitterPinterestEmail
Escéniques La Celestina de Nuria Espert, Madredeus, Serrat y Luz Casal pasarán pol Teatru Xovellanos nos prósimos meses by asturnet 1 de marzu, 2005 Nuria Espert col so montaxe de La Celestina, los portugueses Madredeus, el cantautor Joan Manuel Serrat, Luz Casal y María Dolores Pradera son delles de les propuestes qu’ufierta la programación del Teatru Xovellanos de Xixón pal prósimu trimestre. El coliséu xixonés calienta motores pal veranu con una tabla d’espectáculos na que tamién resalten l’actuación de la música canadiense Lhasa, Ismael Serrano y La Ratonera d’A.Christie, dirixida por Ramón Barea. La programación, pendiente de recibir el vistu bonu del conseyu d’administración del Xovellanos nel so conceyu del xueves 3 de marzu, quier celebrar el décimu aniversariu del teatru municipal cola presencia en Xixón d’artistes destacaos del panorama estatal y internacional. La primer cita del nuevu trimestre ye La Celestina de Robert Lepage interpretada nel papel principal por Nuria Espert nun montaxe dirixíu pol propiu dramaturgu francés. Otra cita importante coles artes escéniques va sere el festival de teatru grecolatín que va celebrase los díes 12 y 13 de mayu y nel que van poder vese representaes Edipo Rey y Antígona de Sófocles, xunta les comedies de Plauto: Miles Gloriosus y el Sorteo de Cásina. Nel ámbitu de la música internacional, amás del conciertu de los británicos R.E.M en Les Mestes, el 29 de mayu, resalta la presencia de la cantante canadiense Lhasa el día 30 d’abril, que va presentar en Xixón el so últimu trabayu musical tituláu “The living road”. El grupu Madredeus, cola cantante Teresa Salgueiro al frente, va actuar nel Xovellanos el día 5 de mayu, ufiertando temes del so últimu discu “Un amor infinito”. Del panorama musical español destaquen les actuaciones d’Ismael Serrano el día 11 de mayu,Miguel Ríos el 20, Joan Manuel Serrat el 24 y María Dolores Pradera el 1 de xunu. 1 de marzu, 2005 0 FacebookTwitterPinterestEmail
Escéniques Trece compañíes de teatru infantil garren el relevu de Feten nun nuevu ciclu entamáu por Caxastur by asturnet 25 de febreru, 2005 Sigue l’espectáculu pa los más neños. Caxastur garra’l relevu de la Feria Europea de Teatru pa Neños (Feten), que güei se pieslla en Xixón, y abre un ciclu de 52 actuaciones pal públicu infantil cola participación de doce compañíes españoles y una arxentina. Les funciones representaránse hasta últimos d’abril nes cuatro sales culturales que la entidá financiera rexenta n’Uviéu, Xixón, Mieres y Llangréu. Música, danza, teatru d’actores y títeres entemécense nel programa, que se pon en marcha güei mesmo cola incorporación, ente otros montaxes, del espectáculu ganador na pasada edición de la feria xixonesa Feten na categoría de pequeñu formatu. La representación de grupos asturianos nel certame tará integrada poles compañíes ‘La Orquesta de Cámara’, ‘La Sonrisa del Lagarto’ y ‘Tragaluz’, amás de la compañía de danza d’Estrella García. Pol so llau, ‘Teatre Un’ y ‘Per Poc’ sedrán l’apuesta catalana,; mientres que Castiella y Llión tará representada poles compañíes ‘Telonicillo’ y ‘Títeres de María Parrato’. Según los datos asoleyaos na presentación del nuevu ciclu que güei echa a andar, Caxastur movilizó a lo llargo de 2004 a alredor de 28.000 espectadores nos dos certámenes de teatru infantil programaos l’añu pasáu, con un total de 140 funciones. 25 de febreru, 2005 0 FacebookTwitterPinterestEmail
Escéniques Boni Ortiz: “Falta una política integral pal teatru, funciona too a base d’ocurrencies” by asturnet 22 de febreru, 2005 Falta una política integral pa da-y impulsu al teatru fechu n’Asturies, básicamente porque “too funciona a base d’ocurrencies”. L’autor y críticu Boni Ortiz, que mañana presenta l’Anuariu del Teatru Asturianu correspondiente a 2004, defende esa afirmación y acusa a les instituciones a da-yos cada vez más la espalda a les artes dramátiques y suxier, ente otres midíes, l’acercamientu del teatru a les escueles y la so promoción fuera’l Principáu. El primer y “gran” responsable, asegura Ortiz, ye’l Gobiernu autonómicu, por nun poner enriba la mesa un plan xeneral específicu pal teatru nin evitar que la promoción teatral acaben asumiéndola “reinos de taifas”, n’alusión a l’ausencia d’una acción centralizada dende’l propiu Principáu. Pesie a too, esa falta de sofitu institucional que recrimina l’autor del Anuariu’l Teatru nun estranguló la vitalidá de les compañíes, qu’en 2004 llevaron a escena “meyores montaxes”. Nel testu que Boni Ortiz presentará mañana al públicu en Xixón, nel marcu de la Feria Europea de Teatru pa Neños, cífrense en 1.100 el total de les funciones teatrales que les sales y teatros asturianos acoyeron a lo llargo del añu pasáu, tanto de compañíes del Principáu como foriates, y menciónense los esfuercios “cotidianos” de dellos grupos por da-y puxu a les representaciones en llingua asturiana. Nesti capítulu, Ortiz llama a que’l teatru n’asturianu complete’l “camín de dignificación” que yá recorrió’l teatru en llingua castellana, de mou que “nun sonen a chino autores clásicos tornaos al asturianu” y se sigan los pasos yá entamaos, ente otres entidaes dramátiques, poles compañíes Margen, Telón de Fondo, Nun Tris y otros grupos especializaos nel públicu infantil. 22 de febreru, 2005 0 FacebookTwitterPinterestEmail
Escéniques La Feria de Teatru pa Neños echa a andar con once funciones nun día y preocupación pol mal tiempu by asturnet 21 de febreru, 2005 Once representaciones pa dir abriendo boca. La Feria Europea de Teatru pa Neños (Feten 2005) arranca güei na práctica con más d’una decena d’espectáculos en seis escenarios y un güeyu puestu nel mal tiempu qu’afecta a Asturies. Los organizadores del certame enfótense en mantener les actuaciones previstes n’allugamientos esteriores pesie a les males previsiones meteorolóxiques. Hasta’l prósimu vienres, día en que la feria echará’l telón, el certame tien nel so calendariu una docena d’espectáculos fuera de sales y teatros, principalmente nel paséu de Begoña y nes places d’Europa, el Marqués y l’Institutu, si bien nesti últimu casu cuéntase cola cercanía’l Centru de Cultura Antiguu Institutu p’acoyer dalgún de los montaxes en casu de mal tiempu. En total, En total, mediu millar de programadores, autores, críticos y actores especializaos siguirán les evoluciones de les 43 compañíes presentes na feria xixonesa, con una presencia de públicu albidrada en 18.000 espectadores y un bayurosu programa que va del estrictu teatru d’actor a les marionetes, la dancia y los pasucáis, nun apueste global pol teatru ‘de familia’. Ocho compañíes escéniques asturianes lleven a escena los sos espectáculos más recientes na Feria Europea de Teatru pa Neños: Nun tris, Higiénico Papel, El Negrito, Fernando Hurtado, Plus, Los Piromantes, Factoría Norte y Kumen. Archivu. Ocho compañíes asturianes estrenarán espectáculos na Feria Europea de Teatru pa Neños 21 de febreru, 2005 0 FacebookTwitterPinterestEmail