Escéniques El Vital Aza convoca certame y presenta dos obres pola Selmana de les Lletres by asturnet 28 d'abril, 2006 El teatru Vital Aza de La Pola L.lena va sumase a los actos de cellebración de la Selmana de les Lletres Asturianes con una programación específica cola que, al travies del área de Cultura del so Ayuntamientu, quier promocionar el teatru n’asturianu, faciendolu llegar a públicos de diferentes edaes. ‘Interditu o Pleitín d’Aldea’ de la Compañía Asturiana de Comedies y ‘Mitología Asturiana’ de Mari Luz Pontón van ser les dos pieces a representar a lo llargo de la selmana qu’entra, na que l’Ayuntamientu de L.lena tamien presenta’l so Certame de Teatru Popular Asturianu ‘Vital Aza’. El miercoles 3 de mayu a les ocho la tarde la Compañía Asturiana de Comedies presenta la pieza costumbrista ‘Interditu o Pleitín d’Aldea’, mentes que los neños van tener el sábadu día 6 a les siete la tarde una actuación espresamente pensada pa ellos que va tener como protagonistes a los personaxes mitolóxicos de Mari Luz Pontón, cola obra ‘Mitología Asturiana’. Pero otra parte, dientro del marcu de los actos de cellebración de la Selmana de les Lletres Asturianes, la estaya de Cultura del Ayuntamientu de L.lena aprova pa dar anuncia a la convocatoria del IV Certame de Teatru Popular Asturianu ‘Vital Aza’. Nesti certame únicu n’Asturies van poder participar toles persones interesaes con obres inedites de temática llibre siempre y cuando s’adapten a les característiques del teatru popular y tean escrites n’asturianu. El plazu de presentación d’exemplares termina’l 15 d’ochobre. 28 d'abril, 2006 0 FacebookTwitterPinterestEmail
Escéniques La revista La Ratonera dedica’l so últimu númberu a Fernando Arrabal by asturnet 17 de marzu, 2006 La revista asturiana La Ratonera , que dirixe Roberto Corte, dedica’l so númberu 16 a la figura y la obra del dramaturgu Fernando Arrabal, una de les más controvertíes personalidaes del teatru escritu español contemporáneu. L’escritor melillés va asistir a la presentación de la revista en Xixón esti martes 21 nun actu onde va caltener un alcuentru abiertu col públicu asistente. La última entrega de La Ratonera inclúi dos testos d’Arrabal y diversos artículos sobre la so obra de Boni Ortiz, Roberto Corte, Joaquín Fuertes, José Luis Campal, Peter Podol, Viveca Tallgren y Marie L. Gazarian-Gautier, ente otros. Fernando Arrabal ye una de les voces más tresgresores y controvertíes del teatru español de la mitá del sieglu XX. Esiliáu en Francia por mor de la so oposición al réxime franquista y enxamás vueltu al so país d’orixen, protagonizó nos últimos años sonaos espolines públicos (dalgunos en programes de televisión) onde nun faltaron diatribes histrióniques contra la Cuba de Fidel Castro o apoloxíes de les apariciones marianes. Na república francesa ta consideráu un xeniu de la lliteratura escénica y tien nel so haber dellos de los más prestixosos premios nacionales del estáu galu. 17 de marzu, 2006 0 FacebookTwitterPinterestEmail
Escéniques Nel Amaro y Rosana Popelka nel II Alcuentru Internacional de Perfomances de Madrid by asturnet 13 de marzu, 2006 El turonés Nel Amaro y la xixonesa Rosana Popelka van participar nel II Alcuentru Internacional de Perfomances de Madrid, entamáu pol Centro de Arte Moderno de la capital del estáu. Los artistes asturianos van escenificar dellos de los sos trabayos metanes esta atopada d’arte en directu que xunta alrodiu d’una trentena de perfomanceros de diversos países d’Europa y América. La primera n’intervenir va ser Rosana Popelka el prósimu viernes 17 cola so propuesta “Así fue como sucedieron las cosas”. Al día siguiente, el sábadu 18, Nel Amaro va poner n’escena les sos perfomances: “A veces dan unas ganas locas de hacerlo”, “Acción real” y “Dicen que la patria es: chill out (o por qué no soy un patriota asturiano)”. 13 de marzu, 2006 0 FacebookTwitterPinterestEmail
Escéniques La compañía Higiénico Papel recibe’l Premiu Xovellanos pol so Ricardo III by asturnet 7 de marzu, 2006 La compañía Higiénico Papel cola so versión de Ricardo III de William Shakespeare ye la ganadora del primer Premiu Xovellanos de Producción Escénica convocáu pol teatru municipal de Xixón. El galardón ye una iniciativa del coliséu playu pa favorecer el llabor de les compañíes de la ciudá na producción de los sos espectáculos escénicos. Higiénico Papel va recibir una ayuda cuantificada en 18.000 euros pa facer el montaxe y la producción de Ricardo III, una obra que va estrenase nel propiu Teatru Xovellanos. El xuráu escoyó el proyectu de l’adaptación de Shakespeare ente diversos otros montaxes presentaos al concursu. Per otru llau el departamentu de Festeyos del Teatru Xovellanos acaba de convocar les sos ayudes y subvenciones pa entidaes organizadores de fiestes, asina como’l plazu de presentación pa grupos y artistes enfotaos en participar nos programes Arte na Cai y Música na Cai. Les bases d’estes convocatories pueden consultase na web www.teatrojovellanos.com y el plazu de pieslle termina el prósimu 31 de marzu. 7 de marzu, 2006 0 FacebookTwitterPinterestEmail
Escéniques Anabel Santiago, Joaquín Sabina y El Brujo na programación trimestral del Teatru Xovellanos by asturnet 3 de marzu, 2006 El cantante Joaquín Sabina vuelve al Teatru Xovellanos de Xixón después del so “gatillazu” y va facelo escomenzando na ciudá playa la so nueva xira el prósimu 6 de mayu. A lo llargo de los prósimos meses xunto a Sabina van desfilar pel escenariu del coliséu xixonés Anabel Santiago col so tributu a la cantadora Diamantina Rodríguez, el xueves 20 d’abril y el grupu de folk Lliberdón al llau de la orquesta tradicional gallega SonDeSeu el viernes 19 de xunu. Nel terrén teatral la programación del Xovellanos pal prósimu trimestre inclúi l’espectáculu “El Túnel” d’Ernesto Sábato, con Héctor Alterio el día 1 d’abril; “La cabra y Miss Yoes”, con Karra Elejalde; ” Los Misterios de El Quijote” de Rafael Älvarez ‘El Brujo’; y “Visitando al Sr.Green” cola dirección de Juan Echanove, ente otres producciones. Un ciclu dedicáu al cineasta suecu Ingmar Bergman en colaboración col Festival Internacional de Cine de Xixón y diversos conciertos pa remembrar l’Añu Mozart componen el cartelu más destacáu de la programación de primavera nel Teatru Xovellanos. 3 de marzu, 2006 0 FacebookTwitterPinterestEmail
Escéniques Axioma Teatro pon n’escena ‘El compromiso’ de Carlos Góngora by asturnet 3 de marzu, 2006 La compañía andaluza Axioma Teatro pon n’escena esti viernes 3 y el sábadu 4 nel Teatru Xovellanos de Xixón la obra “El compromiso” de Carlos Góngora, un espectáculu de títeres pa adultos sobre les relaciones cotidianes nos años solombriegos de la postguerra franquista. El Atenéu Obreru organiza la estrena d’esta obra dientro los actos de conmemoranza del so ciento venticinco aniversariu. “El compromiso” recibió en 2005 el Premiu Max de les Artes Escéniques al espectáculu revelación del añu pasáu. Nella, la compañía Axioma presenta un montaxe de gran formatu, con varios espacios escénicos que se tresformen, onde se va narrando una historia que recuerda los tiempos de la posguerra, contada en primer persona por una pareya que vive una emocionante historia de amor. La voz n’off de l’actriz María Galiana sirve de filu conductor a esta hestoria cuntada al través de títeres de diverses midíes y tamaños. 3 de marzu, 2006 0 FacebookTwitterPinterestEmail
Escéniques La compañía vasca Gorakada Premiu FETÉN 2006 pol so espectáculu Robin Hood by asturnet 18 de febreru, 2006 La compañía Gorakada pol so montaxe ‘Robin Hood’ye la ganadora na categoría de meyor espectáculu teatral de FETEN 2006, a xuiciu del xuráu calificador que concedió esti viernes 17 les sos distinciones a les meyores compañíes partipantes na feria de teatru infantil. La compañía vasca tamién llevó’l premiu al meyor guion por ‘Robin Hood’, obra del dramaturgu Jokin Oregui. El premiu a la meyor música fue pa Joaquín López Chas por ‘Alonso Quijano el Bueno’ de la compañía DATE danza, que tamién algamó’l galardón a la meyor escenografía y a la meyor dirección. Los premios a la meyor interpretación masculina y femenina fueron respectivamente pa Héctor Presa y Lali Lastra pol so papel en ‘Pido Gancho. Carlitos y Violeta’, de la Cía. Encantada. El premiu al meyor espectáculu de títeres fue pa la Cía La Canica por ‘El Elefantito’ y el premiu al meyor espectáculu pa neños y neños de 0 a 4 años fue compartíu por ‘Pupila de Agua’ de la Cía La Casa Incierta y por ‘En el jardín’ de Teatro Paraíso. El xuráu decidió conceder tamién una mención especial a la compañía vasca Panta Rei pola so trayectoria nel teatru pa neños y neñes. 18 de febreru, 2006 0 FacebookTwitterPinterestEmail
Escéniques La Selmana de les Lletres dedícase esti añu al teatru asturianu by asturnet 6 de febreru, 2006 El teatru va ser el protagonista de la prósima Selmana de les Lletres Asturianes y el dramaturgu Darío Fo podía participar nos actos organizaos pola Conseyería de Cultura si prosperen les conversaciones que se tán calteniendo pa pa cuntar col premiu Noble italianu. Nel cursu de la Selmana compañíes escéniques van percorrer el nuestru país con diversos montaxes en llingua asturiana. Les Lletres d’esti añu van cuntar tamién na so ventisiete edición con una colaboración ente la Oficina de Política Llingüística y la Institució dels Lletres Catalanes na que’l director teatral Albert Mestres entama un espectáculu sobre testos de poetes catalanes y asturianos. La Conseyería de Cultura quier repetir l’ésitu de la pasada edición de les Lletres na que’l protagonismu de la poesía contemporánea y la presencia del poeta irlandés Seamus Heaney llevaron esta celebración a un nivel de repercusión mediática y de públicu hasta entós non conocíu. Entós los poetes asturianos ufiertaron dellos recitales en diversos puntos d’Asturies; agora van ser les compañíes teatrales les que lleven la palabra y la escena na nuestra llingua per tol país. El comisariáu de la XXVII Selmana de les Lletres ta formáu por Ramón d’Andrés y Xuan Santori, per parte de la Conseyería y polos escritores Adolfo Camilo Díaz, Xuan Bello y Ramón Lluis Bande. 6 de febreru, 2006 0 FacebookTwitterPinterestEmail
Escéniques FETEN 2006 programa espectáculos pensaos pa rapacinos de 0 a 4 años by asturnet 24 de xineru, 2006 La conceyala de Cultura del Ayuntamientu de Xixón Mercerdes Álvarez presentó esti llunes la Feria Europea de Teatru pa Nenos (FETEN) 2006 que va celebrase ente los díes 12 al 17 de febreru. La programación de montaxes escénicos destinaos a un públicu de 0 a 4 años ye una de les principales novedaes que presenta la feria d’esti añu. Un total de cuarenta y tres compañíes, cinco d’elles asturianes, van participar a lo llargo de los seis díes de programación teatral empobinada a los más mozos. El Teatru Xovellanos y l’Antigu Institutu van ser los principales escenarios de los espectáculos programaos nesta decimoquinta edición de FETEN. El númberu de representaciones que van facese a lo llargo de los seis díes de duración de la Feria ye de sesenta ya incluin teatru con actores, danza, títeres, circu y diferentes propuestes espresives, toes elles pensaes pa la so amuesa énte un públicu que na edición d’esti añu ye más ampliu al incluir espectáculos concebíos pa rapacinos de 0 a 4 años. Na presentación de FETEN 2006 la conceyal de Cultura de Xixón congratulóse del altu nivel de participación de les compañíes. Alrodiu de trescientes de les más diverses procedencies presentaron proyectos pa ser incluíes na Feria xixonesa. 24 de xineru, 2006 0 FacebookTwitterPinterestEmail
Escéniques Xente del mundu del teatru defende l’actuación d’Eladio de Pablo nel Xovellanos by asturnet 21 d'avientu, 2005 Xente del mundu del teatru va entamar una campaña en defensa del dramaturgu y director escénicu Eladio de Pablo énte los ataques dirixíos contra él pol Partido Popular (PP) que pidió’l so cese como miembru del Conseyu d’Administración del Teatru Xovellanos por mor del inxerimientu d’una obra suya dientro la programación del coliséu xixonés. Los entamadores de la campaña en defensa d’Eladio de Pablo, encabezaos pol críticu teatral Boni Ortiz, piden nun escritu empobináu a l’alcaldesa de Xixón, Paz Fernández Felguerosa, que caltenga nel so sitiu al dramaturgu como conseyeru del Xovellanos y desatienda la pitición del PP por “absurda y sinsentíu”. Nel escritu afírmase qu’énte les acusaciones del PP de qu’Eladio de Pablo nun puede ser miembru del Conseyu d’Administración del Teatru Xovellanos por incluir esta empresa un montaxe suyu na programación los firmantes afirmen que “cualquier Conseyeru que provenga del mundu teatral asturianu, lóxicamente ha formar parte d’una compañía, a la que según parez tendía que prohibíse-y actuar, non namás nel Xovellanos, tamién en CMI Xixón Sur, Arte na Cai, Danza Xixón, Festival de Títeres, FETEN, asina como otros eventos escénicos o festivos nos que tuviese implicáu el Teatru Xovellanos”, lo que diba equivalir, diz l’escritu a que “la compañía de la que formase parte esi conseyeru o conseyera, nun diba poder actuar en Xixón, ciudá na que se programen la mitá de les funciones que se dan al año en tola nuestra Comunidá Autónoma”. Eladio de Pablo ta nel Conseyu d’Aministración del Teatru Xovellanos dende 1995 y los firmantes del escritu nel so apoyu remembren nél que “ye l’únicu miembru d’ esi Conseyu relacionáu col mundu del Teatru, representando en bona midida, a les compañíes y grupos escénicos asturianos” y que “nun se trata de nengùn recién llegáu al mundu de la escena asturiana, de la que forma parte dende va más de cuarenta años”. 21 d'avientu, 2005 0 FacebookTwitterPinterestEmail