Educación SUATEA califica de “mocada” l’aprebación del Proyectu de Llei d’Educación by asturnet 25 de xunetu, 2005 El sindicatu asturianu SUATEA y la confederación estatal na que s’inxerta STES-Intersindical califiquen nun comunicáu l’aprebación en Conseyu de Ministros del Proyectu de Llei Orgánica d’Educación de “mocada” y de “despreciu” a les propuestes feches al nuevu testu. Pal sindicatu autónomu considera que’l Proyectu “decepciona y frustra les espectatives de les persones y organizaciones que, como la Confederación de STES-intersindical, planteamos que la nueva llei d’educación reflexe un claru compromisu pola escuela pública”. SUATEA-STSE refuga’l nuevu proyectu al nun tener en cuenta les sos propuestes nin satisfaer les sos espectatives y afirma que va cuntar cola so oposición. Amás d’estes crítiques la confederación intersindical considera que’l testu aprobáu pol Gobiernu central nun solventa asuntos como la potenciación de la escuela pública, la disminución de les ratios pa meyorar la calidá, la elección democrática de los cargos directivos, el fin de les discriminaciones salariales al profesoráu, nin caltién midíes concretes pa prevenir el fracasu escolar n’Educación Primaria. Otres carencies señalaes por SUATEA-STES son el mantenimientu de la carga horaria de determinaes asignatures en Secundaria, l’accesu diferenciáu pal profesoráu interín, el reconocimientu de les enfermedaes profesionales o la reducción del horariu lectivu a les personas mayores de 55 años. 25 de xunetu, 2005 0 FacebookTwitterPinterestEmail
Educación El 12 por cientu de los universitarios asturianos acaba la carrera nel tiempu marcáu pol so plan d’estudios by asturnet 11 de xunetu, 2005 El rector Juan Vázquez llevó al últimu Conseyu de Gobiernu de la Universidá d’Uviéu un informe elaboráu pol Vicerrectoráu de Calidá, Planificación ya Innovación sobre rendimientu académicu nel que la media d’ésti asítiase penriba’l 55 por cientu, una media superior a la d’otres universidaes del estáu. L’informe señala tamién qu’ún de cada ocho universitarios, el 12 por cientu, llogra acabar la so carrera dientro’l tiempu marcáu pol so plan d’estudios. En cuantes al desgrose de los datos por carreres, les técniques tán a la cola en rendimientos académicos, estableciendo que’l nueve por cientu de los alumnos qu’entren nuna escuela o facultá nun lleguen a acabar.El dossier revela que l’universitariu asturiano tarda como media 2,2 años más de los establecíos pa rematar la carrera. El datu más relevante ye’l que se refier a la tasa de rendimientu, un conceptu que determina la relación ente’l númberu d’estudiantes aprobaos nuna asignatura y el total de matriculaos. L’estudiu señala que el nivel más altu de rendimientu ta en Ciencies de la Salú, con un 81,3 por cientu. Los otros campos docentes queden asina: 57,5 por cientu en Humanidades; 55,5 por cientu en Ciencies Xurídico-Sociales; 51,9 por cientu n’esperimentales y 51,8 en titulaciones técniques. La media de rendimientu globlal na Universidá d’Uviéu asítiase nel 55,9 por cientu. 11 de xunetu, 2005 0 FacebookTwitterPinterestEmail
Educación Los profesores de Filoloxía Románica de la Universidá d’Uviéu piden la so continuidá by asturnet 10 de xunetu, 2005 Un grupu de profesores del departamentu de Filoloxía Románica de la Universidá d’Uviéu, encabezos pola decana y presidenta de l’Academia de la Llingua Ana Cano, denuncien nun escritu fechu públicu la desaparición de la so especialidá como titulación de Grau Independiente nel catálogu de nueves especialidaes universitaries. Los profesores consideren que si la reforma sal alantre va desapaecer la especialidá que cuenta con más tradición na Universidá asturiana y cuiden que la Románica ye tresmisora de la cultura europea y occidental. Nel escritu, que firmen amás d’Ana Cano, Rosa M Medina Granda, José R. Fernández González, A.Vespertino Rodríguez Rodríguez, Mercedes Sánchez Alvarez, Toribio Fuente Cornejo y Juan C. Busto Cortina, afírmase que la desaparición de Filoloxía Románica nun s’entiende cuando lo que pretende’l nuevu catálogu ye la Converxencia nun espaciu común européu “al través de bloques compactos y coherentes académicamente”. Los profesores de la facultá de Filoloxía invoquen la latinidá como “fechu llingüísticu, una vivencia y una función simbólica, na midida, nesti últimu aspectu, en que ye portadora de cultura cristiano-greco-latina y despierta asina la conciencia cultural europea, como ya señaló H. Lausberg, eantes de que la idea de la Unión Europea fuere acolumbrada”. Tamién se señala la “proyección americanista” d’esta especialidá, una ciencia que “pon de manifiestu asinamesmo que la identidá romance non namás la constitúi el gran “vínculu latín” ya referíu, sinón tamién la interacción con otres cultures (mundu árabe -del que es amuesa la vertiente árabo-románica de esta filoloxía especialmente en nuestra universidá- y anglo-saxón”. Los profesores del Área piden al Ministeriu que “devuelvan a la Universidá española el mesmu respetu col que la trata el EEES ya Investigación. Confiamos en que s’enmiende el dañu irreparable que orixinaría la desaparición de los nuestros estudios” y demanden la creación d’un títulu de Grau de Filoloxía Románica: “la Universidad -afirmen- ta pa culturizar a la sociedá, tien, pos, una finalidá cultural amás d’otra profesional”. La Filoloxía Románica, recuerden los profesores asturianos nel so escritu, goza d’un gran prestixu nes universidaes d’Europa y América, y dicen nun entender la so despaición de los estudios universitarios españoles. 10 de xunetu, 2005 0 FacebookTwitterPinterestEmail
Educación Tolos centros públicos van tar obligaos a tener llingua asturiana el prósimu cursu by asturnet 5 de xunetu, 2005 Les circulares d’entamu del cursu acabante publicar pola Conseyería d’Educación del Principáu establecen la obligación de tolos centros públicos, tanto de Primaria como aquellos onde s’imparte Enseñanza Secundaria Obligatoria (ESO) y Bachilleratu, d’ufiertar l’asignatura de llingua asturiana, d’alcuerdu colo llantao nel artículu 10 de la Llei d’Usu y Promoción del asturianu. La Conseyería pon un mínimu de diez escolinos pa formar grupu en Primaria, inda contempla la posibilidá d’autorizar la enseñanza de l’asignatura a grupos de menos alumnos. El testu de les circulares d’Educación nun dexa duldes: “la ufierta de les enseñances de la llingua asturiana faráse en toos y caún de los niveles que componen la Educación Primaria”, diz la circular referida a Primaria y la tocante a ESO y Bachilleratu afirma: “tolos centros docentes qu’impartan Enseñanza Secundaria Obligatoria y Bachilleratu incluirán na so ufierta de materies optatives ta tolos cursos d’entrambes etapes llingua asturiana y lliteratura, d’alcuerdu colo establecío nel artículu 10 de la Llei 1/1998, de 23 de marzu, pal Usu y Promoción del asturianu”. Ye la primer vez que s’especifica d’una manera clara y remitiéndose a la llexislación esistente sobre la llingua asturiana pa que tolos centros públicos ufierten l’asignatura en tolos niveles de la enseñanza. Respective a estes circulares publicaes pola Conseyería d’Educación la Secretaría de Llingua del sindicatu SUATEA resalta nun breve comunicáu “la obligatoriedá que tienen tolos centros d´ufiertar Llingua Asturiana tanto na Enseñanza Primaria como en Secundaria y Bachilleratu” y invita a “toles persones a que fagan valir los sos derechos y presionen, si asina fuere necesario, nos sos respeutivos centros pa que la ufierta seya efeutiva”. El vaciu y les duldes qu’hasta agora planteaba la situación de l’asignatura de llingua asturiana provocaron diversos conflictos a lo llargo del cursu pasáu y provocaron la primer fuelga d’alumnos por esti motivu, convocada pola Xunta Moza. Un de los casos más sonaos foi el de l’alumna Catuxa Bermeyo, a la qu’Educación ufiertaba como única posibilidá pa recibir asturianu el cambiu de centru, y nel que los sos familiares protagonizaron diversos actos de protesta, incluíu un encierru na Conseyería. Casos como el d’esta escolina podíen evitase si s’aplica al pie de la lletra el testu de les circulares pal iniciu de cursu d’Educación. 5 de xunetu, 2005 0 FacebookTwitterPinterestEmail
Educación Vázquez destitúi a Paz de Andrés por asisitir al homenaxe al ex rector Julio Rodríguez by asturnet 4 de xunetu, 2005 El rector de la Universidá d’Uviéu, Juan Vázquez comunicó-y ayer a la responsable d’Estensión Universitaria, Paz de Andrés, la so intención de sustituíla. Una selmana enantes Vázquez desixéra-y disculpes a la caderalga por asistir al homenaxe que se-y dedicó apocayá al ex rector Julio Rodríguez. Énte la negativa de Paz d’Andrés a pidir disculpes, el rector, decidió comunicá-y que prescinde d’ella nel so equipu. Juan Vázquez toma esta decisión nun momentu nel que se cuestiona la so xestión dende diversos ámbitos universitarios. Nel últimu claustru de la Universidá, el rector recibió sinfinidá de crítiques dende diversos sectores y son munchos los que nel senu de la institución académica lu acusen d’exercer el so cargu con ciertu enclín al autoritarismu y al personalismu. La so decisión de cesar a Paz de Andrés por asistir a un actu de remembranza del so antigu rival, el fallecíu Julio Rodríguez, paez una clara amuesa d’esta manera d’exercer el rectoráu con un celu desmesuráu. De Andrés y el rector coincidieron ayer en Xixón na inauguración de los cursos de veranu d’Estensión Universitaria onde’l director del Institutu Cervantes, Cesar Antonio de Molina daba una conferencia sobre la so institución nel centenariu del Quixote. L’alcuentru ente la inda responsable d’Estensión Universitaria y Vázquez foi fríu y el rector limitóse a comentar a los medios qu’él “yera’l que marcaba l’axenda del so equipu” y que namás diba falar de los cursos de veranu. 4 de xunetu, 2005 0 FacebookTwitterPinterestEmail
Educación Sigue ensin aclariase’l posible inxerimientu de la Filoloxía Asturiana na reforma de les carreres by asturnet 4 de xunetu, 2005 La posibilidá de que se cree la titulación de Filoloxía Asturiana cola nueva ordenación de les carreres universitaries, entamada p’afayar l’estáu español al espaciu común européu, nun ye dalgo que se tenga por descartable dafechu. Asina lo dexó ver la decana de Filoloxía de la Universidá d’Uviéu, qu’afirmó “nun se sabe cómo va quedar el diseñu final de les carreres, nun hai nada definitivo y lo único que circulen son borradores”. Ana Cano fexo estes declaraciones güei pela mañana, cuando exercía non como decana, sinón como presidenta de l’Academia de la Llingua y foi preguntada por una periodista alrodiu de la información que pudiere tener respective a la creación de la especialidá de Filoloxía Asturiana. Cano aseguró que nos últimos alcuentros que caltuviera con representantes d’otres universidaes del estáu naide daba por cerráu el debate y dixo qu’al Ministeriu inda nun llegara’l borrador definitivu. Pa la decana de Filoloxía: “sábese que se quier facer desapaecer la titulación de Filoloxía Inglesa, que la Filoloxía Románica como tal puede siguir el mesmu camín o nun sé sabe qué va ser d’ello”, tocante al restu de titulaciones, declaró que “hasta que nun se dea por definitivu’l diseñu poco se puede dicir”. Respective a la categoría académica de la posible titulación de Filoloxía Asturiana, Ana Cano foi rotunda: “Ye claro que tien d’inxerise ente les enseñances reglaes”. Esta ye una reclamación de la Facultá de Filoloxía d’Uviéu y una demanda social que de cuantayá bien manifestándose, ensin qu’hasta agora s’escamplara’l camín pa facela realidá. La reforma de les carreres universitaries puesta en marcha pol Ministeriu d’Educación ye una oportunidá pa materializar esa especialidá, inda los enzancos pa consiguilo son percibibles en bona parte de la comunidá universitaria asturiana. 4 de xunetu, 2005 0 FacebookTwitterPinterestEmail
Educación IX refuga la decisión d’Educación de recurrir la sentencia pol casu del director de la Llaboral by asturnet 29 de xunu, 2005 Izquierda Xunida d’Asturies criticó a la Conseyería d’Educación del Principáu pola decisión del departamentu qu’empobina José Luis Rodríguez Riopedre de recurrir la sentencia qu’invalida la designación del director del IES Universidá Llaboral de Xixón. Pa IX esta decisión de la Conseyería representa “una manera dilatoria enantes d’asumir responsabilidaes” y critica qu’al pesar de la sentencia dictada se siga calteniendo’l nomamientu del responsable del institutu xixonés. La designación del actual director del IES Universidá Llaboral provocó nel so día abonda polémica y el refugue de los mesmos alumnos, amás de otros colectivos políticos y sociales. El tribunal de la Conseyería que fizo’l procesu de selección calificó de manera unánime con 0 puntos al otru candidatu pa la dirección del centru, un fechu nel qu’agora el Xulgáu de lo Contencioso Administrativo nº 1 d’Uviéu considera que nun s’actuó cola oxetividá desixible. Pa Izquierda Xunida esta sentencia amás de reponer la xusticia al recurrente -el candidatu rechazáu pol tribunal de selección- da-yos la razón pola denuncia qu’entós presentó la coalición sobre esti asuntu. El coordinador xeneral IX d’Asturies Jesús Iglesias afirmó que’l recursu de la Conseyería d’Educación a esta sentencia ye “una nueva maniobra dilatoria cola pretensión de que la resolución del mesmu se dea más allá del final de l’actual lexislatura, col fin de nun tener d’asumir les lóxiques responsabilidaes. 29 de xunu, 2005 0 FacebookTwitterPinterestEmail
Educación SUATEA critica la postura anguaño d’otres organizaciones na defensa de la escuela pública by asturnet 22 de xunu, 2005 El sindicatu SUATEA refuga nun comunicáu la postura que caltienen otres organizaciones sindicales de la enseñanza respective a los oxetivos que marcaron la movilización unitaria del pasáu 27 d’abril en defensa de la escuela pública. L’alcuerdu firmáu va unos díes ente Educación con ANPE y FETE-UXT supón pal sindicatu autónomu asturianu “una renuncia a la esixencia d’estabilidá” pa los interinos. Tamién critiquen l’actitú de los otros sindicatos énte l’asuntu del complementu autonómicu y la creación d’unidaes d’infantil en centros públicos. SUATEA considera que después de la movilización del 27 d’abril perdióse la oportunidá de siguir la campaña polos oxetivos marcaos nesa convocatoria unitaria y califica de “renuncia” la postura que’l restu de les organizaciones sindicales de la enseñanza vien calteniendo anguaño. Nel tema del complementu autonómicu el sindicatu asturianu acusa a ANPE y FETE-UXT d’oculta-yos información y negociar ensin tener en cuenta que “tábemos nuna movilización conxunta dende xineru”. Tocante al asuntu de los interinos, l’alcuerdu firmáu cola COnseyería d’Educación ye “básicamente una recopilación de la normativa esistente” y que ” n’absoluto facilita la estabilidá del profesoráu interín”, polo que consideren que han ser “estos sindicatos los que tengan d’esplicar al profesoráu interín el porqué de la so renuncia a la esixencia d’estabilidá. Por último, SUATEA, cuida que nel tema de la creación d’unidaes d’infantil en centros públicu pa evitar l’aumentu de los conciertos, el restu de los sindicatos, incluída CCOO, caltienen una postura distinta n’Asturies qu’en Madrid: “mientras aquí coreen al ritmu de las consignes de SUATEA, “¡Concertar, ye privatizar!”, notres instancies, quienes realmente tienen poder de decisión neses organizaciones sindicales, alíense cola derecha y el cleru nuna alianza que,namás ha servir p’avanzar nos procesos de privatización”. Comunicáu de SUATEA 22 de xunu, 2005 0 FacebookTwitterPinterestEmail
Educación Educación firma un alcuerdu con ANPE y FETE-UXT pa camudar la situación de los profesores interinos by asturnet 20 de xunu, 2005 El conseyeru d’Educación José Luis Iglesias Riopedre amosóse contentu de firmar un alcuerdu colos sindicatos ANPE y FETE-UXT pa camudar la situación de los profesores interinos. Los dos sindicatos y el conseyeru escenificaron ayer n’Uviéu la firma d’esti pautu que nun cuenta col sofitu de los otros dos sindicatos mayoritarios na enseñanza n’Asturies: SUATEA y COOO pa los que l’alcuerdu “cierra en falsu” el problema de la inestabilidá llaboral del colectivu d’interinos y les sos condiciones de trabayu. SUATEA amás afirma que l’alcuerdu nun camuda lo ya recoyío nuna resolución de 2004 y qu’impide volver negociar mientres tea en vigor. L’alcuerdu firmáu va tener vixencia hasta’l remate del cursu 2007-2008 y los sos puntos más destacaos ye qu’hasta entón los interinos van poder caltenese nes llistes ensin falta de presentase a les oposiciones, reservaes namás a los aspirantes a entrar nes nueves llistes. En cuantes a la baremación conseñada nel alcuerdu la valoración de la esperiencia llaboral en puestos docentes aumenta hasta un 50 por cientu y valoraráse más l’antigüedá, hasta los nueve años trabayaos. Tanto el sindicatu ANPE como FETE-UXT d’Asturies amosaron la so satisfacción pol alcuerdu firmáu respective a la meyora de les condiciones del colectivu llaboral que carez la mayor estabilidá nel empléu públicu. SUATEA y CCOO, los otros sindicatos mayoritarios, refugaron sumase a esti alcuerdu, pa los primeros porque “cierra en falsu” el problema d’inestabilidá del colectivu y pa Comisiones porque “nun meyora en xeneral les condiciones llaborales y nun elimina la rotación”. El sindicatu asturianu SUATEA afirma nun comunicáu que cásique tolos cambios anunciaos polos firmantes del alcuerdu con Educación ya taben recoyíos nuna resolución de la COnseyería de xunetu de 2004 y qu’agora simplente se sustitúi una nueva resolución y la so publicación nel BOPA por esti pautu ente’l Principáu y los sindicatos ANPE y FETE_UXT. Pa SUATEA la firma d’esti alcuerdu supón “el tema nun va volver negociase coles organizaciones sindicales mientres tea en vigor” y caltién que “la firma d’un alcuerdu supón que s’acepta como bono lo qu’hai escrito nél, pero al empar fírmase’l compromisu de nun poder camudalo”. Anguaño formen el colectivu d’interinos n’Asturies unos 1.500 trabayadores n’activu y más de 5.000 titulaos tán apuntaos a les llistes. Comunicáu de SUATEA 20 de xunu, 2005 0 FacebookTwitterPinterestEmail
Educación L’IES Bernaldo de Quirós de Mieres celebra una folixa de convivencia lúdico-educativa by asturnet 14 de xunu, 2005 L’Institutu d’Enseñanza Secundaria “Bernaldo de Quirós” de Mieres organiza esti miércoles 15 una xornada de convivencia que los responsables de llingua y cultura asturianes del centru califiquen de “folixa lúdico-educativa”, na qu’escolinos, pás y más, van xuntase coincidiendo cola recta final del cursu. La folixa ufierta una degustación de gastronomía local y actuaciones de música en directu. La xornada ta empobinada a los alumnos d’asturianu y tamién a los de 1º, 2º y 3º de la E.S.O., y nel cursu de la mesma van entregase los premios a los participantes na I Olimpiada de Deporte Tradicional ‘Olimpiastur’. Una actuación de la Bandina’l Tombu y d’un gaiteru y un tamboriteru de la Banda de Gaites de Mieres ponen el puntu musical a la folixa na qu’escolinos y padres van poder degustar una amuesa de la gastronomía de la zona. La xornada cuenta col apoyu de la Oficina de Política Llingüística del Principáu. 14 de xunu, 2005 0 FacebookTwitterPinterestEmail