Educación Darréu xúntase a les crítiques feches dende Asturies al proyectu de LOE by asturnet 7 d'avientu, 2005 La organización nacionalista Darréu-Mocedá Nacionaliego axuntóse a les crítiques al proyectu de LOE espuestes enantes por otres formaciones asturianes nun comunicáu nel qu’afirma que’l proyectu de Llei del Gobiernu central “afita y amplía la privatización de la enseñanza”. Darréu considera qu’ente la imposibilidá de qu’Asturies cuente con un sistema educativu propiu namás cabe la defensa d’una “escuela asturiana pública y laica”. Pa la formación nacionalista moza el proyectu de Llei “afita definitivamente la duple rede de centros, públicos ya privaos concertaos,al traviés de conciertos educativos dende Educación Infantil fasta Formación Profesional, mientres la educación pública sofre diferentes carencies ya necesidades y nin tansiquier garantiza la gratuidá y calidá pa toes y toos”. Nesi sen Darréu considera que “la política de financiación d’istitutos privaos y concertaos mengüen les posibilidaes de meyora de los centros públicos”. Darréu pide tamién una “escuela asturiana democrática” énte la designación de les direcciones de centros por concursu de méritos envez de por votación y cuenta que la LOE “nun tien medíes imprescindibles pa que tol alumnáu puea finar los oxetivos previstos: obligatoriedá del 2º ciclu de Educación Infantil, mengua de les ratios, refuerzu de la tutoría, desdobles de diferentes materies, ampliación de les plantilles pa un enseñu personalizáu y la atención a la diversidá…”. La presencia de l’asignatura de Relixón na enseñanza pública ye l’últimu de los aspectos criticaos del proyectu del Gobiernu ya que pa Darréu “la relixón nun pue formar parte del curriculu escolar” y cuiden que na LOE “arrenúnciase a un supuestu proyeutu d’enseñanza llaica claudicando a los intereses de la Iglesia Católica calteniendo la asignatura de relixón”. Per otru llau Darréu organiza esti viernes 9 a les 21.00 hores un conciertu na Sala Maite de Lluanco nel que van partipar los grupos Skama na Rede, Gomeru y Ásperos embaxo’l lema: “Una mocedá llibre, una Asturies soberana”. 7 d'avientu, 2005 0 FacebookTwitterPinterestEmail
Educación MIAS afítase contra la relixón na enseñanza y los conciertos educativos by asturnet 5 d'avientu, 2005 La Mocedá d’Izquierda Asturiana (MIAS) manifiesta la so postura contraria a la presencia de l’asignatura de Relixón na enseñanza pública y a la concertación por parte de l’administración educativa de los conciertos con centros privaos. La organización nacionalista moza pide que se supriman les subvenciones públiques a la enseñanza concertada. Según Carlos Suari Rodrigue, voceru de MIAS: la reforma de la Llei Orgánica dEducación tendría que sofitase en dos finxos básicos: una enseñanza pública, onde toes y toos tengamos los mesmos drechos y posibilidaes, y, per otru lláu, que seya dafechamente llaica y de calidá. Suari posicionose escontral gobiernu del estáu español y el primer partíu de la oposición por, según elli, facer dun debate tan importante comol de la educación un espectáculu llaceriosu y una guerra eleutoral de votos. El portavoz de MIAS atacó, per un lláu, lestremismu col que, dende la ultraderecha española, se tan calteniendo postures indefendibles -refiriéndose a la polémica colos conciertos y la docencia de relixón católica en centros denseñanza públicos- nún estáu supuestamente aconfesional y que debiere ser llaicu. Pa les mocedaes dIzquierda Asturiana el gobiernu estatal debe suprimir los conciertos, ye dicir, les subvenciones con perres públiques de tolos ciudadanos, a los colexos privaos, centros nos que se prioricen los alumnos, de tal mou que conderguen a la enseñanza pública a ser la de los desfavorecíos, términu, esti caberu, emplegáu por cares visibles del PP recientemente nAsturies. Amás, pa Suari ye irónico que, precisamente, los profesionales meyor preparaos seyan despreciaos frente a los de los centros privaos. 5 d'avientu, 2005 0 FacebookTwitterPinterestEmail
Educación SUATEA manifiéstase n’Uviéu contra’l proyectu de la LOE alcordáu nel Congresu by asturnet 1 d'avientu, 2005 El sindicatu SUATEA manifiéstase esta tarde énte la sé de la viceconseyería d’Educación n’Uviéu pa espresar el so refugue al proyectu de LOE alcordáu nel Congresu por tolos grupos, a nun ser el PP, y que los convocantes de la protesta califiquen de “gravísimu ataque a la enseñanza pública y al profesoráu”. Pa la organización sindical asturiana l’aumentu del númberu de ratios nes aules encamentáu nel proyectu de llei ye una midida “nefasta” y podía suponer, según SUATEA, el pieslle de sinfinidá d’unidaes na Enseñanza. El sindicatu considera que la LOE nun solventa reivindicaciones como la incentivación salarial del profesoráu, la reducción d’hores lectives con 55 o más años o la elección democrática de los cargos directivos. Tocante al colectivu d’interinos, SUATEA cuida que “ve desoyida una vez más la so reivindicación d’accesu diferenciáu y, poro, la estabilidá nel so puestu de trabayu. Otru aspectu del alcuerdu sobre Educación algamáu nel Congresu que nun-y presta al sindicatu autónomu ye l’aumentu de la financiación de la enseñanza concertada hasta un 3,1 por cientu. La concentración de SUATEA ta convocada pa esti xueves 1 d’avientu a les 18.00 hores na Plaza d’España d’Uviéu. El aumento de la financiación a la enseñanza privada concertada hasta el 31%, 1 d'avientu, 2005 0 FacebookTwitterPinterestEmail
Educación Los titulaos del antigu ITAE piden la homologación de los sos estudios by asturnet 30 de payares, 2005 L’asociación de titulaos del Institutu de Teatru y de les Artes Escéniques d’Asturies considera que’l colectivu al que representa ta discrimináu respective a otres comunidaes del estáu no tocante a la homologación de los sos estudios colos de l’actual Escuela Superior d’Arte Dramáticu. Nuna carta unviada a distintos representantes políticos los actores y actrices del antigu ITAE piden la igua de la so situación. L’asociación qu’axunta a los titulaos que cursaron los sos estudios enantes de qu’estos tuvieran rangu d’escuela superior afirma qu’insituciones académiques asemeyaes d’otres comunidaes convaliden estes enseñances en casos análogos y piden que la Conseyería d’Educación del Principáu faga lo propio col so casu. Va un mes los titulaos del antigu ITAE unviaron una carta al responsable d’Educación del gobiernu asturianu José Luis Iglesias Riopedre y a representantes de los distintos grupos políticos pa informalos de la so situación y solicita la igua de la mesma, ensin algamar una respuesta afirmativa hasta la fecha pa solventar el so casu. En palabres del voceru de l’asociación Toño Caamaño: “tol mundu ta d’alcuerdu pero naide fai nada por resolvelo”. Agora l’asociación quier dar a conocer la so problemática énte la opinión pública énte lo que consideren “una petición urxente, xusta y lóxica”. 30 de payares, 2005 0 FacebookTwitterPinterestEmail
Educación La fuelga convocada por Xunta Moza llogra un 80% de siguimientu by asturnet 24 de payares, 2005 Xunta Moza valora la convocatoria de fuelga de la xornada d’ayeri na enseñanza, estimada nun 80% de paru, como un verdaderu esitu y afirma qu’espera una respuesta inmediata per parte de la Conseyería d’Educación, en favor del “respetu a los derechos educativos y llingüísticos de los asturianos”. Los datos apurríos por Xunta Moza sobre’l siguimientu de la fuelga estimen ente’l 90 y el 100% de paru nos IES “Monte Naranco”, “Iría”, y “Ventanielles” d’Uvieu, n’”El Batán”, “Bernaldo de Quirós” y “Sánchez Lastra” de Mieres; y nos IES de Lluanco, Candás, Cabanaquinta, Cangues d’Onís y La Pola L.lena. Alredor del 80 y el 50% de los estudiantes nos IES “Doctor Fleming” y Trubia d’Uvieu, “Rio Nora”, “Escultor J. Villanueva” y “Astures” de Siero, amás de los IES de Ciañu y Llanera súmaronse a la convocatortia. Mentes que’l siguimientu más probe anduvo nos IES “Aramo” y “Pando” d’Uvieu, los IES de L’Infiestu y Cangas, con un 20% de paru. Xunta Moza, per otra parte, fai la quexa de “qu’a lo llargo d’esta selmana observáronse actitúes mui belixerantes dende la dirección de dalgunos centros que pudieron restar dalgo de participación al paru”. Sicasí, a nivel xeneral, la Xunta valora la fuelga como un esitu “qu’esperamos sea contestáu dende la Conseyería d’Educación con pasos a favor claros y inmediatos nel respetu a los derechos educativos y llingüísticos de la mocedá asturiano”. Web de la Xunta pola Defensa de la Llingua Asturiana 24 de payares, 2005 0 FacebookTwitterPinterestEmail
Educación SUATEA y STES-I esixéron-y a Zapatero que potencie la escuela pública na LOE by asturnet 22 de payares, 2005 Representantes de la Confederación de Sindicatos de Trabayadores de la Enseñanza (STES-I) reunieronse na tarde d’ayeri con Rodríguez Zapatero pa face-y llegar la so valoración del proyectu de Llei Orgánica d’Educación. Los sindicalistes que nel so día valoraron “insuficiente” el proyectu de la LOE, ente los ataques que ta sufriendo nos últimos díes per parte de “la derecha católica”, quixeron pidí-y al presidente del Gobiernu que cumpla’l col programa electoral y que “la enseñanza pública sía l’exe vertebrador del sistema educativu”. Nel aconceyamientu que tuvieron na tarde d’ayeri pa tratar les reformes de la llei d’educación, representantes del Sindicatu d’enseñanza, del que forma parte’l sindicatu asturianu SUATEA, esixeron-y al presidente del Gobiernu que se “cumpla nesta lexislatura’l compromisu de llegar a la media de la Unión Europea, creando unos fondos específicos de compensación interterritorial n’educación”. Otra de les esixencies de los profesores ye la creación de la Rede Pública d’Escueles Infantiles, dotándoles de los medios necesarios pa que puean ufiertar una hora diaria d’actividaes educatives complementaries. Dos oxetivos concretos que los representantes del profesoráu-y pidieron a Zapatero, foron la necesidá de “recuperar la ellección democrática de los equipos directivos” y el cumplimientu “del principiu de non discriminación por razón de sexu na almisión del alumnáu” de los centros. No tocante a los derechos del profesoráu, acordáron-y el so compromisu de formalizar un “contratu col profesoráu”, garantizando un sistema d’incentivos salariales; y esplicáron-y la so propuesta d’accesu diferenciáu pal profesoráu interín como la meyor forma d’acabar cola precariedá llaboral de más de 80000 profesores. Sobre la polemica de los últimos díes, los miembros del Sindicatu de Trabayadores de la Enseñanza cuestionaron la constitucionalidá de los acuerdos col Vaticanu y manifestaron la necesidá de que les relixones confesionales queden fuera la escuela y fuera del currículo escolar. 22 de payares, 2005 0 FacebookTwitterPinterestEmail
Educación La Comarca de la Sidra celebral Día Universal de la Infancia by asturnet 16 de payares, 2005 El prósimu día 20 celebrase na Comarca la Sidra’l Día Universal de la Infancia, col llema “nun ye un cuentu, son los sos derechos”. Con esti motivu los Servicios Sociales de la mancomunidá dientro del programa “suaños y ilusiones: cabalgando pa escontra´l mañana” organicen, en collaboración col Colexu Salvador Vega de Sariegu y Amnistía Internacional, una riestra d’actos en Sariegu, pal llunes 21, empobinaos a promover el sentíu de la solidaridá y respetu de los derechos humanos tanto nos escolares como nos padres. Les actividaes programaes van entamar a les 13 h. nel centru educativu, cola proyección d’una película alusiva a los derechos del neñu. Actu siguíu los escolares van participar na confección de carteles nos que van poner los derechos de los neños, incluyendo’l derechu de nun dir a la guerra, llema qu’alcuña Amnistía Internacional pa la presente campaña. Estos carteles van unviase a escueles de Nepal que sufre un conflictu armáu dende va nueve años, siendo los principales perxudicaos los neños y neñes nepalís. A les cinco la tarde Francisco Javier Fernández López, pediatra nel Centru de Salú de Nava y miembru d’Amnistía Internacional, va dar a los padres una visión de la Infancia nel mundu, mientres los neños van participar nun taller de globoflesia, a cargu de los Servicios Sociales de la Mancomunidá Comarca de la Sidra y l’Asociación Actívate de Villaviciosa. 16 de payares, 2005 0 FacebookTwitterPinterestEmail
Educación SUATEA denuncia la situación del asturianu nesti cursu escolar by asturnet 9 de payares, 2005 SUATEA analiza nun documentu la situación de l’asignatura de llingua asturiana en tolos niveles de la enseñanza. Nel repasu a la realidá actual del nuestru idioma na docencia el sindicatu denuncia importantes carencies como la falta d’ufierta efectiva en tolos centros, l’inclumpimientu del alcuerdu sobre plantielles y de la mesma Llei d’Usu y la inestabilidá del profesoráu, ente otres. Nel análisis de les enseñances del asturianu afáyense abondes estorbises pa dir afondando na normalización de l’asignatura. Asina n’Educación Infantil SUATEA detecta que “nun sólo nun se ufierta en tolos centros sinón qu´en centros onde s´impartía dexóse de faelo alegando que nun hai hores , que nun ye etapa obligatoria ,etc”. Nes sen el sindicatu considera “perimportante la impartición de llingua nesta etapa ya que la escolarización entera en castellano va faciendo perder la llingua materna a aquellos neños /es que falen asturianu”. Respective a Primaria “sigui incumpliéndose l´alcuerdu de plantilles nel que se diz que tien d´haber profesoráu de llingua a tiempu completu nos centros siendo les itinerancies excepcionales. Amás en dellos centros agrúpase al alumnáu en función de que vayan o non a llingua” y arriendes d’ello “tampoco hai un siguimientu de lo que se fae nes clases de Cultura Asturiana (alternativa a Llingua)”. SUATEA denuncia que dende Educación prometiérase “dir aumentando a otres materies la impartición de les mesmes n´asturianu pero eso quedó nel sacu ,ya nun s´alcuerden”,afirma’l documentu. La situación na ESO y Bachiller el sindicatu cuenta que “siguimos col problema de la optatividá de la asignatura impidiendo que seya realmente voluntaria.Eso que paez igual, nun lo ye puesto que supón una competencia con otres optatives y nun garantiza qu´una ñeña /neñu que quiera estudiar llingua puea faelo. Y asina falando de cupos sigui siendo necesario llegar a un cupu mínimu pa poder recibir clases de llingua colo cualo nun ta garantizáu esti derechu, mentantu n´otres árees sí”. Destamiente el sindicatu reconoz que “iendo verdá que la Conseyería nes sos circulares d´entamu cursu explicitaba que se tenía qu´ufiertar llingua nos impresos de matriculación de tolos centros, tenemos conocimientu de qu´hubo trabes dende diversos centros intentando desviar alumnáu a otres materies o nun solicitando permisu a la Conseyería pa impartilo cuando´l cupu yera inferior al establecíu (cuando nun se llega al cupu ye necesario qu´el centru solicite permisu a la Conseyería)”, dizse nel documentu. Respective a esti últimu asuntu reflexónase que “si bien aumentó ´l númberu de centros onde s´ufierta en Bachiller , creyemos que dende la Conseyería tendríen de garantizar que cualisquier alumnu/a tenga esti derechu a estudiar la so llingua ya implicase más en garantizar que realmente s´ufierte l´asignatura nos centros”. Un de los principales problemes col que s’enfrenta l’asignatura de llingua asturiana ye’l de la situación d’inestabilidá del profesoráu que la imparte. Esta situación “fai que ca añu seya profesoráu diferente´l qu´imparte asturianu nun centru lo qu´impide un siguimientu añu a añu de la evolución llingüística del alumnáu y de los proyeutos previstos nos centros” y al empar “el profesoráu de llingua nun dispón de medios nos centros pa renovar material y malpenes hai cursos ufiertaos de formación dirixíos al profesoráu de llingua”. SUATEA critica la falta de responsabilidaes na COnseyería d’Educación al pesar de nomar a una persona pa ocupase d’asuntos llingüísticos: “entovía nun sabemos pa qué y con qué intenciones puesto que si bien paez s´aconceyó con profesoráu entovía nun hubo mesa de negociación nin presentación oficial colos sindicatos polo que nun sabemos bien qué funciones tien”, diz el sindicatu. Capítulu aparte merez la situación peculiar de los interinos de llingua asturiana: “la Conseyería nun resuelve ´l problema de les bolses puesto qu´una vegada que s´acabó la llista d´asturianu tendría d´abrir una nueva bolsa a continuación de la llista existente y nun lo quier facer (esto fízose ´l cursu pasáu n´otres asignatures) dando llugar a situaciones inxustes”. Asina agora , denuncia SUATEA que “acabaes les llistes existentes, pide plaza d´asturianu culisquiera que tando nel rexistru d´asturianu tea convocáu por dalguna de les especialidaes dándose la inxusticia de que xente de 25 puntos y rexistrada, comu nun ta convocada na convocatoria selmanal nun pue pidir y xente con 5 puntos rexistrada pero d´otra especialidá na que sí la convoquen sí pue pidir pasando asina xente de 5 puntos perriba de xente con 25.¿Tien culpa´l profesoráu de que dalgunes llistes cuerran más qu´otres siendo del mesmu cuerpu? ¿Por qué nun abren una bolsa a continuación de la qu´hai igual que ficieron n´otres asignatures el cursu pasáu?”, pregúntense los autores del documentu. La conclusión final del informe cuenta que “queden yá menos de dos años pa la fin de la llexislatura ya entovía nun vemos más que meros retoques de lo que yá había, nun poniendo los medios suficientes por parte d´esta Conseyería pa garantizar lo que ye un derechu recoyíu nel Estatutu, na Llei d´Usu y nel Plan de Normalización (plan que tanto cacarexaron y del que a nós nun mos dexaron opinar nel debate qu´hubo nel Parlamentu puesto que nun mos llamaron y nel que sí pidieron asistencia al restu d´organizaciones sindicales d´enseñanza)”. El sindicatu autónomu considera que namás la reconocencia de la oficialidá na prósima reforma del Estatutu y les obligaciones que diba implicar pa l’Adminstración podía dir solventando los problemes anguaño esistentes. 9 de payares, 2005 0 FacebookTwitterPinterestEmail
Educación Los profesores interinos van dir a la fuelga’l prósimu 16 de payares by asturnet 7 de payares, 2005 La reivindicación d’un nuevu modelu d’accesu a la funciòn pública pal profesoráu interín ye’l motivu de la fuelga convocada pal prósimu 16 de payares a nivel estatal pola confederación STEs y sofitada n’Asturies por SUATEA. Pa los convocantes miles de puestos de trabayu pueden tar en peligru si prospera el modelu recientemente alcordáu ente’l MEC y dellos sindicatos. La tramitación de la Llei Orgánica de la Enseñanza (LOE) nel parlamentu podía tar rematada enantes de fin d’añu. La confederación estatal STEs y el sindicatu asturianu SUATEA quieren aprovechar estes feches previes a l’aprebación de la LOE pa plantear un nuevu sistema pal accesu de los interinos a un puestu de trabayu que termine cola situación de precariedá qu’afecta al colectivu. Con esi motivu tienen convocada una fuelga pal prósimu 16 de payares en tol estáu. El proyectu de nuevu modelu p’accesu a la función pública del profesoráu interín que’l MEC pautó colos sindicatos FETE-UGT y CSIF representa pa los convocantes de la fuelga del 16 de payares “un motivu d’esmolición pa cerca de 80.000 families” a les qu’acusen d’haber abandonao a los sindicatos firmantes. El nuevu sistema d’oposiciones “puede dexar na cai a miles de persones con años de serviciu” según STEs y SUATEA. La situación del profesoráu interín cobra n’Asturies una relevancia especial nel asuntu de la especialidá de llingua asturiana nel que los aspirantes a cubrir places nun entren nel sistema de nueves bolses como n’otres especialidaes y prácticase un a manera de contratación que SUATEA califica de “inxustu” y “discriminatoriu”. 7 de payares, 2005 0 FacebookTwitterPinterestEmail
Educación El cursu pa encuestadores de material oral supera les espectatives de Política Llingüística by asturnet 25 d'ochobre, 2005 El cursu pa encuestadores de material oral entamáu pola Oficina de Política Llingüística en colaboración col Seminariu de Filoloxía Asturiana de la Universidá d’Uviéu superó les espectatives de matriculación previstes polos organizadores y énte’l curiosu númberu de solicitúes la Conseyeria vióse na necesidá d’aumentar el númberu de places. El cursu de llingua asturiana pa periodistes convocáu al empar que l’anterior inda nun cubrió les trenta y cinco places programaes. Los responsables de Política Llingüística del Principáu manifestaron el so contentu pol ésitu de la convocatoria del cursu d’encuestadores de toponimia y patrimoniu oral programáu pa filólogos y que tuvo de ser ampliáu nes sos places p’atender la demanda recibida de solicitúes. Bona parte de los trabayos fechos por estos encuestadores va utilizase nos llabores de la Xunta de Toponimia a la hora d’entamar los nomenclátores de los espedientes por conceyos.El cursu va impartise en Xixón y n’Uvièu dende’l 25 d’ochobre al 15 d’avientu. L’otru cursu programáu por Cultura en colaboración col Seminariu de Filoloxía Asturiana, empobináu a profesionales de los medios d’información inda tien abiertu’l plazu pa matriculase y les trenta y cinco places previstes ensin cubrir. El plazu va tar abiertu hasta’l prósimu 11 de payares y el cursu va desarrollase ente’l día de fin de la matrícula hasta’l 17 d’avientu. 25 d'ochobre, 2005 0 FacebookTwitterPinterestEmail