Educación Fuelga na enseñanza by asturnet 16 de marzu, 2007 La estaya de mocedá de la Xunta pola Defensa de la Llingua Asturiana convoca una fuelga estudiantil pa reclamar el derechu a estudiar asturianu en condiciones dignes y de normalidá. La fuelga va facese’l prósimu 22 de marzu, a les 12’l mediudía ta convocada una concentración na Plaza d’España d’Uviéu. La fuelga de la Xunta Moza cuenta col apoyu de Mocedá d’Izquierda Asturiana, la Xuventú Asturianista, Mocedá d’Andecha, Coleutivos de Mocedaes Comunistes y el Conceyu Universitariu pol Asturianu. La Xunta Moza convoca esta movilización, la segunda fuelga convocada dende’l movimientu de defensa de los derechos llingüísticos por mor del curriculu educativu presentáu pol conseyeru Riopedre nel que l’asignatura d’asturianu pasaría a ser una materia optativa y non voluntaria como vien siendo hasta’l momentu en cumplimientu cola Llei d’usu y promoción del asturianu. 16 de marzu, 2007 0 FacebookTwitterPinterestEmail
Educación SUATEA recurre la multa de Beatriz Quirós by asturnet 15 de marzu, 2007 La sentencia na que se condena a la sindicalista Beatriz Quirós a pagar 600 euros acusada de desobediencia a l’autoridá va ser recurrida por parte del sindicatu educativu SUATEA. Los sindicalistes Beatriz Quirós y Jesús La Roza fueron denunciaos durante la concentración d’estudiantes y mayestros contra la cesión de parte de la Universidá Llaboral a la empresa Thyssen-Krupp. La cesión tenía por obxetu facilitar a la multinacional la instalación d’un centru de prototipos ocupando les instalaciones del polideportivu de la Universidá Llaboral inauguráu cuatro meses atrás. Nel xuiciu celebráu Jesús La Roza quedó absueltu de los cargos que se-y imputaben mientres que a Beatriz Quirós se-y impusó una multa de 600 por un delitu de desobediencia a l’autoridá al non poder entregar el so DNI, Quirós denunciara previamente la so desapacición, al númeru policial, pero sí en cambiu’l so carné de conducir. 15 de marzu, 2007 0 FacebookTwitterPinterestEmail
Educación Condenen a Beatriz Quirós a pagar 600 por “oponer resistencia a ser identificada” by asturnet 8 de marzu, 2007 El Xulgáu d’Instrucción númeru 2 de Xixón emitió ayeri la condena en contra de la sindicalista Beatriz Quirós, la sindicalista ta obligada a pagar una multa de 600 por “oponer resistencia a ser identificada” durante una protesta d’estudiantes y mayestros contra la cesión d’espacios na Universidá Llaboral de Xixón al grupu Thyssen. La sindicalista va presentar un recursu d’apelación énte l’Audiencia Provincial. La delegada sindical de SUATEA va llevar alantre la defensa del so derechu a protestar como representante sindical na defensa de los espacios públicos educativos. El xuez absolvió a Jesús de la Roza, tamién representante de SUATEA, acusáu pol mesmu delitu; la retirada solicitóla tamién la propia fiscalía del xuiciu; asina mesmo de la Roza quedó absueltu de los cargos de “insultos contra l’autoridá” poles que tamién comparecía. Beatriz Quirós recordó que-y robaren el DNI y poro envede esti documentu hebo enseñar el so carné de conducir. Esti fechu ye recalcáu na sentencia xudicial como preba de “la voluntá de la sindicalista de querer tresgredir el principiu d’autoridá” 8 de marzu, 2007 0 FacebookTwitterPinterestEmail
Educación El CMPA tresllada a la directora de FP les sos propuestes en materia de Formación Profesional by asturnet 7 de marzu, 2007 El presidente del Conseyu de la Mocedá d’Asturies, Paulino Feito, aconceyó ayeri cola Directora Xeneral de Formación Profesional, Paloma Sainz, pa tresllada-y les propuestes del colectivu xuvenil en materia de Formación Profesional. Ente les propuestes s’alcuentra la necesidá de que la titulación de “Documentación Sanitaria”, que s’imparte nel Valle de Turón, tea homologada pa que los titulaos na mesma puedan trabayar nel SESPA. Ente les otres plantegaes pol Conseyu tán la de movilizar a los diferentes departamentos administrativos con competencia en Formación Profesional pa que faigan pa qu’el Consorciu de Transportes d’Asturies (CTA) estienda modelu de transporte similar al de los estudiantes universitarios. 7 de marzu, 2007 0 FacebookTwitterPinterestEmail
Educación Xunta Moza convoca un paru na enseñanza pal 22 de marzu by asturnet 7 de marzu, 2007 La situación de la llingua asturiana na enseñanza ye la causa de la convocatoria d’un paru xeneral nel sistema educativu asturianu pal próximu día 22 de marzu. Xunta Moza convoca la fuelga en respuesta a la nueva “agresión que supón la propuesta de currículu” de la Conseyería d’Educación, na que s’afonda na situación “marxinal” de la llingua asturiana nel sistema educativu. El paru va tar acompañáu por una concentración a la una del mediudía na Plaza d’España. 7 de marzu, 2007 0 FacebookTwitterPinterestEmail
Educación SUATEA reclama medíes educatives, non policía by asturnet 28 de febreru, 2007 La propuesta del PSOE d’asignar un policía a cada centru educativu llevanta les protestes de la comunidá educativa. El sindicatu SUATEA considera que la “propuesta contribui a llevar a la sociedá la idega de que la violencia ta medrando nos centros educativos”. L’informe del Defensor del Pueblu sobre la violencia escolar indica que la violencia escolar disminuyó nos últimos años. La propuesta gubernamental empobínase a qu’el númberu policial asignáu en cada centru participe de la vida del mesmu llegando hasta’l Conseyu Escolar. El sindicatu educativu considera que les necesidaes de los centros educativos nun se centren nes medíes policiales sinon en meyorar la enseñanza y la convivencia na comunidá educativa. Dende SUATEA planteen una serie de midíes como la reducción de los alumnos por clase, nesti puntu’l sindicatu considera que nun se puede mantener la mesma ratio qu’hai 30 años. La introducción nos centros escolares de nuevos profesionales d’educación como trabayadores sociales, mediadores o acompañantes. La formación de padres y madres d’alumnos ye otru de los puntos propuestos dende SUATEA, asina se propón la creación d’escueles de familia que tendríen como fin principal abordar la formación y la xestión de los problemes de convivencia. 28 de febreru, 2007 0 FacebookTwitterPinterestEmail
Educación Dos delegaos de SUATEA a xuciu por una movilización by asturnet 27 de febreru, 2007 Beatriz Quirós y Jesús de la Roza, delegaos de SUATEA na Xunta de Personal Educativu van tener que comparecer nun xuiciu de faltes el próximu 2 de marzu acusaos de “insultar a les autoridaes” y “intentar romper un cordón policial”. Los fechos denunciaos ocurrieron, supuestamente, durante una concentración del alumnáu y profesoráu de la Llaboral en protesta pola decisión d’entregar el polideportivu del centru a la Thyssen. Dende’l sindicatu educativu SUATEA esplícase que la concentración foi tranquila dafechu. Casu demostrable pola presencia de medios de comunicación que nun recoyeron nengún tipu d’incidente. Dende SUATEA consideren que l’actuación “parez un actu de venganza d’aquellos que que fueron obligaos pola presión educativa del Centru a escaecer l’alloriada idega de desmantelar un centru de Formación Profesional recien inauguráu”. Dende SUATEA recuerden qu’a mediaos de xineru yera “imprescindible” abandonar el centru educativu pa garantizar la presencia de la multinacional. Actualmente comenten dende SUATEA eses prieses nun esisten, y yá nun se menciona’l polideportivu y la Thyssen va construyir el so complexu fuera del recintu de la Llaboral. El Sindicatu camienta qu’actuaciones como esta ponen en tela de xuiciu la xera sindical, conculcando los derechos fundamentales del ordenamientu xurídicu. Nesti sen citen que durante esti conflictu una senadora, y dellos parlamentarios y políticos asturianos nun pudieron visitar el centru. 27 de febreru, 2007 0 FacebookTwitterPinterestEmail
Educación El profesoráu de Llingua propón que la Cultura Asturiana seya l’alternativa al asturianu by asturnet 27 de febreru, 2007 L’Asamblea del Profesoráu d’Asturianu alcordó rechazar el currículu de primaria propuestu pola Conseyería d’Educación, nel que l’asturianu sería una asignatura optativa y non voluntaria como vien faciéndose hasta agora. Na Asamblea llegóse a la conclusión de que como alternativa se tendría qu’ufiertar l’asignatura de cultura asturiana, pa quienes nun escueyan asturianu. Los sindicatos educativos afitaron la necesidá d’eliminar les ratios mínimes pa poner clas d’asturianu. Otru de los aspectos propuestos pola Asamblea ye que los padres al entamu del cursu esperesen que nun tienen intención de que los sos neños estudien asturianu, asina como aumentar el númeru d’hores de l’asigantura y facer que la llingua vehicular de Conocimientu del Mediu seya l’asturianu. 27 de febreru, 2007 0 FacebookTwitterPinterestEmail
Educación Educación implantará nel prósimu cursu escolar l’asignatura “Educación pa la Ciudadanía y los Derechos Humanos” by asturnet 22 de febreru, 2007 Una de les asignatures más polémiques de la última reforma del sistema educativu español, la Educación pa la Ciudadanía y los Derechos Humanos. L’asignatura implantaráse a partir del prósimu setiembre ente l’alumnáu de tercero d’ESO de les comunidaes gobernaes pol PSOE, mientres que les del PP decidieron entamar l’aplicación de l’asignatura nel cursu 2008-2009. L’asignatura habrá impartise nun de los tres primeros cursos de la Educación Secundaria Obligatoria, amás d’en cuartu, col nome d’Educación Ético-Cívica. Los conteníos d’esta asignatura incluirán dende’l mediu ambiente, el cambiu climáticu, la inmigración o los derechos humanos. 22 de febreru, 2007 0 FacebookTwitterPinterestEmail
Educación La comunidá escolar de Xove algama la denominación n’asturianu de la escuela by asturnet 21 de febreru, 2007 La comunidá escolar de la escuela de Xove ta acabante algamar el cambiu de denominación pal centenariu equipamientu educativu del barriu del oeste de Xixón. L’Ayuntamientu de Xixón aprobó la denominación n’asturianu de la escuela y sólo falta l’aprobación de la Conseyería d’Educación pa que la denominación Colexu de Xove seya la oficial. La parroquia de Xove ye una de les que depués de l’aprobación de l’aprobación del espediente toponímicu de Xixón tien doble denominación Jove/Xove. Dende la dirección del centru educativu dizse qu’esti pasu yera necesariu teniendo en cuenta que la denominación popular del barriu ye Xove, y qu’el colexu yá venía utilizando la denominación n’asturianu con normalidá, polo que camienta nun va haber polémica pola decisión. 21 de febreru, 2007 0 FacebookTwitterPinterestEmail