Cooperación El diálogu enseña esta fin de selmana les otres cares del planeta by asturnet 20 d'abril, 2006 La octava edición de Les Otres Cares del Planeta, una propuesta de converxencia ente diferentes colectivos asturianos que quieren potenciar la imaxinación y la creatividá a la hora d’allegase a la diversidá de temes que formen parte del planeta, tien como filu conductor el diálogu nes sos estremaes manifestaciones y contestos. Danza, poesía, música, teatru, esposiciones, conferencies y pases de cine, enllenen la programación qu’esti añu va cellebrase en Xixón ente los díes 21 y 29 d’abril. Los interpretes Estrella García y Miguel Quiroga, de la compañía Estrella García Compañía de Danza, son los encargaos d’inaugurar esta tarde la octava edición de Les Otres Cares del Planeta, con un pedazu del espectáculu “Pan de ángel”. Mañana vienres, a les ocho la tarde, el Salón d’Actos del Centru de Cultura Antiguu Institutu va acoyer la proyección d’ “Entre el dictador y yo”, mentes qu’a les doce la nueche van inaugurase diferentes esposiciones pelos chigres xixoneses. Arantaxa Montejo plantea una utópica propuesta de diálogu; el Comite de Solidaridá cola Causa Árabe enseña Palestina baxo la ocupación, mentes que Ruma Barbero presenta diferentes propuestes de bandera p’Asturies titualada “Asturies patria perdida”. La nueche del sábadu, a partir de les diez, va cellebresa la VIII nueche de música, poesía y cuentacuentos nel patiu del Centru Cultura del Antiguu Institutu. La música va correr a cargu de Juan C. Cadenas (violonchelu), Xicu Queipo (tonada), Llorián García (gaita y vigulín), Pedru Pereira (música d’autor), Dani García de la Cuesta (bandurria) y Samuel Akinola Ogunmola (percusión africana). Con toos ellos va collaborar La Bandina y los integrantes de Flamenco Norte. La poesía va corresponder a tres poetes asturianos como son Xuan Bello, Miguel Rojo y Vanessa Gutierrez, y a dos poetes saharauis, Zahra Hasnani y Ali Salem Iselmu, mentes que los cuentacuentos van ser l’asturianu Carlos Alba “Cellero” y Oihulari Klown. Too ello va tar ilustrao coles diapositives d’Antonio Díaz. El domingu día 23 a partir de les cinco y media la tarde van actuar los grupos K-Nalón, Anyway, Vulnerables y Samuel Akinola Ogunmola. A partir del llunes Les Otres Cares del Planeta van echar una mirada a la sociedá asturiana d’anguaño, van proyectase los cortos asturianos “El aparcamiento”, “ntaína”, “Más allá del cementario”, “Tierra de guerrilleros” y “Amáquina”, van estudiase les migraciones n’Europa y repasase tou tipu de temes, como’l polemicu y actual diálogu con ETA. 20 d'abril, 2006 0 FacebookTwitterPinterestEmail
Cooperación Centroamérica cellebra la II Selmana Asturiana de la Solidaridá by asturnet 19 d'abril, 2006 Ente los díes 28 de mayu y 4 de xunu, va tener llugar ente El Salvador y Nicaragua la II Selmana Asturiana de la Solidaridá en Centroamerica (SASCA ’06), que tienen como oxetivu compartir les esperiencies ente los pueblos y comunidaes de Centroamerica, allegando la so realidá a la d’Asturies. La representación asturiana, que va aprovechar pa visitar diferentes proyectos y programes de desarrollu cofinanciaos por dalgunos organismos públicos y ONGD asturianos, va tar encabeza pol conseyeru de Xusticia, Fracisco Javier García Valledor, y el director de l’Axencia Asturiana d’Emigración, Rafael Palalcios. Yolocamba Solidaridá y la Fundación Hijos del Maíz van ser les organizaciones non gubernamentales presentes na comitiva desplazada a El Salvador. La Selmana asturiana y la Conferencia Internacional sobre salú pública y desarrollu humanu en Centroamerica que se va cellebrar na visita, son actividaes organizaes poles ONGs asturianes Yolocamba Solidaridá y la Fundación Hijos del Maíz, en collaboración coles salvadoreñes APROCSAL y PROCOMES, cola cofinanciación de l’Axencia Asturiana de Cooperación al Desarrollu y l’Ayuntamientu de Xixón. L’Asociación Xurtir, la Televisión Local de Xixón, la Organización Panamericana de la Salú, la Universidá d’El Salvador y l’Alcaldía Municipal de San Salvador presten el so apoyu a esta iniciativa que se cellebra per segundu añu consecutivu. 19 d'abril, 2006 0 FacebookTwitterPinterestEmail
Cooperación El Conseyu de la Mocedá del Principáu d´Asturies entama una asesoría pales asociaciones by asturnet 14 d'abril, 2006 El Conseyu de la Mocedá del Principáu d´Asturies ta acabante de poner en marcha una asesoría pales asociaciones cola fin de facilitar la presentación de proyectos a subvencionar pola Conseyería d’Industria y Emplegu destinaes a financiar la contratación de persones desempleaes que realicen obres y servicios d’interés xeneral y social nel añu 2006. L’Asesoría pretende al mesmu tiempu que facilitar la presentación de los proyectos dar aliendu a les asociaciones pa qu’entamen proyeutos que permitan acoyese a estes subvenciones L’Asesoría funcionará nel Conseyu de la Mocedá del Principáu d´Asturies, el miércoles 19 d´abril de 17:00 a 20:00 hores y el sábadu 29 d´abril y sábadu 6 de mayu de 11:00 a 14:00 h. Nel Conseyu de la Mocedá de Mieres fadrálo’l vienres 28 d´abril de 17:00 a 20:00 hores y nel Conseyu de Mocedá de Xixón el vienres 5 de mayu de 17:00 a 20:00 hores. Tamién podrán emplegar los servicios de l’Asesoría n’Uviéu, nel Conseyu de la Mocedá uvieín el xueves 27 d´abril de 17:00 a 20:00 hores y na Oficina d´Información Xuvenil de Siero¡l vienres 21 d´abril de 17:00 a 20:00. L’Aasesoría tendrá tamién un serviciu itinerante’l llunes 8 de mayu nos Conceyos que recibieren demanda de les asociaciones y un nomáu como Serviciu UVI que se desendolcará’l miércoles 10 de mayu de 17:00 a 20:00 hores. Web de l’Asesoría 14 d'abril, 2006 0 FacebookTwitterPinterestEmail
Cooperación Darréu afonda na so campaña pola llingua asturiana nos institutos by asturnet 31 de marzu, 2006 La organización nacionalista moza Darréu va afondar la so campaña pola llingua asturiana nos centros d’enseñances medies qu’escomenzó nesti cursu y cola que pide la presencia del idioma en tolos centros educativos ensin ratios, asina como una implicación más activa de profesoráu, alumnáu y padres pa col asturiano. La escolarización na llingua propia del país ye un de los oxetivos de la organización moza y tamién que l’asturiano seya l’idioma de comunicación emplegáu nes relaciones de los alumnos col centru y d’esti con ellos, seya oral o al través de la documentación, rotulación y señalización. La campaña de Darréu inclúi amás de la pegada de cartelos y distribución de folletos informativos, l’unvíu de cartes a directores de centros docentes y d’asociaciones de padres y madres. La formación moza caltién que los institutos han tener un papel activu na promoción llingüística:”entendemos que dende les direiciones de los centros educativos se debe puxar pola normalización de la nuesa llingua, afitando la so presencia en tolos ámbitos”, afirma Darréu y defende “que la comunicación entel centru y los pas y mas se faiga nasturianu, que la rotulación de cartelos y anuncies internes tamién tea na nuesa llingua y que se facilite a les persones que quieran la so comunicación col IES correspondiente nasturianu, ya seyan alumnos/es o pas y mas”. 31 de marzu, 2006 0 FacebookTwitterPinterestEmail
Cooperación La FSA y el SOMA enfréntense pol centru de parapléxicos de Llangréu by asturnet 27 de marzu, 2006 El secretariu de la Federación Socialista Asturiana (FSA), Jesús Gutiérrez, tomó posición pública en nome de la so organización nel asuntu qu’enfrenta al cabezaleru del SOMA, José Ángel Fernández Villa, col gobiernu de Vicente Álvarez Areces a cuenta de la pitición del sindicatu pa que’l Principáu construya un centru d’atención a parapléxicos en Llangréu. Gutiérrez pidió respetu a les decisiones del executivu y emplazó a los padres de los posibles destinatarios del centru a qué concretaran qué clase d’equipamientu se pide. El cabezaleru de los socialistes asturianos aludió a Fernández Villa, ensin nomalu directamente, refiriéndose a quien vieno impulsando la idea del centru de parapléxicos que’l Gobiernu asturianu descartara y pidió a estos impulsores de la iniciativa (el sindicatu SOMA) respetu, remembrando que ye l’executivu asturianu quien tien competencies pa facer la planificación sanitaria d’Asturies. Gutiérrez fexo una llamada a la responsabilidá de los que piden el centru de parapléxicos a cuenta de los fondos mineros. El líder del SOMA, Fernández Villa ye’l principal defensor de la construcción del centru asistencial y va unos díes recibió una dura negativa de llabios del presidente Areces, que nuna visita a Llangréu calificó de “non prioritario” pal so gobiernu la construcción del equipamientu sanitariu. Agora, el secretariu d’organización de la FSA toma posición en favor del executivu autonómicu y en declaraciones a diversos medios instó a los padres d’enfermos de paraplexia a concretar “de qué clase de centru se ta falando” y estudiar si tien cabida dientro de la distribución de fondos mineros pa llevalu a cabu. Jesús Gutiérrez aprovechó tamién pa criticar a Izquierda Xunida de Llangréu por intervenir nun asuntu que’l líder socialista consideró “internu” y acusó al cabezaleru local d’IX, Alejandro López, de “buscar la paya nel güeyu ayenu” (n’alusión a los problemes internos de la formación d’izquierdes, recientemente avivaos nel últimu congresu del PCA). 27 de marzu, 2006 0 FacebookTwitterPinterestEmail
Cooperación Palacios pide llealtá y coordinación a los sos compañeros del Gobiernu d’Areces by asturnet 20 de marzu, 2006 El director de l’Axencia Asturiana de Cooperación del Principáu, Rafael Palacios amosóse disgustáu pol anunciu fechu esti 16 de marzu n’Uviéu del ministru d’Esteriores Miguel Ángel Moratinos alrodiu la celebración n’Asturies d’un foru iberoamericanu sobre inversión, cooperación y emigración del que’l responsable nesa materia n’administración autonómica afirmó nun haber sío informáu. Palacios pidió a los sos compañeros de gobiernu “llealtá y sobre too coordinación” pa evitar esta triba de situaciones. El responsable de Cooperación del executivu asturianu fexo estes declaraciones a diversos medios nel Mercáu Ecolóxicu y de Comerciu Xustu de Siero esti domingu 19. Rafael Palacios aseguró desconocer el conteníu y tolo relacionao col alcuentru anunciáu por Moratinos na so recién visita a Asturies, coincidiendo cola ausencia por viaxe de trabayu tanto del propiu titular de Cooperación como del conseyeru de la so estaya, Francisco Javier García Valledor.El ministru d’Esteriores vieno acompañáu de la directora xeneral de Cooperación del gobiernu español, Leire Pajín y aconceyóse col presidente Areces y otros miembros del so gobiernu, ensin que tuviere presente na reunión nengún responsable de la conseyería de Xusticia y Esteriores nin representantes de la coalición socia de gobiernu, Izquierda Xunida-Bloque por Asturies El director de l’Axencia Asturiana de Cooperación y dirixente del Bloque relacionó esti “puentéu” de los sos compañeros de gobiernu con otres actitúes y desalcuentros entamaos nos últimos meses nel senu del executivu ente la fuerza socialista mayoritaria y los sos socios d’IX-BA. 20 de marzu, 2006 0 FacebookTwitterPinterestEmail
Cooperación Sigue la confusión alrodiu del centru cultural de Niemeyer n’Avilés by asturnet 14 de marzu, 2006 El presidente del Principáu, Vicente Álvarez Areces, afirmó esti llunes 13 que los conteníos del futuru centru cultural diseñáu por Oscar Niemeyer pa la ría d’Avilés tán por definir y que nun va ser namás un espaciu museísticu. Mentantu sigue la polémica entamada pola campaña del equipu de gobiernu municipal d’Uviéu pa ubicar el Muséu de los Premios Príncipe nesa ciudá, el patronatu de la Fundación que preside Graciano García reúnese p’analizar la situación creada alrodiu’l proyectu de Niemeyer. Areces reconoció ente los micrófonos de Ser Asturies que’l centru cultural diseñáu pol arquitectu brasileiru p’Avilés “nun ye estrictamente un conceptu de museo, sinón que ye un conceptu d’un ámbitu cultural muncho más grande”. Respective a los conteníos d’esi espaciu cultural, el presidente reconoció tamién qu’inda tán por definir: “El Centru Cultural Oscar Niemeyer va tener usos diversos, que van responder a l’ambición del proyectu y vamos definilos como se fai siempre, nun proyectu museolóxicu que desarrolle el conceptu global del centru”, namás que “cuando todo eso estea definío -dixo Areces-, vamos falar con toa la precisión, como se fai en tolos sitios”. El xefe del executivu especificó que los encargaos de definir esos usos diben ser “empreses y consultoríes espertes, que ye lo que se fai en tolos casos que se desarrolla un gran proyectu cultural”, afirmó. Tocante a les filtraciones de diversos medios respective a la posible desvinculación de la Fundación Príncipe d’Asturies del proyectu agospiáu pol Principáu, tres l’espolín armáu pol Ayuntamientu d’Uviéu, Vicente Álvarez Areces declaró que “nun ye cierto” y que taba “absolutamente convencíu de que la Fundación va participar y colaborar col Principáu nel desarrollu d’esi gran centru cultural”. Pel so llau el patronatu de la Fundación aconceya esti martes 14 pa estudiar la situación creada y les consecuencies pal futuru de la institución de la polémica armada al respective del proyectu d’Oscar Niemeyer. 14 de marzu, 2006 0 FacebookTwitterPinterestEmail
Cooperación El director de l’Axencia de Cooperación entama un viaxe a Colombia by asturnet 9 de marzu, 2006 El director de l’Axencia Asturiana de Cooperación, Rafael Palacios, salió esti miércoles 8 dica Colombia col fin d’estudiar nesi país el siguimientu de los programes financiaos pol gobiernu asturianu en materia d’atención a les víctimes de les violaciones de derechos humanos y otros programes de cooperación que’l Principáu desenvuelve na república sudamericana. Na so estancia en Colombia, Palacios va aconceyase coles autoridaes locales y colos organismos humanitarios insertos nos programes de l’Axencia Asturiana pa recoyer la información necesaria sobre los proyectos desenvueltos nesi país. El responsable de Cooperación del Principáu va participar tamién como observador na Comisión d’Observación de les elecciones al Congresu y al Senáu colombianos que van celebrase esti domingu 12 de marzu. Rafael Palacios tien previsto volver a Asturies el día 17, tres cumplir los sos compromisos nesti viaxe a Colombia. 9 de marzu, 2006 0 FacebookTwitterPinterestEmail
Cooperación Una esposición repasa en Xixón el papel de les muyeres na ciencia by asturnet 8 de marzu, 2006 La presencia y l’ausencia de les muyeres a lo llargo de la hestoria de la ciencia ye’l motivu argumental de la esposición ‘La estirpe de Isis’, entamada pola Fundación Municipal de Cultura de Xixón y abierta coincidiendo cola celebración del Día Internacional de la Muyer esti ochu de marzu. L’amuesa repasa figures esenciales nel ámbitu del conocimientu dende la so condición femenina. La esposición apaez dividida nuna veintena de paneles nos que se desenvuelve’l papel desempeñáu pola muyer nel ámbitu del estudiu científicu. Investigadores como Rosalind Franklyn, revolucionaries como Hildegar vn Bingen o Lynn Margulis o estrelles de Hollywood ya inventores como Hedy Lamarr son protagonistes d’esta hestoria cuntada con güeyos femeninos y na que tienen un sitiu destacáu científiques como Ada Byron King o Madame Curie. L’amuesa ‘La estirpe de Isis. Mujeres en la historia de la ciencia’ ta organizada en común con L’Oreal-UNESCO y puede visitase nel Antigu Institutu de Xixón hasta’l prósimu 31 de marzu. 8 de marzu, 2006 0 FacebookTwitterPinterestEmail
Cooperación Artistes asturianos y del restu l’estáu xunen les sos voces contra la violencia de xéneru by asturnet 7 de marzu, 2006 L’Axencia Asturiana de Cooperación ye la promotora del discu “Ta nes nuestres manes. Non más violencia contra les muyeres”, editáu pol sellu uvieín Fonoastur y nel que collaboren diversos artistes asturianos y del restu l’estáu. Mari Luz Cristóbal Caunedo, Celia González, el colectivu Muyeres, Mikel Laboa, Xuacu Amieva y Joaquín Díaz collaboren nel proyectu que se presentó esti llunes 6 énte la prosimidá de los actos del 8 de Marzu. Amás de los músicos citaos participen con temes propios nel CD el tenor Joaquín Pixán, el cantautor vascu Javier Muguruza, el grupu Retama y los catalanes Lydia Pujol y Miro Casavella. El discu promovíu pola Axencia de Cooperación del Principáu tien una tirada de tres mil exemplares que van distribuíse de baldre per Asturies y per toles comunidaes del estáu. 7 de marzu, 2006 0 FacebookTwitterPinterestEmail