Comunicación Abre Miraes 2007 by asturnet 9 de marzu, 2007 Miraes presenta les 93 meyores semeyes de los fotoperiodistes asturianos nel 2006. La esposición organizada pola Asociación Profesional de Fotoperiodistes d’Asturies fae un recorríu pelos sucesos más significativos d’Asturies a lo llargo del añu pasáu. La esposición ta abierta hasta’l prósimu 23 de marzu nel Palaciu Conde de Toreno d’Uviéu. 9 de marzu, 2007 0 FacebookTwitterPinterestEmail
Comunicación Izquierda Xunida lleva’l peslle de TeleAsturias al Parlamentu Européu by asturnet 7 de marzu, 2007 L’eurodiputáu d’Izquierda Xunida Willy Meyer ta acabante presentar una moción na eurocámara na qu’entruga a la Comisión Europea pola decisión adoptada pola Conseyería d’Economía y Administración de clausurar la señal de TeleAsturias. Na pregunta parlamentaria Meyer indica que “el conceptu de pluralismu ye muncho más amplio que l’accesu a una información variada que permita a los ciudadanos formase una opinión ensin vese influyíos por una fonte dominante”. 7 de marzu, 2007 0 FacebookTwitterPinterestEmail
Comunicación Izquierda Xunida promueve una iniciativa parlamentaria pa que TeleAsturias vuelva a emitir by asturnet 5 de marzu, 2007 El Grupu Parlamentariu d’Izquierda Xunida-Bloque por Asturies esixe l’anulación inmediata de la decisión del Viceconseyeru d’Economía y Administración sobre TeleAsturas. La Proposición considera la decisión del Viceconseyeru “un inaceptable atentáu contra la llibertá d’espresión”. Na Proposición non de Llei’l Grupu Parlamentariu d’Izquierda Xunida-Bloque por Asturies esixe que la Xunta Xeneral se pronuncie pa que se restableza’l serviciu de difusión de la señal de les canales de televisión que non algamaron la llicencia de TDT autonómica. El Grupu Parlamentariu d’Izquierda Xunida recuerda’l compromisu adoptáu pol Parlamentu asturianu pa qu’el gobiernu saque a concursu les dos llicencies de televisión dixital terrestre autonómica que nun s’ufrieron nel primer concursu. La propuesta d’Izquierda Xunida va cuntar, previsiblemente, col sofitu del Grupu Parlamentariu del Partíu Popular. Más de 2000 persones apoyen a los trabayadores de TeleAsturias El pasáu vienres los trabayadores de TeleAsturias, empresa de comunicación afectada pola decisión del Viceconseyeru d’Economía y Administración Pública, recibieron el sofitu d’alredor de 2.000 persones na Plaza de la Escandalera d’Uviéu. Na concentración participaron bien de representantes institucionales como los Grupos Parlamentarios d’Izquierda Xunida-Bloque por Asturies, Partíu Popular, sindicalistes, movimientos vecinales o representantes del asturianismu cultural. Al acabar la concentración un grupu de los ellí concentraos dirixeron les sos crítiques hacia’l Conseyeru de Xusticia, Francisco Javier García Valledor, llegando en dalgún casu a intentar pegar al Conseyeru; la portavoz parlamentaria d’Izquierda Xunida y Secretaria Xeneral del Partíu Comunista foi golpeada. Ente los glayíos que se pudieron escuchar sintiéronse “Asturias castellana” o “Habla en castellano” toos ellos contrarios a la petición de los trabayadores de la cadena de televisión qu’en tou momentu pidieron que la concentración fuera pacífica, y que condenaron los fechos. 5 de marzu, 2007 0 FacebookTwitterPinterestEmail
Comunicación Telecable va ufrir telefonía móvil enantes d’acabar 2007 by asturnet 2 de marzu, 2007 La operadora asturiana va entamar a ufrir serviciu de telefonía móvil nel últimu trimestre de 2007 gracies a un alcuerdu algamáu con Vodafone. Esti alcuerdu va permitir que Telecable se convierta n’operador global de telecomunicaciones, con una oferta integral de servicios qu’inclui la telefonía doméstica y móvil, internet y televisión. L’alcuerdu ente les dos compañíes significa que Vodafone va poner a disposición de la operadora asturiana la so infrastuctura, garantizando la cobertura actual de Vodafone España pa los clientes de Telecable móvil. Telecable optó pola figura d’operador móvil virtual completu, colo que va instalar tolos equipos propios afayadizos cola escepeción de la rede d’antenes que va ser proporcionada por Vodafone. D’esta forma Telecable asegura los servicios de mantenimientu y atención al cliente, asina como los diferentes servicios vinculaos a la telefonía móvil como puede ser la portabilidá de la numeración. Con estes medíes la operadora asturiana asegura la independencia, y la so capacidá de diferenciación de los productos y calidá ofertaos. 2 de marzu, 2007 0 FacebookTwitterPinterestEmail
Comunicación La decisión de pesllar la emisión de TeleAsturias recibe les crítiques de les organizaciones polítiques. by asturnet 2 de marzu, 2007 El coordinador xeneral d’Izquierda Xunida manifestó ayeri que la so formación política “nun comparte la decisión d’impedir que TeleAsturias siga emitiendo”. Jesús Iglesias considera que pesllar una televisión a dos meses de les elecciones “ye una cacicada” pidiendo qu’el presidente asturianu desautorice la decisión de la Conseyería d’Economía y Administración Pública. Izquierda Xunida va presentar de forma urxente una iniciativa parlamentaria na Xunta Xeneral col envís de defender la llibertá d’espresión. Jesús Iglesias dio anuncia de que la decisión de la Conseyería yera “unilateral y qu’Izquierda Xunida nun ye responsable”. Pola so parte Izquierda Asturiana “esixe una rectificación del gobiernu asturianu en rellación col peslle de TeleAsturias”. El candidatu nacional d’Izquierda Asturiana, Inaciu Llope, considera que la decisión ye “un pasu más na dinámica represiva contra toos aquellos que desafíen la visión arecista de la realidá d’Asturies”. Dende Izquierda Asturiana faen pública “la so más enérxica repulsa a la supresión de les emisiones de TeleAsturias”. El partíu de la izquierda asturiana considera qu’el Gobiernu socialista “intentó con esta midida inxustificada eliminar un mediu de comunicación que nun-y yera afín lo que supón una midida inaceptable nun país democráticu”. 2 de marzu, 2007 0 FacebookTwitterPinterestEmail
Comunicación El gobiernu asturianu ordena’l peslle de la señal de TeleAsturias by asturnet 1 de marzu, 2007 El vienres 2 de marzu a les 13.00 hores Retevisión va dexar d’emitir la señal de TeleAsturias. El Viceconseyeru d’Alministración Pública y Presupuestos, Luís Iturrioz, unvió una carta al Director Xeneral de Retevisión pa que proceda al corte de les emisiones “pa dexar pasu a les emisiones de la televisión dixital”. Dende la canal privada de televisión consideren el xestu del gobiernu como “dictatorial” al pesllar la emisión a pocos meses de les elecciones. Nel comunicáu emitíu por TeleAsturias se diz que l’argumentu d’Iturrioz ye “que se tien que dexar pasu a les televisiones qu’algamaron la concesión de TDT”. La concesión de les canales de TDT p’Asturies fízose’l 26 de xineru, y según el comunicáu de TeleAsturias les canales qu’algamaron la concesión entovía nun tienen la infrastuctura afayadiza pa entamar les sos emisiones”. Dende TeleAsturias tán valorando la posibilidá d’emitir mediante la so rede privada de repetidores, ayena a la de Retevisión, sicasí la cobertura de los mesmos sería sólo pa Uviéu y Xixón. La señal de TeleAsturias se pue recibir tamién per internet a través de la so emisión dixital. Actualmente la plantiya de trabayadores de TeleAsturias ye de 50 persones que podríen perder el so puestu de trabayu a partir del 2 de marzu. L’apagón analóxicu ta previsto nel Estáu pal añu 2010, cola escepción de la provincia de Soria que lu va facer en 2008 como preba piloto. Durante esti tiempu taba previsto que les emisiones n’analóxico y dixital convivieren. Retevisión, perteneciente al grupu Abertis, ye la empresa concesionaria de la retransmisión de les señales de televisión nel Estáu español. La empresa ye la consignataria del mantenimientu de la rede de postes repetidores de la señal de televisión y radio nel Estáu español. Tele Asturias 1 de marzu, 2007 0 FacebookTwitterPinterestEmail
Comunicación La hestoria del cómic americanu nel Conceyu Abiertu by asturnet 20 de febreru, 2007 L’artísta plásticu y axitador culturar Enesto Avelino va poner una charla nel Conceyu Abiertu, cai La Gascona 12 d’Uviéu, sobre la hestoria del comic americanu. La charra va tar acompañdada por una proyección que recorre la evolución del xeneru n’América. La charrá va facese a partir de les 20.00 hores. 20 de febreru, 2007 0 FacebookTwitterPinterestEmail
Comunicación TeleCable supera los 121.000 clientes by asturnet 19 de febreru, 2007 La compañía asturiana de telecomunicaciones Telecable superó en 2006 la barrera de los 121.000 clientes, ente particulares y empreses. En 2006 la compañía entamó la estensión de la rede de cable pelos conceyos de Carreño, Gozón y Llanera, al tiempu que completaba Siero, Llangréu y Mieres. Los resultaos d’esplotación de TeleCable nel exerciciu 2006 superaron nun 13% los de 2005 llegando a un volume de negociu del 89%. La compañía asturiana ta acabante d’aumentar n’aprosimadamente nun 50% la velocidá de conexón a la rede d’internet de los sos clientes. Nesti apartáu destaca l’aumentu de más del 17%, hasta les 72.612 conexones, que fae d’Asturies una de les comunidaes con mayor númeru d’usuarios d’internet del estáu. Durante esti añu TeleCable tien proyectada la instalación de la rede de cable per delles villes del país. TeleCable 19 de febreru, 2007 0 FacebookTwitterPinterestEmail
Comunicación Izquierda Xunida y Partido Popular presenten dos proposiciones non de Llei p’aumentar el númeru de canales autonómicos. by asturnet 16 de febreru, 2007 La decisión de la Conseyería d’Infrastuctures de conceder una sola llicencia de canal autonomíca privada de televisión dixital terrestre ta siendo contestada por parte de los grupos del Popular y d’Izquierda Xunida na Xunta Xeneral. Ayeri’l Plenu de la Xunta Xeneral aprobó por unanimidá la revisión de la concesión de llicencies, cola fin de que les canales qu’emiten actualmente n’analóxico faigan lo propio na dixital. Los grupos presentaron esta selmana dos proposiciones non de llei qu’afalen a la concesión d’un mayor númeru de llicencies de televisión dixital p’Asturies. Los dos grupos parlamentarios presentaron dos propuestes nel mesmu sentíu pa que s’entame un nuevu concursu pol que s’adxudiquen más canales autonómiques de TDT. Pel momentu la concesión de la canal privada autonómica recayó nuna emisora vinculada a Localia Asturies. Dase la circunstancia de qu’el mapa audiovisual dixital asturianu entovía nun ta pesllao al quedar les concesiones de televisión na cuenca del Caudal, que nun primer momentu taba xunta la del Nalón. Les dos proposiciones non de Llei fueron almitíes a trámite pola ausencia del diputáu socialista, y secretariu xeneral del SOMA-FIA-UGT, José Ángel Fernández Villa. Dende Izquierda Xunida consideren qu’actualmente dende’l puntu de vista tecnolóxicu hai capacidá técnica d’ufrir les cuatro llicencies autonómiques que permite la llei, motivu pol que van solicitar l’apertura d’un nuevu procesu d’adxudicación que complemente al aprobáu. 16 de febreru, 2007 0 FacebookTwitterPinterestEmail
Comunicación Mocedá d’Izquierda Asturiana y Chobenalla Aragonesista soliciten dominios propios p’Asturies y Aragón by asturnet 14 de febreru, 2007 Les organizaciones xuveniles Chobenalla Aragonesista y Mocedá d’Izquierda Asturiana acaben d’asoleyar un comunicáu conxuntu nel que reclamen qu’Asturies y Aragón dispongan de dominios, n’internet, territoriales pa les sos respectives comunidaes culturales y llingüístiques. Les dos organizaciones vienen collaborando na coordinación de delles campañes ente les que destaca’l blog conxuntu ARAST. Pa estes organizaciones moces algamar un dominiu propiu p’Asturies y Aragón sedrá una aición prioritaria de les sos actividaes. Dende estes organizaciones consideren qu’ente los pasos que se dean pa garantizar la sobrevivencia de les cultures de los dos paises “la presencia y identificación na internet al traviés del .ara y del .ast seríen perimportantes”. Dende les dos organizaciones consideren que pa que la propuesta llegue a bon puertu tien de cuntar col apoyu de los gobiernos autonómicos d’Asturies y Aragón. MIAS y Chobenalla consideren qu’han ser estos los que presenten la candidatura de los dominios a la ICANN, entidá internacional encargada d’otorgar los dominios n’internet. La ICANN yá aniciól períodu de consultes y evaluación de los dominios destinaos a comunidaes específicos que-y presentaron, aprobando hasta agoral dominiu .cat destináu pa la comunidá llingüística y cultural catalana. Amás esisten anguaño distintes iniciatives orixinaes nes comunidaes culturales y llingüístiques dEscocia, Gales, Bretaña y Galicia solicitando los dominios .sco, .cym, .bzh y .gal respeutivamente. Dende les dos organizaciones xuveniles faen un llamáu a les asociaciones, empreses y colectivos, asina como al conxuntu de la ciudadanía pa qu’apoyen esta campaña que tien por finxu afitar la futura imaxe y identidá d’Aragón y Asturies na rede. N’Asturies la reclamación del dominiu .ast ta recibiendo apoyos na páxina por puntu ast que yá recibiere más de mediu centenar d’apoyos a la reclamación de l’aprobación d’un dominiu propiu que represente a la cultura y llingua asturianes na internet. 14 de febreru, 2007 0 FacebookTwitterPinterestEmail