Comunicación Próspero Morán presentó el proyectu d’Asturblog como entamu de periodismu alternativu by asturnet 27 d'ochobre, 2004 La última sesión de les Xornaes d’Estudiu de l’Academia de la Llingua Asturiana foron el marcu escoyíu pol director d’Asturnews, Próspero Morán, p’adelantrar les característiques del proyectu de periodismu alternativu Asturblog, un mediu de comunicación interactivu y abiertu a la contribución de los propios llectores que puede tener una utilidá importante pal desenvolvimientu d’idiomes minorizaos como l’asturianu. El responsable del proyectu resaltó tamién el calter democratizador y críticu d’un mediu llibre de les presiones de los grandes grupos empresariales. Próspero Morán asitió l’espoxigue de les weblog como medios de comunicación altenativos dientro’l contestu del desarrollu tecnolóxicu y de les condiciones qu’ofrez la llamada economía de l’atención. Con fonda difusión na mayoría de los países del nuestru entornu, n’Asturies y en llingua asturiana, inda nun se punxera en rede nengún proyectu asemeyáu, nesi sen, resaltó Morán la importancia d’un proyectu d’edición inminente como Asturblog y el papel que podía xugar na normalización del asturianu, asina como de mediu de comunicación na nuestra llingua ente los falantes espardíos per tol mundu. Les weblog son una modalidá de diarios dixitales que tienen como especial característica el que son los propios llectores los que contribuin a la so redacción coles sos aportaciones y comentarios. La función de los profesionales del periodismu nestos medios interactivos céntrase en contrastar y seleccionar les informaciones o comentarios recibíos pa la so publicación nel blog. Al empar cada testu puede retrucase o ampliase desque apaez colgáu na rede, d’una manera asemeyada al funcionamientu de les cuentes personales de corréu electrónicu. La pluralidá informativa y d’opinión ye ún de los principales atractivos d’estos nuevos medios de periodismu alternativu, son poro canales de “democratización de la propia sociedá y de fomentu del espíritu críticu”, afirmó Próspero Morán. El director d’Asturnews y responsable del proyectu d’Asturblog resaltó la importancia d’esti calter democratizador nuna sociedá como l’asturiana “onde’l défici democráticu amuésase perevidente en situaciones como les que cinquen a la llingua asturiana”, remembró.Como casu nel que se pudieron apreciar les capacidaes como mediu alternativu Próspero Morán punxo acontecimientos recientes como la guerra d’Irak y tolo sucedío dende’l 11-S en Nueva York, nel que les weblog sirvieron pa tresmitir información llibre de la censura impuesta polos medios gubernamentales. Amás de les posibilidaes inescosables qu’ufierta el blog nel desenvolvimientu comunicativu de les llingües minorizaes, Morán punxo exemplos prácticos de la utilidá d’esti mediu, como la edición de periódicos escolares, que pueden compartir diversos centros o interactuar enriba d’ellos. Otru exemplu d’aplicación práctica ye la utilidá qu’un blog tien pa la comunicación d’empreses privaes con proveedores y clientes. El proyectu d’Asturblog va ser el d’un blog d’accesu llibre nel que la única condición va ser que la llingua emplegada polos usuarios sea l’asturianu. La presentación oficial d’Asturblog va facese’l prósimu 1 de payares. 27 d'ochobre, 2004 0 FacebookTwitterPinterestEmail
Comunicación El cursu de comunicación audiovisual pa periodistes n’asturianu aplázase hasta febreru de 2005 by asturnet 24 d'ochobre, 2004 El cursu especializáu de comunicación audiovisual en situación de minorización llingüística que diba impartir la Universidá d’Uviéu ente ochobre de 2004 y xineru de 2005 va aplazase hasta’l primer semestre del añu qu’entra por razones administratives. El calter pluriañal del seminariu plantega los principales problemes a la hora de poder inxertase na programación d’Estensión Universitaria y, según informó a Asturnews la Oficina de Política Llingüística, el cursu va desnvolvese ente’l 25 de febreru y el 1 d’abril de 2005. L’anterior cursu de llingua asturiana nel ámbitu de la comunicación cubrió toles places nos primeros tres díes del plazu de matriculación. Pal cursu de comunicación audiovisual espérase’l mesmu ésitu. La iniciativa d’estos cursos surde del colectivu Peridodistes pal Asturianu, una plataforma que xunta a más d’un cientu de profesionales de la información d’Asturies. Empobináu a la capacitación llingüística de los periodistes qu’exercen el so oficiu nel nuestru país cuenta col sofitu de la Oficina de Política Llingüística de la Conseyería de Cultura y ta inxertáu dientro los programes d’Estensión Universitaria de la Universidá d’Uviéu, que valida’l diploma del cursu. Esti seminariu taba previstu pa los últimos meses d’esti añu y xineru de 2005, problemes de tipu administrativu plantegaos pol calter pluriañal del cursu y el métodu avezáu ente los convenios ente’l Principáu y la Universidá – como el qu’agospia el cursu-, son los causantes del retrasu. El formatu del cursu y los sos conteníos nun sufren nengún cambiu motiváu por esti aplazamientu nel so desenvolvimientu. Talo se programó nun principiu, tien una duración de 30 hores y les materies pa impartise son les de ‘Principios d’ortoloxía de la llingua asturiana’,6 hores, a cargu de Fernando ÁLvarez-Balbuena; ‘Técniques de locución’, 12 hores, impartíu por Próspero Morán; ‘Usu de la llingua en contestu audiovisual, 6 hores, a cargu d’Emilio Peña; y ‘Pautes comunicatives nes llingües minorizaes’: 6 hores, a cargu de Mercedes del Hoyo. El preciu de la matrícula ye de 81 euros y l’aportación total de la Conseyería de Cultura pa la celebración del cursu ye de 3.239 euros. 24 d'ochobre, 2004 0 FacebookTwitterPinterestEmail
Comunicación Vil.lar de Vildas recibe’l Premiu al Pueblu Exemplar 2004 de manes del Príncipe d’Asturies by asturnet 22 d'ochobre, 2004 El centenar de vecinos qu’inda viven en Vil.lar de Vildas reciben esti sábadu el Premiu Pueblu Exemplar d’Asturies 2004 entregáu directamente pol príncipe Felipe, un día después de la solemne ceremonia del Teatru Campoamor d’Uviéu na que s’ufiertaron a tolos otros galardonaos los respectivos premios que concede la Fundación Príncipe d’Asturies. El xuráu del premiu decididió distinguir a esti pueblu del conceyu de Somiedu por saber conxugar l’adaptación a los nuevos tiempos de la globalización tecnolóxica col caltenimientu y conservación del so patrimoniu etnográficu y l’entornu tradicional del llugar. A empiezos de los años 90 del pasáu sieglu Vil.lar de Vildas yera un llugar isláu pola so situación xeográfica y col principal mediu de vida sofitáu n’agricultura y ganadería de sosistencia. La llegada progresiva de visitantes en busca de les escelencies paisaxístiques y naturales de la zona nos últimos tiempos tien consiguío desenvolver diversos proyectos de turismu rural que cambiaron dafechu la vida d’esti pueblu.Conscientes del valor cultural qu’atesoraba’l patrimoniu etnográficu del pueblu los vecinos de Vil.lar de Vildas entamaron el llabor de rehabilitación de les sos viviendes y cabañes de ‘teitu’. Anguaño el llugar ufierta la posibilidá de visitar alrodiu de 65 construcciones col tradicional cubiertu de ‘teitu’ d’escoba. En paralelo al desenvolvimientu turísticu de la zona la xente de Vil.lar de Vildas tienen puesto a funcionar apocayá un sistema de conexón a Internet de banda ancha vía satélite. El xuráu del Premiu Pueblu Exemplar d’Asturies valoró bien positivamente esta apuesta de modernidá d’una pequeña comunidá humana que quier siguir viviendo nel so llugar ensin renunciar a les posibilidaes qu’ufierta’l mundu de les nueves comunicaciones tecnolóxiques. 22 d'ochobre, 2004 0 FacebookTwitterPinterestEmail
Comunicación Uviéu prepárase pa la ceremonia d’entrega de los Premios Príncipe d’Asturies by asturnet 20 d'ochobre, 2004 Los responsables de la Fundación Príncipe d’Asturies rematen los últimos detalles pa que too salga según los planes previstos cuando mañana a les 18,30 hores entame la ceremonia d’entrega de los premios que concede la institución un añu más. Más de setenta televisiones europees van cubrir l’eventu que tamién se va poder siguir en tol mundu en castellano o en inglés al través de la canal puesta en marcha dende la páxina web www.fpa.es dende’l día 14 d’ochobre. Como ye vezu la ceremonia va tar presidida pol Príncipe Felipe, al que por primera vez acompaña nel actu la so muyer Letizia Ortiz. Pel escenariu del Teatru Campoamor dirán desfilando los galardonaos d’esta vixésimo cuarta edición de los Premios a recoyer la distinción de manes del heriede de la corona española. Los premiaos esti añu nes estremaes categoríes son Claudio Magris, nel apartáu de les Lletres; Paul Krugnman, premiu de Ciencies Sociales; Jean Daniel, premiu de Comunicación y Humanidaes; Francisco Sánchez Gómez ‘Paco de Lucía’, premiu de les Artes; Hicham El Guerrouj, premiu de los Deportes. Nel apartáu de la Investigación Científica y Técnica, comparten el galardón: Judah Folkman, Tony Hunter, Joan Massagué, Bert Vogelstein y Robert A. Weinberg. Los premios de la Concordia y de Cooperación Internacional foron respectivamente pal Camín de Santiago y pal Programa Erasmus de la Unión Europea. La ceremonia rematará cola interpretación de los himnos d’Asturies y d’España. El sábadu 23 los Príncipes d’Asturies van treslladase hasta Vil.lar de Vildas, en Somiedu, pa facer entrega del Premiu al Pueblu Exemplar a los vecinos del llugar. 20 d'ochobre, 2004 0 FacebookTwitterPinterestEmail
Comunicación Asturnews presenta la so cadarma dixital nun Congresu en Venezuela by asturnet 18 d'ochobre, 2004 El diariu Asturnews.com yera protagonista cimeru de la primer xornada del Primer Congresu de Periodismu Dixital 2004 que se cellebra en Maracay (Venezuela)esta selmana y que se plantega como obxetivu lanalís de les tendencies ya impactos nel exerciciu de la profesión periodística online. El direutor dAsturnews, Próspero Morán, foi ún de los ponentes y presentó como exemplu innovador la cadarma dixital del diariu asturianu nuna ponencia que falaba del rol y el perfil del periodista online. Próspero Morán presentól modelu dAsturnews como exemplu del enfotu didácticu y pedagóxicu que tienen de tener los medios dixitales, sobremanera cuando sempobinen a una comunidá billingüe como yel casu de lasturiana. Emplegando exemplos que diben dende la consulta lésica direuta nuna páxina web hasta laprovechamientu teunolóxicu pa producir testos comprensibles por llectores que falen estremaes variantes duna llingua como asocede col castellán mesmu ente Arxentina, Venezuela y España. El direutor dAsturnews conminó a los participantes del Congresu a que en un contexto de grandes avances comunicativos y tecnológicos que permiten la personalización con fines informativos y culturales además de comerciales, dejen de actuar como medios de masas y comuniquen uno a uno. Les conmino a que hagan un esfuerzo de autocrítica y otro aún más importante por arriesgar mínimamente para evitar que el carro se ponga delante de los bueyes, que nuestros usuarios nos abandonen en cuanto alguien les ofrezca el más elemental avance que mejore su lectura en rapidez y calidad. Esti primer congresu entamó a les tres de la tarde col aportar del Profesor de la Universidá Católica Andres Bello, Fernando Núñez, falando alrodiu del periodismu dixital en Venezuela, y col del Direutor de www.tendenciasdigitales.com, Carlos Jiménez quufiertó un perfil del usuariu venezolanu. Depués de les diez de la mañana (siempre falando de la hora local en Venezuela que ye de seis hores menos que n’Asturies) intervinieron José Alonso Seco, Profesor de la Carlos III, sobro les estratexes pa cautivar a los usuarios; y el direutor de Clarin dixital, Guillermo Cullel, que desplicó la oferta informativa nos medios dixitales. Y darréu de la xinta, ficiéronlol direutor de www.elmundo.es, Gumersindo La Fuente, el Profesor dela Universidáde Californi, Francis Pisani, el direutor de www.elcomercio.com.pe, Juan Carlos Luján, ya Ignacio Escolar, redactor de Tele5. La xornda pesllólal direutor dAsturnews.com, Próspero Morán, falando alrodiu del rol y el perfil del periodista online cola ponencia entitulada Metaperiodistas: Retos y desafíos frente a la incorporación de las Nuevas Tecnologías. Tres xornaes de trabayu y destudiu El Congresu va siguir esti martes 18 dcohobre cola participación de profesores como Raón Salaverría, de la Universidá de Navarra, María José Cantalapiedra, de la Universidá del País Vascu, o Adriana Cely de la Uiversidá del Zulia de Venezuela. El desendolcu de les ponencies y alderiques finarál miércoles 20 dochobre col ponencia de la Editora de www.BBCmundo.com , Carmen González, que falará sobro Cómo Internet ha facilitado la labor de las transmisiones y la cobertura a tiempo real. Programa completu del Primer Congresu de Periodismu Dixital de Maracay 18 d'ochobre, 2004 0 FacebookTwitterPinterestEmail
Comunicación Los actos de los Premios Príncipe d’Asturies van poder siguise por internet by asturnet 12 d'ochobre, 2004 Los actos centrales de la programación de la entrega de los Premios Príncipe d’Asturies van poder siguise un añu más dende cualquie llugar del mundu al través de la web WWW.CANALFPA.COM. La páxina de la Fundación recibió na edición anterior alrodiu de sesenta mil visites y nos Premios de 2004 espérase sobrepasar el númberu de navegantes que s’adientren a siguir los actos públicos entamaos pola institución privada asturiana. El dominiu de la Fundación Príncipe d’Asturies ta na rede dende’l xueves 14 y va incluir animaciones multimedia, galería d’imáxenes, axenda d’eventos y un siguimientu innformativu diariu de los distintos actos programaos. La canal d’internet ufierta al empar una versión en inglés nomada www.fpachannel.com. A entrambes páxines va poder accedese dende la propia web de la Fundación www.fpa.com. Na emisión de la canal puesta en marcha polos responsables de la institución que concede los Premios Príncipe van poder siguise tolos actos y una especial relevancia van tener los elementos interactivos que se van poder visionar sobro cadún de los galardonaos y sobro la mesma ceremonia d’entrega. 12 d'ochobre, 2004 0 FacebookTwitterPinterestEmail
Comunicación La radiotelevisión autonómica asturiana va empezar emitir nel veranu de 2005 by asturnet 7 d'ochobre, 2004 L’ente públicu de radiotelevisión asturiana va entamar les sos emisiones nel segundu semestre de 2005 y va tener el so allugamientu permanente nel recintu de la Universidá Llaboral de Xixón. La noticia adelantrada ayer pol presidente Areces en Sao Paulo al grupu de periodistes qu’acompañen la delegación institucional y publicada nel diariu El Comercio, confirmóla güei la conseyera de Cultura, Comunicación Social y Turismu, Ana María Migoya en declaraciones a la axencia EFE. Escampla asina el futuru inmediatu d’un de los proyectos ‘estrella’ del actual gobiernu del Principáu. Dos de les principales dubies d’ente los proyectos más ambiciosos que l’executivu autonómicu quier ver cumplíos y funcionando nel so mandatu, el de l’ente públicu de comunicación audiovisual y dixital, acaben de ser aclariaes por voz del presidente Vicente Álvarez Areces y de la so conseyera Ana María Migoya. Les primeres emisiones de la radio y la televisión autonómiques tan previstes pal empiezu del segundu semestre del añu 2005, provablemente a finales de veranu, si se cumplen los deseos del gobiernu d’Asturies. L’asitiamientu definitivu de les istalaciones centrales de la radiotelevisión pública del Principáu va tar nel qu’hasta agora se caltenía como ubicación provisional mientres duraren les obres de construcción d’un complexu nuevu allugáu nel Parque Tecnolóxicu de Llanera. Los costes elevaos d’estes istalaciones de nueva planta faen al executivu asturianu descartar esta opción y apostar pol antigu conventu de les clarises de la Universidá de Xixón. 7 d'ochobre, 2004 0 FacebookTwitterPinterestEmail
Comunicación Emilio Fernández Peña algama’l premiu extraordinariu de tesis doctorales de la UPV by asturnet 5 d'ochobre, 2004 L’asturianu Emilio Fernández Peña, profesor de la Universidad Autónoma de Barcelona na Facultad de Periodismo, acaba recibir el premiu extraordinariu de tesis doctorales de la Universidá del País Vascu (UPV)col trabayu “Los servicios de televisión por cable en España 1996-2000: operadores, contenidos y consumos”. Emilio Fernández Peña ye una autoridá en tolo que cinca a la banda ancha española y ye ún de los profesores del claustru que tien d’impartir el segundu de los cursos entamaos pola Universidá d’Uvieu pa especializar a periodistes nel emplegu de les llingües en contestos de minorización. La tesis doctoral, “Los servicios de televisión por cable en España 1996-2000: operadores, contenidos y consumos” recibió’l premiu extraordinariu de tesis doctorales de la Universidad del País Vasco, xunta otres 7 tesis defendíes nes estremaes facultaes del área de Ciencies Sociales y Xurídicas de la UPV-EHU defendíes toes elles nos años 2001 y 2002. La tesis d’Emilio Fernández Peña céntrase nos servicios de televisión multicanal qu’ufierten los operadores y que son de ñatura asemeyada a los emitíos por Digital+. Entama con una contextualización hestórica del xurdimiento d’estos servicios nos Estaos Xuníos que lleva a l’aprobación de la Telecommunication Act de 1996. Darréu aborda’l caso español tamién dende una perspeutiva hestórica arrancando a metanes de los años 80 con el xurdimiento de los videos comunitarios y modestos operadores qu’entamen sobre manera nel Sur y Levante peninsulares. Esti trabayu recoye y procesa les fiches de los más de 200 operadores que desendolcaben la so actividá nel momentu de l’aprobación de la Llei de Telecomunicaciones por Cable el 22 d’Avientu de 1996. Dende ehí céntrase nos operadores de cable actuales, que xurdieren a partir de 1996, y en los contenidos de televisión multicanal que distribuín. Finalmente fala tamién de los usos y consumos que los abonaos al cable y al Satélite Digital fain de la televisión, con especial atención al emplegu del mandu a distancia, los modos de consumu de lo estremaos paquetes de programación (básicu, premium y pagu por programa o pay per view de fútbol y pélículae). Esti ye’l primer trabayu n’España que, dende l’academia y la empresa, analiza los modos de ver televisión de los abonaos a los diferentes soportes de la televisión multicanal (satélite y cable) cofrontados. El premiu constitui un reconocimiento a la calidad y oportunidad del trabayu y al prestigxu de las revistes científiques especializaes en comunicación nes que se espublizaron diferentes partes de la tesis premiada. Ente elles destaquen les revistes internacionales en Inglés European Journal of Communication Research (Berlin), La Gazzete: International Journal of Communication (Amsterdam) y la española Telos, amás de la monografía espublizada por Ediciones Nobel en 2002: “Las telecomunicaciones por cable: el negocio de la convergencia digital”Artículo “Cable y satélite: equipamiento del hogar y consumo televisivo” 5 d'ochobre, 2004 0 FacebookTwitterPinterestEmail
Comunicación Entama’l Cursu de llingua asturiana nel ámbitu de la información y comunicación de la Universidá d’Uviéu by asturnet 2 d'ochobre, 2004 Col mes d’ochobre entamó tamién el primer Cursu de llingua asturiana nel ámbitu de la información y comunicación que desendolca la Universidá d’Uviéu depués de 17 años de cellebrase’l primer cursu d’estes calterístiques n’Asturies. Los 35 alumnos que participen nesti cursu y qu’agotaron les places a los tres díes d’entamar el plazu matrícula ya participaron el vienres n’Uviéu y el sábadu en Xixón nes dos primeres clases. La Universidá estrénase na convocatoria na formación de periodistes n’asturianu y plantega dos cursos estremaos. El primeru d’ellos entamaba esti 1 d’ochobre y va desendolcase hasta’l 13 de payares baxo la denominación ‘Cursu de llingua asturiana nel ámbitu de la información y comunicación’, con un preciu de matrícula de 81 euros -pero reducíu nun 40 por cientu acordies con una subvención de la Dirección Xeneral de Política Llingüística’l Principáu-. Dirixíu por los profesores universitarios Xulio Viejo y Ramón D’Andrés, el cursu empobínase preferentemente a periodistes titulaos o profesionales de los medios de comunicación con esperiencia, ya incorpora conteníos de gramática, rexistros comunicativos y asturianu faláu y escritu, con Pablo Texón, Xosé Nel Comba y Fernando Álvarez Balbuena como profesores. El segundu de los monográficos denomínase ‘Cursu especializáu de comunicación audiovisual nes situaciones de minorización llingüística’ ya impartiráse del del 26 de payares al 22 de xineru, con una matrícula de 81 euros que podrá formalizase entá en feches prósimes: del 29 d’ochobre al 11 de payares. Ente los docentes qu’exercerán de profesores nel cursu -que quier formar a periodistes nel usu d’asturianu en radio y televisión- figura Próspero Morán, director d’Asturnews, que participa nel monográficu en calidá de profesor de la Universidá Carlos III de Madrid. Les 30 hores llectives de caún de los cursos impartiránse na tarde de los vienres na Facultá de Filoloxía d’Uviéu y los sábados pola mañana nel Antiguu Institutu de Xixón. Programa de los cursos na web de la Universidá d’Uviéu 2 d'ochobre, 2004 0 FacebookTwitterPinterestEmail
Comunicación La Fundación Príncipe convida a Stephen Hawking pa inaugurar el venticincu aniversariu de los premios by asturnet 28 de setiembre, 2004 La Fundación Príncipe d’Asturies quier traer a Uviéu al mayor númberu de galardonaos nos sos premios pa los actos conmemorativos del venticincu aniversariu de la institución. Dase por seguro que l’entamu de la celebración va ser una conferencia del científicu británicu Stephen Hawking alrodiu de les sos últimes investigaciones. El cineasta Woody Allen tamién va participar nos actos del aniversariu ufiertando un conciertu de clarinete cola so banda de jazz. La Fundación negocia col artista niuyorquín una posible colaboración nuna de les sos películes. La conferencia de Hawking va desenvolvese al empiezu de los actos conmemorativos del aniversariu na primavera del añu qu’entra y el sitiu escoyíu pa celebrala va ser el Teatru Campoamor d’Uviéu. Destamiente, la institución asturiana quier personificar na figura del formulador de la teoría del Big Ban la recordanza de tolos galardonaos nos sos premios internacionales Un de los proyectos más ambiciosos nos que trabaya anguaño la Fundación Príncipe d’Asturies ye la construcción d’un muséu qu’ofreza un recorríu pela hestoria de los premios y que podía tener lista la primer fase coincidiendo col venticincu aniversariu de la institución 28 de setiembre, 2004 0 FacebookTwitterPinterestEmail