Comunicación L’ex director del centru territorial de TVE, acusáu de graves manipulaciones, ‘recolócase’ en Telemadrid by asturnet 15 de febreru, 2005 D’una cadena pública a otra. L’ex director del centru territorial de Televisión Española n’Asturies, José Antonio Ovies, al que trabayadores de TVE achacaron graves y regulares manipulaciones informatives, integróse nel equipu d’informativos de Telemadrid, cadena na que presenta un programa selmanal y na que se destacó’l pasáu domingu na cobertura en directu del incendiu de la Torre Windsor. Ovies salió de la delegación asturiana de TVE en xunu pasáu con mala prensa al llombu. Nun informe ellaboráu por trabayadores del centru de Televisión Española en San Esteban de les Cruces, atribuíense-y al periodista, ente otres manipulaciones, la grabación previa d’un informativu ficticiu sobro la fuelga xeneral del 20 de xunu de 2002 y la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq, con plena conocencia previa de la falsedá de la noticia. Amás, trabayadores de TVE n’Asturies denunciaron en so día el so ablucamientu al comprobar cómo’l so superior decidía abrir l’informativu territorial asturianu del 27 d’ochobre de 2003 cola noticia -d’ámbitu madrilanu- de la victoria de la candidata’l Partíu Popular, Esperanza Aguirre, nes elecciones de Madrid. Destituyíu del so cargu nel Principáu tres de la llegada’l PSOE al Gobiernu central -cuando lu sucedió Pedro Alberto Marcos– Ovies pasó a trabayar a la cadena pública Telemadrid, cuyes directrices básiques marca’l PP, fuercia política mayoritaria tanto nel Ayuntamientu como na Comunidá autónoma de Madrid. Amás de participar na cobertura en directu del incendiu na Torre Windsor -quince hores siguíes d’emisión con puntes d’audiencia del 65 por cientu en Madrid-, José Antonio Ovies presenta’l programa selmanal d’actualidá ‘Madrid 7 días’, según informa la web de la cadena madrilana. 15 de febreru, 2005 0 FacebookTwitterPinterestEmail
Comunicación La Universidá amplía’l plazu de matrícula pa cubrir toles places del cursu de llingua pa periodistes by asturnet 14 de febreru, 2005 Trece díes más. La Universidá d’Uviéu amplía nesos términos el plazu d’inscripción pal cursu especializáu d’asturianu empobináu a periodistes, depués que nel tiempu ordinariu de matrícula se cubrieren 38 de les 45 places disponibles. El nuevu plazu ta yá abiertu y acabará’l prósimu 23 de febreru, dos díes antes del aniciu’l cursu. La Conseyería de Cultura, Comunicación Social y Turismu, que participa na organización del cursu al traviés de la Oficina de Política Llingüística, comunicó esti mediudía la prórroga nel plazu de matrícula pal cursu, qu’afondará nes singularidaes de la comunicación nun contestu de convivencia de les llingües castellana y asturiana. Con un preciu d’inscripción de 81 euros, el cursu d’Estensión Universitaria ‘Comunicación audiovisual en situaciones de minorización llingüística’ desendolcaráse hasta’l 9 d’abril con dos clases selmanales -vienres y sábados- na Facultá de Filoloxía d’Uviéu y nel Antiguu Institutu Xovellanos de Xixón. La llista de profesores ta encabezada por Xuan Busto en calidá de director ya inclúi, ente otros docentes, al director d’Asturnews y profesor na Universidá Carlos III de Madrid, Próspero Morán. El pasáu mes de payares, la Universidá completó un primer cursu especializáu d’asturianu pa periodistes que se desendolcó baxo la dirección de Xulio Viejo y en cuya presentación la conseyera de Cultura, Ana Rosa Migoya, aseguró que “ye una obviedá” que la llingua asturiana tará presente na nueva radiotelevisión autonómica. 14 de febreru, 2005 0 FacebookTwitterPinterestEmail
Comunicación Pérez Ornia defende una tv autonómica plural ya independiente qu’espeye la singularidá d’Asturies by asturnet 31 de xineru, 2005 Una radiotelevisión independiente y plural, qu’espeye les “actuales manifestaciones culturales y artístiques, y los valores diferenciadores del Principáu”. Esi ye’l modelu de tv autonómica qu’esti mediudía defendió n’Uviéu el periodista y profesor José Ramón Pérez Ornia, al tomar posesión como director xeneral del nuevu ente. Na so primer alocución pública como másimu responsable de la radiotelevisión pública, Pérez Ornia aseguró que la programación del nuevu mediu de comunicación tien que s’afitar nos valores cívicos, culturales y democráticos, colos informativos como pegollu sustancial y cola vocación d’apurrir un nuevu preséu pa dibuxar la cotidianidá d’Asturies. La tv autonómica, sorrayó Ornia, vien a sumar, y non a restar, respecto a los canales que yá esisten. La toma de posesión de Pérez Ornia al frente de la nueva radiotelevisión pública asturiana culmina dos intensos meses de trámites alministrativos pa la efectiva puesta en marcha del ente de comunicación: El nome’l profesor y periodista sonó por primer vegada como candidatu a dirixir la tv a mediaos d’avientu, una conxetura que’l Conseyu de Gobiernu ratificó na so xuntanza del pasáu 19 de xineru, depués de recibir el preste al nomamientu por parte’l conseyu d’alministración del ente. Ex director xeneral de la cadena pública Telemadrid ente 1991 y 1994 y ex trabayador del diariu El País, ente otres responsabilidaes exercíes nuna bayurosa esperiencia llaboral nel ámbitu’l periodismu, Pérez Ornia imparte clases de Programación de radio y televisión nel departamentu de Comunicación Audiovisual y Publicidá I de la Facultá de Ciencies de la Información de la Universidá Complutense de Madrid. Según les previsiones del Gobiernu asturianu, la tv autonómica empezará emitir en prebes nel segundu semestre d’esti añu dende’l so allugamientu provisional na Universidá Llaboral de Xixón. Amás de la televisión, l’ente públicu dotaráse d’una radio y un portal d’internet. Archivu. El conseyu de la tv autonómica avala la elección de Pérez Ornia como director pola so independencia 31 de xineru, 2005 0 FacebookTwitterPinterestEmail
Comunicación Radio Sele aumentará la so plantiella y programación tres de recuperar nel xulgáu la llicencia’l Principáu by asturnet 31 de xineru, 2005 Más llocutores, programación ampliada ya ingresos publicitarios propios d’una radio convencional. Radio Sele, qu’emite dafechu en llingua asturiana dende 1986, enfótase nesi horizonte depués de más de tres años de pleitos y espera la execución de la sentencia qu’obliga al Principáu a devolve-y la llicencia revocada en 2001. Asina lo rafitica’l responsable de la entidá, Xuan Xosé Mariño, que’l vienres pasáu anunció en Xixón el fallu xudicial favorable a la emisora y qu’agora espera la resolución de delles notes aclaratories a la sentencia dictada pol Tribunal Superior de Xusticia d’Asturies (TSXA), referíes a cuestiones puramente formales. Pesie a esa espera, la razón ye yá de Radio Sele, según Mariño, porque la sentencia nun foi recurrida pol Principáu dientro’l plazu establecíu y poro ye firme. N’esencia, el fallu del altu tribunal asturianu anula dafechu la revocación de la llicencia concedida a Radio Sele pol Gobiernu en funciones de Sergio Marqués, qu’en 2001 anuló’l primer Executivu de Vicente Álvarez Areces en beneficiu d’otru de los candidatos nel concursu. Esta resolución prueba, sostién Mariño, “que’l Principáu nun pue facer lo que fizo y correxise a sí mesmu”, y plantega un escenariu alentador pa la emisora anguaño llibre, qu’agora podrá entamar un procesu de profesionalización con un equipu mixtu, integráu por collaboradores actuales y por nuevos trabayadores profesionales. Amás, la emisora abandonará la so frecuencia actual, el 106.5 de la frecuencia modulada, pa desplazase a un puntu’l dial más céntricu y con mayor cobertura. Lo que queda por determinar ye’l plazu en qu’eso ocurrirá. Pol momentu, Radio Sele mantién -tamién na vía de lo contencioso-alministrativo- un segundu pleitu contra l’Alministración autonómica pa reclamar indemnizaciones por los perxuicios que supuso pa la emisora la revocación de la llicencia. Radio Sele empezó a emitir en febreru de 1986 y dende entós convirtióse na única entidá radiofónica durable que mantuvo una programación estable dafechu en llingua asturiana. La retirada, en 2001, de la llicencia concedida dos años antes truncó l’espoxigue de la emisora, con capacidá p’algamar a una audiencia potencial d’unes 800.000 persones. 31 de xineru, 2005 0 FacebookTwitterPinterestEmail
Comunicación La Universidá abre’l plazu de matrícula pal segundu cursu d’asturianu pa periodistes by asturnet 24 de xineru, 2005 Hasta’l 10 de febreru. La Universidá d’Uviéu abre güei el plazu de matrícula pal so segundu cursu especializáu d’asturianu pa periodistes titulaos o con esperiencia, un monográficu que fora pospuestu por razones alministratives y que finalmente va cellebrase ente’l 25 de febreru y el 9 d’abril con 45 places disponibles y un preciu d’inscripción de 81 euros. En términos xenerales, el cursu desendolcaráse como taba previsto nun principiu: Les clases impartiránse vienres y sábados na Facultá de Filoloxía, N’Uviéu, y nel Antiguu Institutu Xovellanos de Xixón, y la nómina de profesores ta encabezada por Xuan Busto en calidá de director ya inclúi, ente otros docentes, al director d’Asturnews y profesor na Universidá Carlos III de Madrid, Próspero Morán. Asinamesmo, el monográficu formativu d’Estensión Universitaria, que nun proporciona créitos de llibre configuración y, poro, nun tien valor académicu pa superar una carrera, ta empobináu de forma preferente a periodistes titulaos o profesionales con esperiencia nos medios de comunicación. El pasáu mes de payares, la Universidá completó un primer cursu especializáu d’asturianu pa periodistes que se desendolcó baxo la dirección de Xulio Viejo y en cuya presentación la conseyera de Cultura, Ana Rosa Migoya, aseguró que “ye una obviedá” que la llingua asturiana tará presente na nueva radiotelevisión autonómica. L’apertura del plazu d’inscripción coincide cola cellebración en tol Estáu de la festividá de San Francisco de Sales, patronu de los periodistes, una conmemoración que los profesionales asturianos de la información secundarán con una xinta de confraternización entamada pola Asociación de la Prensa d’Uviéu. 24 de xineru, 2005 0 FacebookTwitterPinterestEmail
Comunicación Avilés sedrá esti añu la capital del periodismu español by asturnet 21 de xineru, 2005 Más de 200 periodistes de toa España van citase n’Avilés pa falar y escribir sobro’l so oficiu en llugar de facelo en Xixón como se ficiera anuncia hai un mes. La Villa del Adelantáu va acoyer ente’l 24 y el 26 de xunu de 2005 la IV Convención de Periodistes d’España, un alcuentru entamáu poles organizaciones corporatives de los profesionales de la información y que tien d’abordar les condiciones llaborales y la nueva regulación llegal de la profesión. Esti segundu puntu tendrá una presencia destacada nes tres xornaes d’alderique periodísticu n’Asturies, yá que según les previsiones espresaes polos organizadores del cónclave les feches del congresu coincidirán col desendolcu nes Cortes del Estatutu’l Periodista Profesional, un testu normativu llargamente xestáu que pretende regular el llabor de los informadores. Desto falose esta selmana en Valencia na Xunta que caltuvieron AGP-UGT, AP-CCOO, FAPE, la Federación de Sindicatos de Periodistes y los Colexos de Periodistes de Catalunya y Galicia. L’alcuentru, como ya informare Asturnews a finales del mes pasáu ocuparáse amás de forma singular del papel del periodismu na sociedá d’anguaño y del precarizáu réxime llaboral nel que trabayen los profesionales de los medios, que n’Asturies nun cuenten con un sindicatu específicu nin con Colexu Profesional propiu, sinón con una xenérica Asociación de la Prensa. Xunta Cataluña, Madrid, Andalucía, Baleares, La Rioja y Canarias, la vecina Galicia ye la comunidá que más recientemente orixinó un sindicatu de periodistes, órganu cuyu congresu constituyente ta fixáu pal prósimu mes de febreru y nel que yá figuren más d’un cientu de profesionales de los medios de comunicación gallegos en calidá de preafiliaos. La IV Convención de Periodistes d’España aportará a Avilés depués de pasar, n’años anteriores, por Cádiz, Valladolid y Tarragona, y ta promovida pol Foru d’Organizaciones de Periodistes (FOP), qu’a la so vegada integren les agrupaciones de periodistes d’UXT y CCOO, los Colexos Profesionales de Periodistes de Cataluña y Galicia, la federación d’Asociaciones de la Prensa y la Federación de Sindicatos de Periodistes. N’Avientu fízose l’anuncia de que la convención sedría en Xixón 21 de xineru, 2005 0 FacebookTwitterPinterestEmail
Comunicación Un 80 por cientu de los ciudadanos apoya la tv autonómica, según la Unión de Consumidores by asturnet 19 de xineru, 2005 Un 80 por cientu de los ciudadanos sofita la creación de la tv autonómica, según una encuesta de la Unión de Consumidores d’Asturies ellaborada ente los usuarios que formularon consultes al gabinete xurídicu d’esa entidá. El Gobiernu nomó güei formalmente al periodista y profesor José Ramón Pérez Ornia como director xeneral del nuevu ente públicu de comunicación. Pa realizar la so estimación, los representantes de los consumidores entrugáron-yos a los ciudadanos ente los pasaos 11 y 13 de xineru y constataron que la práctica unanimidá de los encuestaos -un 94 por cientu- nun tán satisfechos cola programación televisiva qu’anguaño ufren les distintes cadenes n’Asturies. Esi altu porcentaxe baxa al 88 por cientu nel casu de los ciudadanos qu’albidren necesaria una mayor presencia nes pantalles de lo qu’asocede nel Principáu, reclamación que se relaciona directamente cola creación d’una nueva radiotelevisión pública qu’espeye lo qu’asocede nel Principáu. La Unión de Consumidores d’Asturies -cuyu presidente, Dacio Alonso, presentó esta mañana los datos del sondéu- cuenta con un representante nel conseyu consultivu de la tv autonómica, cargu qu’ocupa Daniel Vega. L’envís declaráu de la entidá presidida por Alonso ye mirar pola pluralidá nos conteníos y pola atención a les comarques alloñaes del triángulu central d’Asturies pa qu’oriente y occidente tengan un pesu propiu na programación. El Conseyu de Gobiernu nomó güei de forma oficial a José Ramón Pérez Ornia como director xeneral de la nueva radiotelevisión pública asturiana, trámite que completa formalmente la creación y puesta en marcha de la tv enriba de tres pegollos: los conseyos d’alministración y comunicación -dambos yá constituyíos- y el propiu director, qu’agora entainará tolos pasos pal aniciu de les emisiones. Pérez Ornia tomará posesión el prósimu 31 de xineru. 19 de xineru, 2005 0 FacebookTwitterPinterestEmail
Comunicación El grupu Recoletos reparte na cai los primeros 40.000 exemplares del so nuevu periódicu gratuitu by asturnet 18 de xineru, 2005 Un nuevu diariu arriquez dende güei la competencia na prensa en papel d’Asturies. El grupu de comunicación Recoletos reparte dende primer hora de la mañana, n’estaciones y otros puntos de tránsitu d’Uviéu y Xixón, los 40.000 exemplares del so nuevu periódicu gratuitu pal Principáu, qu’incorpora noticies en llingua asturiana nes sos páxines d’información xeneral. Nel so primer númberu, el diariu de baldre ‘Que!’ asoleya 32 fueyes con fuerte presencia de la información d’ámbitu estatal y un total de nueve páxines con conteníos de sociedá, cultura, sanidá, deportes y ociu específicamente asturianos. La nueva publicación fai asinamesmo un apueste pola publicación de testos editaos nos blogs qu’hablita el diariu na so dirección d’internet. Dirixíu en Madrid pol periodista asturianu Alejandro Sopeña, con amplia trayectoria nel grupu Recoletos -responsable, ente otres cabeceres, de Marca y Expansión-, el primer periódicu gratuitu d’información xeneral y tirada masiva que ve la lluz n’Asturies ta ellaboráu dende Uviéu por un equipu d’once trabayadores baxo la coordinación de Juan Carlos Villar. El diariu forma parte d’un proyectu a nivel estatal qu’inclúi otres once cabeceres n’otres tantes ciudaes d’España y una tirada conxunta d’un millón d’exemplares, con 7.500 puntos de distribución. ‘Qué!’ saldrá a la cai de llunes a vienres y fará usu de la política de ‘copyleft’ que vien desendolcando Asturnews, que permite reproducir llibremente les noticies del diariu cultural n’asturianu col únicu requisitu de citar la fonte. Web del diariu ‘Qué!’ 18 de xineru, 2005 0 FacebookTwitterPinterestEmail
Comunicación El conseyu de la tv autonómica avala la elección de Pérez Ornia como director pola so independencia by asturnet 12 de xineru, 2005 Un trámite más. El conseyu d’alministración de la radiotelevisión autonómica asturiana dio-y el so preste al nomamientu de José Ramón Pérez Ornia como director del ente, n’atención a la so independencia y profesionalidá. La periodista avilesina Montserrat Fernández Villa perfílase como probable directora d’informativos de la nueva tv pública, que nun algamará plenu rendimientu hasta mediaos de 2006. Na so primer xuntanza depués de la so constitución, el conseyu d’alministración de la radiotelevisión avaló’l perfil de Pérez Ornia pal puestu de másimu responsable del ente y cumplimentó’l penúltimu trámite pa que’l periodista y profesor universitariu tome posesión del so cargu: Agora sólo queda la ratificación formal del Conseyu de Gobiernu. Darréu se dea esti pasu, la tv autonómica tará yá en condiciones d’echar dafechu a andar -depués de la constitución, el llunes pasáu, del conseyu consultivu del ente-, pero’l plenu rendimientu de la radiotelevisión nun s’algamará hasta mediaos de 2006. Hasta entós conformaráse una plantiella de trabayadores que nun empezará a esbillase, por concursu públicu, hasta depués de Selmana Santa. Antes d’ello, la radiotelevisión ha nomar otros cargos de responsabilidá, ente ellos el de xefe d’informativos. Pa él perfílase como candidata, según publica na so edición de güei el diariu ‘La Nueva España’, la periodista avilesina Montserrat Fernández Villa, con amplia esperiencia en televisión (‘Caiga quien caiga’, ‘Lo + Plus’, ‘Qué me dices’), radio y gabinetes de comunicación. Según les previsiones del Gobiernu asturianu, la tv autonómica empezará emitir en prebes nel segundu semestre d’esti añu dende’l so allugamientu provisional na Universidá Llaboral de Xixón. Amás de la televisión, l’ente públicu dotaráse d’una radio y un portal d’internet. Archivu. El conseyu consultivu de l’autonómica aconseya una tv qu’espeye la pluralidá “territorial” d’Asturies 12 de xineru, 2005 0 FacebookTwitterPinterestEmail
Comunicación El diariu ‘Qué!’, con cabecera n’Uviéu y Xixón, ultima’l so llanzamientu en toa España by asturnet 10 de xineru, 2005 Adelantándose al so estrenu en papel, el grupu Recoletos prevé activar a mediaos d’esta selmana la información n’internet del so nuevu diariu gratuitu ‘Qué!’, un periódicu qu’apuesta pola difusión masiva y que tendrá cabecera propia n’Uviéu y Xixón, baxo la dirección del periodista asturianu Juan Carlos Villar. El diariu, que tien les sos oficines n’Asturies nel entresuelu de la Cai Campoamor, 12, d’Uviéu, ya tien presencia na rede, en prebes, na direición www.quediario.com. El diariu naz col envís de convertise nel periódicu d’información xeneral de mayor difusión d’España, dexando de lláu al canal de ventes. Pa ello, y editáu pol grupu de comunicación Recoletos -que xestiona, ente otres cabeceres, Marca, Expansión y Diario Médico-, cuenta col sofitu que-y darán n’Asturies una tirada diaria de 40.000 exemplares, una estensión d’ente 24 y 48 páxines y una apuesta pola cultura, l’ociu, el consumu y el mediu ambiente. El nuevu mediu de comunicación, qu’alterará el mercáu tradicional de la prensa asturiana de papel al ufrir por primer vegada nel Principáu información diaria gratuita de gran difusión, editará les dos cabeceres asturianes dende una redacción única, allugada na cai Campoamor d’Uviéu, na que redactores, fotógrafos y comerciales trabayen dende finales d’ochobre coordinaos por Villar. Un equipu d’once profesionales trabaya yá na preparación d’ediciones de prebes del diariu n’Asturies baxo la coordinación de Villar, periodista conocíu pola so trayectoría nel diariu’l grupu Zeta ‘La Voz de Asturias’, periódicu nel que llegare a ser director, y el so calter d’espertu n’información económica. El grupu Recoletos desembarca n’Uviéu y Xixón con un nuevu diariu gratuitu 10 de xineru, 2005 0 FacebookTwitterPinterestEmail