Portada Cooperación Sebastião Salgado presenta n’Uviéu un anticipu del so proyectu “Xénesis”

Sebastião Salgado presenta n’Uviéu un anticipu del so proyectu “Xénesis”

by asturnet

El Premiu Príncipe d’Asturies de les Artes en 1998, el fotógrafu brasileñu Sebastião Salgado premió a la ciudá d’Uviéu cola presentación en primicia mundial d’un centenar de fotografíes de gran formatu que formen el so proyectu Xénesis. Nélli, esplora l’orixe y la biodiversidá del planeta Tierra. La esposición de les semeyes faese nel Campu San Francisco d’Uviéu.
La esposición ye una de les partes del proyectu Xénesis, nel que Salgado entamó a trabayar en 2004 y que va tar acabada en 2011. Pa ello cuenta col sofitu de les Naciones Xuníes. Trátase d’un proyectu “a llargu plazu” col que pretende amuesar la “megadiversidá” de la Tierra y concienciar a la sociedá de que la jumnidá “detruyó yá’l 54% del planeta, dalgo que la mayoría de la xente nun sabe”, dixere Salgado. Cien semeyes en blanco y prieto y de gran formatu comparten l’espaciu coles castañales, carbayos y otros árbores del campu San Francisco, nel centru d’Uviéu.
Arguyosu de tener ente los sos reconocimientos el premiu Príncipe d’Asturies de Les Artes, el mesmu fotógrafu quiso presentar el proectu n’Asturies. Un de los vínculos que mantién con Asturies ye ‘l programa d’eco-desarrollu del Institutu Terra que preside en Minas Gerais y que financia’l Gobiernu Asturianu.
Xénesis va suponer, según l’autor, la “culminación” d’una carrera enllena d’ésitos y comprometía cola defensa del mediu ambiente y de los más débiles qu’habiten el planeta. Y nos oríxenes d’esti profundiza Salgado coles imáxenes en blanco y prieto. Imáxenes d’animales en peligru d’estinción, como los goriles del Conngu y les orques y ballenes de la Patagonia; d’espacios naturales amenazaos, como’l desiertu de Namibia o los glaciares de Tierra de Fuego; de les tribus amazóniques que mantienen entovía los sos modos primitivos de vida.
Semeyes d’una natura y unos seres humanos que viven entovía y, de milagru, al marxe d’un mundu desarrolláu, d’una parte perpequeña del planeta Tierra qu’entovía permanez inexplorada y cuasi virxe.

Tamién te podria gustar