Scartlett Johansson ye l’actriz meyor pagada del añu, según Forbes

Scartlett Johansson ye l’actriz meyor pagada del añu, según Forbes
17 agostu 11:34 2018 Imprimir

L’actriz estadounidense Scarlett Johansson encabeza la llista de 2018 de les actrices meyor pagues publicada esta selmana pola revista Forbes, un puestu alcanzáu tres la so participación nes películes de Los Vengadores.

Según les cifres del mediu, Johannson ganó ente xunu de 2017 y xunu de 2018 un total de 40,5 millones de dólares, cuatro vegaes más que’l periodu anterior, sustituyendo a Emma Stone nel primer puestu de la popular llista.

El segundu puestu ocupalu la tamién estadounidense Angelina Jolie, anque con un sueldu sustancialmente menor, de 28 millones de dólares, en protagonizando la remortina de “Maleficient” (Maléfica 2). Síguels Jennifer Aniston, que s’embolsó 19,5 millones de dólares y que sigue ganándose un bon salariu 14 años dempués del fin de la serie Friends gracies a la publicidá que protagoniza pa l’aerollínea Emirates, la marca d’agua Smartwater y los productos de guapura de Aveeno. Forbes indicó sicasí que’l salariu de Aniston probablemente va disparase l’añu que vien cola producción d’una serie d’Apple con Reese Witherspoon, pol que caúna d’elles va recibir 1,25 millones de dólares per episodiu.

Witherspoon, precisamente, ocupa’l quintu llugar al ganar 16,5 millones de dólares, y quedóse mui cerca d’adelantrar a Jennifer Lawrence, qu’ocupó’l cuartu puestu con 18 millones de dólares gracies a la so campaña de publicidá de Dior y la so torna a les películes de X-Men. En sestu llugar, Mila Kunis, apaez con 16 millones de dólares en protagonizando la remortina Bad Moms Christmas, siguida de Julia Roberts, con 13 millones de dólares gracies al llargumetraxe Wonder, que recoyó en taquilla 310 millones de dólares, la película de mayor ésitu económicu na que participa nuna década.

L’australiana Cate Blanchett cobró 12,5 millones de dólares y asitióse n’octavu llugar, la cómica Melissa McCarthy en novenu con 12 millones de dólares, y l’israelina Gal Gadot ocupó’l postreru puestu del “top ten” con 10 millones de dólares gracies a la nueva película de Wonder Woman y la publicidá de Revlon. En total, les 10 actrices meyor pagues embolsáronse 186 millones de dólares ente’l 1 de xunu de 2017 y el 1 de xunu de 2018.

Los númberos que presenta Forbes ellaborense en base a datos de delles páxines web especializaes en cine, amás d’entrevistes con persones con información privilexada, y nos totales nun s’inclúin les tases d’axentes, managers o abogaos, y tampoco impuestos. Na actualidá, destaca Forbes, los personaxes femeninos conformen solo’l 28,7 per cientu de los papeles nes películes, según un estudiu publicáu en 2016, lo que se traduz en menos oportunidaes pa les actrices de ganar salarios altos. La revista destacó coles mesmes l’ausencia na llista de Amy Adams, Emma Watson y Charlize Theron, según el fechu de qu’el 60 per cientu de les actrices incluyíes anguaño tien más de 40 años.

  Categories: