Saudi Aramco ye la empresa más rentable del mundu

by redacción asturnews | agosto 20, 2020 8:47 am

Saudi Aramco, la empresa estatal de petróleu y gas d’Arabia Saudina, foi la empresa más rentable en 2019, según la prestixosa llista Fortune Global 500 d’anguaño, publicada esta selmana pasada. Sicasí, echando una güeyada a les resultancies del segundu trimestre de 2020 de la compañía, publicaos hai malpenes unos díes, esa era puede terminar bien llueu.

Saudi Aramco, que salió a bolsa a finales de 2019, llogró unes ganancies de 88.200 millones de dólares estadounidenses esi añu, les más altes del mundu. Por cuenta de la cayida del preciu del petróleu, la baxa na demanda mundial provocada pola pandemia de coronavirus y les disputes dientro de la OPEP, les estimaciones suxuren que ye pocu probable que les ganancies de Saudi Aramco superen los 50.000 millones de dólares anguaño. Esto pondría a la compañía petrolera saudina detrás de la compañía d’inversión Berkshire Hathaway y Apple nel ranking de les empreses más rentables del mundu. Ello ye que a pesar de la pandemia de coronavirus, hasta la fecha estes dos empreses aumentaron los sos beneficios en 2020.

En 2019, Berkshire Hathaway ocupó’l segundu llugar na llista de les mayores empreses del mundu Fortune Global 500 en términos de beneficiu, con un volume de ganancies qu’algamaba los 81.400 millones. Siguíalu Apple, con 55.300 millones.

Cuidando que, polo xeneral, los beneficios namái los faen públicos les empreses que coticen en bolsa o les que tienen previstu faelo, les ganancies de munches empreses de to mundu, sobremanera les empreses estatales, son sopelexaes con menor frecuencia y, poro, pueden nun tar incluyíes nesta clasificación.

Fuente: https://es.statista.com[1]

Endnotes:
  1. https://es.statista.com: https://es.statista.com/grafico/17580/empresas-mas-rentables-del-mundo/

Source URL: http://asturnews.com/saudi-aramco-ye-la-empresa-mas-rentable-del-mundu/