Santiago García Granda presenta so equipu rectoral

Santiago García Granda presenta so equipu rectoral
11 mayu 15:37 2016 Imprimir

Esti martes pela mañana presentábase nun actu celebráu nel Paraninfu de la Universidá d’Uviéu al nuevu equipu rectoral del Rector electu, Santiago García Granda. El nuevu equipu alza al rangu de vicerrectoráu árees nueves como la d’Empresa y respuende a criterios de paridá ente homes y muyeres, atendiendo tamién a la representación de les distintes árees de conocencia.

Nel Paraninfu de la Universidá, el nuevu rector presentó caún de los nuevos cargos académicos del equipu rectoral que van ser:

Vicerrector d’Organización Académica, Juanjo del Coz Díaz (Área d’Inxeniería de la Construcción).

Vicerrector d’Investigación, José Ramón Obeso (Área d’Ecoloxía).

Vicerrector d’Estensión Universitaria y Proyección Internacional, Francisco José Borge López (Área de Filoloxía Inglesa).

Vicerrectora d’Estudiantes, Elisa Miguélez González (Área de Microbioloxía).

Vicerrectora de Recursos Materiales y Tecnolóxicos, Marta María Hernando Álvarez (Área de Tecnoloxía Electrónica).

Vicerrectora d’Acción Tresversal y Cooperación cola Empresa, Eugenia Suárez Serrano (Área d’Organización d’Empreses).

Secretaría Xeneral, Eva María Cordero González (Área de Derechu Financieru y Tributariu)

Delegáu de Coordinación y Estratexa Universitaria, Xabiel García Pañeda (Área d’Inxeniería telemática).

El Vicerrector d’Organización Académica ye Juan José del Coz Díaz (Xixón, 1962), ye Caderalgu del Área d’Inxeniería de la Construcción y doctor Inxenieru Industrial (1994) pola Universidá d’Uviéu desempeñó una intensa actividá profesional na empresa privada INGEMAS S.A. dende 1982 hasta 1991. Anguaño ye subdireutor de Másteres na EPI de Xixón.

Responsable del Grupu d’Investigación en Construcción Sostenible, Simulación y Ensayu (GICONSIME), ye autor de más de cien artículos en revistes indexaes, con un índiz h de 12 n’Inxeniería. Participó nunos 50 proyectos d’investigación competitivos y executó más de 60 contratos d’investigación con empreses ya instituciones.

El vicerrector d’Investigación ye José Ramón Obeso Suárez (L’Entregu, 1959) ye Caderalgu d’Ecoloxía dende 2006 y realizó estancies na Universidá de Cambridge, Stanford y otros centros. Anguaño dirixe la Unidá Mista d’Investigación en Biodiversidá (UMIB) y el grupu d’investigación Ecoloxía Evolutiva y del Caltenimientu que desenvolvió numberosos proyectos d’investigación.

Escribió dellos llibros y tien publicáu más d’un centenar de trabayos científicos, con importante repercusión na comunidá científica internacional y, amás de los sos llabores como editor y evaluador de publicaciones científiques internacionales, forma parte de diversos comités científicos.

Vicerrector d’Estensión Universitaria y Proyección Internacional sedrá Francisco José Borge López (Xixón, 1968) ye Profesor Titular de la Universidá d’Uviéu na Área de Filoloxía Inglesa. Doctoráu pola Universidá d’Uviéu y pola University of Massachusetts (EE.XX.), empecipió la so carrera docente nel Departamentu d’Inglés y el d’Español y Portugués de la University of Massachusetts y nel de Llngües Romances de Amherst College (1992-2000). Foi tamién Secretariu de la Casa de les Llingües (2010-2012), Subdireutor del Departamentu de Filoloxía Angloxermánica y Francesa (2012-2015), y, dende marzu de 2015, Director del Departamentu de Filoloxía Inglesa, Francesa y Alemana.

Con una una trentena de monografíes y artículos d’ámbitu internacional, forma parte del Grupu d’Estudios Cervantinos (GREC) y dirixió l’equipu de la Universidá d’Uviéu nel proyectu européu Leonardo da Vinci “Vinolingua”.

Vicerrectora d’Estudiantes va ser Elisa Miguélez González (Uviéu, 1961) ye Profesora Titular del Área de Microbioloxía y doctora en Ciencies Biolóxiques pola Universidá d’Uviéu (1989). Forma parte del grupu d’investigación BIONUC (Biotecnoloxía en Nutracéuticos y Compuestos Bioactivos).

Investigadora en renomaos centros d’investigación como: Department of Molecular Biology and Biotechnology Robert Hill Institute and University of Sheffield, Institut de Génétique et de Biologie Microbiennes de Lausanne y John Innes Center, de Norwich.

Los resultaos de les sos investigaciones foren presentaes en numberosos Congresos, tanto nacionales como internacionales, y espublizaos en revistes extranxeres indexaes de renomáu prestixu internacional.

Nos postreros 8 años formara parte del equipu decanal de la Facultá de Bioloxía, primero como Secretaria Académica y nos caberos 6 años como Vicedecana, coordinando les práctiques esternes de más de 900 alumnos y alumnes. Amás foi Coordinadora del Programa de Movilidá Nacional SICUE de la Facultá de Bioloxía, del Gráu en Bioloxía y ponente de la Comisión Asesora de Convalidaciones y de la Comisión Xeneral de Reconocimientu de Créditos.

Vicerrectora de Recursos Materiales y Tecnolóxicos (Xixón, 1964) ye Caderalga de Tecnoloxía Electrónica. Inxeniera Industrial y Doctora Inxeniera Industrial pola Universidá d’Uviéu (1988 y 1992) pertenez al grupu d’investigación de Sistemes Electronicos d’Alimentacion (SEA).

Participó en más de 50 proyectos d’investigación financiaos por fondos tanto públicos como privaos y tien publicaos más de 50 artículos en revistes nacionales ya internacionales y más de 140 ponencies en congresos nacionales ya internacionales. Ye inventora en dos patentes promovíes por Alcatel España S. A., una d’elles estendía a diversos países de la Xunión Europea.

Vicerrectora d’Acción Tresversal y Cooperación cola Empresa va ser Eugenia Suárez Serrano (Xixón, 1969) ye Profesora Titular d’Organización d’Empreses ya investigadora nel Sistema d’Información Turística d’Asturies (SITA). Doctora n’Alministración d’Empreses (Universidá d’Uviéu, 1998) y Máster in European Studies (University of Reading, 1993), cursó parte de la so Llicenciatura na Dublin City University con una Beca ERASMUS y trabayó nel Ecotec Research&Consulting en Birmingham, con una beca COMETT de la Xunión Europea.

Tres cinco años d’esperiencia en distintos cargos de xestión (Subdireutora d’Estudiantes, Vicedecana d’Ordenación Académica y Vicedecana de Calidá y Acreditaciones), ye Decana de la Facultá de Comerciu, Turismu y Ciencies Sociales Xovellanos dende 2012, na qu’impulsó y consiguió, en collaboración col Centru Municipal d’Empreses de Xixón, la reconocencia europea Enterprise2020 en “Habilidaes pal emplegu”.

Fora del ámbitu universitariu formó parte del conseyu d’alministración de la Sociedá Mista del Conceyu de Xixón y del Conseyu Asesor de Turismu del Principáu d’Asturies. Na actualidá coordina les xuntes del conseyu Asesor del Institutu de Responsabilidá Social, iniciativa promovida pol Club Asturianu de Calidá.

Secretaría Xeneral/ General Secretariat, Eva María Cordero González (Xixón, 1974) ye Profesora Titular de Derechu Financieru y Tributariu. Foi investigadora nel Instituto Max Planck de Derechu Tributariu, na Universidad Ludwig Maximilians (Munich) y na Universidá British Columbia (Vancouver). Foi tamién profesora visitante de la Universidá de Heidelberg (Alemaña).

Autora de delles monografíes, numberosos artículos y capítulos de llibru, foi investigadora principal d’un proyectu de la Fundación Banco Herrero y, anguaño, d’un proyectu del Plan Nacional. Miembru de l’Asociación Española de Profesores de Derechu Financieru y de l’Asociación Española d’Asesores Fiscales, dende 2014 forma parte del Comité d’Espertos Evaluadores del DAAD (Serviciu Alemán d’Intercambiu Académicu) n’España. Foi Secretaria del Departamentu de Derechu Públicu y Secretaria Académica de la Facultá de Comerciu, Turismu y Ciencies Sociales Xovellanos.

Delegáu de Coordinación y Estratexa Universitaria ye Xabiel García Pañeda (Uviéu, 1974) ye Profesor Titular de l’Área d’Inxeniería Telemática de la Universidá d’Uviéu. Inxenieru n’Informática y Doctor pola Universidá d’Uviéu, ye Máster en Comunicación, Redes y Xestión de Conteníos pola UNED y la mayor parte de la so carrera investigadora desenvolvióse nel campu de los servicios multimedia. Dende 2011 coordina un equipu d’investigación nel campu de la conducción eficiente conformáu por investigadores de la empresa ADN Mobile Solutions, la UNED y la Universidá d’Uviéu. Nel 2005 entró a formar parte del grupu del W3C Syncronize Multimedia siendo’l primer español en ser miembru d’un comité técnicu d’esi organismu internacional.

Foi Director d’Área de Xestión de la Investigación y Subdireutor de Relaciones Internacionales de la Escuela Politécnica d’Inxeniería

 

La persona que va ocupar la Xerencia (Chief Operating Office / Management) va presentase al próximu Conseyu Social de la Universidá pa la so aprobación.

  Categories:
Loading Facebook Comments ...