Portada Educación Santiago García Granda plantega la estratexa futura de la Universidá d’Uviéu en La Granda

Santiago García Granda plantega la estratexa futura de la Universidá d’Uviéu en La Granda

by asturnet

El rector de la Universidá d’Uviéu, Santiago García Granda, plantegó esti llunes mientres la conferencia inaugural de los Cursos de La Granda les principales estratexes que la institución académica tendrá de desenvolver pa encarar los retos del futuru.

El máximu responsable de la universidá asturiana repasó los principales llogros del Campus d’Excelencia Internacional Ad Futurum y avanzó dalgunes de les midíes que va haber qu’acometer nesta nueva etapa pa consolidar el proyectu. Santiago García Granda empezó la so intervención con una alcordanza pal que fuera rector de la Universidá d’Uviéu y unu de los promotores de los Cursos de La Granda, Teodoro López Cuesta.

 

Na so ponencia, titulada Ad Futurum: un proyectu estratéxicu pa una universidá centenaria, el rector de la institución académica apuntó tres recomendaciones pa que’l sellu d’excelencia llegue a bon puertu. Primer, aumentar el númberu d’estudiantes de doctoráu ya investigadores internacionales. Segunda, reforzar la integración rexonal por aciu la identificación de los retos autonómicu y nacional nos que la universidá puede apurrir les sos capacidaes tantu n’investigación como en formación. Y, tercer, ameyorar el llogru de financiamientu pa I+D+i.

Pa llevar estos encamientos a la práctica, el rector abogó por implementar midíes que favorezan la internacionalización, reforzar la captación de recursos, crear equipos multidisciplinares en toles árees de conocencia, aumentar los graos billingües, reforzar la participación na estratexa d’especialización intelixente d’Asturies RIS3 y ameyorar la integración de la universidá nel Institutu d’Investigación Biosanitaria.

El rector terminó la so conferencia con una cita del Quixote y espresó un deséu. “Nun Dexemos engañanos como’l caballeru de la murnia figura pola reblaneda máxica del pasáu y sepamos aunir la so alcordanza coles invenciones que’l presente punxo nes nueses manos pa qu’el nuesu futuru sía’l meyor de cuantos antóxensenos posibles”, destacó.

Tamién te podria gustar