Portada Educación Santiago García Granda garantiza financiamientu palos nuevos llaboratorios de la EPI

Santiago García Granda garantiza financiamientu palos nuevos llaboratorios de la EPI

by redacción asturnews
Foto: José Antonio Carretero (https://www.flickr.com/photos/jose1969/)

El rector de la Universidá d’Uviéu garantizó la selmana psada’l financiamientu pa la creación de nuevos llaboratorios na Escuela Politécnica d’Inxenieros (EPI).

Santiago García Granda realizó esti anunciu demientres la entrega de premios del I Concursu Universitariu Grúes Roxu-EPI Xixón. La inclusión de la modernización de los llaboratorios ta recoyida, avanzó, nel Plan Estratéxicu de la Universidá ellaboráu pal periodu 2018/2022. «Yá tenemos dalgún financiamientu pa poner en marcha unos nuevos llaboratorios que nos dexen afaenos a la nueva realidá», confirmó.

Según García Granda, la Universidá va destinar a estos llaboratorios bona parte del dineru que recibe’l centru per parte del Principáu en conceutu d’oxetivos. «Tratase d’una tema prioritaria», remarcó’l rector, quien tamién adelantró los criterios que se van utilizar a la de partir esta cantidá de presupuestu. «Vamos funcionar por proyectu por que cada llaboratoriu tenga una función y oxetivos concretos. D’esta manera, aquellos que se centren en desenvolver dalguna práctica innovadora van recibir más dineru que los llaboratorios clásicos», esplicó.

Per otru llau, García Granda asumía que la modernización tecnolóxica necesaria pa una alministración electrónica de les xestiones universitaries ta llueñe inda. «Disponer de ferramientes pal control de los grupos de clase y l’actividá universitaria va costar abondo más», reconoció’l rector en siendo preguntáu pol pidimientu que Juan Carlos Riolo, el director de la EPI, realizó mientres la pasada apurre de diplomes de la Escuela. Aquel día, Campu catalogaba la digitalización como «necesaria» y reivindicaba la necesidá de la Universidá de tar a un nivel de xestión 4.0, proporcional al de la industria tocantes a procesos alministrativos.

García Granda coincidía ayeri en dicha necesidá y aseguraba que la Universidá taba, nesti aspeutu, nuna gran desventaxa en comparanza con otros centros universitarios. «Intentamos ponenos al día y tamos dando los pasos pa ello, pero los recursos son realmente llindaos», llamentóse.

El rector foi l’encargáu d’apurrir los premios del Concursu Universitariu Grúes Roxu-EPI Xixón, onde tamién aprovechó pa poner en valor la función d’esti tipu de competiciones. «Tenemos de fomentar estes actividaes que nos ayudar, al traviés de los estudiantes, a atraer grandes empreses. Toi seguro de que’l director de la Escuela ta n’ello», afirmó al empar que destacaba qu’asina les empreses podíen ver que’l material humano» que sale de les universidaes ye directamente aprovechable. «Ver que’l día antes de les vacaciones hai alumnos quedándose hasta última hora por esti tipu de proyectos ye bien estimulante», reconoció.

Tamién te podria gustar