Santiago García Granda: el Rector qu’emplega l’asturianu y al qu’escoyeron los estudiantes

29 abril 08:36 2016 Imprimir

Santiago García Granda, que se calterizó por emplegar l’asturianu a lo llargo de tola campaña electoral na Universidá, fízolo tamién ayeri cuando llogró’l respaldu mayoritariu de los y les estudiantes que-y dieron casi un millar de votos más qu’el so contrincante: 3.665 votos frente a los 2.687 de José Muñiz. En votu ponderáu, un 51,17% de sofitos al nuevu rector frente al 48,77% de Muñiz y felicitóse y agradeció-ylo a la comunidá universitaria con un mensaxe n’asturianu.

La movilización de sectores como l’asturianista y el alumnáu más progresista de la Universidá d’Uviéu, que nun taba dispuestu a dexar el Rectoráu en manos de quien taba consideráu, dende’l principiu, como’l ‘delfín’ del yá exrector, Vicente Gotor acabó cola sorpresa de que’l nomáu sofitu de Pedro Sánchez Lazo nun fora talu, al nun ganar nin un votu del coleutivu del profesoráu estable de la Universidá. García Granda llograra’l sofitu públicu de Pedro Sánchez Llazu, quien tenía tres de sigo 1.800 votos. Pero’l nuevu rector consideraba ayeri pela nueche que l’alcuerdu “nun influyó enforma” al tiempu que nomábase “decepcionáu” porque nun hevo tresvase de votos de docentes de Sánchez Llazu a la so candidatura. Los estudiantes, dixo, “tomen les sos propies decisiones”.

Nel edificiu históricu, pasaes les nueve de la nueche, Santiago García Granda apaeció con dos ferramientes fundamentales na mano coles que lleva trabayando perende dende’l primer día: un ipad y el so programa electoral. Los dos referentes cimeros del compromisu y la modernización que quier llevar a una Universidá d’Uviéu que seya más tresparente, más eficiente y más cercana.

Santiago García Granda, nuevu Rector d'Uniovi

Santiago García Granda, nuevu Rector d’Uniovi

Reconoció que los estudiantes fueron determinantes, allabó la llimpieza del procesu y prometió trabayar dende’l primer día. Los sos primeros pasos van consistir n’arreglar los problemes de burocracia que sufren docentes y grupos d’investigación, amás de les torgues colos trabayos de fin de grau. A los alumnos, prometió-yos una moratoria del réxime de permanencia hasta que s’apruebe una nueva normativa, daqué que va tener que tratar col Conseyu Social, que ye l’auténticu responsable d’esti apartáu.

“Tenemos que protexelos d’un reglamentu inxustu”, aportunó, nuna primera reflexón al mesmu tiempu que prometía qu’una de les sos primeres xeres diba ser tratar de consensuar col presidente del Principáu, Javier Fernández, un calendariu estratéxicu a cuatro años vista.

Loading Facebook Comments ...