Sánchez Vicente presenta’l so llabor poéticu de 1974 a 2018

Sánchez Vicente presenta’l so llabor poéticu de 1974 a 2018
08 febreru 12:15 2018 Imprimir

Esti xueves día 8 de febreru, a les 19,30 hores nel Salón d’Actos del Antigu Institutu de Xixón, va presentase la poesía completa de Xuan Xosé Sánchez Vicente, onde reúne’l so llabor poéticu de 1974 a 2018.Nesta presentación, amás del propiu autor, va tar nel actu’l profesor Leopoldo Sánchez Torre, Inaciu Galán y Naomi Suárez, y Antón García en calidá d’editor y d’autor del prólogu.

El llabor poéticu de Xuan Xosé Sánchez Vicente ye una constante a lo llargo de la so vida: empieza a publicar poesía en 1974, colos primeros pasos de Conceyu Bable, y caltién vivu l’oficiu indagora, cuando ye una de les figures más representatives del Surdimientu. En tan llargu periodu de tiempu sorprende la coherencia d’una obra bien diversa en fondu y forma, na que se dexen sentir voces mui distintes, pero na que se percibe claramente una manera propia de dicir qu’Antón García, nel prólogu, define como neobarroca.

La obra de Sánchez Vicente, intensa y estensa, muévese con soltura ente una poética civil o social, comprometida, y otra de procuru esteticista y raigañu simbolista cola que celebra’l deséu y l’amor. Pero tamién cabe na so poesía la descripción paisaxística, el diálogu dramáticu, la prosa didáctica, la recreación historicista, los fragmentos alcontraos, l’actualización de la vanguardia… En Propia xera, poniendo de relieve por qué ye un de los poetes mayores d’Asturies, queden recoyíos y ordenaos los seis llibros que lleva publicaos: Camín de señardaes (1980), Poemes de Xixón (1981), De reidores costes (1988), …Y de llastientes picos (1999), As de corazon/es/y/es (Premiu «Xuan María Acebal», 2001) y De les hores y les memories (2016). Tamién s’editen dellos poemes inéditos y traducciones d’Horacio, Seamus Heaney y Ezra Pound.

Xuan Xosé Sánchez Vicente nació en Xixón en 1949. Cofundador de Conceyu Bable y miembru de l’Academia de la Llingua Asturiana, foi catedráticu d’institutu hasta la xubilación y un políticu mui activu. Diputáu per dos llexislatures na Xunta Xeneral, fundó y preside’l Partíu Asturianista. Amás del trabayu poéticu y de redactar dellos diccionarios d’asturianu, tien publicaos llibros de relatos, noveles n’asturianu y español, teatru y ensayu políticu, lliterariu y llingüísticu

  Categories:
Loading Facebook Comments ...