San Román acueye los actos del Día de las Lletras Asturianas en Candamu

San Román acueye los actos del Día de las Lletras Asturianas en Candamu
25 abril 16:26 2018 Imprimir

El Palaciu Valdés-Bazán de San Román va acoyer el próximu xueves 3 de mayu a las 19:00 la celebración del Día de las Lletras asturianas con un actu lliterariu nel que va faese la entrega de dellos premios lliterarios.

Nesta xornada va faese la entrega de los premios lliterarios del III Concursu de relatos curtios «Conceyu de Candamu», qu’organiza la Conceyalía de Cultura ya van asistir los ganadores. Na categoría infantil (6-12 años) el primer premiu foi p’Andrea López Granda pol relatu El pirata cantarín ya l’accésit, pa Erika Martínez Hernández por Ragman el Pirata. Dambas dous son alumnas de la escuela pública Prieto Bances de Grullos. El ganador na categoría d’adultos foi’l periodista ya traductor Paco Álvarez pol sou relatu La ponte. Esti escritor da bien prestixu al concursu candamín porque güei en día yá l’autor que más premios lliterarios consiguíu de la hestoria de la lliteratura asturiana. El segundu premiu foi pa la escritora ya profesora de la Universidá de Nueva York Paquita Suárez Coalla, natural de Grullos, gran conocida dientro de las lletras asturianas, col cuentu Alcordances de cariñu.

Pa rematar l’actu va faese un recital poéticu a cargu del poeta local Jorge Estrada, que va presentar dellos versos n’asturianu, ya pol reconocíu escritor Xuan Bello, que vien a San Román a lleer unos poemas del sou repertoriu. Esti actu ta organizáu pol Serviciu de Normalización Llingüística de Candamu ya forma parte del plan de normalización llingüística que se ta llevando a cabu nestos últimos meses por parte de Conceyu candamín.

Loading Facebook Comments ...