Portada Conceyos Samartín unvió en xunu a Educación el proyectu de los aleros del Bosquín

Samartín unvió en xunu a Educación el proyectu de los aleros del Bosquín

by redacción asturnews

El Conceyu de Samartín del Rei Aurelio defende la so xestión na tramitación del proyectu d’arreglu integral de los cargaderos y goterones de les ventanes del colexu El Bosquín que’l pasáu mes de xunu unvió a la Conseyería d’Educación pa la so execución por ser de competencia d’esta alministración les inversiones nos centros educativos.Como recordó la conceyala d’Educación, María Alonso, “yá esti mayu unviamos un primer informe a la Conseyería d’Educación onde solicitábamos qu’intervinieren con urxencia na igua integral de los goterones de les ventanes del colexu pol esfarrapamientu xeneral que presentaben, col riesgu que’ello suponía pa la seguridá de les escolines y escolinos”.

Dempués, rellató la conceyala, “la Conseyería pidiónos un proyectu que foi redactáu pola Oficina Técnica Municipal y unviáu al mes siguiente, polo que volvemos riquir que lo más aína acometan les obres d’arreglu como se comprometieron en so día, darréu que les conversaciones sobre esti asuntu yá vienen de primeros d’añu”.

Los cargaderos y los goterones del colexu fueron oxetu d’igues aisllaes de caltenimientu, pero col pasu’l tiempu “ye fundamental acometer una intervención nel edificiu principal, el polideportivu y la casa del conserxe”, esplicó. Trátase d’estructures de formigón y de resultes del pasu del tiempu y de la climatoloxía esfarrapáronse de manera xeneralizada provocando argayos.

Tocantes a les competencies del Conceyu nel caltenimientu del colexu, el branu pasáu acometiéronse delles actuaciones nel colexu El Bosquín: pintáu, axuste y meyora de l’aula destinada a almuerzos, pintáu de barandielles y del área de files d’accesu al centru y de los xuegos infantiles, arreglu del canalón del ximnasiu y llimpieza y selláu de los canalones de la cancha cubierta, eliminación de charcos, arreglu y pintura en barandielles de la escalera d’accesu al colexu y otres actuaciones de caltenimientu en fontanería, carpintería y lletricidá de manera siguida.

Tamién te podria gustar