Salen a la vienta los abonos del primer ciclu de la nueva temporada de escenAvilés

Dende les 11 hores na Casa de Cultura, Centru Niemeyer y nel portal de vienta d’entraes municipal, esti martes 4 de setiembre salieron a la vienta los abonos del primer ciclu de la nueva temporada de escenAvilés. Podrá aportase a seis de les siete obres d’una programación iguada con criterios de calidá, qu’inclúi dellos estrenos absolutos.

Los estrenos de “La Strada” y “La Culpa” tan incluyíos nesti primer ciclu de la nueva temporada de escenAvilés, dexando fora d’abonu “Calígula” de Mario Gas, del programa estatal Platea d’Artes Escéniques, con entraes que van ponese a disposición del públicu tamién el 4 de setiembre. Los ciclos Off Niemeyer y Fechu n’Asturies, col estrenu de “Niue. Under the coconuts”, cunten col so propiu abonu.

Col mes de setiembre abre’l telón del últimu actu del añu 2018 de escenAvilés, primeru de la nueva temporada de la programación de les artes escéniques d’Avilés nel Teatru Palacio Valdés y el Centru Niemeyer. Los nuevos abonos del cuatrimestre, que dexen la reserva de la localidá de cara a les renovaciones nel restu del cursu, salen a la vienta’l próximu día 4 de setiembre, martes. Y van facer de forma conxunta, a partir de les 11 hores nes taquilles de la Casa de Cultura, el Centru Niemeyer y de forma telemática, al traviés d’Internet nel portal https://entraes.liberbank.es/palaciovaldes.

El preciu de los abonos, que podrán adquirise hasta’l 9 de setiembre, bazcuya ente los 78,75 y los 105,75 euros, dependiendo de la zona del Teatru Palacio Valdés nel que s’alluguen los espectadores. Podrá aportase con ellos a seis de les siete obres del ciclu, quedando fuera la representación perteneciente al programa estatal Platea d’Artes Escéniques, el “Calígula” de Mario Gas. Les entraes pa esti montaxe tamién se van poner a disposición del públicu’l 4 de setiembre, a un costu d’ente 17 y 30 euros.

La cuarta edición de 2018 de escenAvilés cuenta con dos estrenos nacionales absolutos. Per un sitiu “La Strada”, l’adaptación de Gerard Vázquez, con dirección de Mario Gas, del clásicu cinematográficu de Federico Fellini. Y por otru, la postrera propuesta de David Mamet, “La Culpa”, afecha por Bernabé Ricu y empobinada por Juan Carlos Rubio.

La calidá ye’l sellu fundacional de escenAvilés, el que-y dexa abanderar la programación teatral n’Asturies. El cartelu iguáu pal últimu cuatrimestre de 2018 pon a disposición de los espectadores avilesinos un luxu accesible solu comparable al de les grandes capitales del país: dalgunos de los meyores dramaturgos nacionales, como Guillem Clua; clásicos contemporaneos como Lorca o Camus, o n’activu, como David Mamet; directores del prestíu de Mario Gas o Luis Luque, y actrices y actores del nivel d’una Carmen Maura que se prodiga bien poco sobro les tables, Magüi Mira, Lolita Flores, Tina Sainz, Ana Fernández, o Pepón Nieto, Fernando Cayo, Juan Fernández o un Pablo Derqui esllumante como Calígula.

Esa calidá treslládase coles mesmes a los otros ciclos de la temporada, que cunten col so propiu abonu. De tala forma, nel Off Niemeyer, en Salar Club del Centru, podrá esfrutase de trés montaxes: “Síndrhomo”, “Un cuerpu en dalgún llugar” y “Goldi llibre”, obra, esta postrera, que se va representar en gallegu con sobretítulos en castellán. El costu del abonu del Off ye de 33,75 euros.

La tercera pata ye la programación de fechu n’Asturies. A un preciu de 15 euros l’abonu, podrá esfrutase nel teatru Palacio Valdés del estrenu absolutu de la última obra de Maxi Rodríguez, “Niue. Under the coconuts”, y del homenaxe que Teatru Marxe y Teatru Estudio rinden al autor arxentín d’orixe asturianu Mauricio Kartún, con “Semblanza Mauricio Kartún” y “Cumbia morica cumbia”. Los abonos pa estes dos producciones nel teatru Palacio Valdés cuesten 15 euros.

Más información