Portada Europa Sale a puya la primer grabación del clásicu de Bowie ‘Starman’

Sale a puya la primer grabación del clásicu de Bowie ‘Starman’

by redacción asturnews

Una demo considerada la primer grabación de Starman, unu de los grandes ésitos del británicu David Bowie, sale a puya esti martes nel Reinu Xuníu con un preciu envaloráu de 10.000 llibres (11.574 euros). Na cinta, realizada en 1971, puede escuchase a Bowie diciéndo-y al guitarrista Mick Ronson qu’entá nun terminó de componer el cantar cuando tán acabando de grabar.

Acordies cola cadena BBC, Ronson dio-y esa demo al so amigu Kevin Hutchinson, un aspirante a músicu que lu escuchó, etiquetándola como “David Bowie cinta de prueba” y guardándola na so casa. Amás de Starman, esi discu tamién contien los cantares Moonage Daydream y Hang Onto Yourself.

“Recuerdo escuchalo y pensar: ta bien. Nun pensé: esto ye fantástico”, manifestó Hutchinson a la cadena pública, anque matizó que con “dieciséis años nada impresiona” y agora piensa que “obviamente” ta “fenomenal”. Hutchinson reconoció que “nun podía creelo” cuando atopó la grabación y escuchar.

Starman taba incluyida nel discu The Rise and Fall of Ziggy Stardust and the Spiders from Mars (“L’ascensu y la cayida de Ziggy Stardust y les arañes de Marte”), l’álbum que catapultó a la fama en 1972 a David Bowie, fináu en 2016.

Dan Hampson, de la casa de subasta Omega qu’entama l’eventu, señaló que probablemente se trate de la primer versión demo de Starman. “Hai muncha mitoloxía alredor de la composición d’esti clásicu intemporal, y la pura y verdaderamente preciosa versión d’esta cinta ayuda a aprovir una fascinante conocencia sobro’l procesu creativu d’un auténticu xeniu”, indicó.

La puya va tener llugar esti martes na casa de subastes Omega na localidá de Newton-Willows, asitiada entre Liverpool y Manchester.

Tamién te podria gustar