SACO supera los 30.000 espectadores na so V edición

by redacción asturnews | marzo 28, 2019 10:01 am

Les 44 actividaes programaes na Selmana del Audiovisual de Contemporaneu d’Uviéu convocaron a 30.102 persones y casi 10.000 persones allegaron a la primer edición de Radar 2019. Agora, La segunda edición de Radar, d’abril a xunu, va ufiertar una amuesa de cine rumanu contemporaneu y un ciclu dedicáu a l’actriz Bette Davis.

La V edición de la Selmana del Audiovisual Contemporaneu d’Uviéu (SACO) convocó a 30.102 persones nes 44 actividaes programaes. El certame cinematográficu entamáu pola Fundación Municipal de Cultura aumentó la so asistencia nun 31% al respective de la cuarta edición (creció en 9.293 espectadores). Estes son dalgunes de les cifres qu’apurrió esta mañana’l conceyal de Cultura, Roberto Sánchez Ramos y el director del ciclu, Pablo de María.

Los espectáculos y les actividaes de la Mesta llevaron a los teatros Campoamor y Filarmónica, Plaza de la Catedral, Colexu d’Abogaos d’Uviéu, Muséu de Belles Artes d’Asturies y Parking El Carboneru a 7.433 espectadores. Pela so parte, nes actividaes complementaries participaron 4.622 persones. La programación cinematográfica de laSema, la sección más nueva de SACO, cuntó con 12.871 espectadores. Los cuatro programes de la Sema desenvolviéronse nel Teatru Filarmónica dende’l 6 de marzu en 27 sesiones (trés más que na edición de 2018). laSEMA va rematar el próximu xueves, 28 de marzu.

Les actividaes más siguíes polos uvieinos nel quintu SACO fueron SACO Music & AV, El magu d’Oz, Keatoniana, El gabinete del doctor Caligari, Crossroads y los pases d’Escuru y Lucientes, de Samuel Alarcón, y Trés perfectos desconocíos, de Tim Wardle. La evolución de SACO dende la primer edición ye la siguiente (inclúi tamién la evolución de la programación infantil qu’en 2017 pasa a denominase laSEMA)

N’abril, mayu y xunu, el Teatru Filarmónica va amosar 26 producciones de países tan distintos como Rumanía, Reinu Uníu, Francia, Estaos Xuníos o España. El nuevu programa inclúi una nueva entrega de cine rumanu y un ciclu dedicáu a l’actriz Bette Davis.

Uviéu ye una de les cinco ciudaes españoles nes que se va esibir l’Amuesa de Cine Rumanu entamada pol Institutu Cultura Rumanu, en collaboración con SACO y la Fundación Municipal de Cultura. La Filarmónica va esibir cinco llargumetraxes, producciones premiaes en festivales como Locarno, Karlovy Vary, Sevilla y Xixón, ente otros. L’Amuesa de Cine Rumanu va arrincar el próximu 4 d’abril cola película Lemonade, de Ioana Uricaru. Esi día, la directora del Institutu Cultural Rumanu, Maria Pop, va tar n’Uviéu pa presentar esti ciclu qu’arrexunta los siguientes títulos: Alice T., Infinite football, I Do Not Care If We Go Down in History as Barbarians y One Step Behind the Seraphim.

Amás, nel añu que se cumple’l 30 aniversariu del fallecimientu de Bette Davis, Radar dedíca-y un ciclu a la poderosa actriz americana qu’inclúi siete de los sos títulos más emblemáticos: El monte petrificado (1936), La muyer marcada (1937), Jezabel (1938), La carta (1940), Eva al desnudu (1950), ¿Qué foi de Baby Jane? (1962) y Cantar de trubiecu pa un cadabre (1962).

Per segundu añu consecutivu, Radar collabora col Festival de Cine LGBTIQ del Centru Niemeyer, cola exhibición d’una de les películes del concursu: Rafiki, de Wanuri Kahiu.

Toles sesiones de RADAR van tener llugar nel Teatru Filarmónica. Los xueves a les 20.00 hores y los domingos a les 19:30 hores. La entrada ye llibre hasta completar aforu.

Source URL: http://asturnews.com/saco-supera-los-30-000-espectadores-na-so-v-edicion/