“Sabores de plaza en plaza” va repitir n’Avilés tres l’ésitu d’esti añu

“Sabores de plaza en plaza” va repitir n’Avilés tres l’ésitu d’esti añu
10 agostu 08:43 2016 Imprimir

La iniciativa turísticu-gastronómica “Sabores de plaza en plaza”, celebrada dende’l xueves hasta’l domingu n’Avilés, superó les mires iniciales de públicu y tantu el Conceyu como la UCAYC fixeron pública esta mañana la so intención de repitir l’añu que vien.

El conceyal de Promoción de Ciudá, Manuel Riola, y el vicepresidente y responsable d’hostelería de la UCAYC, Gonzalo Rodríguez, compartieron balance positivu y la voluntá de dambes instituciones de siguir la esperiencia.Campa recordó que “como yá señalamos el día de la presentación, toles incorporaciones y novedaes  del programa festivu del mes d’agostu nacen cola vocación de permanencia y tamos bien contentos cola resultancia de la primer edición de Sabores”.

Anunció que “hai detalles que vamos apolazar y ameyorar porque esta primer edición púnxose en marcha con poco tiempu y vamos atender les suxerencies recibíes. Son cuestiones de detalle como, por casu, ameyorar el llume y el suministru d’agua nes casetes. Son cuestiones que vamos analizar colos hosteleros dempués de la Selmana de la Tapa, que se celebra del 5 al 11 de setiembre”.

El conceyal de Promoción de Ciudá aseguró que “la valoración xeneral que recoyimos estos díes tantu per parte de los hosteleros participantes como del públicu asistente ye bien satisfactoria”. Recordó que “cuando planiamos la programación festiva tenemos trés oxetivos: que los avilesinos participen masivamente y dinamicen el comerciu y l’hostelería locales, atraer a visitantes de la nuesa redolada más cercana y, de terceres, amontar el turismu de fora d’Asturies”.

La primer edición de “Sabores de plaza en plaza” cuntó con 20 casetes y la participación de 25 hosteleros de la ciudá partíos en 5 places del cascu históricu, caúna d’elles ambientada con actuaciones musicales los díes de celebración del eventu.

  Categories: