Portada Lorient 2006 Ruben Alba gana otra vuelta’l Troféu McCrimmon

Ruben Alba gana otra vuelta’l Troféu McCrimmon

by asturnet

El Troféu McCrimmon de gaita, enantes nomáu McCallan, viaxó otra vuelta p’Asturies de la man de Rubén Alba que cuayó una perbona actuación y algamó’l primer puestu por mor de la puntuación otorgada pol xuráu bretón. El resultáu foi polémicu pol descontentu los xuraos gallegos y los gaiteros d’esi país poles puntuaciones de los asturianos.

La suerte foi esquiva con munchos delos favoritos nel sortéu previu al concursu. Rubén Laba, quexábase de tener que tocar l’últimu y a Daniel Bellón y Daniel Lumbreras tocába-yos entamar darréu de xintar, lo que suel dar más problemes que ventaxes.

La competición entamó cola participación d’ún de los meyores gaiteros de la nueva mocedá musical del país vecín, Daniel Bellón, que tuvo una actuación asemeyada a les que nos tien avezaos, con munchu procuru y bon ritmu. Un poco más nerviosu vióse darréu a otru de los concursantes gallegos, Daniel Lumbreras, que tuvo acertáu na interpretación gallega anque un poco menos seguru na asturiana y bretona.

Tres de los dos primeros concursantes del país vecín, xubió al escenariu’l primer representantge asturianu, Marco Antonio Guardado del Valle, qu’amuesó also veteranía y cuayó una actuación muncho meyor que la del añu pasáu, anque nun foi a arrequexar del too los nervios en delles fases de la so interpretación.

Una bretona ente astures y gallegos

La única bretona que s’atreve a competir con gallegos y asturianos cola gaita qu’empleguen los celtes del sur, Marie Le Cam, de Lorient, tuvo nesta segunda participación nel concursu munchu más segura que l’añu pasáu. Favorecida pol fechu de que se tea d’interpretar una pieza bretona en primer llugar, tranquilizóse y tuvo a munchu meyor altor na intepretación asturiana y na gallega, perdifícil pa una escuela musical como la de los bretones avezaos a sones más repetitivos y ensin munchos floreaos.

Iñaki Santianes foi l’asturianu que siguió na intepretación afintando na sala’l por qué de la so victoria l’añu pasáu nesti concursu. Pieces bien preparaes, un nivel d’execución cásique perfeutu y la veteranía que da’l pasar dellos años por Lorient y perconocer los requexos del concursu. Darréu Alberto Coya ufiertó una bona actuación, como tamién lo fizo l’asturianu Jorge Suárez Carbajal. Munchu más aposentáu que l’añu pasáu y dexando bien nidiu’l so altor interpretativu. Tres de Pablo Dalama, el caberu de los gallegos n’actuar, Rubén Alba García, segundu l’añu pasáu y ganador hai dos, punxo un broche doráu a un concursu que foi consideráu ensin dubies como ún de los meyores de los caberos años.

Tamién te podria gustar