RPA estrena los miniespacios d’información cultural de Vanessa Gutiérrez

Güei, vienres 5 de febreru, y según da anuncia la RPA, va escomenzar a emitise’l miniespaciu de tres minutos de duración en llingua asturiana “Batura”; el programa va dir depués de los informativos de la tarde (16:00, 17:00 y 18:00 hores) de llunes a vienres. Nél va facese un viaxe per diferentes llugares del mundu (que se revela nel últimu programa de la selmana –son quince miniespacios en total a la selmana–) al traviés de personaxes, hestories, efemérides, recomendaciones culturales, etc., que de dalguna manera tengan que ver con esi sitiu.

La encargada de conducir Batura va ser Vanessa Gutiérrez (Urbiés, 1980), presentadora tamién del programa de la TPA Pieces, dedicáu a la cultura producida n’Asturies. Amás d’eso, desarrolla una actividá como escritora: el so primer llibru de poemes, Onde seca l’agua, publicólu nel 2003, y nel 2004 ganó’l Premiu Teodoru Cuesta, na so trecena edición, col poemariu tituláu La danza de la yedra; dende entós ta considerada como una de les voces reseñables de la poesía n’asturianu más moza. La so primer obra en narrativa foi Les palabres que te mando (2006), a la que siguió El país del silenciu (2007), un ensayu documental escritu conxuntamente con Beatriz R. Viado, que rellata en capítulos independientes la vida de muyeres asturianes nacíes a partir de 1910, centrándose nes sos esperiencies de la Guerra Civil. La última obra publicada por Vanessa Gutiérrez tituláse La cama (2008).