Rotterdam va acoyer Eurovisión 2021

by redacción asturnews | mayo 20, 2020 9:03 am

La organización d’Eurovisión confirmó esta fin de selmana que la edición de 2021 va tener llugar na ciudá holandesa de Rotterdam, la mesma que tendría d’acoyer na nueche’l sábadu’l festival d’anguaño, el primeru suspendíu nos sos 65 años d’hestoria pola pandemia de coronavirus.

L’anunciu tuvo llugar mientres la emisión del especial “Europe Shine A Light”, producíu a contra reló pola Unión Europea de Radiodifusión (UER) y la televisión pública de Países Baxos como sustitutu del tradicional concursu.

El pasáu mes d’abril el conceyu de Rotterdam yá amosó la so disposición a acoyer Eurovisión 2021 y aprobó pa ello aumentar en 6,7 millones d’euros el presupuestu que prevía destinar a entamar el festival de 2020. Tres la victoria del holandés Duncan Laurence n’Israel en 2019, delles ciudaes de Países Baxos presentáronse como candidates a acoyer esta edición fallida.

Rotterdam foi la escoyida dempués d’analizase la “idoneidá técnica” del allugamientu, les instalaciones circundantes y la contribución financiera del conceyu.

Source URL: http://asturnews.com/rotterdam-va-acoyer-eurovision-2021/