Portada Plástiques Rosina Gómez Baeza ye candidata firme a dirixir el Centru d’Arte de La Llaboral

Rosina Gómez Baeza ye candidata firme a dirixir el Centru d’Arte de La Llaboral

by asturnet

Según informen güei diversos medios asturianos la xixonesa Rosina Gómez Baeza, responsable de la Feria ARCO a lo llargo de venti años ye la candidata más firme pa dirixir el nuevu Centru d’Arte Contemporáneu de la Universidá Llaboral. La propia Gómez Baeza, qu’asistía estos días al xuráu del Príncipe d’Asturies de les Artes, dexó entever tala posibilidá en declaraciones a esos medios. El complexu artísticu de la Llaboral ye un de los proyectos culturales más ambiciosos del gobiernu del Principáu.

La hasta agora responsable d’ARCO -una de les feries d’arte contemporáneu más importantes del mundu- anunció la so intención de dexar la dirección de la feria madrilana y namás paez tar esperando a que’l Patronatu del Centru d’Arte de la Llaboral s’aconceye en xunetu pa decidir la so incorporación al frente del proyectu. Hasta agora, Rosina Gómez Baeza yera asesora d’esi mesmu patronatu al través del COnseyu de les Artes y les Ciencies.

El nuevu centru d’arte del Principáu va dedicase fundamentalmente a la creación audiovisual y dixital, y los sos responsables quieren convertilu nun espaciu de referencia dientro d’estes artes a nivel internacional. La Conseyería de Cultura y Comunicación quier tamién que’l Centru d’Arte de la Llaboral tea vinculáu dafechu al nuevu Ente Públicu de Radiotelevisión y qu’entramos compartan proyectos y medios tecnolóxicos.

Tamién te podria gustar