Rockmeria repasa’l rock nes llingües minorizaes

L’espaciu musical Rockmería, presentáu por Xune Elipe, y que s’emite na Radio del Principáu d’Asturies tolos miércoles de 15 a 16 hores y en redifusión de 23 a 24 hores, va dedicar la edición d’esti miércoles al rock que se fae nes llingües minorizaes europees. Dientro de los conteníos del programa que dirixe Xune Elipe falaráse sobre les rellaciones ente’l rock y les llingües minorizaes, la so historia, los primeros pasos, asina como’l momentu actual. Ente la música que se va poner nel programa fadráse una selección de grupos con cantares en catalán, gallegu., eusquera, aragonés, occitanu, sardu, bretón, galés, irlandés o friulés.

La segunda parte d’esti programa va cuntar cola participación de Delfo Valdés, cantante de La Tarrancha, y Miguel Fernandi “Burilo” cantante de Skama la Rede, qu’entamarán un alderique sobre’l fechu de facer rock n’asturianu y sobre’l grau nel que inflúi la llingua nel conteníu de les lletres, asina como cuestiones como si l’asturianu ta preparáu pa ser un idioma del rock o si usar una llingua minorizada inflúi a la hora d’abrir o pesllar puertes nel mundu de la música.